WAPAMBE WA CCM SONGEA WAMESABABISHA ANGUKO LA CHAMA KATIKA UCHAGUZI WA UDIWANI

Hamis Abdalah Ally akiwa kwenye moja ya mikutano ya kampeni za udiwani

NA STEPHANO MANGO, SONGEA

MAJIGAMBO na tambo za viongozi, wagombea na wapambe wa vyama vya siasa viwili vilivyoshiriki kwenye kampeni za kuwania kiti cha udiwani Kata ya Lizaboni Halmashauri ya Manispaa ya Songea Mkoani Ruvuma vimefikia tamati kwa wananchi kupiga kura kumchagua diwani waliokuwa wanamtaka

Vyama vilivyoshiriki kwenye mchakato wa kampeni vilikuwa ni viwili kwa maana ya Chama cha Mapinduzi (Ccm) mgombea wake alikuwa ni George Oddo Mbunda na Chama cha Demokrasia na Maendeleo (Chadema) mgombea wake alikuwa ni Alanus Mwanja Mlongo


Wakati wa kampeni wananchi wa Kata ya Lizaboni walipata fursa ya kusikiliza sera za vyama hivyo ambapo wapigakura hao walihitimisha kwa kufanya uchaguzi wa kiongozi waliyemhitaji aprili mosi mwaka huu na kumfanya aliyekuwa mgombea wa Chadema  Alanus Mlongo kuibuka kidedea katika uchaguzi huo.


Uchaguzi huo mdogo umefanyika baada ya Kata hiyo kuwa wazi kutokana na kifo cha aliyekuwa Diwani wa Kata hiyo Ally Said Manya(CCM) pia alikuwa Mstahiki Meya wa Halmashauri ya Manispaa ya Songea ambaye alifariki dunia julai mwaka 2011.

Licha ya kampeni hizo kutawaliwa na vijembe, malumbano na kauli chafu kati ya vyama na wagombea, lakini wananchi wa Kata ya hiyo walizingatia sera zilizoonekana kuwa na tija kwao, ambazo pia zinatekelezeka na kumchagua kiongozi waliyekuwa wanamtaka kwa njia ya kumpigia kura.

Katika uchaguzi huo wapigakura waliopo kwenye orodha ya kudumu kwenye daftari la wapigakura walikuwa ni 7825 lakini waliopiga kura ni 3315 jambo ambalo limeonyesha wazi kuwa wakazi wengi wa Kata hiyo hawakuweza kujitokeza kupiga kura licha ya mgombea wa Chadema kupata kura 1712 wakati Mgombea wa Chama cha Mapinduzi katika Kata hiyo George Oddo Mbunda alipata kura 1579.

Nawapongeza wananchi wa kata ya Lizaboni waliotimiza wajibu wao wa kikatiba katika uchaguzi huo na kumpigia kura kiongozi ambaye alionekana kukidhi matakwa ya wananchi kutokana na sera alizokuwa anazinadi wakati wa kampeni.

Tume ya uchaguzi ilisimamia uchaguzi huu vizuri na hatua zote za uhesabuji wa kura zilikuwa za haki na utangazaji ndio maana zoezi zima lilimalizika kwa amani kwa wale wote ambao walikuwa wanasubiri matokeo kutokana na kura walizozipiga.

Matokea hayo ni salamu tosha kwa viongozi wa Ccm na wa Serikali kuhusu kupuuza haki na matakwa ya wananchi huku wakibeza kuwa kelele za mlango hazimsumbui mwenye nyumba, pamoja na kuwa vijana wengi wanaoshabikia upinzani hawana shahada za kupigia kura

Hayo ni matokeo ya mbinu dhaifu za kimkakati zilizokuwa zinafanywa na Viongozi wa Chama cha Mapinduzi Wilaya ya Songea mjini chini ya uwenyekiti wa Hemed Dizumba za kuamua kufanya siasa za kihuni katika kampeni zilizopita na za uchaguzi huu mdogo wa udiwani

Kitendo chake cha kukataa baadhi ya maoni yaliyo wazi na yaliyojificha yaliyokuwa yanatolewa na wadau wa chama hicho katika kuhakikisha chama hicho kinaibuka ushindi katika Kata hiyo ndiko kulikosababisha Chama cha Chadema kiibuke na ushindi na kuongeza idadi yake ya madiwani na kufikia nane sasa kupitia chama hicho

Siasa za kihuni kwa sasa hazitakiwi zitumike katika chama kikongwe kama Ccm ambacho kimepoteza dira machoni na mioyoni mwa watanzania, hivyo kufanya kampeni dhaifu zilizogubikwa na kwaya, mashairi, ngonjera na lugha zilizokosa staha hakuwezi kukivusha chama hicho katika chaguzi zinazokuja

Katika wimbi kubwa la ufisadi, ukosefu wa ajira kwa vijana, migomo na maandamano ya makundi mbalimbali na kila aina ya uchafu ambao Serikali ya Ccm inatupiwa huwezi kumtegemea hata kwa akili ndogo kiasi gani Lukas Ngongi, Grayson, Juma Kangala na Hamis Abdalah Ally waweze kuleta ushindi kwa mgombea yoyote yule ndani ya chama hicho kinachojichimbia kaburi

Ni watu ambao hawawezi kujenga hoja zenye mantiki katika kuleta ushindi stahiki kwasababu popote wanaposimama hawawezi kuzungumza lugha zenye staha, kueleza mikakati ya ushindi, kujibu hoja kwa mpangilio na kueleza miradi ambayo inatekelezwa na Serikali ya mtaa na hata ya wilaya katika maeneo wanayoishi

Kutokana na tabia zao ambazo zimejaa utata watu wenye akili timamu,hawawezi kushawishika na maneno yaliyojaa dhihaka, matusi katika jukwaa la kampeni walilokuwa wanalitumia watu wa Ccm kumnadi mgombea wake George Oddo na badala yake watu walikuwa wanazibeza kampeni zao kwasababu zimejaa hadithi tupu

Badala ya kujikita kueleza utekelezaji wa miradi mbalimbali uliofanywa na aliyekuwa Diwani wa Kata hiyo marehemu Said Ally Manya, wao wanahangaika kutoa ahadi au kumshambulia mtu ambaye hana uhusiano na ugumu wa kampeni waliokuwa wanaupata katika kampeni hizo

Kitendo cha uongozi wa Ccm kuwaweka watu hao waliojaa siasa za majitaka ambao walikataliwa kabla ya kuanza na baada ya kumaliza kampeni hizo ndiko kulikosababisha fedheha kubwa kwa wananchi kukataa kushabikia chama hicho wakati wa kampeni zake na mwisho kukataliwa katika uchaguzi huo na kuonyesha uhai mdogo siku za mbeleni na hasa katika uchaguzi mdogo wa Mletele

Hakuna sababu yoyote ya msingi utakayoambiwa na viongozi wa Ccm wilaya ya Songea mjini na wapambe wao kuhusu anguko kubwa tunalolishuhudia hivi sasa kwa wapinzani kuchukua kwa kasi ya ajabu uongozi kuanzia serikali za mitaa na sasa udiwani ambapo madiwani wa upinzania wanaingia kwa kasi kubwa

Washabiki wa chama cha Ccm kila siku wanaendelea kuamia upinzani huku waliobaki huko wakiwa wamekata tamaa kabisa na wengine wakiwasha endiketa ya kutaka kukimbilia chama hicho ambacho kimejaa majungu na siasa za kuviziana kila kukicha

Dizumba na viongozi wenzake wa Ccm wa wilaya na wapambe wao ndio wanaosababisha anguko la chama hicho katika Wilaya ya Songea mjini, hivyo kama kweli wanakitakia mema chama hicho wanapaswa kutambua kuwa utawala wa serikali inayofuata mfumo wa demokrasia, viongozi hawateuliwi bali huchaguliwa na hatma yao ipo mikononi mwa wananchi

Tambo na majigambo yao wanapokuwa kwenye kijiwe cha kisiwa ndui hazitakiacha chama hicho salama hata kidogo kwa sababu watu wengi wana malalamiko na majonzi kwa vitu vya ajabu wanavyovifanya ambavyo vitapelekea Ccm Songea mjini kionekana chama dhaifu cha upinzani kutokana na mwenendo huo

Wanapaswa kutambua kuwa uchaguzi maana yake ni utaratibu wa kuonesha utashi wa kile unachokitaka na usichokitaka, ni tendo la kuchagua kitu au mtu kwa sababu ya sifa nzuri. Ndiyo maana watu hupiga kura kuchagua wawakilishi wao kwenye vikundi mbalimbali vya kijamii,  Halmashauri,bungeni na maeneo mengine

Suala la wagombea kusimama ili wapigiwe kura kamwe haliwezi kuhusishwa na utashi wa kiongozi  kwani wanaohudhuria mikutano ya kampeni ndio wanaopima na kumchagua mtu anayefaa kuwawakilisha katika Halmashauri, bungeni na sehemu zingine kusudiwa

Kampeni ni wakati wa wagombea kunadi sera za vyama vyao kwa wananchi ili wajue ni kina nani, wa chama kipi wanaofaa kupewa ridhaa ya kuwawakilisha halmashauri,bungeni au kwingineko hivyo kuwatumia watu ambao toka wamezaliwa hawajawahi kuongoza hata kikundi cha watu kumi na wakati mwingine kutoa lugha za ovyo ni kutafuta anguko kubwa katika mizania ya siasa.

Chama cha Mapinduzi kinawasemaji wazuri wengi kuanzia ngazi ya shina hadi Wilaya pia kina madiwani, wabunge ambao wanafahamu kuzungumza na wapiga kura , hivyo kinapaswa kiwatumie watu hao kwani ni hazina kubwa, kwa sababu wao kuelezea mazuri ya chama na yale yaliyotekelezwa na Serikali ya chama wanauwezo mkubwa lakini kimewasahau au kuwadharau watu hao badala yake kinawaendekeza wahuni katika kuutafutia ushindi chama.

Wakati wa uchaguzi mkuu wa mwaka 2010 watu hao walitumika kukipigia kampeni chama na matokeo yake kata tano zilizopo mjini kabisa kuchukuliwa na Chama cha Chadema na katika uchaguzi huu mdogo uliofanyika hivi karibuni watu hao wametumika tena na kusababisha Kata hiyo ichukuliwe na upinzani.

Katika kampeni hizo zote zilifanywa kinyume cha makusudio yake kwa sababu badala ya wapiga debe kunadi sera za vyama vyao, walijikita zaidi kwenye maisha binafsi ya wagombea na familia zao wakiwachafua na kuwazushia mambo chungu nzima yasiyowahusu wapiga kura.

Waliokwenda shule wameshindwa kuonyesha tofauti na wasiokwenda shule ndio maana tumeona hata wapiga ramli wakiukwaa uongozi na kujidai kuwa uongozi wamepewa na Mungu.


Waimbaji wakichukua jukumu la kuishauri na kuidhibiti serikali. Na matokeo yake tunayaona. Tupo tulipo kwa sababu tumejiweka tulipo na kama hatua madhubuti hazitachukuliwa uchaguzi mdogo wa udiwani kata ya Mletele Manispaa ya Songea yatajitokeza kama yaliyotokea katika uchaguzi wa Lizaboni.


Kwa maneno mengine ninachokisema ni kwamba tunakwama kimaendeleo kwa sababu tunafanya siasa zisizo na akili. Ushahidi wa kauli yangu hii ni kampeni tulizoshuhudia hadi sasa. Tuhuma za kutekwa na kuteswa tumezisikia.tuhuma za rushwa na matusi tumezisikia


Siasa zinazolindwa kwa mtutu wa bunduki haziwezi kuwa siasa zitakazomkomboa mwananchi. Siasa zinazoangalia uwiano wa jinsia badala ya uchangamfu wa ubongo haziwezi kuja na suluhu ya matatizo yetu katika Wilaya ya Songea na mkoa kiujumla


Wakati wengi walioingia katika fani ya siasa wameamua kupumzisha akili zao, wananchi nao wameanza kuwashabikia wanasiasa mithili ya mashabiki wa soka ambao hushabikia timu fulani bila kuwa na sababu za msingi.


Ushabiki wa mpira huwa ni ushabiki kutoka moyoni tu, hakuna mtu anakaa na kufikiria kisha kuamua aipende timu ipi. Ndipo tulipofika na matokeo yake sasa tunayaona na tutaendelea kuyaona.


Matokeo ya ushabiki bila fikra, tumejikuta tuna wanasiasa uchwara wengi na bahati mbaya sana katika fikra zao hizo zilizoshindwa kupevuka wanaendelea kuwa viongozi wetu na wanaoamua mustakabali wa maisha yetu na kesho ya taifa letu.

Siasa za leo kwanza zinaanzia maslahi binafsi, halafu maslahi ya chama na labda ndio yanafuata maslahi ya taifa. Na ushahidi wa hili ni tatizo la rushwa katika chaguzi zetu. Mtu mzima anakubali kumpigia huyu au yule kura kwa sababu yeye amepewa chochote bila kujali ukubwa au thamani ya alichopewa

Nachelea kutoa hitimisho kwamba inabidi tufike mahali tuweke mikakati ya kuwapima uelewa wale wanaotaka nafasi za uongozi katika ngazi zote. Lakini mchawi wa yote ni vyama vya siasa. Vyama hivi vina nafasi nzuri sana ya kuchuja wanaofaa na wasiofaa.

Kutokana na muktadha huo, anguko la Ccm katika uchaguzi wa udiwani wa Lizaboni nililitegemea na kama watashindwa kujirekebisha kutokana na hulka zao basi natarajia anguko kubwa zaidi katika uchaguzi mdogo kata ya Mletele na chaguzi zingine

Mwandishi wa Makala

Anapatikana 0715-335051

http://www.stephanomango.blogspot.com/ 

CHADEMA YASHINDA UDIWANI MANISPAA YA SONGEA

DIWANI MPYA WA KATA YA LIZABONI (CHADEMA) ALANUS MLONGO

Na Stephano Mango,Songea.

MGOMBEA Udiwani kupitia Chama cha Demokrasia na Maendeleo (CHADEMA) katika Kata ya Lizaboni iliyopo Halmashauri ya Manispaa ya Songea Mkoani Ruvuma kwenye Uchaguzi mdogo ameshinda kwa kupata kura 1712 wakati Mgombea wa Chama cha Mapinduzi katika Kata hiyo George Oddo Mbunda alipata kura 1579.

Akitangaza matokeo hayo mara tuu baada ya kumaliza zoezi la uchaguzi lililoanza majira ya saa 1 asubuhi hadi saa 10 jioni Msimamizi msaidizi wa uchaguzi wa Kata ya Lizaboni Mussa Chiwango alimtangaza Alanus Mlongo wa Chadema kuwa ndiye aliyeshinda katika Uchaguzi huo.

Chiwango ambaye pia ni Afisa Mtendaji wa Kata hiyo alisema kuwa kwenye orodha ya daftari ya kupigia kura inaonyesha kuwa Wananchi waliojiandikisha ni 7825 lakini waliopiga kura ni 3315 jambo ambalo limeonyesha wazi kuwa wakazi wengi wa Kata hiyo hawakuweza kujitokeza kupiga kura.

Kwa upande wake Diwani Mteule wa Kata ya Lizaboni Mlongo mara tuu baada ya kutangazwa kuwa ni mshindi alieleza kuwa nafasi hiyo amepewa na Mwenyezi Mungu hivyo anawajibu mkubwa wa kuangalia changamoto zilizopo kwenye Kata hiyo ambazo zinahitajika zifanyiwe kazi haraka iwezekanavyo.

Alieleza zaidi kuwa mara tuu baada ya kuapishwa kazi yake ya kwanza itakuwa ni kuhakikisha kuwa ana ubana uongozi wa Halmashauri ya Manispaa ili kumaliza tatizo kubwa lililopo la Miundo mbinu ya barabara,maji na Ujenzi wa vyumba vya madarasa kwenye Shule za Sekondari za Londoni na Mjimwema.

Naye Katibu wa Jimbo la Songea la Chama hicho Masumbuko Paul Masumbuko aliiambia www.stephanomango.blogspot.com kuwa ushindi walioupata kwenye uchaguzi mdogo kwenye Kata ya Lizaboni ni endiketa kwa Ccm kwamba kila Uchaguzi utakapofanyika kuanzia sasa Chadema lazima washinde kwani mpaka sasa Halmashauri ya Manispaa ya Songea ina Kata 21 ambapo kati ya hizo Kata sita zina ongozwa na Madiwani wa Chadema.

Alibainisha zaidi kuwa mbinu zilizotumika ambazo zimefanikisha ushindi kwenye Kata ya Lizaboni ndizo mbinu zinazotarajia kufanyika kwenye Kata nyingine ya Mletele ambayo iko wazi tangu Diwani wa Kata hiyo alipofariki dunia miezi 2 iliyopita.
Aidha Masumbuko alisikitishwa na kitendo cha baadhi ya wafuasi wa Ccm ambao walikwenda kwenye maeneo ya kupigia kura huku wakiwa na vitisho lakini kwa vile wafuasi wa Chadema nao walijipanga walifanikisha kukamata gari la kigogo mmoja wa Ccm likiwa limesheheni fimbo ambazo zinahofiwa kuwa zilikuwa zinatakiwa kutumika kwaajili ya kuwapigia wafuasi wa Chadema jambo ambalo liliufanya uongozi wa Chama cha Chadema kumtafuta mmiliki wa hilo gari ambaye hakutaka kutaja jina ili aweze kueleza ni kwanini aliamua kuchukua fimbo kwenye gari lake na kupeleka kwenye eneo la kupigia kura.

Alisema kuwa licha ya mmiliki wa gari hilo kutoa sababu ambazo ni dhaifu kuwa alikuwa amemtuma dereva wake kwenda kijijini kutafuta fito ambazo zingemsaidia kujengea zizi la mbuzi askari Polisi waliokuwakwenye doria waliikamata gari hiyo na kuiondoa kwenye eneo hilo na kufanikisha mpaka uchaguzi unakwisha usalama kwa wapiga kura unakuwepo jambo ambalo amelieleza kuwa jeshi hilo la Polisi linastahili pongezi tofauti na walivyokusudia.

Hata hivyo Kamanda wa Polisi wa Mkoa wa Ruvuma Michael Kamuhanda alipoulizwa www.stephanomango.blogspot.com kuwa katika zoezi zima la uchaguzi mdogo wa Kata ya Lizaboni kama kulikuwepo na tofauti yeyote alisema kuwa Jeshi lake lilijipanga katika maeneo yote ya Kata hiyo kwa kuhakikisha kuwa Vituo vyote vya kupigia kura vinalindwa bila kuwepo vurugu ya aina yeyote na aliongeza kuwa suala la gari kukamatwa likiwa limebeba fimbo Ofisini kwake lilikuwa bado halijamfikia na alidai kuwa inawezekana lilimalizwa na askari wake wa chini ambao waliona hakuna sababu ya msingi ya kuendelea kulishikilia gari.

Mgombea wa Udiwani wa Chama cha Mapinduzi Mbunda alipoulizwa na www.stephanomango.blogspot.com kuhusiana na zoezi zima la uchaguzi alisema kuwa kubwa zaidi anawashukuru Wakazi wa Lizaboni ambao walionyesha nia ya kutaka awe Diwani wao lakini kwa bahati mbaya kura hazikutosha hivyo amewaomba wawe na subira hadi hapo mambo ya uchaguzi yatakapojitokeza tena.

Mweneykiti wa Umoja wa Vijana wa Ccm (UVCCM) wa Wilaya ya Songea Mjini Victor Ngonyani amesema kuwa kuvunjika koleo sio mwisho wa uhunzi hivyo kushindwa kwa Ccm kwenye uchaguzi mdogo huo wa Udiwani ni changamoto kubwa ambazo zinapaswa kufanyiwa kazi na Chama cha Mapinduzi ili changamoto kama hizo zisijirudie tena na kwa kuto kuoneana haya kwa Wanachama ambao wanaonekana kuwa ndiyo waliosababisha Ccm kupigwa na Chadema.
MWISHO.

CCM SONGEA YAISHIKA PABAYA CHADEMA KAMPENI ZA UDIWANI MANISPAA YA SONGEA

Hamis Abdala Ally ambaye ni mmoja wa timu mahiri ya kampeni ya Chama cha Mapinduzi Manispaa ya Songea akizungumza kwenye mkutano huo wa kampeni wa kumnadi George Oddo kuwa diwani katika kata ya Lizaboni



Ibrahimu Ngaponda akiwahutubia wananchi wa Madizini kata ya Lizaboni kwa lengo la kuwahamamisha wananchi hao kumchagua George Oddo ili awe Diwani wa Kata ya Lizaboni



Add caption



Mgombea udiwani kupitia Ccm Kata ya Lizaboni George Oddo akiomba kura kwenye moja ya mikutano ya kampeni za udiwani



Katibu wa Siasa na Uenezi wa Chama cha Mapinduzi Manispaa ya Songea Zuberi Mtelela akiwahutubia wananchi wakati wa mkutano wa kampeni za kumnadi George Oddo jana



Katibu wa Siasa na Uenezi wa Chama cha Mapinduzi Mkoa wa Ruvuma ambaye pia ni Diwani wa Vitimaalumu Manispaa ya Songea Genfrida Haule akiwaomba wananchi wamchague George Oddo kuwa diwani wa Kata ya Lizaboni





Mstahiki Meya wa Halmashauri ya Manispaa ya Songea ambaye pia ni Diwani wa Kata ya Matogoro Charles Mhagama akiwahutubia wananchi wa kata ya Lizaboni kwenye mkutano wa kampeni za Ccm



Meneja Kampeni wa Kata ya Lizaboni Kwinyelesa kulia akimnadi George Oddo kuwa diwani wa Kata hiyo ili aweze kushirikiana na wananchi wa kata hiyo kusukuma mbele gurudumu la maendeleo mbele

Na Stephano Mango, Songea

WANANCHI wa Kata ya Lizaboni Manispaa ya Songea Mkoani Ruvuma wametakiwa kuwa makini katika kufanya maamuzi sahihi ya kumchagua Diwani wa Kata hiyo katika uchaguzi unatarajiwa kufanyika aprili mosi mwaka huu kwa kumchagua mgombea wa Chama cha Mapinduzi ili aweze kushirikiana na wananchi katika kusukuma mbele gurudumu la maendeleo

Wito huo umetolewa jana na Katibu wa Siasa na Uenezi wa Chama cha Mapinduzi Mkoa wa Ruvuma ambaye pia ni Diwani wa Vitimaalum Manispaa ya Songea Genfrida Haule kwenye mkutano wa hadhara wa kampeni za udiwani kata ya Lizaboni uliofanyika kwenye viwanja vya Shule ya Msingi Madizini

Haule alisema kuwa Chama cha Mapinduzi kina hazina kubwa ya makada ambao wanaweza kuipeperusha bendera ya chama katika uchaguzi huu wa udiwani lakini kutokana na busara za viongozi wa Ccm na matakwa ya wananchi tumemteua George Oddo aweze kuwatumikia wananchi wa kata hii

Alisema kuwa awali Kata hiyo ilikuwa ina matatizo mengi sana katika sekta ya Afya, elimu, barabara, maji na masoko lakini kutokana na sera nzuri za Ccm kwa kupitia aliyekuwa Diwani wa Kata hii marehemu Said Ali Manya Serikali ya inayoongozwa na Ccm ilikuwa sikivu na ndio maana mnaona maendeleo makubwa katika Kata ya Lizaboni

Alieleza zaidi kuwa kuna baadhi ya kero bado zipo kwenye kata hii hivyo ni vema mkamchagua diwani kupitia tiketi ya Ccm ili aweze kumalizia ahadi na kero ambazo marehemu ally Said Manya aliziorodhesha kwa kuweka mikakati ya utekelezaji ili kuleta mabadiliko zaidi ya kimaendeleo

Naye Hamis Abdala Ally ambaye ni mmoja wa timu mahiri ya kampeni ya Chama cha Mapinduzi alisema kuwa wananchi wanapaswa wazipuuze kelele za wapinzani ambao kwao kuona damu inamwagika katika Kata ya Lizaboni kwao ni ushindi

Ally alisema kuwa Chadema wamekosa sera na umakini katika kampeni zao kwa kushindwa kueleza mambo ambayo yataweza kuwasaidia wananchi badala yao wanaendekeza fujo na matusi huku wakishabikia kwa nguvu ukubwa uvunjifu wa amani katika kata hiyo

“ Nimesikitika sana kuona viongozi wa Chadema wanafurahia kuona kuna kijana amepigwa panga na kujeruhiwa vibaya na ajali ya kugongwa kwa mtoto juzi na kudai kuwa kwa kuwa damu imemwagika sasa ndio dalili ya ushindi kwao jambo ambalo linatia shaka wananchi na kudhani kuwa wao ndio waliopanga uvujaji damu huo” alisema Ally

Alieleza zaidi kuwa Serikali ya Chama cha Mapinduzi imefanya mambo mengi toka upatikana uhuru wan chi hii kwa kuwawezesha wananchi kupata barabara safi, maji safi na salama, elimu, afya, masoko, na uwezeshaji wa mitaji ya kiuchumi kwa kuzungumza na taasisi za fedha kupunguza masharti katika mikopo yao kwa wananchi

Alifafanua kuwa kupatikana kwa vitu hivyo ndiko kunakosababisha wananchi wapate ustawi wao na kuchangia kuleta maendeleo kusudiwa kwani watakuwa wamekombolewa kwa kiasi kikubwa sana na kwamba mapungufu mengine yanafanyiwa kazi kwani yanafahamika waziwazi

Alisema kuwa kwa kuwa Serikali iliyopo madarakani ni ya Ccm na iliwekwa na wananchi hivyo kuwasikiliza Chadema kuwa wataleta maendeleo ni uongo mkubwa na kitendo cha kuwapigia kura aprili mosi mwaka huu ni kutupa kura zenu na mtasimamisha maendeleo kwa kipindi kirefu

Alifafanua kuwa nyinyi wenyewe wananchi ni mashahidi hakuna mwaka ambao wananchi wamelima mahindi mengi kama mwaka jana lakini Serikali imeyanunua yote na mengine yanaendelea kupelekwa kwenye hifadhi ya chakula sasa hao wanaosema mbolea imechakachuliwa na kusema Serikali imeshindwa kununua mahindi wanapata wapi ujasiri kama sio kuwadanganya wananchi?

“ Eti Zitto Kabwe anafika nyumbani kwa watu badala ya kuuliza wenyeji, yeye anakurupuka na kusema hapa kuna matatizo ya wizi wa mbolea, mafuta ya jenereta za umeme hivyo ichagueni Chadema ili idhibiti hilo, sasa kama wao wanafahamu kuna wizi kwanini wasiiambie Polisi ili mwizi akamatwe badala yake wanataka udiwani kwani Diwani ni Polisi? Watadhibiti kwa njia gani? Kama sio wao ndio wanaofanya mchezo huo mchafu?”

Alisema kuwa hali ya umeme ni ya uhakika kwasababu kulikuwa na tatizo la kiufundi lakini tayari Shirika la Tanesco limeshafanya kazi yake na umeme unapatikana ambapo wananchi wanaendelea na shughuli zao za kujiingizia kipato ili kuyafikia malengo ya maendeleo

Akizungumza kwenye mkutano huo Katibu wa Siasa na Uenezi wa Ccm Wilaya ya Songea Mjini Zuberi Mtelela alisema kuwa wananchi mpigieni kura Oddo George ili aweze akaungane na madiwani wenzake ili aweze kutimiza ahadi ambazo tuliziahidi wakati wa uchaguzi  mkuu wa mwaka 2010

Mtelela alisema kuwa mkiichagua Chadema licha ya kuwa mtakuwa mmepoteza kura zenu na kusimamisha maendeleo kwa miaka mitatu bali mtakuwa mmeongeza kikundi cha watu wenye fujo kinachoshabikia mambo mabaya kwa jamii ya Manispaa ya Songea

Kwa upande wake Katibu wa Jumuiya ya Vijana Mkoa wa Ruvuma Mwajuma Rashid alisema kuwa Chadema wamejipanga kuleta vurugu siku ya uchaguzi na tayari wameanza kuwapiga na kuwatishia viongozi wa Ccm hivyo wananchi mkiwapa kura watu hao mtakuwa mnajenga kizazi cha vurugu na kukwamisha maendeleo yaliyopangwa katika kata ya Lizaboni

Rashid alisema kuwa sisi tumetulia lakini uvumilivu una mwisho wake na endapo mamlaka zinazo husika hazitadhibiti mwenendo huo ambao unahatarisha amani katika uchaguzi huo nasi tunaweza tukatumia nguvu zetu ili wapiga kura na wanachama wa Ccm wawe salama

Naye Mwenyekiti wa Ccm Manispaa ya Songea Hemed Dizumba alisema kuwa kazi kubwa inafanywa na wananchi wa Lizaboni ndio maana Chadema wana haha kwani tayari wenyewe wanajua kuwa ushindi kwao haupo

Dizumba alisema kuwa ushahidi upo wazi kutokana na maneno wanayowasema wenyewe kwasababu hizo mbwembwe walizonazo wameshagundua kuwa zinaletwa na washabiki wao kutoka Bombambili, Majengo, Mjini, Mfaranyaki, Misufini na Ruvuma lakini sisi tunazungumza na watu wa Lizaboni ambao ndio wapiga kura

Kwa upande wake mgombea udiwani kupitia Chama hicho Oddo George alisema kuwa uzuri wa Serikali ya Chama cha Mapinduzi wananchi mmeuona hivyo hakuna sababu ya kuichagua Chadema katika uchaguzi huo

George alisema kuwa mipango ipo wazi kinachotakiwa ni wananchi kukubari april mosi mwaka huu kuwa inapaswa kuitekelezwa na Chama cha Mapinduzi kupitia Diwani wake ambaye ni mimi hivyo wananchi naomba kura zenu zote ili niweze kuibeba mikoba aliyoiacha marehemu Ally Said Manya mabaye alikuwa Diwani wa kata hii kupitia Ccm

Alisema kuwa kama kweli wananchi wa Kata ya Lizaboni mnaheshimu maendeleo mliosaidiana kuyaleta Kata ya Lizaboni na Marehemu Manya basi msipoteze kura zenu kwa kumchagua mgombea wa Chadema ambaye ameshaonyesha kuwa hana dhamira ya dhati ya kuwaletea maendeleo watanzania

MWISHO

TIMU YA MLALE JKT YAMWAGIWA VIFAA VYA MICHEZO

Mkuu wa Mkoa wa Ruvuma Said Mwambungu

Na Augustino Chindiye, Songea

MKUU wa Mkoa wa Ruvuma Said Mwambungu ametoa vifaa vya Michezo kwa timu ya JKT MLALE ambayo ndio timu pekee ya Mkoa huo iliyotinga katika hatua ya Tisa Bora ya Ligi ya Taifa daraja la kwanza.

Vifaa vilivyokabidhiwa ni Mipira 16, na viatu jozi 25 vyote vikiwa na thamani ya shilingi milioni 2.5, zikiwa ni juhudi za serikali ya Mkoa huo kukamirisha maandalizi ya timu hiyo itakayowakilisha Mkoa wa Ruvuma katika Ligi hiyo inayo tarajia kutimua vumbi mwishoni mwa mwezi huu.

Akiongea katika makabidhiano ya msaada huo Mkuu wa mkoa Mwambungu pamoja na mambo mengine ali toa wito kwa wananchi wa Mkoa huo kuunganisha nguvu zao na kuiunga mkono timu yao.

Alisema baada ya timu ya Majimaji kufanya vibaya katika ligi hiyo hivi sasa mkoa wake umeelekeza nguvu katika timu hiyo wakiwa na matumaini kuwa timu hiyo ita watoa kwa kuujengea heshima mkoa Mkoa wa Ruvuma

Nao viongozi wa timu ya JKT Mlale na Chama Cha Mpira wa Miguu Mkoani hapa (FARU) Joseph Mapunda na mwakilishi wa Kikosi cha Mlale Isack Kusimbwa pamoja na neno la shukiurani kwa msaada huo walimuahidi Mkuu wa Mkoa kuwa watahakikisha timu hiyo inatinga ligi kuu.

Walisema msaada huo umefika wakati muafaka na wakaahidi kufikisha vifaa hivyo kwa walengwa pamoja na salamu zake kwa wachezaji wote na wakatumia nafasi hiyo kumkaribisha kiongozi huyo kushiriki katika michezo hiyo ili aweze kujionea kazi ya vijana wake.

Mwisho

WAKULIMA WA KOROSHO TUNDURU BADO HAWAJALIPWA MADAI YAO LICHA YA SERIKALI KUTOA AGIZO

       Mkuu wa wilaya ya Tunduru Juma Madaha

Na Augustino Chindiye, Tunduru

WAKATI kukiwa na maelekezo kutoka Serikani kuwa mabenki yatoe fedha zitakazotumika kuwalipa malipo ya pili, pamoja na kulipia korosho ilizo kopwa kutoka kwa wakulima wa zao hilo wakulima wa wilaya ya Tunduru Mkoani Ruvuma malipo hayo bado hayajaanza  kutolewa.

Hayo yamesemwa na Meneja wa Chama kikuu cha Ushirika wa wakulima wilayani Tunduru (TAMCU) Imani Kalembo alipotakiwa kuzungumzia utekelezaji wa agizo hilo kutoka serikalini.

Akifafanuaa taarifa hiyo Bw. Kalembo alisema kuwa malipo hayo yameendelea kukwama kutokana na majibu ya viongozi wa Benki ya NMB tawi la Tunduru waliodai kuwa bado hawajapokea maelekezo kutoka makao yao makuu juu ya kuanza kutoa fedha hizo zitakazotumika wakati wa malipo hayo.

Katika taarifa hiyo Kalembo alisema kuwa jumla ya tani 4800 zimekwama katika maghala na kusababisha malipo kwa wakulima wa Korosho wilayani humo kushindwa kutolewa ni sehemu ya tani 7000 zilizozalishwa Msimu wa mwaka 2011/2012.

Alisema katika msimu huu Wilaya hiyo ilibahatika kuuza katika mnada mmoja tu kati ya minada 9. ambapo iliuza tani kama 1100 na kwamba hayo ilitokana na wanunuzi wakubwa kukataa kununua korosho hizo kwa bei ya shilingi 1480 kwa kilo moja  waliyoitaka wakulima hao wakiwa wanashinikiza wanunue kwa chini ya shilingi 1400.

Kufuatia hali hiyo baadhi ya vyama vya msingi vya ushirika vya wakulima wa wilaya hiyo vimepata changamoto ya baadhi ya wakulima wake kuondoa korosho maghalani na kuanza kuuza korosho zao kwa walanguzi ambao hutumia kipimo halamu kiitwacho KANGOMBA yaani bakuli linalobeba kilo 2 linanunuliwa kwa shilingi 600.

Akizungumzia hali hiyo Mkuu wa Wilaya ya Tunduru Juma Madaha pamoja na kuipongeza serikali kwa kutoa tamko hilo alisema kuwa ofisi ya kwa kushirikiana na uongozi wa Mkoa huo zikiwa ni juhudi zaa kuhakikisha kuwa malipo hayo yatolewe kwa haraka.
Mwisho

MKURUGENZI WA WILAYA YA NAMTUMBO MKOANI RUVUMA ATISHIWA KUUAWA

Kamanda wa Polisi Mkoa wa Ruvuma Michael Kamuhanda

Na Stephano Mango, Songea

JESHI la Polisi mkoani Ruvuma linawasaka watu wasiofahamika wanaodaiwa kumtishia kumuua Mkurugenzi Mtendaji wa Halmashauri ya wilaya ya Namtumbo Mussa Zungiza(56) ambaye inadaiwa kuwa alitumiwa ujumbe wa maandishi kwenye simu yake ya mkononi akitishiwa kuuawa  .

Akizungumza na www.stephanomango.blogspot.com  jana mchana ofisini kwake Kamanda wa Polisi mkoa wa Ruvuma Michael Kamhanda alisema kuwa tukio hilo lilitokea machi 25 mwaka huu majira ya saa za mchana huko katika wilaya ya Namtumbo .

Kamanda Kamhanda alieleza zaidi kuwa inadaiwa mnamo siku tofauti za mwezi machi mwaka huu huko katika wilaya ya Namtumbo Mkurugenzi Mtendaji wa Halmashauri  ya wilaya hiyo Zungiza alipokea ujumbe wa maandishi kupitia kwenye simu yake ya mkononi akitishiwa kuuawa. 

Alibainisha zaidi kuwa kwenye simu hiyo ya mkononi ujumbe huo ulitoka  katika namba  mbalimbali za simu,ambapo ujumbe wa kwanza ulitumwa machi 14 mwaka huu  majira ya saa 1:46 asubuhi na ujumbe wa pili ulitumwa  mach 14 mwaka huu majira ya saa 4:08 usiku .

Alieleza zaidi kuwa ujumbe huo ulieleza kuwa siku yoyote Zungiza atauawa kwa njia ya aina yoyote na kutoeleza chanzo au sababu ya kutaka kumuuwa ,jambo ambalo lilimpa hofu kubwa juu ya maisha yake .

Kamanda Kamhanda alisema kuwa Mkurugenzi Mtendaji huyo Zungiza  baada ya kupokea ujumbe huo kupitia kwenye simu yake ya mkononi  hatua ya kwanza alichukua ya kuwasiliana na kamati ya ulinzi ya wilaya hiyo na kisha alitoa taarifa juu ya ujumbe huo aliotumiwa wa vitisho katika kituo cha polisi cha wilaya ya Namtumbo ambako lilifunguliwa jalada la uchunguzi .

Hata hivyo kamanda Kamhanda alisema kuwa jeshi la polisi mkoani Ruvuma  linaendelea na upelelezi zaidi wa kina kuhusiana na tukio hilo ili kuwabaini watu waliohusika kumwandikia ujumbe kupitia simu yake ya mkononi ambao ulimtishia kumuuwa Zungiza.

 MWISHO

AKAMATWA NA POLISI BAADA YA KUMZIKA MWANAE KICHANGA MAMA AKIWA HAI

Kamanda wa Polisi Mkoa wa Ruvuma Michael Kamuhanda

NA GIDEON MWAKANOSYA ,SONGEA

JESHI la polisi mkoani Ruvuma limemtia mbaroni Anna Mhenga (25) mkazi wa Bombambili katika Halmashauri ya Manispaa ya Songea kwa tuhuma za kumtupa mtoto wake mwenye umri wa siku moja  kwenye eneo la msitu wa milima ya Chandamali ambako alichimba shimo na kumfukia .

Habari zilizopatikana jana mjini Songea ambazo zimethibitishwa na Kamanda wa Polisi wa mkoa wa Ruvuma Michael Kamhanda zilisema kuwa tukio hilo lilitokea machi 24 mwaka huu majira ya saa za mchana huko katika eneo la msitu wa Chandamali uliopo katika Manispaa ya Songea.

Kamanda Kamhanda alisema inadaiwa kuwa siku hiyo ya tukio Anna alijifungua mtoto wa jinsia ya kike kisha aliondoka eneo la nyumbani kwake na alielekea kwenye eneo la msitu mkubwa wa miti wa Chandamali ambako aliamua kuchimba shimo na kukifukia kichanga alichotoka kujifungua .

Alifafanua kuwa inadaiwa kuwa Anna alijifungua mtoto huyo akiwa na ujauzito wa miezi 7 kisha alifikia uamuzi wa kumtupa mtoto wake kwa kumfukia  jambo ambalo liliwafanya majirani wamshitukie ambapo mmoja kati yao ambaye ndiye raia mwema alitoa taarifa katika kituo kikuu cha Polisi cha Songea.

Alieleza zaidi kuwa Polisi baada ya kupata taarifa ya tukio hilo walifanikiwa kumkamata Anna ambapo katika mahojiano ya awali mtuhumiwa alikataa kuhusika na tukio hilo na baada ya upelelezi zaidi wa Polisi alikiri kuwa ni kweli alikuwa na ujauzito .

Alifafanua zaidi kuwa machi 26 mwaka huu majira ya saa za asubuhi  mtuhumiwa Anna alipelekwa kwenye Hospitali ya Serikali ya mkoa Songea kupimwa ambako ilibainika kuwa mazingira yote yalionyesha kuwa mtuhumiwa alitokakujifungua .

Alieleza zaidi kuwa Polisi baadaye waliendelea kumhoji na alikubali kuwa ni kweli alijifungua mtoto wa jinsia ya kike ambaye alidai kuwa amemzika kwenye msitu mkubwa wa miti uliopo eneo la Chandamali .

Kamanda Kamhanda alibainisha zaidi kuwa inadaiwa mtuhumiwa baadaye aliwapeleka askari Polisi kwenye msitu wa Chandamali ambako aliwaonyesha mahali alipomfukia mtoto huyo ambapo walichukua jukumu la kufukua eneo hilo na kukuta maiti ya kichanga ikiwa ndani ya shimo.

Alisema kuwa maiti ya kichanga huyo baadaye ilichukuliwa na kupelekwa kuhifadhiwa katika chumba cha kuhifadhia maiti kilichopo katika hospitali ya Serikali ya mkoa Songea na Polisi bado inaendelea kufanya uchunguzi kuhusiana na tukio hilo .

MWISHO

DKT EMMANUEL NCHIMBI MBUNGE WA SONGEA MJINI NA WAZIRI WA HABARI UTAMADUNI NA MICHEZO ATINGA KAMPENI ZA UDIWANI KATA YA LIZABONI MANISPAA YA SONGEA

 Mbunge wa Jimbo la Songea Mjini na Waziri wa Habari, Utamaduni na Michezo Dkt Emmanuel Nchimbi akimnadi mgombea wa Udiwani wa Kata ya Lizaboni, Manispaa ya Songea kupitia CCM  George Oddo aliyesimama kushoto kwenye mkutano uliofanyika kwenye ofisi za CCM kata ya Lizaboni jana

 Mamia ya wananchi wakimsikiliza Mbunge wa Jimbo la Songea Mjini na Waziri wa Habari, Utamaduni na Michezo Dkt Emmanuel Nchimbi akimnadi mgombea wa Udiwani wa Kata ya Lizaboni, Manispaa ya Songea kupitia CCM  George Oddo kwenye mkutano uliofanyika kwenye ofisi za CCM kata ya Lizaboni jana

Mbunge wa Jimbo la Songea Mjini na Waziri wa Habari, Utamaduni na Michezo Dkt Emmanuel Nchimbi akimnadi mgombea wa Udiwani wa Kata ya Lizaboni, Manispaa ya Songea kupitia CCM  George Oddo kwenye mkutano uliofanyika kwenye ofisi za CCM kata ya Lizaboni jana

KONGANO BUNIFU ZINA MCHANGO KATIKA KUKUZA UCHUMI WA NCHI

 Aliyekuwa mgeni rasmi katika ufungaji wa mafunzo ya Wawezeshaji Kongano Mkuu wa Mkoa wa Rukwa Mhandisi Stella Manyanya( MB) akimkabidhi Cheti cha kuhitimu mafunzo hayo mmiliki wa mtandao wa www.stephanomango.blogspot.com ,Stephano Mango,wa kwanza kushoto ni Kaimu Mkurugenzi Mkuu wa Tume Sayansi na Teknolojia Dkt Dugushilu Mafunda. wa kwanza kutoka kulia ni Wawezeshaji wa mafunzo hayo Dkt Flower Msuya na Mhandisi Peter Chisano

Mgeni rasmi aliyefunga mafunzo hayo Mkuu wa Mkoa wa Rukwa Mhandisi Stella Manyanya (MB) akiwa kwenye picha ya pamoja naViongozi wa Tume ya Sayansi na Teknologia na washiriki wa mafunzo ya Wawezeshaji Kongano Tanzania yaliyofanyika Ukumbi wa The Beach Comber Hotel kuanzia Februari 27 hadi machi 1, 2012

NA STEPHANO MANGO,SONGEA

HAKUNA ubishi kuwa umaskini nchini Tanzania umebaki kuwa kikwazo kikubwa kwa maendeleo ya nchini yetu ingawa pia Tanzania ina matajiri wakubwa wachache na maskini wengi.

Kwa mtazamo wangu mtu maskini ni yule asiye na uchaguzi kwenye chakula, hawezi kuyakataa magonjwa wala ujinga katika maisha yake kwani kwake kila kitu ni kigumu na amekuwa sugu katika hali hiyo

Umaskini nchini umeota mizizi wanaishi kwa kipato duni sana kwani wengi wanaishi chini ya dola moja ya marekani kwa siku, umaskini upo mijini na vijijini watu wanatia huruma ukiwaona kutokana na ugumu wa maisha kutokana na sababu mbalimbali

Ikiwemo ya viongozi wetu wengi wanashindwa  kutambua na kuifungua mifumo ya kiuchumi, kisiasa na hata kijamii ili kuwawezesha wananchi kwa wingi wao ili wawe washiriki na wadau muhimu katika kumiliki uchumi wao

Watanzania wengi kushindwa kuwa na maamuzi juu ya mustakabali wa Taifa lao leo na kesho kunaendelea  kuwafanya wageni kutumia vibaya rasilimali tulizojaliwa kuwa nazo

Ni wazi kuwa watanzania tuna rasilimali za kutosha ambazo zinaweza kutukwamua kwenye tope zito la umaskini lakini hatujaweza kuzitumia vizuri na mbaya zaidi tumewaachia wageni ndio wamiliki na kuzitumia kwa ujeuri rasilimali zetu kwa muavuli wa uwekezaji

Hali hiyo inatufanya tuendelee kuwa maskini wa kutupwa na kujenga utamaduni mpya wa utegemezi kwa mataifa ambayo tumewaachia wachume mali zetu na kukimbizia huko kwao

Taifa letu, leo limekuwa na watu tegemezi kuanzia ngazi ya mtu binafsi, kaya, jamii, na hata Taifa, swali la kujiuliza sasa ni je tu wategemezi kwa kiasi gani na je, miaka 50 ijayo tunataka tuwe na Taifa la aina gani?

Utegemezi sio jambo zuri kwani unapunguza uhuru wetu, unatukosesha thamani, tunakosa sauti ya kimaamuzi na unatufanya tuwe wadogo mbele ya wahisani au wafadhiri tunaowategemea

Katika makala haya, nakusudia kujadili jambo chanya la kongano bunifu kama ishara ya kufanya mageuzi ya kiuchumi na kuondoa dhana ya utegemezi kama Taifa na jamii kiujumla kwani katika nchi nyingine jambo hili limesaidia kuinua na kuimarisha uchumi wao

Kongano bunifu zipo nyingi nchini ambazo ili ziweze kuleta mabadiliko ya kiuchumi katika ngazi ya kijamii hadi kitaifa zinahitaji kuunganika ili ziwe na nguvu ya pamoja katika soko la bidhaa kwa kushirikiana na  sekta binafsi, serikali na wanataaluma katika kongano mahsusi kwenye maeneo mbali mbali hapa nchini kwetu.

Katika nchi nyingi ushirikiano huu umekuwa kichocheo kikubwa cha  ubunifu  ambao husaidia katika kutoa bidhaa zenye viwango na sifa zinazoweza kuhimili ushindani ndani na nje ya nchi kwa malengo kusudiwa

Kongano bunifu zina uwezo mkubwa wa kupunguza umaskini na kutoa nafasi nyingi za kazi kwa jamii pia vilevile Kongano hizi huleta mahusiano ya karibu sana kati ya wanachama wa kongano na wadau wengine wa maendeleo kama vile  wanataaluma, sekta binafsi na serikali.

Wengi wanaweza kushangaa neno kongano bunifu kwani inawezekana halijazoeleka masikioni mwa watu wengi, ili niweze kuwatendea haki wasomaji na wananchi nieleze kidogo maana ya neno hilo

Kongano bunifu ni muunganiko wa shughuli za aina moja za wajasiliamali wenye malengo sawa na wanaofanya kazi katika eneo/ wilaya, mkoa na Taifa moja katika kukabiliana na changamoto mbalimbali zinazowakabili katika shughuli yao

Mfano ni wachongaji vinyago, wahunzi, wakulima wa uyoga, mwani, alizeti, mahindi, maharage, ufuta mpunga, wavuvi, wafugaji kuku, watengenezaji batiki, wasindikaji wa mazao, wafugaji wa wanyama mbalimbali, wavuvi na vikundi vya wajasiliamali kama hao

Wajasiliamali wanaojishughulisha na ufugaji wa kuku katika wilaya nzima wanaweza wakatengeneza jukwaa lao(kongano bunifu) litakalokuwa linajadili namna bora ya kuimarisha ufugaji wa kuku ,soko, mitaji, changamoto nyingine zinazowakabili katika kufikia hali stahiki, hiyo ndiyo maana ya kongano bunifu

Kwa kutambua umuhimu wa kongano bunifu katika kuleta uchumi imara wa jamii na Taifa, kuanzia februari 27 hadi machi 1, mwaka huu wa 2012 Tume ya Sayansi na Teknolojia nchini iliweza kutoa mafunzo kwa wawezeshaji kongano katika ukumbi wa The beach Comber, jijini Dar es Salaam

Washiriki wa mafunzo hayo walitoka Tanzania bara na Visiwani ambapo jumla ya washiriki 46 kutoka kwenye kongano 26 nchini walifanikiwa kupata mafunzo hayo muhimu yenye lengo la kukuza kukuza uwezo wao katika kuhamasisha na kuanzisha ushirikiano kati ya sekta binafsi, serikali na wanataaluma katika kongano mahsusi kwenye maeneo mbali mbali hapa nchini kwetu.

Ili washiriki waweze kupata ujuzi wa kuweza kuimarisha kongano ambazo ziko katika mazingira wanakofanyia kazi ili kukuza mkakati wa kuongeza Ubunifu na Ushindani wa  sekta binafsi kupitia kongano bunifu kwa lengo la kuchochea maendeleo ya kiuchumi nchini

Wawezeshaji wa mafunzo hayo walikuwa watanzania ambao ndio wamekuwa wawezeshaji katika nchi za Nigeria, Msumbiji, Ghana, Senegal, Tanzania na Kenya ambao ni Dkt Flower Msuya, Sostenes Sambua na Peter Chisano

Washiriki wa mafunzo hayo waliweza kutoa elimu stahiki ya kuimarisha kongano bunifu katika katika maeneo ambayo washiriki wanatoka ili ziweze kuwa na nguvu moja katika kufanya wazalishaji watengeneze bidhaa bora zenye kukidhi ushindani katika masoko ya ndani na nje.

Kutokana na hilo na kila mmoja akatimiza wajibu wake tuna kila sababu ya kuongoza bara zima la Afrika katika kuonyesha umuhimu wa Kongano bunifu jinsi zilivyoweza kusaidia katika kuongeza pato la taifa, ajira na maendeleo ya jamii , uchumi, ubunifu na Ushindani wa Taifa katika masoko ya nje

Ni vema sasa nchi ikaanza kuendeleza dhana ya kongano bunifu kama njia ya kufikia maendeleo ya kiuchumi nchini kwa kushirikisha wajasiliamali kutumia vema fursa zilizopo za maliasili zetu ili ziwe nguzo kubwa katika kufikia lengo stahiki

Kuanza upya kimtazamo ni fursa ya kubadilika na kuchukua mambo mazuri mapya ambayo kutoka kwa wengine au pale yanapopatikana hata ndani yetu kutasababisha kutuondoa kwenye utegemezi wa kiuchumi na kuondokana na umasikini uliokithili nchini

Kesho ya Tanzania hatuwezi kuongelea bila leo na kila tunachopanda leo ndicho tunachovuna kesho, hivyo msingi wa leo tuliujenga jana uwe mbovu au mzuri pia kwa sababu leo ipo kwa sababu ya kesho ipo na jana ilikuwepo basi leo tunapaswa kubadilika ili tuijenge vyema kesho yenye neema

Leo tukianza upya basi kesho tutazaliwa upya na tukizaliwa upya ndipo hapo tunapopaswa kuwa , hivyo kujifunza na kuanza upya ni ujasiri na ni njia ya kuleta mabadiliko katika dunia ya leo bila kujali gharama za kufanya hivyo

Tuanze upya kwa kuwa wajasiriamali mahiri chini ya kongano bunifu kwani ujasiriamali ni ile hali, uwezo na mkakati au mchakato wa kubuni, kuanzisha, kuendesha na kumudu shughuli halali ya maendeleo ya kiuchumi

Tunahitaji ujasiliamali wa kujiamini, kuthubutu, kubuni na kuendeleza zao tokeo la ubunifu huo kwa kuleta faida chanya katika maisha yake, jamii na Taifa kiujumla kwani ujasiliamali ni nguzo muhimu kwa uchumi wa kisasa wa karne ya 21

Dhana ya ujasiliamali inatimia endapo hali ya kugundua au kubuni biashara mpya au kuiendeleza ile ya zamani kwa ajili ya kuwekeza na kutoa huduma stahiki kwa jamii pana, hivyo tuamue sasa kuwa katika hali hiyo katika jukwaa la dunia ili kuzifaidi fursa za uchumi za ndani na nje ya nchi

Uchumi wa dunia umebadilika, uchumi wa soko katika utandawazi ndio unashikilia mfumo wa kiuchumi wa dunia ili kuharakisha maendeleo kwa kutoa ajira mbadala kwa kujiajili, kujitegemea na kujenga uwezo wa kujiamini katika maisha na biashara kubwa dhana ya ujasiliamali chini ya kongano bunifu inahitajika

Wahenga walisema huwezi kuzuia sikio lako kusikia lakini unaweza kuzuia mdomo wako usiseme, nami kwa hakika nasema nauzuia mkono wangu usiandike zaidi lakini siwezi kukuzuia msomaji kuendelea kusoma

Mwandishi wa Makala

Anapatikana 0715-335051

www.stephanomango.blogspot.com

 

HIVI NDIVYO CCM ILIVYOFUNIKA JANA KWENYE MKUTANO WA UDIWANI KATA YA LIZABONI MANSPAA YA SONGEA



Mwenyekiti wa CCM Manispaa ya Songea Hemed Dizumba akizungumza na wananchi wa Mtaa wa Polisi Kata ya Lizaboni wakati wa kampeni za kumnadi mgombea wa kiti cha udiwani kata ya Lizaboni kupitia chama hicho George Oddo



Mgombea Udiwani Kata ya Lizaboni Manispaa ya Songea kupitia tiketi ya Ccm George Oddo akiomba kura kwa wananchi jana wakati wa mkutano wa kampeni uliofanyika kwenye viwanja vya mtaa wa Polisi kwenye kata hiyo





Kama kawaida Ccm bila burudani haiendi, hawa ni baadhi ya kinadada wanenguaji kwenye kampeni hizo



Wananchi waliojitokeza jana kusikiliza mkutano wa Ccm uliofanyika kwenye viwanja vya mtaa wa Polisi Kata ya Lizaboni, katikati anaonekana mgombea akiomba kura kwa wananchi

VIONGOZI WA MKOA WA MTWARA NA RUVUMA WAASWA KULITA MKONGA WA TAIFA

       Mkuu wa Mkoa wa Ruvuma Said Mwambungu

Na Agustino Chindiye,Tunduru
VIONGOZI wa Mikoa ya Ruvuma Mtwara na maeneo yanayopitiwa na Mkongo wa Taifa nchini wameombwa  kuulinda na kuhakikisha kuwa Mkongo wa Taifa haukatwi wala kuhujumiwa kwa njia yoyote ile.

Ombi  hilo  limetolewa na Waziri wa Mawasiliano, Sayansi na Teknolojia Profesa Makame Mbarawa ambaye anaendelea na ziara ya kukagua Mkongo wa Taifa katika Mikoa ya kusini.

Pamoja na maagizo hayo pia Profesa Mbarawa alitoa elimu juu ya faida za Mawasiliano ya Mkongo wa taifa  kwa viongozi wa Ngazi za Vijiji, Wilaya na hata kwa wananchi wachache kila alipokutana nao kikubwa akihimiza ulinzi wake na kueleza kuwa nyaya zilizo wekwa katika Mkongo huo hazina soko popote Duniani na kwamba atakaye fanya uharibifu wowote atawasababishia wenzake kukosa mawasiliano tu.

Aidha katika hotuba hiyo kwa viongozi hao alisema kuwa mawasiliano kupitia Mkongo wa Taifa yataiwezesha Tanzania kupiga hatua kubwa ya kimaendeleo katika sekta za Biashara, Uzalishaji mali, Elimu na Afya, pamoja na Ulinzi.

Akizungumzia matatizo ya mawasiliano ya simu za Mkononi yaliyoanza kujitokeza katika siku za Karibuni Prof. Mbarawa alikiri kuwa hali hiyo inatokana na mitambo ya kampuni za simu zilizowekeaz nchini kuwa hivi sasa zimeanza kuelemewa na wingi wa huduma na wateja.

Akifafanua taarifa hiyo Profesa Mbarawa alibainisha kero na matatizo ya simu za Mkononi kutounganishwa vizuri pale mtumiaji anapopiga ama kukoroma, kampuni za Simu kupiga matangazo ya biashara kwanza kabla ya  kumuunganisha mtumiaji anapotaka kuongea na mwingine ama mitambo kutofanya kazi ambayo yamekua yakilalamikiwa na wananchi

Ziara hiyo ya kiukaguzi zaidi, Waziri Mbarawa akipita katika vituo na njia ambazo Mkongo wa Taifa umelazwa kuunganisha mawasiliano kati ya Mkoa na Mkoa ikiwa ni awamu ya kwanza, kabla ya awamu nyingine ambapo wilaya zote pia zitaunganishwa.

Naye Mbunge wa jimbo la Tunduru Kusini ambaye alikuwa mwenyeji wake Abdalah Mtutura alisema kuwa alilazimika kumpeleka Waziri huyo katika Tarafa ya Nalasi ali akajionee maelfu ya wananchi wanaoishi huko huku wakiwa hawana huduma za mawasiliano wala hawasikilizi Radio yoyote ya Tanzania huku ahadi iliyotolewa na Rais kuwa wangejengewa vituo vya kuwawezesha kupata mawasiliano hayo ikiwa haija tekelezwa.

Awali akimsomea taarifa ya maendeleo ya Wilaya hiyo Mkuu wa Wilaya ya Tunduru  Juma Madaha alibainisha kuwa mbali na kuwepo kwa utitiri wa makampuni ya simu ya Ttcl.Vodacom, Tigo, Zantel na Airtel lakini huduma hiyo imekuwa ikipatikana kwa uhakika katika makao makuu ya Wilaya na Vijiji vichache.

Alisema Wilaya hiyo ina ukubwa wa eneo la kilometa za mraba 18,778 ikiwa na tarafa 7. kata 35 na Vijiji 148 na kwamba ipo umbali wa Kilometa 1264 kutoka jijini Dar es Salaam kupiti makao makuu ya Mkoa wa Ruvuma Mjini Songea na Kilometa 800 kutoka Dar es Salaam kupitia Masasi Mkoani Mtwara na Mikoa wa Lindi nakuongoza kuwa hali hiyo inapaswa kuangaliwa na serikali katika uimarishaji wa miuondo mbinu yake.
Mwisho

DARAJA LASABABISHA KAPTENI KOMBA ASHINDWE KUWAPA POLE WAHANGA

Mbunge wa Jimbo la Mbinga Magharibi Kapteni John Komba

Na Gideon Mwakanosya, Nyasa

MBUNGE  wa Jimbo La Mbinga Magharibi Kapteni mstaafu John Komba ameshindwa kuendelea na ziara yake ya siku mbili ya kwenda kuwapa pole ndugu wa watu wanao daiwa kuwa wamekufa maji na wengine kujeruhiwa vibaya baada ya gari waliyo kuwa wakisafiria kutoka Mbinga mjini kwenda kijiji cha Ngumbo kusombwa na maji wakati likiwa linavuka daraja la mto mnywamaji na kusababisha watu wanne kufa maji na majeruhi wawili kufuatia daraja la mto mbuchi kutitia na kusababisha kushindwa kupita magari

Hata hivyo Kapteni Komba alifanikiwa kufika nyumbani kwa marehemu Mwalimu Lucas Godon Mbunda wa kijiji cha Mkili ambako familia ya marehemu pamoja na ndugu na jamaa walikuwa wakiendelea kuomboleza msiba na aliwapa pole na kutoa rambirambi na alitoa ahadi ya kuwalipia ada watoto wawili wa marehemu Mbunda wanaosoma katika shule ya sekondari ya bweni ya Chipole inayomilikiwa na Kanisa la Katoliki  iliyopo wilaya ya Songea vijijini na shule ya sekondari ya Bweni ya Beroya iliyopo Halmashauri ya Manispaa ya Songea.

Kapteni Komba alifafanua zaidi kuwa analazimika kuchukua jukumu hilo la kuwalipia ada ya mwaka mmoja watoto wa marehemu Mbunda ambao wameachwa wakati mgumu kwani marehemu Mbunda kabla ya kukutwa na umauti alikuwa anatoka Mbinga ambako alikwenda kuhakiki taarifa za akaunti yake ya Benki ya NMB na kuchukua mshahara wake wa mwezi uliopita jambo ambalo limeonesha wazi kuwa watoto hao wanahitaji msaada zaidi wa kulipiwa ada ili waendelee na masomo ambapo fedha zinahitajika Shilingi laki nane kila mmoja .

Kapteni Komba ambaye aliongozana na viongozi mbalimbali wa wilaya ya Mbinga wakiwemo Katibu wa CCM wa wilaya hiyo Anastasia Amasi na Mwenyekiti wa Halmashauri ya wilaya ya Mbinga Oddo Mwisho aliendelea na ziara yake hadi katika kijiji cha Kihagara ambako alishindwa kuendelea na safari yake baada ya daraja la mto mbuchi kutitia kufuatia mvua kubwa zinazoendelea kunyesha na kusababisha magari kushindwa kupita kwenye daraja hilo.

Wakiwa kwenye eneo la daraja la mto Mbuchi Diwani wa kata ya kihagara (CHADEMA)  Steven Pata alimweleza Mbunge Kapteni Komba  kuwa machi 14 mwaka huu  wakati maafa makubwa yaliyotokea ya vifo vya watu wanne kufa maji na watu wengie kujieruhiwa wakati gari walilokuwa wakisafiria kusombwa na maji pia mvua hizo zilisababisha daraja la mto Mbuchi kutitia hivyo aliiomba Serikali ione umuhimu wa kuchukua hatua za haraka za kulitengeneza daraja hilo amabako ni kiungo kikubwa kutoka Liuli na kihagara  na pamoja na wanachi wa kutoka kata za Lihundi, Lundu, Mbaha na Lituhi .

Kwa upande wake Meneja wa wakala wa barabara (TANROADS) mkoani Ruvuma Mhandisi Abrahamu Kissimbo alisema kuwa kikosi cha wataalamu wake kimeshafanya tathimini ya uharibifu wa miundombinu uliotokea katika daraja la Mbuchi na kwamba ameahidi kuwa ndani ya wiki mmoja mara tu baada ya kufika vipuli vinavyo hitajika kwenye daraja hilo ujenzi huo utakuwa umekamilika na amepiga marufuku pikipiki na magari kupita kwenye daraja hilo na watakao kamatwa watachukuliwa hatua.

Machi 14 mwaka huu majira ya saaa nane usiku gari aina ya Landlover wanteni yenye namba za usajili T 492 AWY ambalo lilikuwa klikitoka Mbinga kwenda Ngumbo huku likiwa limesheheni abiria pamoja na mizigo lililokuwa likiendeshwa na Bosco Hyera lilisombwa na maji wakati linavuka kwenye daraja la mto Mnywamaji na kusababisha watu wanne kufa maji na watu wengine wawili kujeruhiwa vibaya.

 Mwisho

KIKONGWE CHA MIAKA 75 CHASOMBWA NA MAJI NA KUFARIKI DUNIA

Na Steven Augustino,Tunduru

BIBI kizee wa Miaka 75 amefariki dunia baada ya kusombwa na maji yaliyo furika katika Mto uliopo katika Kitongoji cha Mchololo katika kijiji cha Tulieni Wilayani Tunduru.

Mashuhuda wa tukio hilo wamesema kuwa Bibi huyo aliyefahamika kwa jina la Laina Abdurahamani alikuwa na mkasa wakati akijaribu kuvuka mto huo wakati akitokea shambani kwake.

Taarifa hiyo iliendelea kufafanua kuwa akiwa katika harakati hizo ghafla mkondo wa maji makali yalimchukua na kuondoka.

Walisema baada ya tukio hilo wasamalia wema walipiga kelele za kuomba msaada na kwamba hadi wanafika waogeleaji katika eneo hilo walimkuta bibi huyo akiwa amekwisha fariki dunia na kufanikiwa kuuokoa mwili wake.

Mganga aliyeufanyia uchunguzi mwili wa marehemu Laina Dkt. Goerge Malawi alisema kuwa chanzo cha kifo hicho kilitokana na marehemu kunywa maji mengi.

Kamanda wa Polisi wa Mkoa wa Ruvuma  Michael Kamuhanda amethibitisha kuwepo kwa tukio hilo na akatumia nafasi hiyo kuwaomba wananchi kuacha tabia za kuishi kwa mazoea na akahimiza kudumisha utamaduni wa kuvushana.

Hili ni tukio la pili kusababisha kifo likifuatiwa na tukio la hivi karibuni ambapo hivi karibuni Mkazi waKijiji cha Kangomba said Abubakari (43)  alilipotiwa kufariki dunia baada ya kupigwa na radi huku kukiwa na taarifa za  946  vyoo 35 vimebomolewa kutokana na mvua
hizo.

Mwisho

WANNE WAKAZI WA DAR WAKAMATWA SONGEA NA MENO YA TEMBO

     Kamanda wa Polisi Mkoa wa Ruvuma Michael Kamuhanda

NA DUSTAN  NDUNGURU,SONGEA.

WATU wanne wakazi wa jijini Dar es salaam wanashikiliwa na jeshi la polisi mkoani Ruvuma kwa tuhuma za kukamatwa na nyara za serikali(meno ya tembo) zenye thamani ya zaidi ya shilingi milioni sita.

Akiongea na waandishi wa habari kamanda wa polisi mkoani hapa Maiko Kamuhanda alisema watu hao walikamatwa katika kijiji cha Suluti kwenye maeneo ya mashamba ya NAFCO wilayani Namtumbo aprili 15 mwaka huu majira ya saa 2.30 asubuhi.

Kamuhanda alisema watu hao walikamatwa na askari wa doria baada ya kupata taarifa kutoka kwa raia wema wa kijiji cha Suluti.

Aliwataja majangili yaliyokamatwa kuwa ni John Andrew(30) ambaye ni dereva wa gari,Hemed Geofrey(30),Idd Manase(32) na Modesta Eliakim(25) wote wakazi wa Dar es salaam.

Kamuhanda alifafanua kuwa majangili hayo yalikamatwa yakiwa na vipande 30 vya meno ya tembo ambayo walikuwa wamepakia katika gari ambayo ilikuwa imebandikwa namba bandia DFP 7208 aina ya TOYOTA Landcruiser.

Alisema kwenye kadi ya gari hilo inaonyesha namba T.125 ATD Toyota Landcruiser mali ya Morrice Christopher Meenda na kwamba meno hayo ya tembo walikuwa wakiyapeleka Dar es salaam.

Kamanda huyo wa polisi aliwataka wananchi kuendelea kushirikiana na polisi kwa kutoa taarifa mbalimbali na kwamba mpango uliopo ni kwa jeshi hilo kuendelea kukabiliana na majangili hayo.

Hata hivyo alisema polisi wanaendelea na uchunguzi kuhusiana na tukio hilo.

                MWISHO.

NYUMBA 946 ZALIPOTIWA KUBOMOKA WILAYANI TUNDURU

                   Mkuu wa Wilaya ya Tunduru Juma Madaha

Na Steven Augustino,Tunduru

NYUMBA  946 zimeripotiwa kubomoka kutokana na  mvua kubwa zinazoendelea kunyesha mfululizo Wilayani Tunduru Mkoani Ruvuma na kuwaacha wakazi wake wakiwa hawana makazi.

Hayo yamebainishwa na Kaimu Katibu Tawala wa Wilaya ya Tunduru, Afisa Tarafa wa tarafa ya Matemanga  Ally Hatibu na kuongeza kuwa pia mvua hizo zimebomoa vyoo 35 na kusomba mazao katika mashamba ya wakulima 56 na kwama hivi sasa wananchi hao wanahifadhiwa na Ndugu, jamaa na marafiki katika maeneo yao.

Hatibu aliendelea kueleza kuwa pamoja na matukio hayo pia. Mvua hizo zimeharibu vibaya  miundombinu ya barabara, Madaraja  yanayounganisha kati ya Wilaya hiyo na makao makuu ya Mkoa huo barabara za kwenda vijijini.

Akifafanua taarifa hiyo  Hatibu alisema kuwa Tarafa ya Milingoti ndiyo iliyo athirika zaidi kutokana na kubomokewa na nyumba 716 huku takwimu zikionesha kuwa tarafa ya Lukumbule ikifuatia kwa kuwa na nyumba 230 zilizo bomoka kufuatia mvua hizo.

Aidha takwimu za maafa hayo zinaonesha kuwa Kata ya Nakayaya ndiyo inayo ongoza kutokana na kubomokewa na Nyumba 122, Kata ya Milingoti 99, Masonya 88, Nanjoka 57,Mchangani 54 huku kata ya majengo ikishika nafasi ya mwisho kutokana na kubomokewa na nyumba 46.

Kwa mujibu wa taarifa hiyo daraja lililobomoka ni la mto Masonya liliteteleka kutokana na mto huo kujaa pamoja na madaraja ya mito Nasanga na Msinjewe pamoja na mto Mkandu barabra iendayo katika vijiji vya tarafa za Lukumbule, Nalasi na Mchoteka na kusababisha usumbufu
kwa wanananchi kutokana na baadhi ya magari kusitisha safari za kwenda na kuingia mjini Tunduru huku kukiwa na wimbi la ongezeko la nauli kwa magari yanayokubali kufanya safari hizo kwa kubahatisha.

Hatibu aliendelea kubainisha kuwa miongoni mwa usumbufu unaowapata madereva wanaofanya safari katika maeneo hayo  ni pamoja na kutozwa fedha na wananchi walio panga miti katika maeeenero yaliyo haribika na kuwatoza kati ya Shilingi 5000 na Tsh.2000 kwa kila gali linapo vuka kuelekea upande wa pili.

Alisema kufuatia hali hiyokamati ya Ulinzi na usalama ililazimika kuwatembelea wahanga na kuwapa pole kwa mkasa huo pamoja na kujionea uharibifu wa madaraja hayo na kupeleka taarifa za maafa hayo katika ofisi ya Mkuu wa Mkoa wa Ruvuma ili kuangalia uwezekano wa wahanga hao kupatiwa msaada Serikalini.

Kuhusu uharibifu wa miundombinu ya Barabara na madaraja hayo, Hatibu alisema kuwa tayari Meneja wa Wakara wa Barabara Mkoa wa Ruvuma (TANROAD`s) amekwisha tuma wataalamu Wilayani humo kwa ajili ya kuhakikisha kuwa barabara zote zinafunguka na shughuli kuendelea kama kawaida.

Mwisho