MAELFU YA WAKAZI WA TUNDURU WAJITOKEZA KUMZIKA MWENYEKITI WA TLP TUNDURU RAJABU MNYACHI

                             Na  Steven  Auguastino, Tunduru

 

MAELFU ya wakazi wa mji wa Tunduru wamejitokeza kumzika aliyekuwa Mwenyekiti wa chama cha Tanzania Labour Party (TLP) Wilaya ya Tunduru Rajab Mohamed Mnyachi aliyefariki Dunia baada ya kuugua kwa muda mrefu na kulazwa katika hospitali ya serikali ya wilaya ya Tunduru Mkoani Ruvuma.

 

Msemaji wa familia ya Marehemu Mnyachi Bw. Shaibu Namkumbe akizungumza na mtandao wa http://www.stephanomango.blogspot.com/ alisema kuwa marehemu Mnyachi alikuwa anasumbuliwa na  maradhi ya shinikizo la damu.

 

Akifafanua wasia wa marehemu mnyachi Bw. Namkumbe alisema kuwa kipindi cha uhai wake alijishikisha na alikuwa mkereketwa wa mageuzi kupitia vyama ya siasa pamoja na kugombea nyadhifa mbali mbali.

 

Alisema mwaka 1986 hadi 1999 marehemu  Mnyachi alikuwa mwenyekiti wa Chama cha NCCR Mageuzi na aligombea katika kinyang`anyiro cha Ubunge wa jimbo la Tunduru akiwa anapambana na marehemu Juma jamardini Akukweti wa CCM katika uchaguzi Mkuu wa mwaka 1995.

 

Taarifa hiyo iliendelea kueleza kuwa Mwaka 1999 marehemu alikihama chama cha NCCR Mageuzi na kujiunga na TLP ambako pia alichaguliwa kuwa mwenyekiti wake hadi umauti ulipo mkuta Septemba 9 mwaka huu.

 

Akiwa katika chama hicho pia marehemu alitoa hamasa kubwa na kukifanya chama hicho kupata wanachama wengi na kugombea katika vinyang`anyiro vya Ubunge katika chaguzi za mwaka 2000, 2005 na uchaguzi mdogo wa kuziba pengo la marehemu Akukweti mwaka 2007.

 

Wakiongea kwa nyakati tofauti baadhi ya wananchi wanaomfahamu Marehemu Mnyachi, katibu wa Mbunge wa Jimbo la Tunduru Kusini Bw. Maulidi Kalambo (Yakanungu) na Mwenyekiti wa Chama cha Demokrasia na Maendeleo CHADEMA Wilaya ya Tunduru Bw. Maurid Said mbali na kukiri kuwa Marehemu alikuwa mahiri katika medani za siasa na kuongeza kuwa sasa Tunduru imeishiwa watu wenye vipaji.

 

Katika maelezo yao viongozi hao walisema kuwa Marehemu mnyachi, marehemu  Mazee Rajab wa CUF pamoja na Simbili Makanyaga wa UDP aliyehamia jijini Dar es salaam baada ya kuchaguliwa kuwa katibu Mwenezi wa Chama hicho Taifa walikuwa ni hazina kubwa na kwamba sasa Wilaya ya Tunduru inategemea majaliwa ya mungu kupata vijana wenye kipaji na watakao kubalika katika kuleta changamoto za maendeleo vinginevyo CCM itaendelea kushika hatamu.

 

Mwisho.   

ASKARI WANYAPORI AKUTWA AMEUWA NA WATU WASIOFAHAMIKA

                                               Na Gideon Mwakanosya,Songea.

ASKARI wa idara  ya wanyamapori Nchini  Msumbiji  Babu Abdalah (35) amekutwa akiwa ameuwawa kwa kupigwa na kitu chenye ncha kali sehemu za kifuani na watu wasiofahamika huko katika  kijiji cha Chikomo wilayani Tunduru Mkoa wa Ruvuma.

Akizungumza na Mtandao huu wa http://www.stephanomango.blogspot.com/ ofisini kwake jana kamanda wa Polisi Mkoa wa Ruvuma Michael Kamuhanda alisema kuwa tukio hilo limetokea Septemba 10 mwaka huu majira ya saa 9 alasiri huko katika kijiji cha Chikomo.

Alisema kuwa siku hiyo ya tukio inadaiwa kuwa afisa mtendaji  wa kijiji hicho Ally Mtukusye alipatiwa taarifa ya tukio hilo kasha aliwasiliana na polisi wa kituo kikuu cha Tunduru ambao walifika kwenye eneo la tukio wakiwa wameongozana na mganga ambaye ndiye aliyethibitisha kuwa askari huyo wa idara ya maliasili toka Nchi ya Msumbiji amekufa kutokana na kipigo.

Kamuhanda alisema kuwa  Askari huyo alikutwa akiwa na majeraha makubwa sehemu za usoni upande wa kushoto na kifuani upande wa kushoto ambayo  ndio yalimsababishia  kuvuja kwa damu nyingi atimaye kufariki dunia.

 Hata hivyo kamanda Kamuhanda alisema kuwa kufuatia tukio hilo hakuna aliyekamatwa au kutiliwa mashaka na chanzo bado kinaendelea kuchunguzwa.

MWISHO.

WANNE WASHIKILIWA NA POLISI RUVUMA KWA TUHUMA ZA MAUAJI WILAYANI TUNDURU

                                        Na Gideon Mwakanosya,Songea.

JESHI la Polisi mkoani Ruvuma linawashikilia watu wanne wakazi wa kijiji cha kitanda wilayani Tunduru kwa tuhuma za kumpiga na kitu chenye ncha kali sehemu mbambali za uso na kumsababishia kifo mwanamke mwenye umri wa miaka 60 mkazi wa kijiji hicho.

Kamanda wa Polisi Mkoa wa Ruvuma  Michael Kamuhanda akizungumza na mwandishi wa mtandao wa http://www.stephanomango.blogspot.com/, Gideon Mwakanosya kutoka mjini Songea, alisema kuwa tukio hilo limetokea septemba 10 mwaka huu mwajira ya saa 2.00 usiku huko katika kijiji cha kitanda kilichopo wilayani Tunduru.

Kamuhanda amemtaja aliyeuwawa kuwa ni Mwanahawa Landi (60) mkazi wa kijiji hicho na amewataja wanaoshikiliwa na polisi kuhusiana na tuhuma za mauaji hayo kuwa ni Mohamed Saidi (25), Kassim Said (39), Said Baina (76) na Ally Said (37) wote wakazi wa kijiji cha kitanda.

Alifafanuwa zaidi  kuwa inadaiwa kuwa siku hiyo ya tukio Mohamed Issa (70) alitoa taarifa kwenye kituo cha polisi cha Tunduru kuwa Mwanahawa ameuwawa kwa kukatwa na kitu chenye ncha kali usoni na ambayo yalimsababishia sura yake kuharibika kabisa na watu wasiofahamika.

Kamanda Kamuhanda alisema kuwa chanzo cha mauaji hayo bado kinachunguzwa lakini tayari watu wanne polisi imewatia mbaroni kwa mahojiano zaidi na kwamba uchunguzi utakapokamilika watuhumiwa watafikishwa mahakamani ili kujibu tuhuma za mauaji.

MWISHO.

NIMESAFIRI KIKAZI WAPENZI WASOMAJI WA MTANDAO HUU

Stephano Mango

Mmiliki wa mtandao huu wa http://www.stephanomango.blogspot.com/, ambaye ni ndugu Stephano Mango amesafiri kikazi toka Songea mpaka Jijini Dar Es Salaam, ambapo ameungana na wanaharakati wengine nchini na nchi jilani kwa ajili ya kuhudhuria Tamasha la Jinsia Tanzania ambalo linaanza kufanyika kesho Septemba 13-16 mwaka huu 2011

Katika Tamasha hilo Mada mbalimbali zitawasilishwa na wanaharakati na wasomi waliobobea katika utetezi wa masuala ya jinsia na haki za binadam, kwa mwaka huu Mada itakuwa ni ,"Ardhi,Nguvu Kazi na Maisha Endelevu" chini ya Kampeni kubwa ya "Haki ya Uchumi:Rasilimali ziwanufaishe Wanawake Walioko Pembezoni.

Hivyo,ndugu wasomaji jiandaeni kupata habari mbalimbali kutoka katika tamasha hilo kwani mtandao huu wa http://www.stephanomango.blogspot.com,utakuwa/ makini kuwaletea wasomaji vitu murua kwa kukidhi kiu yako ya kupata matukio muhimu ya kiharakati

MIAKA 50 YA UHURU WA TANZANIA NA UFANYAJI KAZI ZENYE UCHUMI MDORORO

Akina mama ambao majina yao hayakuweza kufahamika mara moja wakiwa wamebeba miwa kwa ajiri ya kwenda kuiuza ili kuweza kujipatia kipato cha kujikimu kutokana na ugumu wa maisha unaowakabili katika jamii zao na taifa kiujumla,wananchi wengi wanaoishi pembezoni wamekuwa wakiishi katika mazingira duni kutokana na kushindwa kufaidi mgawanyo wa rasilimali za nchi

HAYA NDIYO YALIYOJILI KATIKA MAONYESHO YA NANE YA SIDO KANDA YA KUSINI YANAYOENDELEA KUFANYIKA KATIKA VIWANJA VYA CCM WILAYANI MBINGA MKOANI RUVUMA

 Mkurugenzi mkuu wa SIDO Michael Raizer akimuonyesha Waziri wa Viwanda na Biashara Dkt Cyril Chami shughuli za uzalishaji wanazozifanya kwenye banda la Sido mara baada ya kuzindua maonyesho hayo jana kwenye viwanja vya CCM wilayani Mbinga

 Waziri wa Viwanda na biashara Dkt Cyril Chami akisalimiana na Meneja wa Benki ya NMB tawi la Mbinga Lugano Mwampeta mara baada ya kuwasili kwenye viwanja vya maonyesho mjini Mbinga

 Mgeni rasmi katika maonyesho ya nane ya Sido kanda ya kusini,Waziri wa viwanda na biashara Dkt Cyril Chami akizindua maonyesho hayo katika banda la SIDO kwenye viwanja vya CCM mbinga,wa kwanza kushoto ni Mbunge wa Jimbo la Mbinga Mashariki Gaudence Kayombo.Maonyesho hayo yameanza septemba 9-12 na kushirikisha wajasiliamali 200 kutoka katika mikoa ya mbeya,Lindi,Mtwara,Iringa na Ruvuma

 Mkuu wa Mkoa wa Ruvuma Dkt Christine Ishengoma(mwenye suti nyeusi) akikagua banda la wajasiliamali JKT Mlale kabla ya mgeni Rasmi ajatembelea banda hilo na kujionea shughuli zinazofanywa na taasisi hiyo ya Serikali,wa kwanza kulia ni Mkurugenzi wa habari na Masoko Sido makao makuu Jannet Ninja

 Mkurugenzi wa habari na Masoko wa Sido Jannet Ninja akimuonyesha mkuu wa mkoa wa Ruvuma Dkt. Christine Ishengoma (mwenye suti nyeusi)sehemu atakayoanza mgeni rasmi kukagua mara atakapowasili kwenye viwanja hivyo vya maonyesho,wa kwanza kulia ni Mkuu wa Wilaya ya MBINGA Kanali Mstaafu Edmund Mjengwa,wa kwanza kushoto Mwenyekiti wa Umoja wa Wanawake (UWT)wilaya ya Mbinga Lusiana Ndunguru

 Askari wa Skauti akimvesha skafu Mgeni rasmi Waziri wa Viwanda na Biashara Dkt Cyril Chami ikiwa ishara ya kumkaribisha katika viwanja vya maonyesho,wa kwanza kushoto ni Mbune wa jimbo la Mbinga Mashariki Gaudence Kayombo,wa pili ni Mkuu wa mkoa wa Ruvuma Dkt Christine Ishengoma

 Mgeni rasmi akipata maelezo katika banda la muungano wa wajasiliamali vijijini(MUVI) alipotembea katika banda hilo jana

 Mgeni Rasmi akiangalia kwa umakini ingini ya mashine ya kusaga kutoka kwa wajasiliamali wa Mbeya alipotembelea banda hilo wakati wa maonyesho

 Mjasiliamali wa usindikaji na uuzaji wa vinywaji aina mbalimbali ikiwemo Mvinyo kutoka Seedfarm Songea chini ya Kampuni ya Jeim Product Magdalena Talimo akimuonyesha bidhaa mbalimbali zinazozalishwa na kampuni yake Mgeni Rasmi Waziri wa Viwanda na Biashara Dkt. Cyril Chami alipotembelea banda la kampuni hiyo

 Mkuu wa Wilaya ya Mbinga Kanali Mstaafu Edmund Mjengwa akiwa amepumzika kutokana na uchovu wa kuzunguka kukagua mabanda ya wajasiliamali na kupata kahawa katika banda la MCCCO

 Mwanafunzi wa Chuo cha Ufundi Stadi Veta SONGEA akimpa maelekezo mgeni rasmi Dkt Chami ya namna mashine ya kusukia nywele inavyofanya kazi alipotembelea banda hilo

Viongozi mbalimbali wa serikali ya mkoa wa Ruvuma wakimsindikiza Mgeni rasmi waziri wa viwanda na biashara Dkt Cyril Chami kuelekea jukwaani na kuhutubia wajasiliamali waliopo kwenye viwanja vya CCM wilayani Mbinga

 Mgeni Rasmi Dkt Chami akiangalia kwa umakini kikundi cha ngoma ya chioda kinavyotumbuiza maonyesho hayo

Mgeni rasmi Dkt Chami akimpa maelezo Mkuu wa Wilaya ya Mbinga kanali Edmund Mjengwa mara baada ya kumaliza kukagua mabanda yote ya maonyesho(PICHA ZOTE NA STEPHANO MANGO)

                   WAZIRI Dkt CHAMI AZIANGUKIA TAASISI ZA FEDHA NCHINI

Na Stephano Mango,Songea

WAZIRI wa Viwanda na Biashara Dkt .Cyril Chami ameziangukia taasisi za fedha nchini kuona umuhimu wa kuweka masharti nafuu ya mikopo kwa wajasiliamali ili waweze kukopa fedha kulingana na michanganuo ya miradi yao kwa lengo la kukuza uchumi wa jamii na nchi kwa ujumla

Wito huo aliutoa jana wakati akihutubia mamia ya wajasilimali waliojitokeza katika uzinduzi waa maonyesho ya nane ya Shirika la Kuhudumia Viwanda Vidogo(Sido) kanda ya kusini yaliyofanyika katika viwanja vya Ccm Wilayani Mbinga Mkoani Ruvuma

Dkt Chami ambaye alikuwa mgeni rasmi katika uzinduzi huo alisema kuwa taasisi za fedha nchini zinatakiwa kubuni utaratibu wenye masharti nafuu wa kuwakopesha wajasilimali wadogo na wakati kwani uzoefu wan chi nyingi unaonyesha kuwa wajasiliamali wadogo na wakati ndio walipaji wazuri wa mikopo

“Natoa wito kwa taasisi hizo kushirikiana na Sido pamoja na vyombo vingine vya kuendeleza wajasiliamali wadogo na wakati ili ziweze kubuni mbinu muafaka za kuwakopesha wajasiliamali na kutoa elimu itakayowawezesha wajasiliamali kukopesheka’alisema Dkt Chami

Alisema kuwa wajasiliamali wanakabiliwa na changamoto nyingi katika shughuli zao ikiwemo changamoto ya kutokujua kusoma vipimo hasa kwa wale wanaojihusisha na ujasiliamali wa mazao ya kilimo na misitu kama vile uuzaji wa mahindi,maharage,viazi,alizeti,ufuta na asali wamekuwa wakipata hasara sana na kurudisha nyuma ukuaji wa uchumi kwa mjasiliamali hivyo aliwataka wakala wa vipimo kuendelea kutoa elimu ya vipimo kwa wazalishaji hao ili kuweza kuleta ustawi na maendeleo sawa kwa wananchi wote

Akizungumza kwenye uzinduzi huo Mkurugenzi Mkuu wa Sido Michael Raizer alisema kuwa lengo la maonyesho hayo ni kuwawezesha wananchi kufahamu bidhaa mbalimbali zinazozalishwa na viwanda vidogo nchini ili ziweze kuwasaidia katika harakati zao za kukuza uchumi

Raizer alisema kuwa maendeleo ya sekta ya wazalishaji wadogo na wakati ni muhimu sana kwa ukuaji wa uchumi endelevu na kuondoa umaskini hivyo licha ya serikali kuandaa sera ya ununuzi 2004 bado sera hiyo haijasaidia wazalishaji wadogo kwani sera hiyo haizazingatia umuhimu wa kukuza soko la ndani hasa kukuza bidhaa zinazozalishwa na viwanda vidogo

Awali Mkuu wa mkoa wa Ruvuma Dkt Christine Ishengoma akimkaribisha mgeni rasmi alisema kuwa wajasiliamali wa mikoa ya kanda ya kusini wanatakiwa kuandaa mikakati ya kutumia fursa za ukanda wa maendeleo wa mtwara ili kuweka kitovu cha bidhaa zinazozalishwa kutokana na rasilimali zilizopo kwenye maeneo yetu ili wageni watakapokuja waweze kuona kuwa mikoa hii inatumia kikamilifu rasilimali zilizopo kuanzisha na kuendesha viwanda,kuongeza ajira na kipato

Aidha Dkt Ishengoma aliwataka wajasiliamali kuongeza ubora wa bidhaa na kuzalisha bidhaa kwa wingi kwani bidhaa bora zinauzika kwa haraka hivyo ni muhimu kuelewa kuwa tatizo la bidhaa zetu na nchi za nje siyo kukosa soko bali ni uwezo mdogo wa uzalishaji na usiozingatia mahitaji ya soko husika na ubora wa bidhaa

MWISHO

WANAFAMILIA WAMETAKIWA KUBORESHA MAHUSIANO YA KUMILIKI ARDHI

                                            Na Juma Nyumayo, Dar es Salaam,

KUTOKANA na migogoro mingi inayoibuka katika ngazi ya kaya na familia hapa nchini hali inayopelekea kuwa na mahusiano mabaya katika kuzalisha na kumiliki mali, familia hizo zimetakiwa kujenga na kuboresha mahusiano yao kwa kufuata vigezo vya uwazi na upendo hatua kwa hatua kabla mali wanazozalisha hazijawatesa kwa  kuwagombanisha kwa kile kinachodaiwa nani mmiliki halali kati ya mwanamke na mwanamume.

Hilo ni moja ya azimio lililofikiwa na washiriki wa warsha ya Uchumi na Ukombozi wa mwanamke   kimapinduzi inayoendeshwa  na Chuo cha Mafunzo ya Jinsia cha  TGNP katika Ukumbi wa kitivo cha Uhandisi Chuo Kikuu cha dar es Salaam.

Katika hali ya kubaini tatizo kuu la wanandoa pia familia nyingi kusambaratika kutokana na migogoro ya nani amiliki mali, au kurithi wanawarsha hao wamechambua mbinu mbalimbali na kuja na mapendekezo ambayo huenda yakapunguza tatizo linalozikabili familia nyingi hapa nchini hasa kutokana na mfumo dume unaomtenga mwanamke kumiliki mali hasa zenye thamani.

Sheikh wa wilaya ya Liwale, Adam Mpelengana, alisema ni muhimu kwa wanaume wote kutambua kuwa wanawake ni wasaidizi wa mwanamume na ni jukumu la mwanamume kumpenda na kumfanyia haki anazostahili badala ya kumuachia kazi nyingi bila usaidizi.
"Mwanamke anatakiwa aenziwe apendwe kwa kila namna, haifai kuendekeza mila na desturi za kumtumikisha mwanamke,' alisisitiza Sheikh Mpelengana.

Awali Mchungaji wa KKT toka Shinyanga, Odorus Gyunda , alisema ni muhimu kubainisha wazi ukatili wanaofanyiwa wanawake ni kinyume cha mapenzi ya mungu.
"imeelezwa wazi kuwa Mwanaume ampende mke wake na mwanamke amtii mumewe," alisema na kubainisha kuwa hayo hayawezekani kama hakuna upendo na mawasiliano mema katika uzalishaji na taratibu zote za kuishi.

Hata hivyo wanawarsha hao wamependekeza kuwa ili kusiwe na migogoro katika matumizi ya fedha na umiliki wa mali ni vyema wenza wakashiriki kikamilifu maamuzi ya kupanga utafutaji wa fedha au mali hatua kwa hatua mapema.

jambo jingine lililoelezwa ni wanawake na wanaume kwenye kaya zinazotegemea  kilimo wajue mahitaji yao ya chakula mapema wakati wa kuandaa mashamba ili wasije uza chakula chote kwa tamaa ya fedha.

Wakijadili suala la kudhibiti matumizi na kuweka kumbukumbu za mapato katika ngazi ya kaya washiriki hao wamependekeza kuwe na daftari la pamoja la kuwekea kumbukumbu za mapato na matumizi katika kila hatua.

Aidha wamewaasa wanawake kuwa makini na mchango wa nguvu kazi zao katika kuhudumia familia pia kuzalisha mali katika kaya na kuhoji matumizi na shughuli za kila mmoja katika kaya husika.

Vilevile imeelezwa wazi kuwa usafi na kujali afya za wanafamilia ni mtaji mkubwa katika kuleta mahusiano mema katika kutumia muda na kumiliki mali za kaya.

Washiriki hao hawakuishia hapo, walisema hayo yatawezekana iwapo, kutatengwa walao siku moja katika wiki kuzungumzia masuala na maendeleo ya kaya husika kwa kuwahusisha mume, mke na watoto ili kaya ziendeshwe  kwa shughuli na bajeti zenye mtazamo wa kijinsia zaidi. 
MWISHO

RAIA 11 WA PAKISTANI NA BANGLADESHI KURUDISHWA MAKWAO

RAIA 11 WA PAKISTANI NA BANGLADESHI KURUDISHWA MAKWAO

Na Stephano Mango ,Songea.

WATU kumi na moja ambao ni raia wa Pakstani na Bangladesh waliokuwa wamekamatwa katika kijiji cha Magwamila kilichopo wilayani Songea mkoani Ruvuma wakitokea Msumbiji ambako walifukuzwa na askari wa Nchi hiyo kwa kupigwa na mijeredi sehemu mbalimbali za miili yao na kujeruhiwa wanatarajiwa kurejeshwa kwenye Nchi zao kwa kupitia ofisi za balozi za Nchi hizo hapa nchini.

Afisa uhamiaji wa Mkoa wa Ruvuma Koku Rwebandiza akizungumza jana na mtandao huu wa http://www.stephanomango.blogspot.com/ amesema kuwa raia hao wa Pakistan na Bangladesh kwa sasa hivi wanafanyiwa taratibu za kuwarejesha kwani walipokamatwa huko katika kijiji cha Magwamila walikutwa wakiwa na hati za kusafiria ambazo zilionekana kuwa na utata.

Rwebandiza alisema kuwa hati hizo za kusafiria ambazo walikutwa nazo watu hao ambao ni Raia wa Bangladesh na Pakstan hazioneshi ni lini waliingia Tanzania wakati wakitokea kwenye Nchi zao wala hazionyeshi ni lini waliondoka hapa Nchini na kuelekea Msumbiji ambako walikamatwa wakiwa katika eneo la Lichinga na askari wa Nchi ya Msumbiji.

Alisema kuwa kutokana na hali hiyo idara ya uhamiaji  mkoani Ruvuma imelazimika kuwarejesha raia hao kwenye balozi za Nchi zao ambazo ndizo zitakazoangalia ni namna gani zitawarudisha kwenye nchi zao.

Rwebandiza alisema kuwa raia hao kumi na moja wa nchi za pakistan na Bangaladesh walikamatwa mwanzoni mwa wiki huko katika kijiji cha magwamila kilichopo mpakani mwa Tanzania na Msumbiji ambapo inadaiwa walifukuzwa toka msumbiji kwa kupigwa mijeredi sehemu mbalimbali za miili yao na kunyang'anywa mali zao zote walizokuwa nazo pamoja na fedha na askari wa nchi ya Msumbiji kisha waliletwa hadi mpakani na kufukuziwa kijijini hapo huku wakiwa na majeraha.

Hata hivyo afisa uhamiaji Rwebandiza alisema kuwa raia hao baada ya kuwahoji walieleza kuwa wao walitoka Pakstan kwa pamoja kwa usafiri wa Ndege hadi Tanzania kupitia uwanja wa ndege wa kimataifa wa jijini Dar es salaamu na baadae walitafuta usafiri wa basi hadi Mtwara ambako nako walifanikiwa kupata usafiri wa malori hadi wakafanikiwa kuvuka msumbiji ambako walinaswa na askari wa Nchi hiyo.

Raia hao ambao walikamatwa ni wapakistan watano ambao ni Hassan Bilali (20), Fawad Yassin (20), Mohamed Hawadhi(20),Haftari Hussein (24) na Hassad Hawadh (45) na raia toka Bangladesh waliokamatwa ni sita ambao ni Shahed Alzani (29) ,Amar Hamad (25),Garuan Khalifa(40),Mohamed Parvaz(35) ,Shajar Meya (28) na Sao Meya (28) .

MWISHO.

WANAHARAKATI WALALAMIKIA MIGOGORO YA ARDHI KUKWAMISHA MAENDELEO NCHINI

WALALAMIKIA MIGOGORO YA ARDHI KUKWAMISHA MAENDELEO

Na Juma Nyumayo, Dar es Salaam

MIGOGORO ya Ardhi inayoendelea katika mikoa mbalimbali nchini imetajwa kuwa ni kikwazo kikubwa cha maendeleo ya wanawake katika harakati zao za kujikwamua kiuchumi pia kuleta ukombozi wa mwanamke na maendeleo stahiki hapa nchini.

Hayo yameibuliwa na washiriki wa warsha inayoendelea katika Ukumbi wa Kitivo cha Uhandisi Chuo Kikuu cha Dar es Salaam wakati wa uwasilishaji wa mada ya mifumo na vikwazo vinavyozuia wanawake kujikwamua kiuchumi.

Akiwasilisha Mada hiyo, Mwezeshaji toka TGNP, Rehema Mwateba alisema ni vyema washiriki wakaeleza hali halisi ya umiliki wa ardhi na migogoro inayendelea kujitokeza hivi sasa ikilinganishwa na mifumo iliyopo katika kumkomboa mwanamke kimapinduzi.

Mshiriki mmojawapo ambaye pia ni Mwenyekiti wa Halmashauri ya Morogoro,Kibena Kingo, ametolea mfano wa mapigano yanayoibuka mara kwa mara na yanayoendelea wilayani kwake kati ya wafugaji na wakulima, ambapo chanzo kikiwa ni matumizi ya Ardhi na kwamba mgogoro huo ni mkubwa.

Imeelezwa wafugaji hao wanaotokea mikoa ya kaskazini na kati wanalishia wanyama wao mazao ya wakulima bila kujali na hivyo kuwakwaza wananchi wenyeji ambao wengi wao ni wakulima wa mazao ya chakula.

"Mgogoro wa ardhi ni mkubwa na waathirika wakubwa ni wanawake na watoto, hata hivyo ni lazima hatua zichukuliwe ili kutatua migogoro hii kabla hayajatokea mauaji makubwa," alishauri Kingo.

Wakati kingo akielezea mgogoro wa ardhi Morogoro bado Mwezeshaji toka TGNP Darus Badi alipaza sauti yake na kuthibitisha kuwa mtandao huo una rekodi ya migogoro ipatayo 60 ya ardhi katika mkoa huo na kwamba kuna haja ya kulichukulia uzito tatizo hilo.

" Tuna migogoro tunayoijua kule Morogoro na tukiwa kama wanaharakati lazima tushirikiane kuchukua hatua," alisema Badi.

Naye Makamu Mwenyekiti wa halamashauri ya Mbinga Prisca haule alisema migogoro mingi ya ardhi huko Mbinga imeibuka kutokana na wakazi wa huko kutafuta maeneo ya kulima baada ya kuishiwa ardhi maeneo ya milimani.

"Kuna migogoro ya ardhi katika familia na nje ya familia kupigania ardhi ya kulima," alisema na kubainisha kuwa bado kuna mipango mibovu na sera isiyoeleweka katika umiliki wa ardhi.

Hata hivyo lawama azikuachwa kwa wawekezaji katika vitalu vya mbuga za wanyama hadi migodi ya madini kama ya Buzwagi, Geita hadi huko Namtumbo kwenye Urani( Uranium) ambako wananchi wa kawaida na hasa wanawake wanaona kama mchezo wa kuigiza wasijue kinachoendelea kwenye ardhi yao.

Lawama kibao zimeelekezwa pia kwa Mamlaka za vijiji na Miji kugawa ardhi kwa upendeleo na hasa kwa wale wanaotoa kitu kidogo kwaajili ya kupata viwanja vya makazi na kuwaacha kabisa wanawake nyuma.

Wakati wa Ufunguzi wa warsha hiyo, Mkuu wa Taasisi ya Mafunzo ya Jinsia ya TGNP, Dkt. Diana Mwiru, aliwaasa washiriki kujadili mada mbalimbali kwa lengo la kujenga uelewa na kusaidi jamii tunapoelekea kusherehekea tamasha la Jinsia na Mika 50 tangu Tanganyika kupata Uhuru wake.

Dkt. Mwiru,alisema, katika miaka 50 iliyopita wanawake wa nchi hii wameendelea kuachwa nyuma katika kumiliki na utoaji wa maamuzi juu ya rasilimali  ikiwa ni pamoja na ardhi.

Mwisho

WATATU WAJITOKEZA KUGOMBEA UDIWANI KATA YA MATIMILA WILAYA YA SONGEA

                                Kaimu Mkurugenzi wa Wilaya ya Songea Anna Mbogo



Na Gideon Mwakanosya,Songea.

WATU watatu wamejitokeza kuchukuwa fomu akiwemo katibu wa Mbunge wa Jimbo la Peramiho Menansi Komba za kuwania nafasi ya kiti cha udiwani kata ya Matimila Wilaya ya Songea vijijini Mkoa wa Ruvuma baada ya kuachwa wazi na aliyekuwa diwani wa kata hiyo Joseph Komba (CCM) kufariki dunia kwa ajari ya pikipiki.

Akizungumza na mwandishi wa mtandao huu wa http://www.stephanomango.blogspot.com/ jana ofisini kwake Mkurugenzi wa uchaguzi jimbo la Peramiho Anna Mbogo amewataja waliochukuwa fomu kuwa ni Eliutelius Pili  wa chama cha Demokrasia na Maendeleo (CHADEMA), Juma Gawaza wa chama cha wananchi CUF na Menansi Komba wa chama cha Mapinduzi(CCM).

Mbogo amesema kuwa hata hivyo mwisho wa kurudisha fomu hizo ni septemba 9 mwaka huu majira ya saa 10 jioni na kwamba kampeni zitaanza rasmi septemba 10 hadi Oktoba 1 mwaka huu majira ya sa 12 jioni.

Hata hivyo amewataka wananchi wa kata hiyo kujitokeza kwa wingi kwenye uchaguzi mdogo wa kujaza nafasi ya udiwani siku ya oktoba 2 mwaka huu kwani kumekuwepo na mazoea ya kutojitokeza kwenye zoezi la upigaji kura hali inayopelekea udororaji wa demokrasia nchini.

Mkurugenzi wa uchaguzi wa jimbo hilo ambaye pia ni kaimu mkurugenzi wa halmashauri ya Wilaya ya Songea  Mbogo amesema kuwa uchaguzi mdogo wa kujaza nafasi ya kiti cha udiwani katika kata ya Matimila unatarajiwa kufanyika oktoba 2 mwaka huu kufuatia kifo cha aliyekuwa diwani wa kata hiyo  Joseph Komba aliyefariki kwa ajari ya pikipiki wakati anaendesha kijijini hapo Machi 9 mwaka huu.

TGNP NA HARAKATI ZA UKOMBOZI KWA WANAWAKE NCHINI

 

Na Juma Nyumayo, Dar es Salaam

WANAWAKE nchini wameshauriwa kuziangalia changamoto juu a uelewa wa masuala ya uchumi na ukombozi wa wanawake baada ya miaka 50 toka uhuru ambapo wanawake wengi waeachwa nyuma kielimu na kiuchumi.

Hayo yameelezwa leo Chuo Kikuu cha Dar es Salaam, na Mkuu wa Taasisi ya Mafunzo ya Jinsia ya TGNP, Diana Mwiru, wakati wa Ufunguzi wa Warsha ya Uelewa wa Masuala ya uchumi na wanawake yanayoshirikisha viongozi mbalimbali wakiwemo madiwani toka mikoa yote ya Tanzaia Bara.

Mwiru, amesema, katika miaka 50 iliyopita wanawake wa nchi hii wameendelea kuachwa nyuma katika kumiliki na utoaji wa maamuzi juu ya rasilimali.

Mkuu huyo, amebainisha kuwa wakati umefika hivi sasa kwa jamii ya kitanzania kuhakikisha maisha bora kwa kila mtanzania yaapatikana kwa kuwashirikisha watu wote kutafuta na kutumia rasilimali za taifa.

Aemesema ni muhimu wa serikali zetu kuhakikisha wananchi hasa wanawake wanashiriki katika mchakato wa bajeti na iwe na mtazamo wa kijinsia.ngi wao ni viongozi wa Dini, waheshimiwa Madiwani, Viongozi wa asasi zisizo za iserikali waandishi wa Haari na wanaharakati wanawajibu wa kuhakikisha uchumi na ukomboziwa mwanamke kimapinduzi unakwenda sambama na elimuya mtoto wa kike.

Mwateba amesema mia na desturi ambazo ni vikwazo katika ukombozi huo a faa zibainishwe wazi na kwama zijengwe nguvu za pamoja katika kutetea haki za uchumi.

Katika hali nyingine washiriki wawarsha hiyo wameeleza kwa kuna mabadiliko mengi yanajitokeza hivi sasa na kwamba baadhi ya Sera na kanuni zinawakandamza wanawake katika harakati za kumkomboa

Prisca Haule, Mheshimiwa Diwani Viti Maalum halmashauri ya Mbinga alisema inashangaza kuona Diwani wa Viti maalum hana nafas kugombea uongozi wa juu kama Uenyekiti wa Halmashauri au Umeya wa Manispaa.

"Hizi sera zinatunyanasa na kutuweka nyuma a kuwa wanyonge, alisema Haule.

Kauli hiyo iliungwa Mkono na Mwenyekiti wa Halmashauri ya wilaya ya Morogoro Vijijini Kibena Kingo kuwa hata wabunge viti Maalumu nao hawawezi kuteuliwa kupata nafasi ya Uspika au Uwaziri Mkuu.

"Hawawezi kupata nafasi kama hizo hivyo ukombozi wa mwanamke unavikwazo vingi," alisema Kingo.

Wakati vikwaz hivyo vikibainishwa, Diwani Anna Lyimo kutoka Halmashauri ya Moshi amewalalamikia wanaume wa Moshi kuwaingilia wanawake katika zao lao la Ndizi ambalo kimsingi ni zao la chakula na likimilikiwa na wanawake.

Lyimo alisema kuingiliwa huko kumetokana na kuanguka kwa zao la Kahawa na kitendo hicho kinaibua mgogoro wa kimaslahi ya kiuchumi.

Naye mwezeshaji Rehema Mwateba, alisema kuna mifumo ya kiuchumi na Matabaka ambayo bado yanamkandamiza mwanamke na hivyo washiriki ambao we

Mafunzo hayo ya siku tano yanaendelea katika Ukumbi wa Kitivo cha Uhandisi Chuo Kikuu cha Dar es Salaam ambapo washiriki wanategemewa kujenga uelewa wa masuala ya uchumi na ukombozi wa waawake kimapinduzi na kuwaelewesha watoa maauzi katika maeno yao wanayotoka.

Mwisho

POLISI RUVUMA INAWASAKA WATU WATANO KWA TUHUMA ZA MAUAJI

                             Na Gideon Mwakanosya, Songea.

 

POLISI mkoani Ruvuma inawasaka watu watano wakazi wa kijiji cha Likuyuseka kilichopo wilayani Namtumbo kwa tuhuma za kumuuwa Issa Lupia (47) wakati wakiwa kwenye kilabu cha pombe  za kienyeji.

 

Akizungumza na mtandao wa http://www.stephanomango.blogspot.com/ ofisini kwake kamanda wa Polisi mkoani hapa Michael Kamuhanda alisema kuwa tukio hilo limetokea juzi majira ya saa moja usiku huko katika eneo la kilabu cha pombe za kienyeji kijiji hapa.

 

Alisema kuwa watuhumiwa hao baada ya kugunduwa kuwa wametenda kosa walitoroka na kutokomea kusikojulikana na kwamba kwa sasa hivi polisi inaendelea kuwasaka watuhumiwa hao ambao wanadaiwa kuwa wametorokea nchi jirani ya msumbiji.

Amefafanua kuwa inadaiwa kuwa kabla ya tukio Lupia aliondoka nyumbani kwake na aliaga kwamba anaenda kwenye kilabu cha pombe za kienyeji kilicho karibu ambako alipofika alimkuta Hamza Saidi ambaye ni rafiki yake akiwa na wenzake wane.

 

Alisema kuwa Lupia aliungana na wenzake walianza kunywa pombe na baadae walianza kutofautiana ndipo ulipotokea ugomvi ambapo Lupia alipigwa ngumi na mateke sehemu mbalimbali za mwilini na kumsababishia kifo papo hapo.

 

Kamanda alisema kuwa watu waliokuwa jirani na eneo hilo walipofika kwenye tukio ghafla watuhumiwa hao walianza kutawanyika mmoja baada ya mwingine na kutokomea kusikojulikana ndipo taarifa ya tukio hilo ilipelekwa kwenye ofisi za serikali ya kijiji na baadae polisi ambao walifika kwenye eneo la tukio wakiwa wameongozana na mganga wa hospitali ya Mkoa alithibitisha kuwa Lupia amekufa kutokana na kipigo.

 

Alisema kuwa chanzo cha tuki hilo ni ulevi ambao baadae uliwafanya watofautiane na kuanza kumpiga mwenzao Lupia na kumsababishia kifo.

 

ASAKWA NA POLISI KWA TUHUMA ZA KUMBAKA DADA YAKE

                                        Na Gideon Mwakanosya,Songea.

 

JESHI la Polisi mkoani Ruvuma linamsaka Rashuel Mapunda mkazi wa mtaa wa misheni Mbinga mjini kwa tuhuma za kumbaka dada yake mwenye umri wa miaka 14  ambaye jina lake limeifadhiwa anayesoma kidato cha kwanza katika shule ya sekondari ya kutwa ya Makita.

 

Kamanda wa Polisi wa Mkoa wa Ruvuma Michael Kamuhanda alisema kuwa tukio hilo lilitokea juzi majira ya saa 9.alasali nyumbani kwa wazazi wao ambako inadaiwa Mapunda alimkamata dada yake kwa nguvu na kumfanyia kitendo cha unyama.

 

Kamuhanda alifafanuwa zaidi kuwa inadaiwa kuwa siku ya tukio msichana huyo akiwa anajiandaa kufanya shughuli za usafi nyumbani kwao ghafla alimkuta kaka yake amefika na kumkamata na kumalazimisha avue nguo kasha alifanya nae mapenzi.

 

Alisema kuwa wakati Mapunda anafanya tendo hilo la kinyama kwa dada ake ambaye alipiga kelele kwa ishara ya kuomba msaada majirani wasikia na walipofika kwenye nyumba hiyo walimkuta mapunda tayari ameshambaka msichana huyo.

 

Kamuhanda alisema kuwa majirani pamoja na wazazi wake wakiwa kwenye eneo la tukio walianza kumkimbiza Mapunda kwa lengo la kutaka kumkamata walishindwa baada ya yeye kuwatoroka a kutokomea kusikojulikana.

 

Alisema kuwa baadae msichana huyo walimpeleka kwenye hospitali ya wilaya ya Mbinga kwa matibabu ambako ilibainika kuwa mwanafunzi huyo ameumizwa vibaya sehemu zake za siri ambazo zimeonekana kuwa na michubuko mingi.

 

Kamanda alisema kuwa jeshilake linaendelea kumsaka mtuhumiwa huyo na kwamba akipatikana atafikishwa mahakamani kujibu shitaka linalomkabili.

 

MWISHO.  

CHADEMA WAMFYATUKIA MGOMBEA UMEYA WA CCM SONGEA CHARLES mHAGAMA

                                Diwani wa kata ya Misufini kupitia Chadema Salum Mfamaji

                                         Katibu wa CHADEMA mkoa wa Ruvuma Dorphini Ghazia

                                         Mwenyekiti wa CHADEMA mkoa wa Ruvuma Joseph Fuime

Na,Stephano Mango,Songea

CHAMA cha Demokrasia na Maendeleo(Chadema) kimemshukia mgombea wa nafasi ya Umeya wa Halmashauri ya Manispaa ya Songea kupitia Chama cha Mapinduzi(Ccm) Charles Mhagama kwa madai kuwa sio kiongozi makini na muadilifu anayeweza kulisukuma mbele gurudumu la maendeleo kwa maslahi ya wananchi

 

Akihutubia mamia ya wakazi wa Manispaa ya Songea katika viwanja vya soko la Manzese,kata ya Misufini Mwenyekiti wa chama hicho Mkoa wa Ruvuma Joseph Fuime alisema kuwa nafasi ya Umeya ni nafasi nyeti sana katika Halmashauri ya Manispaa ya Songea hivyo ina hitaji mtu makini,mwenye hekima,busara na muadilifu wa kuweza kushirikiana na wadau mbalimbali kuweza kulisukuma gurudumu la maendeleo

 

Fuime alisema kuwa kutokana na umuhimu huo mgombea aliyepitishwa na Chama cha Mapinduzi (Ccm)Charles Mhagama ili kuweza kuziba nafasi ya Umeya iliyoachwa wazi na Marehemu Ally Manya aliyefariki mwezi julai 29 mwaka huu,kuwa hana uwezo wa kushika nafasi hiyo kutokana na kujaa tamaa ya kujitajirisha kiharamu kupitia fedha za wananchi

 

Alieleza kuwa Mhagama ni kiongozi mbabe na mwenye kupenda rushwa hali inayodhorotesha maendeleo ya wananchi kwani alishawahi kufanya vitendo viovu ikiwa ni pamoja na kuwepo kwa ushawishi wa rushwa katika ununuzi wa gari ya kuzima moto,uuzwaji wa Katapila la Halmashauri akiwa ni Diwani wa kata ya Matogoro na kiongozi wa Kamati mbalimbali za baraza la madiwani

 

“Mhagama hawezi kuwa kiongozi bora na atakayeweza kutupeleka kwenye ustawi stahiki wa maisha kwani vitendo vyake vingi ni viovu kwani kuna kipindi alikuwa na mahusiano na mwanafunzi mmoja miaka ya nyuma ambapo alikutwa naye kwenye nyumba ya wageni na wazazi wa mwanafunzi huyo na kupelekewa kupigwa viboko hadharani”alieleza Fuime

 

Alifafanua kuwa vitendo hivyo vinadhihirisha ni jinsi gain alivyokuwa mchafu na kiongozi mbovu asiyestahili kupewa majukumu makubwa ya Umeya hasa katika kipindi hiki kilichogubikwa na ufisadi,rushwa na urasimu mkubwa Serikalini

 

Alisema kuwa siku zote Chama cha Mapinduzi kimekuwa kikiwaacha viongozi wazuri na kuwateua viongozi wabovu ili waweze kukinufaisha chama kwa maslahi yao binafsi hivyo hatuwezi kuongozwa na kiongozi wa aina hiyo na ndio maana tunapaza sauti ili umma ujue na kuwaambia Madiwani wao waliowachagua kutokumpigia kura mgombea huyo wa Ccm kwenye uchaguzi wa Serikali unaotegemewa kufanyika Septemba 25 mwaka huu

 

Alisema kuwa Halmashauri ya Manispaa ya Songea ni mali ya wananchi wote na sio mali ya chama fulani hivyo wananchi pazeni sauti zenu kwa maslahi ya vizazi vilivyopo na vijavyo ili waweze kufaidi rasilimali zilizopo kuliko kuwaachia watu wenye dhamira mbaya wazizoe rasilimali hizo

 

Alieleza kuwa kwa kuwa chama cha Mapinduzi kipo kwa ajili ya kuwanyonya watanzania,kunyanyasa haki za binadamu kwa maslahi ya wachache basi Chadema tutatetea haki za binadamu na kuzuia unyanyasaji wowote na ndio maana tunapaza sauti zetu ili wananchi muamke na kudai maisha yenye ustawi kwani ni haki zenu

 

Awali Katibu wa Chama hicho Mkoa wa Ruvuma Dorphine Ghazia akingua mkutano huo alisema kuwa Serikali ya Chama cha Mapinduzi ni Serikali katili sana kwa watu wake ndio maana wanaona wananchi wanahangaika kwa maisha magumu wao wanaendelea kuwakandamiza

 

Ghazia alisema kuwa watanzania hawana huduma bora za afya,miundombinu,elimu,maji wao wanawatukuza wanyama kwa kuwawekea mazingira mazuri ya kuishi mfano mzuri wa vyura vya kihansi wanalindwa kuliko binadamu,hivyo Chadema kitaendelea kuthamini utu wa binadamu kwa kuwatendea mambo yenye ustaarabu katika maisha yao

MWISHO

MASKINI MAMA KAMBONA !111111NDIVYO WAKAZI WA TUNDURU WALIVYOKUWA WANAMLILIA MWASISI WA TANU MAREHEMU KAMBONA

       

Marehemu Edith Kambona

Na Steven Augustino,Tunduru

MAELFU ya wakazi wa Wilaya ya Tunduru mkoani Ruvuma walijitokeza kumzika mwasisi wa Tawi la Chama cha TANU katika Tarafa ya Nampungu Wilayani humo  marehemu Edith Angela Kambona (73) pichani aliyefariki akiwa nyumbani kwake mtaa wa Extended Tunduru mjini.

Akizungumzia tukio hilo mume wa marehemu kambona, Mzee Jerome Kambona alisema kuwa mkewe alifariki ghafla usiku wa kuamkia septemba 1, mwaka huu 2011 baada ya kupatwa na homa ya shinikizo la damu.

Akisoma wasifu wa marehemu katika maziko yaliyofanyika katika makaburi yaliyopo nyumbani kwao, msemaji wa familia hiyo Emmanuel kambona alisema kuwa marehemu ambaye alizaliwa mwaka 1938 alimaliza elimu ya msingi katika shule ya msingi Mindu mwaka 1957 na baadae kujiunga na shule ya wasichana ya Newala Middle School kuanzia mwaka 1958/1959 na baadae kujiunga na masomo ya uuguzi katika chuo cha Tukuyu Mkoani Mbeya.

Taarifa hiyo iliendelea kufafanua kuwa baada ya kumaliza elimu hiyo pia wakati wa uhai wake, marehemu Kambona ateuliwa kuwa Mwenyekiti na muasisi wa chama cha Tanu katika Tarafa ya Nampungu kuanzia mwaka 1962 wadhifa ambao aliutumikia kipindi cha mwaka mmoja ambapo mwaka 1963 alichaguliwa kuwa Mwenyekiti wa Jumuiya ya Umoja wa Wanawake Tanzania (UWT) Wilaya ya Tunduru hadi mwaka 1969.

Taarifa hiyo ilieleza kuwa mwaka 1970 marehemu Kambona aliteuliwa kuwa Katibu Tarafa na kutumikia wadhifa huo katika Tarafa za Kidodoma, Ligunga, Matemanga, Namasakata,Nampungu Wilayani Tunduru na Tarafa ya Lipalamba Wilayani Mbinga Mkoani Ruvuma nafasi aliyoitumikia hadi mwaka 1988.

Awali akisoma misa ya maziko ya marehemu kambona Padre Keneth Mathiani kutoka kanisa la Angalikana Tunduru aliwataka waamini wa madhehebu hayo kuzingatia maandiko ya vitabu vitakatifu ili waende kuishi maisha yenye furaha milele baada ya vifo vyao kama tuaminivyo kwamba Marehemu Kambona atapata tuzo hiyo vile aliishi kwa uadilifu wakati wote wa uhai wake

Aidha Marehemu Kambona wakati wa uhai wake akiungana na viongozi wenzake wa wilaya ya Tunduru ndio waliofanikisha adhima ya kuondoa njaa Tunduru kwa kauli mbiu ya Kunjatu ikiwa na maana ya kuondoa njaa Tunduru ,kampeni ambayo ilipelekea wakazi wote wa Tunduru kulima mazao ya chakula ekari mbili na mazao ya biashara ekali moja chini ya uongozi wa Kasapila aliyekuwa mkuu wa wilaya ya Tunduru kwa wakati huo

Marehemu Kambona atakumbukwa kwa mchango wake mkubwa kwa taifa hili hasa katika sekta ya elimu na jamii kwani alikuwa ana ndoto kubwa ya kuwaona watu wanaelimika kwa kusoma kwa bidii na kukataza utoro mashuleni na mamba kwa watoto wa shule

Marehemu ameacha Mgane, Watoto watatu, wajukuu 23 na vitukuu 14, mungu aiweke mahali pema peponi Roho yake, apumzike kwa amani amina.

Mwisho

HAYA NDIYO MTANDAO HUU ULIVYOSHUHUDIA PILIKAPIKA ZA MAHAFALI YA AINA YAKE YA SHULE YA MSINGI MKOMBOZI ILIYOPO KATA YA BOMBAMBILI,MANISPAA YA SONGEA ILIYOFANYIKA JANA KATIKA VIWANJA VYA SHULE HIYO NA BAADAE KWENYE UKUMBI WA CHAMA CHA WALIMU MKOA WA RUVUMA

 Mzee Samwel Mapunda akimpongeza Mgeni Rasmi Juma Nyumayo mara baada ya kumaliza kuwahutubia katika sherehe za mahafali katika shule ya Msingi Mkombozi na kuwapatia msaada wa mifuko kumi ya Saruji(Cement) na wazazi kuahidi kubebelea mchanga kwa ajili ya kusakafia darasa la Awali shuleni hapo

 Kushoto Padre Chinguku akiwaonyesha,Gideon Mwakanosya,Mwandishi Mkongwe wa Magazeti ya Nipashe na guardian na Mjumbe wa Bodi ya Swacco(katikati)kulia ni mzee Samwel Mapunda namna watoto walivyopendeza katika mahafali hiyo

 Kulia ni Gideon Mwakanosya akisalimiana na Mjapani ambaye jina lake halikuweza kupatikana mara moja kutokana na pilikapilika za kufanikisha mahafali hiyo,pembeni ni wanafunzi wakiwa na hamu ya kuendelea kusherehekea mahafali hayo

 Viongozi mbalimbali wakiwa na Mgeni Rasmi Nyumayo katika darasa linalodaiwa kuwa ni la Awali ambalo halijasakafiwa na mgeni Rasmi kutoa mifuko kumi ya Saruji na wazazi kuahidi kutoa mchanga wa kusakafia darasa hilo kwa lengo la kutaka watoto wao wakombolewe na elimu itolewayo Shuleni hapo

 Watoto wakitafakari kwa umakini hatima ya elimu yao mara baada ya kupewa Saruji na mchanga utakaotumika kuondoa vumbi katika darasa lao

 Watoto wakitamani kucheza kiduku kutokana na furaha kubwa waliyonayo baada ya kusikia kuwa darasa lao litakuwa katika hali stahiki kwa kuendelea kupatiwa elimu kusudiwa

 Viongozi wa Serikali ya Kata ya Bombambili wakiwa kwenye picha ya pamoja na Mgeni rasmi nje ya darasa la Awali ambalo linatarajiwa kukarabatiwa hivi punde

 Wa kwanza kushoto ni Mwalimu Mkuu wa Shule ya Msingi Mkombozi Imelda Mbawala akiwa kwenye picha ya pamoja na Mgeni Rasmi na familia ya Kazimguru

 Sherehe ikifunguliwa kwa mbwembwe zote kwenye ukumbi wa Chama cha Walimu Mkoa wa Ruvuma,ikiongozwa na Mgeni Rasmi Nyumayo,kushoto ni Diwani wa kata ya Bombambili Kenny Moto akisaidiwa na Mwenyekiti wa Mtaa wa Mjimwema Twalik Mpakasini wa kwanza kushoto

 Mwalimu Mstaafu Agnes Nkoma aliyeanza kazi mwaka 1972 na kustaafu utumishi wa UMMA,mei mwaka huu 2011 akipokea zawadi ya utumishi uliotukuka kutoka kwa Mgeni Rasmi Nyumayo katika Mahafali ya Shule ya Mkombozi ambapo amestaafu akiwa Mwalimu Mkuu katika Shule hiyo

 Mwalimu Bibi(Notbuluga Mapunda)akimshukuru kwa utumishi wake Mwalimu Agnes Nkoma na kumtakia maisha mema ya kustaafu utumishi wa UMMA

 Sherehe yoyote duniani haiwezi kufanikiwa bila kuwepo mziki au burudani,sasa kazi ipo Dj MKongwe ambaye pia ni Diwani wa Kata ya Bombambili akionyesha umahiri wake wa kusugua Cd na kuchezesha pini za uhakika kwa wazee na vijana(Masharobaro)

 Wahitimu wa darasa la Saba katika Shule ya Msingi Mkombozi wakimng'ang'ania Mgeni Rasmi Nyumayo kucheza muziki wa kisasa bila kufahamu kuwa mwenzao alikuwa kijana wa zamani na sasa akitaka kutikisa kichwa na kisigino chini lazima achezewe nyimbo za zamani kama vile Ottu Jazz Band,Sikinde na zingine za aina hiyo bila kusahau TWISTI

 Hapo sasa Mgeni Rasmi akiwa na Wazee wenzake akisakata rumba katika mahafali ya aina yake huku akitamani kuvua koti la suti ili aweze kumudu vizuri rumba hilo

Ukosikia kipindi maalumu ndio hicho cha kuongeza vocha ya tumbo ili uweze kupata nguvu za kufanya jambo na uwezo kamilifu wa kufikiri,kwa kweli sherehe hiyo ilikuwa ni ya aina yake kufanyika mjini hapa,tuwashukuru wote waliowezesha mtandao huu wa http://www.stephanomango.blogspot.com/ kufika shuleni hapo na ukumbi ili kuweza kuwaletea wasomaji na wadau wa mtandao huo taarifa na burudani

 Mzee Samwel Mapunda na Mkewe Mwalimu Notbuluga Mapunda(Mwalimu Bibi) hawakubaki nyuma katika Mahafali hayo kwa kumsindikiza mjukuu wao Dickson Mapunda kushikana mkono na Mgeni Rasmi Nyumayo na kupokea uthibitisho wa kuhitimu elimu ya Msingi darasa la Saba mwaka huu 2011

 Hapa sasa ni kucheza Kiduku kwenda mbele kwa wahitimu wa darasa la saba katika Shule ya Msingi Mkombozi ikiwa ni furaha ya kuhitimu na kukabidhiwa cheti na Mgeni Rasmi Nyumayo kwa kudumu katika darasa la kwanza hadi la saba mwaka huu

 Usiposhuhudia Mahafali haya unaweza kujilaumu kwa kukosa raha na maneno ya busara na hekima kutoka kwa Mgeni rasmi Nyumayo na hapa ni watoto ambao urefu wake ni wa mashaka wakiwa wanatafuta uwezo wa kuona kinachoendelea

 Wageni waalikwa,walimu na wanafunzi wakiwa wanafuatilia mahafali hayo kwa umakini mkubwa

 Mgeni Rasmi Juma Nyumayo ambaye ni Mwanaharakati wa masuala ya haki za binadamu akimpa msaada wa fedha ya kununulia Uniformu Mwanafunzi wa darasa la tano Agnes Magagura baada ya kusikia kuwa anashindwa kuendelea na Shule kwa kukosa Uniformu na kuguswa kutoa msaada huo

Mwalimu Mkuu Mstaafu wa Shule ya Mkombozi Agnes Nkoma akishangiliwa na Wanafunzi wake alipokuwa anawaaga na kwenda kuanza maisha mapya ya URAIANI kwa kuwa amestaafu utumishi wa Umma