NI AIBU NA FEDHEHA VULUGU ZA UCHAGUZI WA UMEYA SONGEA ! JE NANI WA KULAUMIWA?

 Mbunge wa Jimbo la Songea Mjini Dkt Emmanuel Nchimbi

 Msimamizi wa uchaguzi Jimbo la Songea Mjini Nachoa Zakaria

 Naibu Mstahiki Meya wa Halmashauri ya Manispaa ya Songea Mariam Dizumba

Mgombea wa nafasi ya Umeya wa Halmashauri ya Manispaa ya Songea Charles Mhagama

Na Mwandishi Wetu

MADIWANI wa Halmashauri ya Manispaa ya Songea mkoani Ruvuma wamerushiana makonde baada ya Naibu Meya wa Halmashauri hiyo Mariam Dizumba kudaiwa kuiba kura zilizopigwa na madiwani hao ili kuziba nafasi iliyoachwa wazi ya Mstahiki Meya wa Halmashauri hiyo aliofariki dunia miezi michache iliyopita

Katika uchaguzi huo ulioanza kwa marumbano makubwa yaliyodumu kwa zaidi ya dakika 20 kati ya madiwani wa Chama cha Demokrasia na Maendeleo(Chadema) na Madiwani wa Chama cha Mapinduzi ambao walikuwa wanajadili namna uchaguzi huo utakavyokuwa  huru na haki kutokana na Chadema kutosimamisha mgombea na Ccm kusimamisha mgombea

Kutokana na hali hiyo Msimamizi wa uchaguzi ambaye pia ni Mkurugenzi wa Halmashauri hiyo Nachoa Zakaria alitoa ufafanuzi wa kanuni za uchaguzi wa nafasi hiyo ambapo aliwataka madiwani kupiga kura za ndio au hapana na kwamba wapigakura halali waliojiorodhesha walikuwa ni Madiwani 26 akiwemo na Mbunge wa Jimbo la Songea Mjini Dkt Emmanuel Nchimbi

Baada ya hali hiyo kutulia Msimamizi wa uchaguzi Zakaria aliita orodha ya wajumbe na kuwataka wachukue karatasi za kupigia kula ambapo madiwani wote walipiga kura na kuitwa wahesabu kura waweze kuzihesabu kura hizo

Zoezi la kuhesabu kura lilipomalizika Naibu Meya wa Halmashauri hiyo Mariam Dizumba alilisimama na kuanza kutangaza matokeo kwa kudai kuwa Mgombea Umeya wa Halmashauri hiyo Charles Mhagama amepigiwa kura za ndio 14 na kura za hapana 12

Dizumba alisema kuwa kutokana na matokeo hayo namtangaza Diwani wa kata ya Matogoro Charles Mhagama kuwa ndiye Mstahiki Meya wa Halmashauri ya Manispaa ya Songea kuanzia sasa

“Naomba Msimamizi wa uchaguzi umuite Diwani Mhagama aweze kuvaa joho la Umeya na kukalia kiti chake”alisema Dizumba

Baada ya Msimamizi wa uchaguzi  Zakaria kumuita Diwani Mhagama na kumtaka avue joho la Udiwani na kuvaa joho la Umeya ndipo baadhi ya madiwani walipomtaka Msimamizi wa uchaguzi azihesabu upya kura hizo ili madiwani wote wazione

“Naomba msimamizi usitishe zoezi la kumtaka Diwani Mhagama akalie kiti cha Umeya kwa sababu kuna mashaka makubwa na zoezi la utangazaji wa matokeo yake hivyo zihesabiwe kura upya na madiwani wote wazione”alisema Diwani wa kata ya Mfaranyaki Seneta Yatembo

Jambo ambalo Msimamizi wa uchaguzi alionekana kupata kigugumizi nalo na kumsababisha Mbunge wa Jimbo la Songea Mjini Dkt Nchimbi kuingilia mgogoro huo na kupelekea kuharibu hali ya hewa na kuanza kurushiana lugha za matusi miongoni mwa madiwani

Wakati mgogoro huo ukiendelea Diwani wa Viti Maalum Chadema Rhoda Komba akaanza kuwaita madiwani wenzake  ili waweze kumuona Naibu Meya Mariam Dizumba alivyokuwa anaiba kura zilizopigwa za hapana kutoka kwenye sanduku la kura na kuchukua kura za ndiyo kutoka kwenye mkoba wake na kuziweka ndani ya sanduku la kura

Hali hiyo ilisababisha vurugu kubwa na kumfanya Mbunge Dkt Nchimbi akimbie na sanduku la kura kuelekea nje ya ukumbi kabla ya kunyanganywa na kutakiwa kurirudisha ndani na Madiwani wakiongozwa na Madiwani wa Chadema

Wakati Madiwani wanamnyang’anya sanduku la kura Dkt Nchimbi ndipo Naibu Meya Mariam Dizumba alipata mpenyo wa kukimbia na kufanikiwa kuingia ndani ya gari na kutokomea kusikojulikana na kufanya madiwani kuvua majoho na kuondoka zao huku wakimzomea Dkt Nchimbi na kurusha maneno ya matusi

Baada ya tafrani hiyo Madiwani wa Chadema waliitisha kikao na waandishi wa habari na kutoa tamko la kutomtambua Charles Mhagama kuwa Mstahiki Meya wa Halmashauri ya Manispaa hiyo na kwamba wameiomba tume ya uchaguzi ione umuhimu wa kuitisha uchaguzi mwingine

“Akisoma tamko hilo kwa niaba ya madiwani wenzake kwenye ukumbi wa Saccos ya halmashauri hiyo Diwani wa kata ya Bombamabili Kenny Mpangara alisema kuwa mazingira yote ya zoezi la uchaguzi yameonekana na utata kwa maslahi binafsi na kudai kuwa Madiwani wa Chadema watasusia vikao vyote vya halmashauri mpaka Meya mpya atakapopatikana

"Madiwani wa Chadema wapo 7 katika Halmashauri ya Manispaa ya Songea wakati madiwani wa Ccm wapo 20 ambapo kwenye uchaguzi wa leo walikuwepo 19"alisema Mpangara

Kwa upande wao Madiwani wa Chama cha Mapinduzi wakitoa tamko hilo mbele ya waandishi wa habari na kusomwa na Diwani wa kata ya Lilambo Yobo Mapunda lilisema kitendo walichofanya Madiwani wa Chadema cha kufanya fujo na kutaka kuwapiga wengine ni kitendo kibaya sana katika kukuza demokrasia na kwamba Ccm inamtambua Mstahiki Meya Charles Mhagama

Akizungumza na waandishi wa habari Msimamizi wa uchaguzi Nachoa Zakaria kuhusiana na kitendo cha Naibu Meya Mariam Dizumba kutangaza matokeo badala ya Msimamizi wa uchaguzi alisema kuwa kwenye vikao vya baraza la madiwani Mkurugenzi ni katibu wa vikao na kwamba Naibu Meya ndiye alikuwa sahihi kutangaza matokeo hayo

MWISHO

BAADA YA UBAKAJI WA DEMOKRASIA YA UCHAGUZI WA UMEYA MAPAMBANO YANAENDELEA MIONGONI MWA MADIWANI

 Joseph Fuime ambaye ni Diwani wa Kata ya Mjini akiongoza mapambano ya kurudisha demokrasia mikononi mwa wapiga kura

 Sanduku la kura lalejeshwa meza kuu baada ya kurejeshwa toka mikononi mwa watu wasiopenda demokrasia

 Madiwani waendelea kutaharuki tukio la kihistoria la uchaguzi wa kuziba nafasi iliyoachwa wazi na marehemu Ally Said Manya

Wananchi wakiwatathimini kwa umakini mkubwa wawakilishi wao walipokuwa wanachapana makonde katika ukumbi wa Saccos wa Halmashauri ya Manispaa ya Songea

VULUGU,TIMBWILI LAANZA BAADA YA NAIBU MSTAHIKI MEYA MARIAM DIZUMBA KUTANGAZA MATOKEO YA UCHAGUZI WA UMEYA

 Naibu Mstahiki Meya wa Halmashauri ya Manispaa ya Songea Mariam Dizumba akitangaza matokeo ya uchaguzi huo

 Kushoto ni Mbunge wa Jimbo la Songea Mjini Dkt John Nchimbi akiwatuliza Madiwani ambao walikuwa wakimzomea Mstahiki Meya aliyevaa Joho nyekundu Charles Mhagama na kuambiwa kuwa amechakachua matokeo na hivyo hawamtambui

 Viongozi hao wakiteta jambo baada ya kunusa harufu ya kushtukiwa mchezo wao walioufanya

 Madiwani wakianza kurushiana maneno yaliyokosa staha na kupelekea vurugu kuanza ndani ya kikao cha baraza la Madiwani

Hapa sasa ni ubabe wa kuzuia sanduku la kura lisitolewe ndani ya ukumbi wa uchaguzi ili zihesabiwe tena na madiwani waweze kujiridhisha kuhusu matokeo ya kura walizozipiga

KURA ZAENDELEA KUHESABIWA NA WASIMAMIZI WASAIDIZI WA UCHAGUZI

 Wasimamizi wasaidizi wa uchaguzi Jimbo la Songea Mjini wakiendelea kuhesabu kura zitakazo mkubali au kumkataa mgombea Umeya wa Halmashauri ya Manispaa ya Songea Charles Mhagama

Wa kwanza kutoka kushoto ni Afisa Maendeleo ya Jamii Halmashauri ya Manispaa ya Songea Naftan Saiyoloi akiwa na Mweka hazina wa Halmashauri hiyo Kessy Mpakata

MADIWANI WAENDELEA KUPIGA KURA HUKU UTULIVU UKIWA WA KUTOSHA AMBAKO HAKI NA WAJIBU WA MPIGAJI KURA UKIENDELEA

 Mgombea Umeya wa Halmashauri ya Manispaa ya Songea ambaye ni Diwani wa Kata ya Matogoro akitoka kupiga kura katika uchaguzi huo

 Diwani wa Kata ya Mateka Maricelino Mapunda akitumia vyema haki yake ya kumchagua Mstahiki Meya wa Halmashauri ya Manispaa ya Songea

 Mbunge wa Jimbo la Songea Mjini Dkt Emmanuel John Nchimbi ambaye pia ni Waziri wa Habari,Utamaduni na Michezo akipiga kura wakati wa zoezi hilo la upigaji kura

Madiwani wakitafakari wakati wasimamizi wasaidizi wa uchaguzi huo wakihesabu kura

UCHAGUZI WA UMEYA MANISPAA YA SONGEA NI VITUKO VILIVYOSHEHENI AIBU MBELE YA MBUNGE DKT NCHIMBI

 Diwani wa Kata ya Matogoro Charles Mhagama ambaye ni mgombea Umeya wa Halmashauri ya Manispaa ya Songea akifuatilia kwa umakini mkubwa kanuni za uchaguzi wa nafasi hiyo kutoka kwa msimamizi wa uchaguzi huo

 Mbunge wa Jimbo la Songea Mjini Dkt Emmanuel Nchimbi akiwasalimia madiwani kwenye mkutano huo wa uchaguzi wa nafasi wazi ya Umeya

 Msimamizi wa uchaguzi Jimbo la Songea Mjini Nachoa Zakaria ambaye pia ni Mkurugenzi wa Halmashauri ya Manispaa ya Songea akionyesha wajumbe sanduku la kupigia kura katika uchaguzi huo uliofanyika leo
                                    
 Kutoka kulia ni Msimamizi wa uchaguzi Nachoa Zakaria akihakikisha majina ya wajumbe watakaopiga kura,kushoto ni Naibu Meya wa Halmashauri ya Manispaa ya Songea Mariam Dizumba

 Hapa ni dua kwanza,ndivyo alivyoanza Diwani wa Kata ya Misufini Salum Mfamaji,akiwa diwani wa kwanza kupiga kura katika uchaguzi huo

MADIWANI WAVUTANA ZAIDI YA DAKIKA 10 UCHAGUZI WA UMEYA MANISPAA YA SONGEA

 Kutoka kushoto ni Diwani wa Viti Maalum(CCM) Rehema Millinga,Rhoda Komba (CHADEMA)Christian Matembo wa kata ya Seedfarm

 Kutoka kushoto ni Madiwani wa CCM,Willon Kapinga kata ya NdilimaLitembo,James Makene kata ya Matarawe,Gerald Ndimbo kata ya Ruhuwiko

 Waziri wa Habari, Utamaduni na Michezo Dkt Emmanuel Nchimbi ambaye pia ni Mbunge wa Songea Mjini

Mkurugenzi wa Halmashauri Manispaa ya Songea Zakalia Nachoa

AZALIWA AKIWA NA UVIMBE KICHWANI NA KUPELEKWA KATIKA HOSPITAL YA MKOA WA SONGEA KWA AJILI YA MATIBABU ZAIDI

 Asante Umbulu mwenye umri wa miezi 3 akiwa amelazwa katika Hospital ya Mkoa ya Songea kwa ajili ya kupata matibabu ya uvimbe wa kichwa,mtoto huyo anatakiwa kupelekwa katika Hospital ya Taifa ya Muhimbili kwa ajili ya matibabu kwani katika Hospital ya Mkoa ya Songea haiwezi kumfanyia Operesheni kutokana na kukosekana kwa vifaa na wataalamu wenye vigezo stahiki

Mtoto huyo anahitaji msaada wa kufika Jijini Dar es Salaam na kupatiwa matibabu,yeyote anayetaka kumsaidia mtoto huyo aende katika Hospital ya Mkoa wa Songea na aonane na DKT NGAIZA kwa maelezo zaidi au piga simu 0755-33 50 51utaunganishwa na Dkt Ngaiza

Waandishi wa habari wakizungumza na mama wa mtoto Asante Umbulu katika Hospital ya mkoa wa Songea,Martina Nombo,kutoka kushoto ni mwandishi wa gazeti la Mwananchi,Joyce Joliga,katika ni Cresencia Kapinga mwandishi wa gazeti la Majira

Mtandao huu wa http://www.stephanomango.blogspot.com/ unatoa pole kwa familia ya Martina Nombo kwa kumuuguza mwanao Asante Umbulu

Maskini mtoto IVVO PONERA anavyoteseka baada ya kuungua moto shambani baada ya kibanda alimukuwepo kuungua moto

 

 Mtoto IVVO PONERA mwenye umri wa mwaka mmoja akiwa amelazwa katika Hospital ya mkoa wa Songea baada ya kufikishwa Hospital hapo akitokea kijijini kwao Mchomolo Wilayani Namtumbo,

Mama wa mtoto huyo Paulina Lwambo akizungumza na mtandao huu wa http://www.stephanomango.blogspot.com/ katika hospital hiyo alisema kuwa IVVO alikuwa analelewa kwenye kibanda shambani na kaka yake aitwaye Jackson Ponera wakati yeye anaendelea na shughuli za kuvuna mahindi

Alisema kuwa katika kibanda hicho alikuwa amepika chakula ili waweze kujipatia mlo baada ya kumaliza kuvuna,ghafla akasikia mwanaye Jackson anamwita huku akisema kibanda kinaungua moto

"Niliacha kuvuna na kukimbilia kwenye kibanda na kukuta kibanda kinaungua na mtoto IVVO yupo ndani,nilichanganyikiwa lakini nilifanikiwa kumuokoa akiwa ameharibika mwili wake kwa kuungua"alisema Lwambo

Alieleza zaidi kuwa nilimchukua kwa umakini mkubwa na kumleta hapa Hospital kwa ajili ya matibabu na anaendelea vizuri na matibabu

MTOTO AZALIWA NA UVIMBE KICHWANI,WENGI WANASEMA HUENDA ANA VICHWA VIWILI

Na Stephano Mango ,Songea

Martina Nombo (27) mkazi wa kijiji cha Lulambo Wilayani Mbinga Mkoani Ruvuma amejifungua Mtoto wa kike ambaye anadaiwa kuwa na vichwa viwili ameomba msaada kwa watu wenye uwezo wamsaidie wakiwemo wataalam wa upasuaji wa Kichwa wamsaidie kuhokoa maisha ya Mwanaye.

Akizungumza na mtandao huu wa www.stephanomango.blogspot.com  katika wodi namba tano  ambapo amelazwa na Mwanaye huyo hospitali ya Mkoa wa Ruvuma jana mara baada ya  kupata rufaa kutoka hospitali ya  Mbuyula iliyopo Wilaya ya Mbinga

 Mama wa Mtoto huyo amesema, alijifungua salama  kwa njia ya kawaida mapema  9 juni mwaka huu katika hospitali ya Mbuyula ambapo mara baada ya kukabidhiwa mwanaye na wauguzi aligundua kuwepo kwa tatizo hilo na aliwaarifu nao walimweleza kuwa aendelee kuwa na subira.

Amesema, tangu alipojifungua katika hospitali ya Mbuyula kichwa cha mtoto waki kilizidi kukua na kutengeneza kitu kama uvimbe ambapo mtoto  aliendelea kutibiwa hospitalini hapo hadi madaktari walipompatia rufaa ya kumwamishia  katika hospitali ya mkoa jana  kwa ajili ya matibabu zaidi.

Kwa upande Daktari Bingwa wa upasuaji wa hospitali hiyo Hassan Lumbe amesema, picha ya  X-ray imeonyesha kuwa ndani ya kichwa kuna shimo ambalo linasababisha ubongo utoke na kuingia kwenye  uvimbe ,pia mifupa ya kichwa aijajiunga vizuri.

Amesema,upasuaji wa mtoto huyo katika hospitali hiyo hauwezi kufanyika  kutokana na kutokuwa na vifaa  na utaalamu walionao hawakidhi viwango vya kutoa tiba kwa mtoto huyo hivyo wanamrufaa kwenda muhimbili .

Amesema,kesi kama hizo ni chache kuripotiwa katika Hospital hiyo na kwamba wao walimpokea  baada ya kupewa rufaa toka katika hospitali aliyozaliwa ya  Mbinga  nao wanatarajia kumpatia rufaa kwenda hospitali ya taifa ya  Mhubili kwani wamefanya vipimo na vimeonyesha kuwa opelesheni hiyo haiwezi kufanywa hapo na wanachofanya ni kuandaa rufaa pamoja na fedha kidogo ya kumsaidia kumsafirisha Mama huyo na Mwanaye.

Mwisho.

WATATU WAFIKISHWA MAHAKAMANI KWA KUITAPELI BENKI YA NMB

Na Gideon Mwakanosya, Songea

WATU watatu wamefikishwa Mahakamani  kwa kosa la kula njama na kutenda kosa la jinai  la kufanya udanganyifu  na kujipatia mkopo wa fedha toka  katika Benki ya NMB tawi la Songea Mkoani Ruvuma .

Wakisomewa shitaka hilo jana na  Hakimu mkazi Mfawidhi Mwandamizi Baptisti Mhelela amesema,washitakiwa  wote kwa pamoja walitenda  kosa hilo  kati ya oktoba 22 mwaka 2008 na desemba  5 mwaka 2010 .

Amesema,katika kosa la pili mshitakiwa namba moja Cosmas Haule (35) anashitakiwa peke yake kwa kujipatia mkopo wa fedha   shilingi milioni arobaini kwa udanganyifu  kati ya kipindi hicho hicho cha oktoba 22 mwaka 2008 na 5 desemba 2010 na aliposomewa kosa alikana.

Amesema,mshitakiwa Cosmas yupo nje kwa dhamana  na  ametoa hati ya nyumba na dhamana ya mali isiyo hamishika yenye thamani ya shilingi milioni kumi pamoja na dhamana ya milioni 15  kesi hiyo inatarajiwa kutajwa septemba 30 mwaka huu,upelelezi bado haujakamilika.

Katika kosa la tatu,Mshitakiwa namba tatu Asha Banda (35) anashitakiwa kwa kosa la kujifanya  mmiliki wa nyumba namba 22 kitalu L L Mateka B wakati ilikuwa siyo jambo la kweli na kubadili jina kuwa anaitwa Consolata Alphonce Soko .

Inadaiwa kuwa mshitakiwa alitenda kosa hilo kati ya tarehe hizo hizo  oktoba 22 ,2008 na 5 desemba 2010 katika benki ya NMB tawi la Songea.

Mshitakiwa amekana shitaka na yupo nje kwa dhamana ya shilingi milioni tano ,na mshitakiwa namba 2 Onesmo Soko  naye yupo nje kwa dhamana  ya milioni tano.

Mwisho.

CHADEMA WAKATAA KUSIMAMISHA MGOMBEA UMEYA SONGEA

                                     Katibu wa Chadema Jimbo la Songea Masumbuko Paulo

CHAMA cha Demokrasia na Maendeleo(Chadema) wilaya ya Songea  kimemuandikia barua Mkurugenzi wa Halmashauri ya Manispaa ya Songea kuhusu dhamira ya chama hicho kutosimamisha mgombea wa nafasi wazi ya Mstahiki Meya wa Manispaa hiyo kutokana na mizengwe na ghiliba zinazofanywa na Mkurugenzi huyo

Akizungumza na waandishi wa habari jana katika ofisi za Chama hicho zilizopo kata ya Mfaranyaki Katibu wa Chadema Jimbo la Songea Masumbuko Paulo alisema kuwa Chama chake kimeamua kutosimamisha mgombea wa kuziba nafasi hiyo kutokana na mizengwe mingi inayoendelea katika harakati za uchaguzi huo

Paulo alisema kuwa Viongozi wa Chadema wamekutana na kutoa msimamo wao kuhusu muenendo huo na kuamua kumjulisha Mkurugenzi wa Manispaa kuwa Chadema hakitasimamisha mgombea katika uchaguzi wa Septemba 23 mwaka huuu

Alisema kuwa Chadema kimemtaka Mkurugenzi wa Halmashauri ya Manispaa ya Songea kutopindisha kanuni na sheria kwa maslahi ya Chama Cha Mapinduzi alivyofanya katika uchaguzi uliopita wa kumpata Meya

“Chama kinakukumbusha kufuata kanuni ili kuondoa migongano isiyo ya lazima tena tunamtaadharisha kutoegemea kwa upande mmoja kama unavyofanya sasa”alisema Paulo

Mtandao huu umefanikiwa kuipata barua hiyo ya tarehe 21 Septemba 2011 iliyoenda kwa Mkurugenzi wa Halmashauri ya Manispaa ya Songea yenye kumbukumbu namba CH/SMJ/RV/18 yenye kichwa cha habari “Taarifa ya kutosimamisha mgombea wa nafasi wazi ya Mstahiki Meya Manispaa”

Sehemu ya barua hiyo inasomeka “….uchaguzi uliopita wa aina hii haukuwa huru na haki kwani mazingira ya kupiga kura hayakuwa ya siri wala hukuandaa eneo la siri la mtu kupiga kura badala yake ulifanya wajumbe wapiga kura wapige kura ya wajumbe iwe inaonekana kwa wazi tu”

Katika mkutano huo na waandishi Paulo alisema kuwa Chadema ina madiwani 7 ambapo Chama cha Mapinduzi (Ccm) ina madiwani 20 na wabunge wawili kwa maana ya mbunge wa Jimbo la Songea Mjini Dkt Emmanuel Nchimbi,na Mbunge wa Viti Maalum Mkoa wa Ruvuma Devota Likokola na kufanya kuwa Ccm iwe na Madiwani 22

Katika uchaguzi huo Ccm imemsimamisha Diwani wa Kata ya Matogoro Charles Mhagama kutokana na Chadema kutomsimamisha mgombea wa kuziba nafasi wazi ya Meya wa Manispaa kunamfanya Charles Mhagama kuwa mgombea pekee wa nafasi

Uchunguzi uliofanywa na mtandao huu umebaini kuwa watu wengi hawajaridhiki na kitendo cha Ccm  kumpitisha Charles Mhagama kuwa mgombea Umeya kutokana na nafasi hiyo kuwa nyeti katika kusukuma mbele gurudumu la maendeleo

Imebainika kuwa baadhi ya madiwani wa Ccm wanamkakati kabambe wa kumpigia kura za hapana mgombea wao ili uchaguzi uhitishwe upya kutokana na Charles Mhagama kutokuwa na mahusiano mazuri na madiwani wezake na kuonekana sio chaguo stahiki

Akizungumza na mtandao huu wa http://www.stephanomango.blogspot.com/ Mkurugenzi wa Halmashauri ya Manispaa ya Songea Nachoa Zakaria alikiri kupokea barua ya Chadema na kueleza kuwa kanuni zinaruhusu kufanya uchaguzi ambapo kutakuwa na kura ya ndiyo au hapana

Zakaria alisema kuwa ikiwa wajumbe therusi mbili wakipiga kura za hapana uchaguzi huo utaitishwa upya kwa mujibu wa kanuzi za uchaguzi wa nafasi hiyo ya umeya na kuongeza kuwa uongozi anatoa Mungu na kwamba Halmashauri hiyo inahitaji apatikane Meya na ipo siku atapatikana

Alisema kuwa katika uchaguzi huo atasimamia kikamilifu kanuni na sheria za uchaguzi kwa maslahi ya Halmashauri na wananchi na kudai kuwa madai ya Chadema katika barua yao sio ya msingi kwa kuwa wanalalamikia kitu kilichopita badala ya kuzungumzia uchaguzi uliopo

Uchaguzi huo unafanyika kuziba pengo lililoachwa wazi na marehemu Ally Said Manya aliyefariki Julai 29 mwaka huu katika hospitari ya Misheni ya Peramiho baada ya kuugua muda mrefu maradhi ya moyo na kisukari

AWALI Chadema walimcharukia mgombea wa nafasi ya Umeya wa Halmashauri ya Manispaa ya Songea kupitia Chama cha Mapinduzi(Ccm) Charles Mhagama kwa madai kuwa sio kiongozi makini na muadilifu anayeweza kulisukuma mbele gurudumu la maendeleo kwa maslahi ya wananchi

Akihutubia mamia ya wakazi wa Manispaa ya Songea  hivi karibuni katika viwanja vya soko la Manzese,kata ya Misufini Mwenyekiti wa chama hicho Mkoa wa Ruvuma Joseph Fuime alisema kuwa nafasi ya Umeya ni nafasi nyeti sana katika Halmashauri ya Manispaa ya Songea hivyo ina hitaji mtu makini na muadilifu wa kuweza kushirikiana na wadau mbalimbali kuweza kulisukuma gurudumu la maendeleo

Fuime alisema kuwa kutokana na umuhimu huo mgombea aliyepitishwa na Chama cha Mapinduzi (Ccm)Charles Mhagama ili kuweza kuziba nafasi ya Umeya iliyoachwa wazi na Marehemu Ally Manya aliyefariki mwezi julai 29 mwaka huu,kuwa hana uwezo wa kushika nafasi hiyo kutokana na kujaa tamaa ya kujitajirisha kiharamu kupitia fedha za wananchi

Alieleza kuwa Mhagama ni kiongozi mbabe na mwenye kupenda rushwa hali inayodhorotesha maendeleo ya wananchi kwani alishawahi kufanya vitendo viovu ikiwa ni pamoja na kuwepo kwa ushawishi wa rushwa katika ununuzi wa gari ya kuzima moto,uuzwaji wa Katapila la Halmashauri akiwa ni Diwani wa kata ya Matogoro na kiongozi wa Kamati mbalimbali za baraza la madiwani

“Mhagama hawezi kuwa kiongozi bora na atakayeweza kutupeleka kwenye ustawi stahiki wa maisha kwani vitendo vyake vingi ni viovu kwani kuna kipindi alikuwa na mahusiano na mwanafunzi mmoja miaka ya nyuma ambapo alikutwa naye kwenye nyumba ya wageni na wazazi wa mwanafunzi huyo na kupelekewa kupigwa viboko hadharani”alieleza Fuime

Alifafanua kuwa vitendo hivyo vinadhihirisha ni jinsi gain alivyokuwa mchafu na kiongozi mbovu asiyestahili kupewa majukumu makubwa ya Umeya hasa katika kipindi hiki kilichogubikwa na ufisadi,rushwa na urasimu mkubwa Serikalini

Alisema kuwa siku zote Chama cha Mapinduzi kimekuwa kikiwaacha viongozi wazuri na kuwateua viongozi wabovu ili waweze kukinufaisha chama kwa maslahi yao binafsi hivyo hatuwezi kuongozwa na kiongozi wa aina hiyo na ndio maana tunapaza sauti ili umma ujue na kuwaambia Madiwani wao waliowachagua kutokumpigia kura mgombea huyo wa Ccm kwenye uchaguzi wa Serikali unaotegemewa kufanyika Septemba 23 mwaka huu na kuongeza pia Halmashauri ya Manispaa ya Songea ni mali ya wananchi wote na sio mali ya kikundi cha watu wachache wenye malengo yao binafsi

MWISHO

MJUMBE WA BODI YA MIKOPO WA SERIKALI ZA MITAA ATEMBELEA SOKO LA SONGEA NA KUJIONEA CHANGAMOTO ZAKE

Na Amon Mtega,Songea   SOKO kuu la Halmashauri ya Manispaa ya Songea mkoani Ruvuma lililoungua moto mwaka 2003 na kuteketeza kabisa fedha na mali za wafanyabiashara wa soko hilo na kisha kujengwa upya na Manispaa  hiyo kwa fedha zilizotoka kwa wahisani na taasisi za mikopo na kisha kuendelea kutoa huduma hiyo lakini bado linakabiliwa na changamoto mbali mbali.   Akitoa taarifa ya uendeshaji wa soko hilo mkuu wa Masoko ya Manispaa ya Songea Salum Homera kwa Mjumbe wa bodi ya mikopo ya Serikali za Mitaa George Mallima Lubeleje alisema kuwa baada ya soko hilo kujengwa upya likiwa na meza 308 na maduka 161 na kwamba linatoa huduma kwa wananchi wa ndani na nje ya mkoa wa Ruvuma.    Alisema kuwa pamoja na huduma hizo halmashauri hukusanya kiasi cha shilingi milioni 9.4 kwa mwezi ambazo hutumika kuisaidia halmashauri kugharamia shughuli mbambali za kiutawala na utoaji huduma kwa wananchi pia serikali kuu hukusanya kodi ya mapato kutoka kwa baadhi ya wafanyabiashara wa soko hilo ambayo huisaidia serikali kutoa huduma boraa kwa wananchi.    Aidha pamoja na mafanikio hayo Homera alisema kuwa zipo changamoto ambazo zinahitaji kutatuliwa ili kuboresha mapato zaidi ikiwemo mahitaji ya ukarabati ambayo ni makubwa kuliko kiasi kinacho kusanywa na soko hilo,baadhi ya wafanyabiashara kuendesha biashara zao nje ya soko na kulikosesha soko mapato na kuchelewa kusainiwa kwa sheria ndogo za halmashauri ambazo huwa zina mapendekezo ya maboresho ya viwango vya kodi na ushuru mbali mbali.    Kwa upande wao wafanyabiashara na wananchi wanaolitumia soko hilo walisema kuwa soko hilo bado linahitaji ukarabati mkubwa ili liweze kuwa na hadhi ya Manispaa na hasa katika maduka ya kuuzia nyama ambako kunahitaji usafi wa hali ya juu tofauti na hali ilivyo sasa.   Naye mjumbe wa bodi ya mikopo ya Serikali za Mitaa  George Malima Lubeleje akizungumza baada ya kukagua soko hilo mbali na kupongeza matumizi ya fedha ya mkopo iliyotolewa na bodi hiyo kwa ajili ya ujenzi huo alisema kuwa halmashauri inapaswa kusimamia sheria ndogo ambazo zitasaidia kuongeza kipato na kuweza kumaliza kulipa deni la mkopo huo ili iweze kupewa mkopo mwingine.  mwisho

MAJAMBAZI WAUA,WAJERUHI,KUPORA SHILINGI MILIONI MBILI NA KUTOKOMEA ZAO

               Na Steven  Augustino,Tunduru

WATU wanaodhaniwa kuwa ni majambazi wamemuua kwa kumpiga mapanga mkulima wa kitongoji cha Mkangwala kilichopo katika kijiji cha Mbatamila Wilayani Tunduru aliyefahamika kwa jina la Bibie Mtenje (25) na kumjeruhi vibaya mume wake Kasim Shaibu (35).

Taarifa kutoka katika kijiji hicho zinaeleza kuwa baada ya watu hao kutekeleza uharamia huo walifanikiwa kupora fedha taslimu zaidi ya shilingi milioni mbili pamoja na kuchoma moto nyumba ya jirani yake aliyetambulika kwa jina la Anafi Alifa aliyedaiwa kutoka na kupeleka taarifa kwa majirani wakati tukio hilo likiendelea.

Ndugu wa majeruhi Shaibu ,Bw.Sandali Shaibu na Kazembe Rajabu wanao muuguza majeruhi huyo aliyelazwa katika hospitali ya Wilaya ya Tunduru akiwa hajitambui walisema kuwa tukio hilo lilitokea usiku wa kuamkia Septemba 21 mwaka huu.

Wakifafanua taarifa hiyo wanafamilia hao walidai kuwa fedha alizo porwa majeruhi na kusababisha kifo cha mkewe zilitokana na mauzo ya viroba 24 vya mpunga ambao walilima na kufanikiwa kuvuna msimu uliopita wakiwa na matumaini ya kujiletea maendeleo baada ya kuuza.

Akizungumzia tukio hilo Kamanda wa polisi wa Mkoa wa Ruvuma  Michael Kamuhanda mbali na kukiri kuwepo kwa tukio hilo alisema kuwa jeshi la Polisi linaendelea na uchunguzi na kwamba endapo watabainika watu kuhusika na tukio hilo sheria itafuata mkondo wake.

 Mganga wa hospitali ya Wilaya ya Tunduru Dkt. George Chiwangu ambaye alimpokea na kumshughulikia majeruhi Shaibu alisema kuwa, majeruhi huyo ameumizwa vibaya kichwani na sehemu za tumboni kutokana na kukatwa mara nyingi na mapanga.

Naye Mganga aliyeufanyia uchunguzi mwili wa marehemu Mtenje, Dkt.Titus Tumbu alisema kuwa kifo chake kimesababishwa na kutokwa na damu nyigi zilizosababishwa na majeraha ya kukatwa na mapanga sehemu za kichwani.

Mwisho   

MANISPAA YA SONGEA WAFANIKIWA KUDHIBITI MIMBA KWA WANAFUNZI WA SHULE ZA MSINGI

               Na Thomas Lipuka,Songea

IDARA ya Elimu  na wadau wa Elimu katika Manispaa ya Songea Mkoani Ruvuma,wamefanikiwa kuondoa tatizo la mimba kwa wanafunzi wa Shule za Msingi kwa kipindi cha mwaka 2010 hadi 2011 ambapo hakuna mwanafunzi aliyepata mimba katika Shule zote za Msingi katika Manispaa hiyo.

Taarifa ya hali ya Elimu ya mwaka 2010/2011 iliyosomwa na Mkurugenzi wa Manispaa ya Songea Zakaria Nachoa kwa wadau wa Elimu katika Ukumbi wa Songea Club hivi karibuni imebaini kuwa hakuna mimba iliyoripotiwa kwa wanafunzi wa Shule kwa Kata zote 21 za Manispaa hiyo.

Nachoa alisema mbinu iliyotumika katika kuzuia suala la mimba ni pamoja na ushirikiano wa karibú baina ya wazazi,walimu,wadau wa Elimu na Viongozi wa Elimu ngazi zote za Manispaa na hatimaye kufikia kufuta kabisa tatizo la mimba katika Shule za Msingi zote za Manispaa ya Songea.

Taarifa ya mandeleo ya Elimu katika Manispaa hiyo imetaja pia mafanikio zaidi yaliyojitokeza katika sekta ya Elimu ni pamoja na ufaulu kwa Wanafunzi waliomaliza Elimu ya Msingi 2010 ambapo Manispaa hiyo imekuwa ya kwanza Kimkoa, na kuzipita Wilaya za Songea,Mbinga,Namtumbo na Tunduru.

Hata hivyo changamoto kadha zimejitokeza katika tathmini elimu Manispaa ya Songea ambapo kuna uhaba wa vitabu vya kiada,jambo ambalo linapelekea kitabu kimoja cha kiada kutumiwa na wanafunzi 11 ama zaidi.

Changamoto zingine zilizotajwa katika tathmini hiyo ni uhaba wa walimu darasani, hivi sasa kuna walimu 820 wakati mahitaji ni walimu 1259 hivyo Manispaa ya Songea kuwa na upungufu wa walimu 439 darasani ,jambo ambalo linahitaji msaada toka Serikali kuu.

Mkurugenzi wa Manispaa ya Songea amewaambia wadau wa Elimu kuwa kuna upungufu mkubwa wa vyumba vya madarasa,vyoo na nyumba za walimu,ameomba wadau wa Elimu kujipanga kwa hatua za awali za ujenzi wa maboma ili wanafunzi wote watakao faulu 2011 waweze kupata nafasi kidato cha kwanza.

Kuhusu changamoto ya upatikanaji wa madawati wadau wamesema ni vema kujipanga upya kwani suala la miti ya kutengenezea madawati lipo kwenye uwezo wao, isipokuwa Serikali iwezeshe Manispaa ya fedha kwa vifaa vya kiwandani ili kuondoa tatizo la madawati hatimaye wanafunzi wapate mazingira bora ya kujifunzia na kuleta usikivu,wanaposoma ili kuongeza ufaulu.

Mkurugenzi wa Manispaa pia alitoa taarifa ya maendeleo ya Elimu ya watu wazima mbele ya Mwenyekiti wa kikao cha tathmini Mkuu wa Wilaya ya Songea Thomas Sabaya kuwa Manispaa ya Songea ina watu 2883 ambao hawajui kusoma kuhesabu na kuandika sawa na asilimia 40% ya watu wazima wote wa Manispaa hiyo ambapo Mkuu huyo wa Wilaya akatia mkazo kwa Kata zote kuendeleza kwa kasi Elimu ya watu wazima ili kufuta kabisa asilimia ya wasiojua kusoma,kuandika na kuhesabu katika Manispaa ya Songea.

“Naagiza kisomo sasa kipambe moto kata zote waratibu Kata,walimu wakuu,watendaji ngazi zote wajibikeni ipasavyo” alisisitiza Bwana Sabay.

Mwenyekiti huyo wa Kikao hicho ambaye pia ni Mkuu wa Wilaya ya Songea Thomas Sabaya amewaagiza viongozi wa Elimu Manispaa,Waratibu Kata,walimu na wadau wa Elimu kusimamia kikamilifu malengo ya kukuza taaluma katika Manispaa kwa kuhimiza mahudhurio ya wanafunzi,walimu kufundisha kikamilifu,wakaguzi kufuatilia ufundishaji na viongozi kutekeleza wajibu wao kwa kutoa stahiki zote za walimu ikiwemo malipo ya likizo,matibabu na posho zao za kujikimu.

MWISHO

HII, NIMIONGONI MWA SHUGHULI ZINAZOFANYWA NA TCCIA MKOA WA RUVUMA KATIKA KUTANGAZA BIIDHAA ZA WAJASILIAMALI WANAOLELEWA NA TAASISI HIYO MUHIMU KWA WAJASILIAMALI

 Afisa Mtendaji wa TCCIA Mkoa wa Ruvuma Philemon Moyo akiangalia bidhaa aina ya mvinyo ikiwa katika aina mbalimbali zilizowekwa kwenye fremu maalum katika ofisi za TCCIA mkoa wa Ruvuma zilizopo kwenye jengo la NSSF mjini hapa

AJIKUTA MIKONONI MWA DOLA KWA KUSABABISHA KIFO CHA ADERINA KWA MADAI YA WIVU WA KIMAPENZI

                             Na Gideon Mwakanosya,Songea

JESHI la Polisi Mkoani Ruvuma linamshikilia Mfanyabiashara mkazi wa  wa Mbinga mjini Timotheo Komba (21) kwa tuhuma za kumuua muhudumu ya baa ya Mbuji iliyopo mjini humo ambaye awali alikuwa mpenzi wake

Akizungumza na Mwaandishi wa mtandao huu wa www.stephanomango.blogspot.com  jana ofisini kwake Kamanda wa Polisi wa Mkoa wa Ruvuma Michael Kamuhanda alimtaja mwanamke aliyeuawa kuwa ni Aderina Nchimbi(21) ambaye ni mkazi wa mtaa wa eneo la Shule ya Msingi Kiwanjani Mbinga Mjini

Kamuhanda alisema kuwa tukio hilo lilitokea Septemba 20 mwaka huu,majira ya saa moja asubuhi huko katika mtaa wa eneo la Shule ya Msingi Kiwanjani

Alisema kuwa inadaiwa siku ya tukio Afisa Upelelezi wa makosa ya jinai wa Wilaya ya Mbinga Mrakibu Msaidizi wa Polisi Edward Kavalambi akiwa na Askari wenzake wa kitengo cha Upelelezi ambao walikuwa doria waligundua kuuawa kwa Aderina ambaye alikutwa kando kando ya barabara jilani kabisa na nyumbani kwake

Alifafanua zaidi kuwa Maaskari kanzu hao baada ya kugundua tukio hilo la mauaji muda mfupi walifanikiwa kumkamata Komba ambaye anadaiwa kuwa katika kipindi cha nyuma alikuwa mpenzi wake tangu walipokuwa wakiishi katika Kijiji cha Mpepai

Alisema kuwa chanzo cha tukio hilo la mauaji kinasadikiwa kuwa ni wivu wa kimapenzi ambapo inadaiwa kuwa marehemu Aderina kabla ya mauti hayajamkuta alikuwa akilazimishwa kufanya mapenzi na Mfanyabiashara huyo Komba ambaye alikuwa akijitahidi kumshawishi warudiane tena na mahusiano yao kama awali lakini mwanamke huyo alikuwa anakataa

Kamuhanda alisema kuwa mara upelelezi utakapokamilika mtuhumiwa Komba anatarajiwa kufikishwa mahakamani ili kujibu tuhuma zinazomkabili,