RAIS KIKWETE, VIJANA MITAANI WANAKUULIZA HIVI............................?

                    Rais wa Tanzania Jakaya Kikwete

Na Stephano Mango, Songea

RAIS Jakaya Kikwete, Rais wa Jamhuri ya Muungano wa Tanzania, naomba leo nitumie nafasi hii kuzungumza nawe juu ya mambo machache ambayo nimekuwa nikisikia vijana wanayazunguza na kutamani kuyafikisha kwako juu ya serikali yako na namna wanavyokutazama katika nafasi yako juu ya mustakabali wa maisha yao chini ya jua hili.

Hivyo ninaomba ufahamu kuwa vijana wengi wana mengi ya kusema nawe kama ilivyo kwa watanzania wengi, tatizo kubwa ni namna ya kufikisha kauli yao hiyo kwako. Hivyo mimi naomba nibebe wajibu huo wa kuwa kipaza sauti cha vijana kwa kufikisha kauli yao kwako.

Awali ya yote napenda kukupa pole kutokana na majukumu mengi ya kuwatumikia watanzania, majukumu uliyokabidhiwa na wananchi kupitia sanduku la kura mnano tarehe 14.12.2005 ambayo mpaka leo bado unayo.

Mheshimiwa Rais, kwa muda mrefu sasa vijana wa kitanzania wamekuwa wakilalamika juu ya mazingira magumu yanayowakabili katika harakati zao za kimaisha. Hii inatokana na jinsi hali ilivyobadilika tofauti na matarajio waliyokuwa nayo juu yako kabla na baada ya kuchaguliwa kwako kuwa rais wa awamu ya nne wa Tanzania.

Hivyo wamekuwa wakijiuliza kama ni kweli kuwa ile kauli ya “Maisha bora kwa kila Mtanzania” na ile ya “Tanzania yenye neema yawezekana” inawahusu wao au ni kwa wale wachache tu walio katika mazingira ya kujichukulia Chao Mapema.

Ninakumbuka wakati unapiga kampeni na kuomba kura kwa watanzania mwaka 2005 na mwaka 2010 ulikuwa na kauli mbiu nzuri juu ya vijana kuwa utawawezesha Vijana kujiajiri

Mheshimiwa Rais, wakati uliporudi jijini Dar es salaam baada ya kuteuliwa Mjini Dodoma kuwa mgombea wa CCM katika uchaguzi mkuu wa 2005, ulipata mapokezi makubwa sana ambapo pamoja na mambo mengine ulikutana na kilio cha vijana juu ya matatizo mbalimbali yanayowakabili.

Hivyo walipoongea nawe katika Ukumbi wa Diamond Jubilei ulisema kuwa umesikia kilio chao na hivyo uliahidi kujitahidi kutafuta namna ya kuwasaidia vijana hao kutoka katika hali ngumu ya maisha inayowakabili.

Hata hivyo hali imekuwa ni tofauti na matarajio yao tangu serikali yako iingie madarakani. Swali la vijana ni je ulikuwa unawalaghai au kuna vitu ulivyokutana navyo ikulu vikakwamisha dhamira yako njema uliyokuwa nayo dhidi yao?

Swali hili limekuwa likiulizwa kwani mambo yanayoendelea kwa vijana baada ya kuingia madarakani serikali yako yamewakatisha tamaa na wengi wamekuwa wakijuta kwani hawakutarajia kuona hayo hasa kwa kuzingatia kuwa eti (ulikuwa mshikaji wao) katika hali ngumu ya maisha.

Vijana wamekuwa wakiuliza kuwa je zile ajira milioni moja ulizoahidi kila mwaka bado zipo au zinachukuliwa na wawekezaji wa nje au ni kwa vijana wapi, na kwa wale uliowaahidi kuwawezesha kujiajiri ni hao serikali yao iliyoamua kuwafukuza mjini kwa kuwa wanachafua miji kwa kutembeza bidhaa mikononi na kuuza mitumba katika maeneo ambayo mnadai si maeneo si rasmi?

Je ni wapi mlipowatengea vijana hao penye nafasi na miundo mbinu bora na wakakataa kwenda? au ndio Machinga Complex yenye kiza kinene?
Mheshimiwa Rais, hivi karibuni nilikuwa jijini Dar es salaam, ambapo kwa bahati nzuri nilipata nafasi ya kuzunguka katika maeneo mengi ya jiji hilo, kwa sehemu kuwa vijana waliokuwa wakifanya biashara zao za kuuza mitumba na bidhaa nyingine (maarufu kama wamachinga), wameondolewa na kupelekwa katika maeneo yasiyo na biashara wala miundo mbinu,

Matokeo yake wengi wamekata mitaji yao kiasi cha baadhi yao kuamua kujiua baada ya kubomolewa kwa vibanda vyao bila kujua kama huko walipokuwa wanapelekwa ni sehemu sahihi au la, pia zoezi hilo limehamia pia kwa wapiga debe na makondakta wasio na shughuli maalum katika vituo mbalimbali vya daladala.

Hata hivyo licha ya hatua hiyo kuchukuliwa kwa ajili ya vijana hao ambao nao ni wahitaji na wamekuwa wakitegemea kupata riziki kupitia maeneo hayo, bado hakuna hatua mbadala zimechukuliwa katika kuwasaidia wahusika hao ili wasiende kufanya zile biashara za kutegemea mtaji wa nguvu zao (wizi, ujambazi, umalaya na ukahaba).

Zoezi hili si la jijini Dar es salaam tu, bali ni katika maeneo yote ya nchi yetu. Kwa sehemu kubwa inaonekana kuwa tumehamisha tatizo kutoka sehemu moja na kulipeleka sehemu nyingine, kwani hakuna mbinu mbadala za kuwasaidia hao tuliowaondoa mjini.

Mheshimiwa Rais, pamoja na kauli nzuri za viongozi wetu juu ya kuwataka vijana kurudi vijijini kwa ajili ya kujiingiza katika kilimo kwanza na ufugaji lakini ukipita katika maeneo mengi ya vijijini utakutana na hali mbaya ya maisha ya huko na wala hakuna miundo mbinu mizuri wala pembejeo kwa wale wote wanaoamua kujikita katika sekta hizo muhimu.

Na kwa wale wachache wanaojifanyia shughuli hizo, bado hawapati soko wala mazao yao hayanunuliwi kwa wakati na kama wanauza mazao yao basi ni kwa wafanyabiashara ambao wananunua mazao hayo kwa bei ya chini na hivyo kuwa ni hasara kwao,nani atawasaidia hao katika mikakati yao ya kujikwamua kiuchumi?.

Vijana wanauliza, mbona wao hata kama wamejiunga katika vikundi vya watu wasiopungua hamsini hawawezi kupata mikopo ili nao wafanye biashara zitakazowanyanyua kiuchumi na hivyo kuitwa wajasiriamali wa ndani? Kwani kila wakifanya hivyo hawafanikiwi, kwa hili unasemaje mheshimiwa rais?

Mheshimiwa Rais, vitendo vya unyanyasaji na kuwaua vijana na wachimbaji wadogo vinavyofanywa na wachimbaji wakubwa ambao wengi si raia katika maeneo mbalimbali ya migodi ya madini yetu ni sehemu ya kilio cha kila mara huku serikali yako ikifumbia macho bila kutoa walao kauli ya kukemea matendo hayo ni sehemu ya swali ambalo vijana wamekuwa wakiuliza.

Wao wana nafasi na kauli gani katika kujinufaisha na ujtajiri huo ambao ni sehemu ya neema kubwa Mwenyezi Mungu aliyoitunukia Tanzania na sasa inachukuliwa na wageni kama mali isiyo na wenyewe? Ni vema ukawajibu vijana hata hili.

Kuna vikundi mbalimbali vya vijana katika maeneo mbalimbali ya nchi yetu wanaoishi na VVU, lakini pamoja na wao kukaa kama familia, bado hawapati misaada itakayowawezesha walao kuwa na miradi ya kuwapatia mapato ili waweze kujikimu kimaisha

Kwani iwapo vijana hawa wasipopata misaada ni hatari sana kwa maisha ya watanzania wengine kwani wanaweza kuamua kusambaza VVU kwa makusudi bila kujulikana licha ya kuwa wamekuwa wazi kuwa wanaishi na VVU.

Kwasababu ,wengi wao wamekuwa wakitongozwa na wanaume/wanawake wengine kwa kuwa hawajionyeshi na kwa kweli wengi wao ni wazuri wa sura na miili na afya zao ni nzuri na wala huwezi kuwatilia shaka kama hutaelezwa kuwa wanaishi na VVU. Hili pia ni swali la vijana kwako.

Mheshimiwa Rais, nina mengi ya kuzungumza nawe kwa niaba ya vijana wa Tanzania, hata hivyo naomba uniruhusu niseme kuwa umefika wakati wa kuwasiliza vijana, kwani kilio kikubwa cha vijana ni kutokusikilizwa.

Hivyo ninakuomba sana ujitahidi pamoja na ratiba yako kutingwa na shughuli nyingi za nchi, utenge walao siku moja ili ukae na vijana wa Tanzania uwasikilize kwani nina imani kuwa wana mambo mengi ya kusema nawe.

Ninayasema haya kwa kuwa mpaka sasa hakuna waziri yeyote wa Wizara ya Kazi, Ajira na Maendeleo ya Vijana au hata manaibu mawaziri wao, aliyewahi kupanga na kukaa na vijana na kuwasikiliza katika kilio chao.

Fahamu kuwa kwa sehemu kubwa inawezekana kuwa mengi huyafahamu na wala hujayasikia yote, lakini ukipata nafasi ya kuwasikiliza vijana utafahamu hayo na mengi zaidi ambayo ulikuwa hujayasikia.

Mheshimiwa Rais, nimalizie kwa kusema kuwa, vijana wanahitaji kusikia jambo jipya, wengi wanatamani kupata nabii mpya wa kuwaokoa na wala habari za kisiasa si za lazima kwao kwani wengi wana maisha magumu, hawajui watakula nini kesho na wala maisha yao watayaboresha vipi.

Hivyo unaombwa kubeba wajibu huo kwa nguvu mpya ili vijana wakiri kuwa sasa wameuona ukombozi ulio tayari kwao. Ni matarajio ya vijana kusikia kitu juu ya hayo na mengine mengi ambayo hayajaandikwa hapa ili waweze kujua kuwa wewe ni mkombozi wao au wasubiri mwingine.
Mwandishi wa Makala

Anapatikana 0715-335051

www.stephanomango.blogspot.com

WANNE WAHOFIWA KUFA MAJI KUTOKANA NA GARI KUSOMBWA NA MAJI

Kamanda wa Polisi Mkoa wa Ruvuma Michael Kamuhanda

NA DUSTAN  NDUNGURU  SONGEA.

WATU wanne wanahofiwa kufa maji na wengine watatu kunusurika katika wilaya ya Mbinga mkoani Ruvuma baada ya gari walilokuwa wakisafiria kusombwa na maji kwenye mto Mnywamaji kijiji cha Ngumbo.

Kamanda wa polisi mkoa wa Ruvuma Michael Kamuhanda alisema kuwa tukio hilo limetokea machi 14 mwaka huu majira ya usiku katika kijiji cha Ngumbo.

Kamuhanda alisema kuwa gari lenye namba za usajili T492 AWY Landrover 110 lililokuwa likisafiri kutoka Mbinga mjini kuelekea katika kijiji hicho lilisombwa na maji wakati lilipokuwa likivuka katika daraja la mto Mywamaji ndani likiwa na watu saba.

Alifafanua kuwa kujaa kwa maji hayo kulifuatia mvua kubwa iliyokuwa ikinyesha na kwamba maji hayo yalikuwa yameambatana na mawe jambo ambalo lilisababisha gari hilo kusukumwa.

Kamuhanda aliwataja wanaohofiwa kufa maji kuwa ni Lukas Mbunda(59) ambaye ni mwalimu mkuu wa shule ya msingi Nkili,Maiko Due(39) mkazi wa Mbinga mjini na Evangelista Mzili(37) mkazi wa kijiji cha Unango.

Alimtaja mtu wa nne ambaye mwili wake umepatikana ni Aidan Mahundi(19) ambaye ni fundi magari mkazi wa kijiji cha Paradiso na kwamba watu watatu walionusurika ni Mathias Mbunda,Rose Mpombo ambao wamelazwa katika kituo cha afya Nkili na dereva wa gari hilo John Hyera ambaye alitoweka mara baada ya tukio hilo.

Hata hivyo jeshi la polisi linaendelea na uchunguzi kuhusiana na tukio hilo.

             MWISHO.

RC ENG, MANYANYA AWATIMUA WAKURUNGENZI WA HALMASHAURI ZA MKOA WA RUKWA KIKAONI

Mkuu wa Mkoa wa Rukwa ENG, Stella Manyanya(Mb)

Na Stephano Mango, Rukwa

MKUU wa Mkoa wa Rukwa Mhandisi Stella Manyanya, aliwafukuza kwenye mkutano wakurugenzi wote wa halmashauri za mkoa huo kwa kushindwa kutoa maelezo ya kina kuhusu madai ya fedha za walimu.

Manyanya alilazimika kufanya hivyo jana wakati wa kikao cha Kamati ya Ushauri ya Mkoa (RCC) alichokuwa mwenyekiti wake ambapo alipewa taarifa za walimu kutolipwa zaidi ya sh milioni 6.5 wanazoidai Halmashauri ya Sumbawanga Mjini.

Akieleza madai ya walimu hao Ofisa Tawala Msaidizi mkoani hapa David Kilonzo alisema walimu hawajalipwa kwa muda mrefu sasa hususan waliotoka nje ya mkoa huo kwa ushawishi wa mfuko wa kuboresha mazingiara ya watumishi.

Baada ya maelezo ya ofisa tawala huyo, mkuu wa mkoa alichukizwa na kuwatoa nje ya kikao hadi watakapopata majibu sahihi ni jinsi gani watawalipa walimu hao.

Alisema mara ya mwisho niliwaeleza kuwa sihitaji kusikia tena suala hilo likijirudia kwenye kikao cha RCC na niliwaagiza wakurugenzi wote kuhakikisha mnawalipa walimu lakini hii leo mnakuja na porojo hizo hizo sasa natamka kuwa siwahitaji humu ndani tokeni nyote na mkirejea mniambie namna mtakavyowalipa walimu hao haraka

Alisema serikali inabebeshwa lawama kwa sababu ya uzembe wa baadhi ya watendaji wake na kwamba inashangaza kuona katika malipo yenu na hata posho zenu mnavyohangaika ili mjilipe haraka lakini madai ya walimu yanachukua muda mrefu huku mkiwazungusha mara nenda mara rudi!

“Mkifanya kazi kwa kufuata taratibu na kuwajibika mtakuwa rafiki zangu lakini kama kuna mtu anapuuza maelekezo yanayotolewa kamwe sitamvumilia na tutamshughulikia kwa mujibu wa kanuni na sheria zilizopo.” Alisema Mhandisi Manyanya

Hata hivyo baada ya dakika 45 wakurugenzi hao walirejea kwenye kikao hicho wakidai watahakikisha walimu hao wanalipwa madeni yao katika kipindi cha mwezi mmoja kuanzia sasa.

RC MANYANYA AWAPONGEZA MADAKTARI WA RUKWA KWENYE KIKAO CHA KAMATI YA USHAURI YA MKOA

Na, Stephano Mango, Rukwa

MKUU wa Mkoa wa Rukwa Mhandisi Stella Manyanya amewapongeza Madaktari  na wauguzi wote nchini  ambao walifanya kazi zao kwa umakini mkubwa na uadilifu katika kipindi chote cha mgomo wa kwanza na wa pili ulioitishwa na chama cha Madaktari Tanzania (MAT) na kumalizika hivi karibuni

Akizungumza jana kwenye kikao cha Kamati ya mkoa wa Rukwa kilichofanyika kwenye ukumbi wa mikutano wa ofisi ya Mkuu wa mkoa huo alisema kuwa Madaktari na wauguzi wa Rukwa wametujari na kutuheshimu sana

Mhandisi Manyanya alisema kuwa wanataaluma hao wamejari uhai wa watanzania wenzao kwa kudiriki kufanya kazi yao ya kuwatibu wagonjwa na kutoa huduma stahiki za kiafya bila kinyongo wakati wenzao wakiwa kwenye mgomo

Alisema kuwa kitendo chao cha kuwajali  wananchi katika kipindi hicho kigumu hivyo , mkoa unajipanga ili kuona namna bora ya kuwapongeza Madaktari na wauguzi wa mkoa wa Rukwa kwa heshima na utu waliouonyesha katika wakati huo na sasa ambapo mgomo nchi nzima umemalizika

Alieleza kuwa wakati wa mgomo maeneo mengine huduma zilisitishwa na kupelekea watu wengi kupata usumbufu, ulemavu wa maisha, vifo na madhara mengine mengi hali ambayo imelitia doa Taifa hili ambalo linajali misingi ya haki za binadamu

"Watanzania tunapaswa tuimarishe maadili ya kazi zetu na kujali utu wa binadamu kwani inasikitika Madaktari na wauguzi wanashindwa kuwahudumia wagonjwa na badala yake wanaendekeza mgomo wenye maslahi binafsi huku wakiwaacha wagonjwa wakifa kwasababu ya kushindwa kumaliza madai yao kwa njia ya kukaa mezani"alisema Mhandisi Manyanya

Alifafanua zaidi kuwa haki ya kuishi ni haki kubwa kuliko zote na kwamba hakuna mtu mwenye mamlaka ya kuondoa uhai wa mwenzake kwa sababu yoyote ile kwani mwenye uwezo na mamlaka hayo ni mwenyezi mungu peke yake ni vema kazi yake tukamuachia yeye

Aliesema kuwa mkoa wa Rukwa unampongeza Rais Jakaya Kikwete kwa kumaliza mgomo huo wa Madaktari nchini na kuahidi kutekeleza baadhi ya madai yao  hilo ndilo jambao ambalo watanzania wengi walikuwa wanarisubiri kutokana na kuchoka kwa madhara yaliyokuwa yanajitokeza kutokana na mgomo huo ,hivyo Madaktari wale waliogoma warejee kazini na kuendelea na kazi wakati madai yao yanafanyiwa kazi na Serikali

MWISHO

KIKAO CHA KAMATI YA USHAURI YA MKOA WA RUKWA CHAMALIZIKA KWA KUWEKA MIKAKATI MBALIMBALI YA MAAZIMIO

 Mkuu wa Mkoa wa Rukwa Mhandisi Stella Manyanya akitoa hotuba ya ufunguzi wa kikao cha RCC

HOTUBA YA UFUNGUZI YA MKUU WA MKOA WA RUKWA INJINIA STELLA MANYANYA KWENYE KIKAO CHA KAMATI YA USHAURI YA MKOA WA (RCC) TAREHE 14/ 03/ 2012

Mhe. Mwenyekiti wa CCM, Ndugu H. Matete,

Katibu Tawala wa Mkoa, Ndugu Salum M. Chima,

Kamati ya Ulinzi na Usalama ya Mkoa,

Waheshimiwa, Wakuu wa Wilaya,

Bibi Joyce Mgana,

na Dr.

Rajabu Lutengwe,

Wah. Wabunge,

Meya, na Wenyeviti wa Halmashauri zote za Mkoa wa Rukwa,

Wakurugenzi,

Wakuu wote wa Idara,

Wageni Waalikwa,

Mabibi na Mabwana.

Rukwa Ruka!, Sumbawanga Ng’ara!

·        Awali ya yote napenda kumshukuru Mwenyezi Mungu kwa kutuweka hai.

·        Pili napenda kuwakaribisha katika Kikao hiki, na poleni kwa safari kwa wale mliotoka mbali.

Nachukua pia nafasi hii kuwakaribisha watumishi wageni wote waliohamia katika Mkoa wetu katika kipindi cha kuanzia Oktoba mpaka leo.  Ni imani yangu kuwa wataungana na viongozi, pamoja na watumishi wenzao kuhakikisha kuwa Rukwa inaruka na Katavi inaimarika zaidi.

Waheshimiwa wajumbe,

Nichukue pia nafasi hii kwanza kuwashukuru sana ninyi Wajumbe kwa niaba ya wananchi wote kwa jinsi tulivyoshirikiana katika matukio yote makuu na ya muhimu katika Mkoa wetu wa Rukwa na Katavi.  Naishukuru sana Kamati yangu ya Ulinzi na Usalama, Chama cha CCM na Vyama vya Siasa, Wakuu wa Idara mbalimbali, Watumishi wote, Wafanyabiashara, Wawekezaji na Wananchi wote kwa ujumla, kwa kufanikisha shughuli hizo kwa umakini mkubwa.

Shughuli kuu zilizofanyika ni pamoja na:-

1.      Kongamano la Uwekezaji la Ukanda wa Ziwa Tanganyika ambalo lilifanyika tarehe 17/10/2012 mjini Mpanda, Kongamano hilo lilifunguliwa na Mgeni wetu rasmi Mheshimiwa Dkt. Jakaya Mrisho Kikwete, Raisi wa Jamhuri ya Muungano wa Tanzania.  Waliohudhuria wengine ni pamoja na Mheshimiwa Mizengo Peter Pinda Mbunge wetu, Waziri Mkuu wa Jamhuri ya Muungano wa Tanzania, Dkt. Mary Nagu, Waziri wa Uwezeshaji na Uwekezaji katika Ofisi ya Rais, Mabalozi 34 kutoka nchi mbalimbali, Wakuu wa Mikoa 3 kutoka Kigoma, Mheshimiwa Issa Machibya, ambaye pia alikuwa muandaaji wa Kongamano, Mkuu wa Mkoa wa Tabora, Mheshimiwa Fatma Mwase, na Mkuu wa Mkoa wa Mtwara Mheshimiwa Joseph Simbakalia, pia Wadau mbalimbali wa makampuni na mashirika ya umma, na kwa namna ya pekee wananchi wenyewe.

Kwa upande wa Vyama vya Siasa, Chama Tawala CCM chini ya Mwenyekiti wake wa Mkoa Ndugu H. Matete walishiriki, pamoja na Chama cha Chadema.

2.      Mapokezi ya Mwenge yalifanyika kwa ufanisi mkubwa.

3.      Tulifanya Tamasha la Wana Rukwa na Katavi kuanzia tarehe 25 – 27/11/2011 katika kijiji cha Makumbusho Jijini Dar es Salaam. 

Tamasha hilo lilifana sana, hivyo napenda kuwapongezeni wote mlioshiriki katika kuandaa tamasha hilo, wakiwemo wazee wa mila, Viongozi wa Serikali pamoja na Wafanyabiashara wetu, na nimtaje ndugu Sumri kwa kutuweka vizuri kiusafiri

Aidha, nawashukuru na kuwapongeza sana Wana Rukwa na Katavi, waishio Dar es Salaam, chini ya Mwenyekiti Bibi Mwangaza Mwanisongole kwa kufanikisha tamasha hili kwa kiwango kikubwa.

Tamasha hili lilifunguliwa na Mheshimiwa Dkt Mohammed G. Bilal Makamu wa Rais wa Jamhuri ya Muungano wa Tanzania na kufungwa na Mheshimiwa Mizengo Peter Pinda (Mb) na Waziri Mkuu.

4.     Miaka 50 ya Uhuru tuliadhimisha mjini Namanyere katika Halmashauri ya Wilaya ya  Nkasi 9/12/2011.

5.     Tulipata Mgeni, ambaye ni Makamu wa Rais Dkt Mohammed Gharib Bilal kuanzia tarehe 18 – 24/2/2012 katika mikoa yetu ya Rukwa na Katavi.  Ziara yake ilikuwa ya mafanikio makubwa kutokana na ushirikiano mkubwa kati ya Chama Tawala na Serikali, Vyama vingine vya Siasa pamoja na wananchi wote waliohudhuria kwa wingi kwenye mikutano, kwa utulivu na heshima kubwa.  Nawashukuruni sana.

6.  Maadhimisho ya siku ya Wanawake duniani yalifanyika tarehe 8/3/2012 Mjini Sumbawanga, na yalikuwa mazuri.

         Pamoja na taarifa hizo ili ngoma inoge kuna wenyewe, hivyo basi nawashukuru sana Waandishi wa habari wa Mkoa wangu wa Rukwa pia Katavi pamoja na rafiki zao wa vyombo mbalimbali kwa jinsi wanavyotuunga Mkono na kuisaidia serikali ya Mkoa wa Rukwa, na taifa kwa ujumla. Pia navishukuru vikundi vya ngoma.

Mambo mengine muhimu.

1.   Barabara zetu zinaendelea kujengwa vizuri kwa kiwango cha lami, japo katika zile tunazogharimia sisi wenyewe (Serikali ya Tanzania) zinakabiliwa na upungufu wa fedha kutokana na majukumu mbalimbali ya serikali ikiwemo umeme, madeni ya watumishi kama Madaktari, Walimu n.k.

2.   Mkoa umeanzisha mpango wa Sumbawanga Ng’ara tuuunge mkono pamoja na Halmashauri zote zing’are.

3.   Napenda kuwataarifu kuwa madaktari wetu wa Mkoa wa Rukwa pamoja na wauguzi wote wa Mkoa wetu kwa kweli hawakugoma kabisa katika migomo yote miwili.  Wametujali sana wana Rukwa, na wametupa heshima kubwa sana na wamethamini sana uhai na maisha yetu.  Mkoa utaangalia namna bora zaidi ya kuwapongeza. Lakini kwa kuanzia naomba niwapongeze wote katika Kikao hiki.

Kwa namna ya pekee nakiomba kikao hiki kiazimie pongezi kwa Mheshimiwa Dkt. Jakaya Mrisho Kikwete, Rais wa Jamhuri ya Muungano wa Tanzania kwa jinsi alivyoshughulikia mgomo huu wa madaktari na kwa kuridhia kutupatia Mkoa mpya wa Katavi baada ya Mkoa wetu kugawanywa.

Waheshimiwa wajumbe, kutokana na ukubwa wa jiografia na maumbile ya Mkoa wetu tunashauri kuwa serikali ione uwezekano wa kuongeza ukomo wa bajeti.  Na kwa vile Mkoa wa Rukwa umegawanywa, basi ni vema Mkoa wa Rukwa uendelee na ukomo wa zamani na Mkoa wa Katavi upewe ukomo mpya. 

Waheshimiwa wajumbe, katika kuandaa bajeti ya mwaka huu kama ilivyoelezwa na Katibu Tawala wetu ndugu Chima, Mkoa unaazimia kuweka kipaumbele katika kumaliza miradi iliyopo na kuwa na miradi michache ili ikamilike na kutoa matukio badala ya kuwa na miradi mingi isiyoisha.  Hali hiyo ni kuharibu fedha kidogo tunayopata bila kupata matukio mazuri.

Waheshimiwa wajumbe tunayo mengi ya kujadili, muda hautoshi, na naona hali ya RAS wetu kimfuko ni mbaya, lakini kikao hiki ni muhimu sana ikizingatia kuwa ni dira ya bajeti.  Naomba tuchangie kwa makini ili kuufanya mkoa wetu uruke.

Kikao kimefunguliwa

 Baadhi ya wajumbe wa kikao hicho, Ignas Malocha Mbunge wa Jimbo la Kwela, Ally Kessy Mbunge wa Jimbo la Nkasi Kaskazini, na Suleiman Kakoswe Mpanda Vijijini wakifuatilia kikao hicho.

 Baadhi ya wajumbe na wageni waalikwa wa kikao hicho wakisikiliza neno la ufunguzi wa kikao hicho likitolewa na Mkuu wa Mkoa wa Rukwa Mhandisi Stella Manyanya (hayupo pichani).



Meneja wa Sido Mkoa wa Rukwa Martin Augustino Chang'a akiwa anafuatilia kwa umakini kikao hicho. Wengine ni baadhi ya wataalamu katika Ofisi ya Mkuu wa Mkoa Rukwa. 

KIKAO CHA BODI YA BARABARA MKOA WA RUKWA CHAMALIZIKA NA KUAINISHA MAAZIMIO MBALIMBALI

Mwenyekiti wa kikao hicho ambaye pia ni Mkuu wa Mkoa wa Rukwa Injinia Stella Manyanya akitoa hotuba ya ufunguzi. 

Mkuu wa Wilaya ya Mpanda Dkt. Rajab Rutengwe kulia akiteta na Mkuu wa Wilaya ya Nkasi Joyce Mgana wakati kikao hicho kikiwa kinaendelea

Wajumbe wa kikao hicho wakiendelea kusikiliza kwa umakini hoja mbalimbali zilizokuwa zinawasilishwa kwenye kikao hicho

Meneja wa TANROADS Mkoa wa Rukwa Florian Kabaka akiwasilisha taarifa ya Idara yake kwenye kikao hicho 

Mkuu wa Wilaya ya Mpanda Dkt. Rajab Rutengwe akizungumza kwenye kikao hicho, kulia kwake ni Mkuu wa Wilaya ya Nkasi Joyce Mgana.

KWA PICHA ZAIDI

BOFYA HAPA

WATATU WAFIKISHWA MAHAKAMANI KWA TUHUMA ZA MAUAJI

Na,Augustino Chindiye Tunduru

WATU watatu wamefikisha katika Mahakama ya Hakimu Mkazi wa Mahakama ya Wilaya ya Tunduru Mkoani Ruvuma kwa  tuhuma za kumuua kwa kukusudia marehemu Said Ally Kaunya.

Walioshitakiwa kwa tuhuma hizo katika Shauri hilo la mauaji namba 3/2012 ni Rajab Kalanje Namdoa (82), Asha Rajab (44) na Yasin Mohamed (52) ambao wamedaiwa kuwa  walifanya kosa hilo kwa kukusudia,

Akiwasomea shauri hilo Mwendesha mashtaka Mkaguzi Msaidizi wa Polisi Asp Alfred Kasoro alisema kuwa kwa pamoja watuhumiwa hao walitenda kosa hilo Machi 8 mwaka huu katika kijiji cha Nalwale kilichopo katika Kata ya Nandembo wilayani humo.

Kutokana na Shauri hili linalowa kabiliwa watuhumiwa hao kuwa nje ya uwezo wa kusikilizwa na mahakama hiyo,  watuhumiwa hao hawakutakiwa kujibu chochote.

Hata hivyo  hakimu wa mahakama hiyo  Goefre Mhini aliwaamuru kwenda Lumande hadi Machi 26 mwaka huu wakati shauri hilo litakapo somwa tena.

Kwa mujibu wa Taarifa za tukio la mauaji hayo yalitokea kwa sababu ya kugombea mashamba katika kijiji cha Nalwale katika Kata ya Nandembo ambapo Mtuhumiwa namba moja  amedaiwa kufanya tukio hilo ili kumaliza ugomvi huo.

Kwa mujibu wa taarifa hizo marehemu alidaiwa kuvamia shamba la mtuhumiwa namba moja nakuanza kulilima miaka 8 iliyopita ambapo katika kipindi chote hicho kesi ilikuwa ikiendelea katika hatua mbalimbali na kwamba kabla ya kifo hicho marehemu alikuwa ametoka kushinda kesi hiyo katika mahakama ya Ardhi ya Mkoa iliyopo katika manispaa ya Songea.

Mwisho.

MBUNGE WA VITIMAALU MKOA WA RUVUMA, MNEC NA MKUU WA MKOA WA RUKWA MHANDISI STELLA MANYANYA AWA MBUNGE WA KWANZA KUTEMBELEA JENGO LA POLISI WANAWAKE LINALOJENGWA NA WANAHARAKATI NA KUAHIDI KUTOA MILIONI 1

 Kutoka kushoto ni Katibu wa UWT Mkoa wa Ruvuma Mariam Yusuph, Afisa Habari Ofisi ya Mkuu wa Mkoa wa Rukwa Hamza Temba, Mwanaharakati wa TGNP Kanda ya Kusini na Mhariri Msaidizi wa Tujifunze Kanda ya Kusini Juma Nyumayo, Mbunge wa Vitimaalum Mkoa wa Ruvuma, Mnec na Mkuu wa Mkoa wa Rukwa Mhandisi Stella Manyanya, Mwanaharakati wa TGNP Kanda ya Kusini, Mwandishi wa Star Tv/ Redio Free na Mwenyekiti wa Kamati ya Ujenzi wa jengo la Polisi wanawake mkoa wa Ruvuma Adam Nindi, Mkaguzi Msaidizi wa Polisi Fadhiri Chacha 

 Kutoka kulia ni Mwenyekiti wa UWT mkoa wa Ruvuma Kuruthum Mhagama, Katibu wa UWT Mkoa wa Ruvuma Mariam Yusuph, Mkuu wa Mkoa wa Rukwa, Mnec na Mbunge wa Vitimaalum Mkoa wa Ruvuma Mhandisi Stella Manyanya akiwa na wajumbe wengine wa Baraza la Uwt mkoa wa Ruvuma wakitembelea jengo maalum la kusikiliza matatizo ya wanawake (Dawati la Jinsia) lilopo karibu na kituo kikuu cha Polisi Mjini Songea

 Mwanaharakati wa TGNP Kanda ya Kusini na Mhariri Msaidizi wa Tujifunze Kanda ya Kusini Juma Nyumayo akitoa maelezo ya awali ya jengo hilo kwa viongozi wa Jumuiya ya UWT Mkoa wa Ruvuma walipotembelea jengo hilo wakiongozwa Mkuu wa Mkoa wa Rukwa, Mnec na Mbunge wa Vitimaalum Mkoa wa Ruvuma Mhandisi Stella Manyanya

 Mwanaharakati wa TGNP Kanda ya Kusini, Mwandishi wa Star Tv/ Redio Free na Mwenyekiti wa Kamati ya Ujenzi wa jengo la Polisi wanawake mkoa wa Ruvuma Adam Nindi akitoa maelezo ya ujenzi wa jengo hilo

 Viongozi wa Jumuiya ya UWT Mkoa wa Ruvuma walipotembelea jengo hilo wakiongozwa Mkuu wa Mkoa wa Rukwa, Mnec na Mbunge wa Vitimaalum Mkoa wa Ruvuma Mhandisi Stella Manyanya wakisikiliza maelezo ya jengo hilo

 Mkuu wa Mkoa wa Rukwa, Mnec na Mbunge wa Vitimaalum Mkoa wa Ruvuma Mhandisi Stella Manyanya akizungumza kwa furaha baada ya kutembelea ujenzi wa jengo hilo ambalo linapaswa kuigwa na mikoa mingine ambapo aliahidi kutoa milioni 1 kuchangia ujenzi huo na kushauri kuwa mara litakapo kamilika licha ya kutoa ushauri wa kisheria, ujinsia pia kiwe kioo cha maendeleo kwa wanawake kwa kutumia sheria watakazojifunza kupitia dawati hilo

Mkuu wa Mkoa wa Rukwa, Mnec na Mbunge wa Vitimaalum Mkoa wa Ruvuma Mhandisi Stella Manyanya akiondoka eneo hilo baada ya kukamilisha kazi yake ya kukagua jengo la dawati la jinsia(mtandao wa Polisi Wanawake)

TAARIFA YA KAMATI YA MAUAJI MKOA WA RUVUMA YATOLEWA NA RC MWAMBUNGU

MKUU WA MKOA WA RUVUMA SAID MWAMBUNGU

WAANDISHI WA HABARI WAKITAFUTA PICHA YA MNATO WAKATI MKUU WA MKOA WA RUVUMA SAID MWAMBUNGU AKITOA TAARIFA YA KAMATI

Na Gideon Mwakanosya ,Songea.

KAMATI iliyoundwa na Mkuu wa mkoa wa Ruvuma Said Mwambungu kuchunguza chanzo cha mauaji ya watu waliouwawa kuhusiana na imani za kishirikina na kusababisha vurugu za watu kuandamana na iliyopolekea mauaji ya watu wawili imekamilika.

Kamati hiyo iliyoundwa na watu wanane ikiongozwa na katibu tawala msaidizi miundombinu Severin Tossi ili Serikali iweze kuchukuwa hatua na kuhakikisha mambo kama hayo hayatokei tena

Akitoa taarifa hiyo Mwambungu alisema kuwa wale wote waliotuhumiwa kwenye mauaji hayo wamefikishwa kwenye vyombo vya sheria.

Hata hivyo alisema kuwa kamati hiyo imeshindwa kuthibitisha uvumi wa watu kumi na nne waliouwawa kwa kuhusishwa na imani za kishirikina na kwamba tabia ya watu kueneza uvumi wa uongo ni mbaya sana kwani inagharama kubwa kwa wananchi na kuongeza kuwa kamati hiyo imefatilia na kupata taarifa kuwa hakuna mtu yoyote aliyenyofolewa viungo vya siri .

“Naomba nitoe rai kwenu kuwa tabia hii ya uenezaji wa uvumi ni mbaya sana kwa sababu inagharama kubwa sana kwa wananchi ambao wanashindwa kufanya kazi zao za kila siku katika ujenzi wa Taifa.”alisema Mwambungu.

Amesema,tayari elimu kwa wananchi imeshatolewa na wananchi wameanza kufanya kazi ya ulinzi shirikishi kwa kushirikiana na polisi kata ambapo kazi ya ulinzi na kwamba  mitaa yote ya Manispaa ulinzi umeimalishwa.

Mwambungu ameongeza kuwa, kwa sasa hali ya utulivu na usalama katika mkoa wa Ruvuma imerejea kama awali ambapo wananchi wanaendelea na shughuli zao za kila siku kama kawaida .

“Napenda kuwahakikishia wananchi wa mkoa wa Ruvuma na watu wanaoishi nje ya mkoa wa Ruvuma kuwa Songea ni salama na wananchi wanaendelea na shuguli zao kama kawaida, nawashukuru wananchi kwa ushirikiano mkubwa ambao wameutoa pia wanahabari kwa kusaidia kurejesha hali ya utulivu na amani ”alisema

Aidha, amewataka wananchi kuelewewa umuhimu wa kujilinda na kufata sheria ikiwa ni pamoja na kuacha hulka ya kujichukulia hatua mkononi ,ikiwa ni pamoja na kuacha kujihusisha na tabia za uvumi na hisia za kishirikina ili kuimarisha amani na utulivu.

MWISHO.

NYUMBA ZAIDI YA 300 ZABOMOLEWA NA MVUA WILAYANI TUNDURU

MKUU WA WILAYA YA TUNDURU JUMA MADAHA

Na Augustino Chindiye,Tunduru
ZAIDI ya Nyumba 300 zimeripotiwa kubomoka  katika Tarafa ya Mlingoti Wilaya ya  Tunduru Mkoani Ruvuma kufuatia mvua kubwa zinazo endelea kunyesha kwa takribani siku tatu sasa na kusababisha wakazi wa kaya hizo kukosa makazi.

Sambamba na tukio hilo pia. mvua hizo zimesababisha miundombinu ya barabara za kwenda vijijini  kujifunga kutokana na maji kujaa kiasi cha kutishia kubomoka  huku madaraja yakiwa hayapitiki kutokana na maji kufurika na maji kupita juu ya daraja .

Taarifa kutoka kwa madereva wanaofanya safari katika barabara kuu iendayo Songea zinasema kuwa maji yamejaa sana na kupita juu ya Daraja la Mto Masonya hali ambayo imesababisha magari yao kusitisha safari za kwenda na kuingia mjini Tunduru.

Adha nao madereva wanaofanya safari za kwenda katika vijiji vya Lukumbule,Mbesa  Nalasi Mchoteka nako hakufai kutokana na maji katika mto Msinjewe  kujaa sana na kutishia magari ya abiria kushindwa kupita huku taarifa kutoka katika Barabara iendeyo Masasi Mkoani Mtwara na Jijini Dar es salaam zikisema kuwa kikwazo kipo katika daraja la Mto Muhuwesi ambapo pia hapapitiki hali inayo onesha kuwa mji wa Tunduru hivi sasa upo kisiwani .

Akizungumzia maafa hayo Afisa Tarafa wa tarafa ya Milingoti  Manfred kahobera Hyera mbali na kukiri kuwepo kwa wimba la maafa hayo alisema kuwa hali katika mji wa Tunduru ni mbaya sana kiasi cha kutishia maisha ya wakazi wake.

Akifafanua taarifa hiyo Hyera alisema kuwa  hadi sasa amepokea taarifa kutoka kwa watendaji  kata tatu za miji huo Nanjoka zimeripotiwa kubomoka  nyumba 50, kata ya Masonya Nyuma 52 na majengo Nyuma 32 huku taarifa kutoka katika Tarafa ya Ligoma zikidai kuwa hali ni mbaya , chanzo cha matukio hayo kikidaiwa kuwa nyumba
hizo zilijengwa kwa tofari mbichi.

Juhudi za kupata taarifa za uharibifu ulisaabishwa na Mvua hiyo katika meneo mengine ya Wilaya hiyo zilishindikana kutokana na Kaimu Mkuu wa Wilaya hiyo  Martin Mulwafu kudaiwa kuwa yupo katika safari ya kufuatilia taarifa hizo vijjini.
Mwisho

MBUNGE WA VITIMAALU MKOA WA RUVUMA, MNEC NA MKUU WA MKOA WA RUKWA MHANDISI STELLA MANYANYA AHUDHURIA KIKAO CHA BARAZA LA UWT MKOA WA RUVUMA NA KUTOA SHILINGI 150000

Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya akiwasalimia wajumbe wa Baraza la Uwt Mkoa wa Ruvuma katika kikao kilichofanyika juzi katika ukumbi wa CCM mkoa wa Ruvuma, wa kwanza kutoka kulia ni Mkuu wa Mkoa wa Ruvuma Said Mwambungu, wapili Mwenyekiti wa CCM mkoa wa Ruvuma Corneus Msuya, watatu ni Mwenyekiti wa Uwt Mkoa wa Ruvuma Kuruthum Mhagama

 Wajumbe wa Baraza la UWT Mkoa wa Ruvuma wakimpa zawadi na kumpongeza Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya kwa kuteuliwa na Rais Jakaya Kikwete kuwa Mkuu wa Mkoa wa Rukwa na Kaimu Mkuu wa Mkoa wa Katavi

 Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya akiwashukuru Wajumbe wa Baraza la UWT mkoa wa Ruvuma kwa zawadi na pongezi walizozitoa kwake wakati wa kikao cha Baraza la Uwt mkoa wa Ruvuma kilichofanyika kwenye ukumbi wa mikutano wa CCM mkoa wa Ruvuma juzi

 Wajumbe wa kikao cha Baraza la UWT Mkoa wa Ruvuma wakicheza wimbo wa chama na Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya ikiwa ni ishara ya kufurahi pamoja katika kuanza mwaka wa uchaguzi ndani ya chama

 Wajumbe wa kikao cha Baraza la UWT Mkoa wa Ruvuma wakisikiliza hoja mbalimbali zilizokuwa zinawasilishwa na Katibu wa UWT mkoa wa Ruvuma Mariam Yusuph hayupi pichani kwenye kikao hicho kilichofanyika juzi

 Wakwanza toka kushoni Katibu wa CCM Wilaya ya Songea Lidya Gunda, wapili Katibu wa CCM Wilaya ya Songea Mjini Alfonce Siwale, watatu ni Katibu wa UVCCM Mkoa wa Ruvuma Mwajuma Rashid, wanne Katibu wa Jumuiya ya Wazazi mkoa wa Ruvuma Rajab Honde wakifuatilia kikao hicho

 Kamati ya utendaji wa UWT mkoa wa Ruvuma ambao ndio Sekretarieti ya kikao hicho wakiendelea na majukumu yao wakati kikao hicho kikiendelea

 Wajumbe wa kikao hicho wakiendelea na kikao hicho

 Wajumbe wa kikao cha Baraza la UWT Mkoa wa Ruvuma wakimkabidhi zawadi na kumpa pongezi Mkuu wa Mkoa wa Ruvuma Said Mwambungu kwa kuteuliwa na Rais Jakaya Kikwete kushika Mkoa wa Ruvuma

 Mkuu wa Mkoa wa Ruvuma Said Mwambungu akiwashukuru wajumbe wa kikao cha Baraza la UWT Mkoa wa Ruvuma kwa kumpatia zawadi na kumkaribisha Ruvuma, wa kwanza kulia ni Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya, wa kwanza kutoka kushoto ni Katibu wa UWT Mkoa wa Ruvuma Mariam Yusuph, wa pili ni Mwenyekiti wa UWT Mkoa wa Ruvuma Kuruthum Mhagama wapili Mwenyekiti wa CCM Mkoa wa Ruvuma Corneus Msuya

 Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya akiwa na Katibu wa CCM mkoa wa Ruvuma Emmanuel Mteming'ombe wakati Mkuu wa Mkoa wa Ruvuma Said Mwambungu akiwashukuru wajumbe wa kikao hicho kwa kumpatia zawadi

Mkuu wa Mkoa wa Ruvuma Said Mwambungu akimkabidhi Katibu wa UWT Mkoa wa Ruvuma Mariam Yusuph jumla ya shilingi 250000 ikiwa shilingi 150000 kutoka kwa Mbunge wa Vitimaalum mkoa wa Ruvuma,Mnec na Mkuu wa Mkoa wa Rukwa Mhandisi Stella Manyanya na shilingi 100000 kutoka kwake

SUFA WAANZA KUTOA FOMU ZA KUGOMBEA NAFASI MBALIMBALI ZA UONGOZI

                                                Katibu Msaidizi wa SUFA Godfrey Mvula

Na Gideon Mwakanosya, Songea

CHAMA cha mpira wa miguu Manispaa ya Songea(SUFA) kimeanza kutoa fomu za kuwania nafasi mbalimbali za  uongozi wa chama hicho, uchaguzi ambao umepangwa kufanyika mwishoni mwa mwezi huu.

Akizungumza mjini hapa jana Katibu Msaidizi wa SUFA, Godfrey Mvula alisema kuwa pamoja na utoaji wa fomu za kugombea nafasi mbalimbali za  uongozi wa chama hicho, bado kamati ya utendaji wa SUFA kimepanga kuteua kamati ya kusimamia uchaguzi huo ambao utafanyika Machi 30 mwaka huu katika ukumbi ambao utakaopangwa.

Alisema wagombea wa nafasi hizo wanatakiwa wawe angalau na elimu sio chini ya kidato cha nne na awe mtu anayejihusika na soka kwa kuongoza vilabu  ili kujenga ufanisi na uelewa zaidi katika kufanikisha na changamoto ya maendeleo ya soka katika Manispaa hiyo.

Alisema wagombea wote watakaojitosa kuchukua fomu na kuzirejesha watafanyiwa usaili wao wa mwisho Machi 25 kabla ya kuingia katika uchaguzi wa kuwania nafasi hizo za uchaguzi ambao watakaa madarakani kwa muda wa miaka mitatu.

Alisema SUFA kwa sasa inaongozwa na Mwenyekiti wake Gorden Sanga na ina vilabu vya soka 35 ikiwemo Majimaji ambavyo vimesajili kupitia msajili wa vyama vya michezo na vilabu nchini.

  MWISHO

RC MANYANYA ASHUSHA PRESHA YA WANANCHI WA MDUNDUALO KUHUSU MAENEO YAO KUCHUKULIWA NA WACHIMBAJI WA MAKAA YA MAWE NGAKA WILAYANI MBINGA

Mkuu wa Mkoa wa Rukwa Mhandisi Stella Manyanya ambaye pia ni Mbunge wa Vitimaalu Mkoa wa Ruvuma akizungumza na wananchi wanaozunguka mgodi wa makaa ya mawe ya Ngaka Wilayani Mbinga kuhusu mgogoro wa wananchi na wawekezaji katika mgodi huo



Wananchi wanaozunguka mgodi wa uchimaji wa makaa ya mawe wakimsikiliza Mkuu wa Mkoa wa Rukwa na Mbunge wa Vitimaalum Mkoa wa Ruvuma Mhandisi Stella Manyanya





WATU WAWILI WAMEFARIKI KATIKA MATUKIO MAWILI TOFAUTI WILAYANI TUNDURU

Na,Augustino Chindiye Tunduru

WATU wawili wamefariki dunia katika  matukio tofauti yaliyotokea wilayani Tunduru Mkoani Ruvuma likiwemo tukio la kuuawa kwa kushambuliwa kwa mapanga kutoka na kilichodaiwa kuwa chanzo chake ni ugomvi wa kugombea eneo la kulima na mwingine kupigwa na radi.

Taarifa za tukio la Mauaji ya kugombea shamba lilitokea katika kijiji cha Nakawale katika Kata ya Nandembo ambapo Mtu aliyeuawa amefahamika kwa jina la Said Kaunya.

Akizungumzia tukio hilo mjomba wa marehemu Yusuph Mangalai alisema kuwa marehemu alikumbwa na maswahibu hayo usiku wa kuamkia machi 9 mwaka huu ambapo baada ya maharamia hao kutekeleza unyama huo waliuficha mwili wa marehemu kwa kuuzika pembeni mwa bwawa la maji
hali ambayo iliwapa wakati mgumu wanafamilia.

Hata hivyo Mangalai amewapongeza watu wote walioshiriki katika msako uliofanikisha kupatikana kwa mwili wa marehemu na kuuzika katika makaburi ya Njasi Mjini Tunduru.

Kwa mujibu wa taarifa hizo tukio la pili lililo husu kifo cha Mkulima kupigwa radi kilitokea katika kijiji cha Kangomba Wilayani humo ambapo aliye fariki dunia katika tukio hilo amefahamika kwa jina la Said Abubakari(43),

Akizungumzia tukio hilo Kaka wa marehemu Ally Hatibu alisema kuwa Marehemu alikumbwa na mkasa huo ulimpata wakati akipandikiza mihogo
shambani kwake.

Alisema katika tukio hilo marehemu aliunguzwa vibaya kuanzia chini ya mguu hadi kichwani upande wa kulia na kufariki papo hapo.

Kamanda wa polisi wa mkoa wa ruvuma Naftali Mantamba amethibitisha kuwepo kwa matukio hayo na kueleza kuwa polisi wanendelea na uchunguzi
ili sheria ifute mkondo wake.


Mwisho

WAKULIMA WA KOROSHO WILAYA YA TUNDURU WAENDELEA KULILIA SOKO LA ZAO LAO

MKUU WA WILAYA YA TUNDURU JUMA MADAHA

Na,Augustino Chindiye,Tunduru

WAKATI Serikali ikiwa imetoa tamko la kuwafutia Leseni Wanunuzi wa
Korosho nchini, Wakulima wa zao hilo Wilayani Tunduru  Mkoani Ruvuma
wamehoji hatima ya Soko la Korosho zao.

Hayo yalitokea katika kikao cha wadau wa Korosho kilichofanyika katika Ukumbi wa Chama Kikuu cha Wakulima (TAMCU) na kuwashirikisha Waandishi na Wenyeviti wa Vyama vya msingi vya wakulima wa zao hilo na wakaituhumu Serikali ya awamu ya nne kuwa imekuwa butu katika  kutoa maamuzi hali ambayo inawafanya Wanachi kukata tamaa juu ya utendaji wake.

Wawakirishi wa Wakulima kutoka Chama cha Msingi  Litungulu Mohamed
Matoto na Yasini Masiano wa Chichilimbe walisema kuchelewa kutolewa
kwa maamuzi kunako fanywa na Serikali kumewafanya viongozi wa vyama
vya msingi kuishi katika hofu ya kufanyiwa fujo na wakulima wao.

Awali akifungua kikao hicho Mwenyekiti wa Chama kikuu cha Wakulima Wa
Korosho (TAMCU) Mohamed Katomondo mbali na kupongeza hatua zilizo
chukuliwa na Serikali kwa kunukuu kauli ya Makampuni hayo
kunyang`anjwa Leseni bila majadiliano iliyotolewa na Rais wa Jamuhuri
ya Muungano wa Tanzania Dkt. Jakaya Kikwete na kuongeza kuwa katika
tamko hilo hakukuwa na kipengele wala maelekezo yaliyozungumzia hatima
ya Korosho za wakulima.

Aidha katika taarifa hiyo Katomondo alionesha mashaka ya kuendelewa
kwa zao hilo kutokana na wakulima wengi kukatishwa tamaa na utaratibu
wa mfimo wa Stakabadhi ghalani wakidai kuwa mfumo huo unanyonya nguvu
zao.

Akitoa taarifa ya mdororo wa Korosho hizo Meneja wa Chama Kikuu cha
Ushirika wa Wakulima wa Korosho Wilayani Tunduru (TAMCU)Imani
Kalembo alisema kuwa katika msimu wa Mwaka 2011/2012 chama hicho kupitia
vyama vya msingi vya wakulima takwimu zinaoneshja kuwa uzalishaji
umeongezeka kutoka kilo 4,135,042 za mwaka 2010/2011 hadi kilo 7,570,000.

Kalembo aliendelea kufafanua kuwa hadi kufikia Februari 29 mwaka huu
takwimu zinaonesha kuwa Korosho zilizopokelewa Maghalani ni Kilo
6,842,446 na kilo 641,230 zipo katika maghala ya watu binafsi na
zingine zipo nje ya ofisi za chama hicho na kilo 86,324 bado zipo
mikononi mwa wakulima huku takwimu hizo zikionesha kuwa ni kilo
1,890,384 tu ndizo zilizouzwa katika mnada mmoja kati ya minada tisa
iliyofanyika hali inayotishia chama hicho kushindwa kulipa malipo ya pili ya wakulima ambapo TAMCU inadaiwa Jumla ya Shilingi 2,441,870,350/= .

Taarifa hiyo iliendelea kueleza kuwa deni hilo limetokana na chama
hicho kununua jumla ya Kilo 6,976,821 ambazo Chama hicho kupitia vyama
vya msingi vimeweza kuzilipia kwa asilimia 70% pekee, sambamba na Deni
la Shilingi 608,260,000 zilizotokana na Mkopo wa  kilo 506,855 za Korosho za zilizo kopeshwa na wakulima kwa vyama vya Msingi.

Kalembo aliendelea kueleza kuwa wakati hayo yakiendelea Chama
hicho pia  kinakabiliwa na changamoto ya Chama kushindwa kununua jumla
ya kilo 86,324 zenye Dhamani ya Shilingi Milioni 17,264,800 ambazo
bado zipo mikononi mwa wakulima wa zao hilo hali inayo endelea
kuwakatisha tamaa ya kuendelea na kilimo hicho

Akizungumza na waandishi wa habari hivi karibuni Mjini Songea Katibu
Mtendaji wa Shirikisho la Vyama vya Ushirika Wilgisi Mbogoro,
alisema takwimu za Korosho zote zilizokwama baada ya wanunuzi
kutunisha misuli kuzinunua ni kilo 72,978,340 zenye thamani ya
shilingi Bilioni 113.7

Wakitoa salamu za Serikali Mkuu wa Wilaya ya Tunduru Juma Madaha namlajisi msaidizi wa vyama vya Ushirika Mkoani Ruvuma WatsonNganiwa walisema kuwa msimamo wa Serikali ni kuhakikisha kuwa Korosho zote zinanunuliwa kutoka kwa wakulima na wakatumia nafasi hiyo kuwaomba wakulima kuwa na subira wakati taratibu za mchakato wa kufanikisha hayo zikiendelea.
Mwisho