WATOTO YATIMA WANAOSOMA SEKONDARI TUNDURU WAKOSA CHAKULA

                            MKUU WA WILAYA YA TUNDURU JUMA MADAHA

Na,Augustino Chindiye Tunduru
ZAIDI ya Watoto yatima 3000 wanaosoma katika Shule za Sekondari na Msingi Wilayani Tunduru Mkoani Ruvuma wamelalamika kukosa huduma ya chakula ambacho hutolewa katika shule hizo kutokana na wao kutochangia fedha za kuchangia ili kuwawezesha kupata huduma hiyo.

Wakiongea kwa nyakati tofauti wanafunzi hao wamesema kuwa toka shule zifunguliwe mwanzoni mwa mwaka huu ambapo wanafunzi hao wamekuwa hawaruhusiwi kunywa uji wala chakula cha mchana kama ambavyo wanafunzi wenzao hupewa huduma hiyo.

Katika taarifa hiyo wanafunzi hao walisema kuwa hali hiyo mbali na kuonekana kuwa wanabaguliwa lakini kitendo hicho kimekuwa
kikiwakatisha tamaa ya kuendelea na masomo katika shule zao.

Aidha wanafunzi hao walidai kuwa kitendo hicho cha viongozi wa Shule kuwabagua kupata huduma hiyo pia kimewasababisha kuonekana kwa tabaka la Watoto hao wasio na Wazazi na walezi kunyanyaswa na wanafunzi wenzao hali inayotishia kulididimiza kundi hilo kitaaluma.

Alipotakiwa kuzungumzia hali hiyo Afisa Elimu Shule za Sekondari
Wilayani humo Ally Mtamila mbali na kukiri kuwepo kwa changa moto hiyo alisema kuwa ipo haja ya kuboreshwa kwa taarifa za Watoto hao hasa kwa wasio kuwa na Walezi wa kuwahudumia ili wanapo pangiwa Shule vigezo vyao viwawezeshe kupangwa katika Shule za Bweni ambazo chakula chao hutolewa na Serikali.

Upande wa afisa maendeleo ya jamii wa Wilaya hiyo Mary Ding`ohi alipotakiwa kuzungumzia tukio hilo mbali na kukiri kuwepo kwa kero hiyo alisema kuwa tatizo hilo limetokana na kuchelewa kwa fedha za kuwaghalamia wanafunzi hao.

Alisema hata hivyo tayari idara yake imekwisha pokea kiasi cha Shiligi Milioni 35.763 ambazo kati yake Tsh. 15,976,000 zimepangwa kughalamia malipo ya Ada, kununua sare za Shule na Michango hiyo ya Chakula kwa Watoto 3215 wanaosoma katika Shule hizo.

Ding`ohi aliendelea kufafanua kuwa Fedha hizo ambazo kila
mwanafunzi yatima amepangiwa kulipiwa Tsh. 70,000 kwa mgawanyo wa Tsh.20,000 za Ada na Tsh.50,000 kama mchango wa chakula kwa mwaka mzima fedha hizo zimepangwa kulipwa kuanzia Wiki ijayo.

Mwisho

TAIFA LIMEKWAMA KIUCHUMI LINAHITAJI UFUFUO NA UJENZI MPYA WA VIWANDA

                                                     RAIS JAKAYA KIKWETE

Na Stephano Mango,Songea

MSINGI wa uchumi wa nchi kwa sasa ni lazima utazamwe katika kuanzisha na kufufua viwanda kwa ajiri ya maendeleo ya kiuchumi ili wananchi na taifa liweze kusonga mbele kwani kwa dalili zilizopo tutaendelea kulalamika na hatimaye kushindwa kujitegemea kabisa.

Ni wazi kuwa sehemu kubwa ya matatizo ya uchumi yanayoikabili serikali ya Rais Jakaya Kikwete, yana mizizi katika utendaji kazi wa awamu mbili zilizomtangulia kwani udhaifu ulijidhihirisha katika kupanga uchumi kwa maendeleo ya nchi

Kuna sura tatu za kuzingatia katika uchumi wa Tanzania na ule wan chi zote za Dunia ya tatu,kwanza ni dhaifu kiuchumi,pili kwa sehemu kubwa ni tegemezi kwa fedha kutoka nje,tatu,kadri utegemezi kiuchumi unavyoendelea ndivyo uhai wa kisiasa na kiuchumi utakavyoendelea kuwa tegemezi

Ufufuaji wa viwanda vilivyokufa na ujenzi wa viwanda vipya nchini uwe msingi mkubwa wa kuiondoa nchi hapa ilipo na kulijenga Taifa na watu wake wawe  wenye uchumi imara ambao utasababisha kuwe na maendeleo ya vitu

Katika Dunia hii ambayo nchi zinazoendelea zinashindana  kwa ujenzi wa viwanda,nasi hatuwezi kujiondoa kwenye sekta hiyo kama kweli tunataka kujikwamua kiuchumi ,kitendo cha kupuuza hoja hiyo ni kukimbilia kwenye uibuaji wa mipango mahututi ya kuokoa uchumi wa nchi na ile ya kuwajaza wananchi mabilioni ya Jk ambayo ni mipango mfu

Rasilimali tulizo jaliwa kuwa nazo hapa nchini hazitakuwa na maana kubwa kama zitashindwa kutumika katika kutokomeza umaskini wa watanzania kutokana na ukosefu wa ajira ambazo wangezipata kwa kuajiriwa kwenye viwanda ambavyo vingekuwa vinatumia rasilimali tulizonazo

Uwepo wa viwanda ni msingi mkubwa wa maendeleo katika nchi yeyote dunia licha ya kupunguza umaskini kutokana na watu wake kuajiriwa,pia husababisha wananchi kupenda bidhaa za kwao na kwamba fedha zinazotumika kununua  bidhaa nje ya nchi kama vile viatu,kanga,vitenge,majembe,pini,sindano na bidhaa zingine ambazo zinaweza kutengenezwa hapa

 Zingeweza kuchangia kasi ya mzunguko wa fedha ambapo matokeo yake yangeleta ustawi kwa wananchi na taifa kiujumla kwani pengo la wenye nacho na wasio nacho lingepungua sana na hata kupanda kwa gharama za maisha kungepungua

Ili kuweza kuleta hali chanya katika kuondokana na umaskini wa watanzania na uchumi goigoi,msingi wa kwanza ni kuasisi kwa makusudi uhusiano kati ya sekta mbili kuu za uzalishaji ambazo ni viwanda na kilimo ambapo sekta hizi zinaweza kuendelea kwa uhakika kama shughuli zake zitashabihiana na kutegemeana

Msingi wa pili ni kuweka uwiano wa ndani kwa hizi sekta mbili kwasababu ndani ya sekta ya kilimo kunapaswa kuwe na uwiano kati ya uzalishaji wa chakula na uzalishaji wa (mazao) malighafi za viwandani

Kati ya uzalishaji mkubwa na uzalishaji mdogo,kati ya mfumo wa sasa wa uzalishaji na ule wa kale,na kati ya uzalishaji binafsi na uzalishaji wa umma ambapo jambo muhimu hapa ni kuwa na kiunganishi kikuu katika kusukuma mbele maendeleo ya vingine

Hapa kiunganishi kikuu ni uzalishaji wa chakula kwasababu watu ambao ndio rasilimali muhimu na nguvu ya msingi kwa maendeleo hivyo lazima wale chakula bora kabla ya kupata nguvu ya kufanya mambo mengine

Msingi wa tatu ni kuwa na uwiano ndani ya viwanda ambapo idara muhimu katika sekta hii ni viwanda vikuu na viwanda vyepesi au vya kati,ikiwa jukumu la viwanda vikubwa ni kuvipatia viwanda vya kati mashine za uzalishaji mali

Kazi ya viwanda vikubwa ni kuzalisha mashine za kuzalisha mashine ambazo vinatumika kwenye viwanda vidogo kwa maana ya vipuri na kuondoa tatizo la kutegemea vipuri kutoka nje

Viwanda vya kati ni sekta inayozalisha bidhaa za walaji kama vile nguo,viatu,pamba(nyuzi),bia,zana za kilimo,vifaa vya kupasua mbao,mitambo ya maji na vingine vya aina hiyo ambapo pia viwanda vya kati ni sekta inayovigharamia viwanda vikuu kwa maana ya kuwa kule ambako inapata mashine na inatoa bidhaa za mlaji kwa watumishi wa sekta zote mbili

Siyo tu kwamba ujenzi wa viwanda vikubwa nchini ni muhimu katika kujenga msingi wa mapinduzi ya kiteknologia na uvumbuzi,bali pia unasaidia kuimarisha uwezo wa nchi katika kudhibiti vizuri mazingira

Katika mchakato wa maendeleo viwanda vikubwa vinajenga mabwawa ili kudhibiti mafuriko na kuhifadhi maji kwa ajili ya kilimo cha umwagiliaji,pia vinarahisisha kupeleka umeme vijijini,hatua ambayo ni muhimu na ya awali katika uwiano bora wa maendeleo ya viwanda,na upunguzaji tofauti ya maisha kati ya vijijini na mijini

Viwanda vikubwa ni muhimu pia katika kuendeleza mfumo imara wa uchukuzi na mawasiliano na kwa sababu ya umuhimu wake katika uchumi hakuna nchi iliyowahi kuendelea bila kuwa na viwanda vikubwa

Ni kutokana na nguvu ya eneo hili nchi zenye viwanda zimeweza kuzitawala na kuzidhibiti nchi maskini ikiwemo Tanzania ndio maana kutokana na maono stahiki ya kujenga Taifa linalopaswa kujitegeme,Serikali ya awamu ya kwanza ilijenga viwanda vingi vya kati ili kuondoa utegemezi kwa mataifa ya nje

Ilijenga viwanda vya nguo,mbolea,zana za kilimo na vya bidhaa karibu zote za mlaji,awamu hiyo ilifanikiwa kujenga viwanda vya kutengeneza mashine(Moshi Mashine Tools) viwanda vya kutengeneza magari(Nyumbu) kiasi cha kukaribia kujitosheleza kwa mahitaji ya ndani

Leo,viwanda hivyo havipo tena,vilitelekezwa,vikauzwa katika mkumbo wa ubinafsishaji,vikauawa na mabepari wa kimataifa ili kujenga na kuendeleza utegemezi wa Tanzania kwa bidhaa kutoka nje

Sababu nyingine ni ulimbukeni wa walioko madarakani na ushabiki unaoenezwa nao kwa bidhaa kutoka nje,jambo ambalo linaonyesha kujikana na kudharau chako na kuhangaika na bidhaa ambazo hawajashirikishwa

Kama nchi ingekuwa na watawala wabunifu wa maendeleo ya kweli,majengo ya minara pacha ya benki kuu yangejenga viwanda vingi ambavyo vingewezesha kuinua uchumi wa watanzania na nchi kiujumla lakini badala yake nchi imejiingiza kwenye ujenzi wa maghorofa yaendayo mawinguni na majumba ya anasa yasiyozalisha utajiri

Matumizi haya mabaya ya rasilimali yanafanya nchi kama Tanzania ziyapigie magoti mataifa makubwa kuomba mikopo zaidi,na wakati huo huo uchumi hauzalishi vya kutosha kuwezesha ulipaji madeni na riba ya mikopo hiyo

Misaada ya mabilioni tunatomwagiwa na nchi za China,Japan,Marekani na Uingereza na kufanya watawala kurukaruka kwa furaha kama ndama,ingekuwa ya manufaa zaidi kama ingetolewa kwa mfano wa viwanda ili kuliwezesha Taifa  kujitegemea na kujiendeleza

Ilivyo sasa,ni misaada inayoongeza na kuimarisha utamaduni wa utegemezi kwani wanaotoa mikopo na misaada hawataki  Tanzania iwe na ndoana wala ijue jinsi ya kuvua samaki kwasababu wanataka kila siku Tanzania na nchi za Dunia ya tatu zipige magoti langoni mwa tajiri na kuomba samaki

Ni wazi huu ni utumwa,je Mustapha Mkulo Waziri wa fedha na uchumi na wenzake Serikalini wanakubali kumeza dawa chungu ya kuponya ugonjwa unaolisumbua Taifa maskini lenye rasilimali zote muhimu zinazosababisha mchakato wa maendeleo kukamilika

Serikali inapaswa kuelewa kwamba bila ya kuweka mikakati bora,kasi ya ukuaji viwanda nchini itaendelea kuwa ndogo kama ilivyo sasa,hivyo inatakiwa kuona Serikali inaanzisha mpango wa kuendeleza viwanda na hatimaye kukuza na kuondoa umaskini

Mpango huo wa kuendeleza viwanda ni lazima uwe na sera na mikakati madhubuti ili ufanikiwe ambapo mbinu mbalimbali zina hitajika na mambo makuu mengine katika utekelezaji wenye ufanisi wa kuanzisha mchakato wa ufufuo na ujenzi wa viwanda kwa ukombozi wa Taifa letu

Mwandishi wa Makala haya

Anapatikana 0715-335051

www.stephanomango.blogspot.com

JOHN KASEMBO AWALETEA WATANZANIA KITABU CHA MIAKA 50 YA UHURU WA TANZANIA BARA: TULIKOTOKA, TULIPO NA TUNAKOKWENDA

                                                KIPO MITAANI SASA

                        JOHN MTWALE KASEMBO

JINA LA KITABU: MIAKA 50 YA UHURU WA TANZANIA BARA: TULIKOTOKA, TULIPO NA TUNAKOKWENDA

MWANDISHI: JOHN MTWALE KASEMBO

Ni mzaliwa wa Mkoa wa Mwanza. Alisoma shule ya msingi Shamaliwa. Na baadaye masomo ya Sekondari kwenye Seminari za Nyegezi - Mwanza na Maua - Moshi. 

Ni mwezeshaji na mtoa mada wa mambo ya uongozi, dini, vijana, falsafa, ujasiriamali na amali za maisha. Ni mhitimu wa masomo ya falsafa na dini katika Chuo cha Mtakatifu Augustino Peramiho ambacho ni Chuo Kishiriki cha Chuo Kikuu cha Urbaniana, Roma.

Tena yeye ni mtafiti wa maendeleo ya Tanzania. Sasa anaendelea na masomo ya Shahada ya Kwanza ya Teolojia katika Chuo hicho hicho.

Kitabu hiki kimechapishwa na kampuni ya Kolbe printing press, Nairobi nchini Kenya.

Yaliyomo

Kutabaruku................................................................................................. 7

Salamu za Rais wa Baraza la Maaskofu Katoliki Tanzania ...................... 9

Shukrani..................................................................................................... 11

Dibaji.......................................................................................................... 15

Utangulizi................................................................................................... 17

Vifupisho................................................................................................... 23

Sehemu ya Kwanza

TANZANIA TULIKOTOKA

1. UKOLONI TANZANIA BARA........................................................... 27

2. HARAKATI ZA UKOMBOZI............................................................. 39

3. UHURU................................................................................................ 47

4. MAISHA BAADA YA UHURU......................................................... 57

Sehemu ya Pili

TANZANIA TULIPO

5. JUBILEI YA MIAKA 50 YA UHURU WA TANZANIA BARA....... 69

6. JUBILEI NI KUANGALIA TUNU ZETU KAMA WATANZANIA. 78

7. JUBILEI NA CHANGAMOTO ZETU................................................ 86

Sehemu ya Tatu

TANZANIA TUNAKOKWENDA

8. JUBILEI NI KUANZA UPYA............................................................. 107

9. KANUNI YA TIBA MCHEPUO KWA MAENDELEO

YA TAIFA LETU..................................................................................... 133

TATHMINI NA MOTISHA..................................................................... 145

HITIMISHO.............................................................................................. 159

REJEA....................................................................................................... 169

PICHA YA JALADA LA KITABU NIMEIAMBATANISHA KAMA ATTACHMENT. UNAWEZA KUIDOWNLOAD NA KUIWEKA PIA.

MUHTASARI:

Ndugu Watanzania wenzangu, nimendika kitabu hiki kwa malengo matatu. Kwanza kitabu hiki kinalenga kupanua mawazo na mtazamo wetu Watanzania kuhusu dhana ya Jubilei ambayo sisi tunafanya kumbukumbu ya miaka 50 ya uhuru wetu yaani kujua kuwa nini tunatakiwa tufanye. Uelewa huu utakuwa wa msingi kwa kizazi kitakachofanya Jubilei ya miaka 75 au miaka 100 ijayo ya taifa letu. Tena, lengo la pili la kuandika kitabu hiki ni kutoa uelewa ambao utakuwa ni chagizo la mabadiliko, ukombozi na maendeleo kwa watu tulioamua kutafakari na kutenda kadiri ya ukweli kwa manufaa ya taifa letu katika kizazi hiki na kijacho wakati huu tunapofanya Jubilei ya miaka 50 ya uhuru wetu. Na zaidi, lengo langu la mwisho la kuandika kitabu hiki ni kuchukua wajibu kama Mtanzania wa kushirikisha mawazo yangu kwa  Watanzania wenzangu ili kuyatafuta maendeleo ya kweli ya taifa letu na zaidi sana ni kutoa mchango wangu katika sherehe hizi za taifa letu. Sikupenda sherehe kubwa kama hii ipite kama meli isiyoacha nyayo baharini.

Kitabu hiki kimegawanyika katika sehemu kuu tatu. Sehemu ya kwanza ni Tanzania - tulikotoka ambayo inaongelea masuala ya ukoloni, harakati za ukombozi, uhuru na maisha baada ya uhuru. Sehemu ya pili inaongelea Tanzania – tulipo inayozungumzia hali yetu leo kiuchumi, kisiasa na kijamii nikijadili changamoto zetu kama taifa na tunu zetu tulizonazo tangu uhuru mpaka sasa kama Watanzania na maana na umuhimu wa sherehe zetu za Jubilei ya miaka 50. Hatimaye, sehemu ya tatu, inazungumzia Tanzania – tunakokwenda (mwanzo mpya) ikijadili wapi tunakokwenda kama taifa yaani kuwa na mwanzo mpya na kuingalia kanuni ya tiba mchepuo kama nyenzo ya kutufikisha huko.  Kama yule mshairi na mtunzi wa vitabu wa Uingereza Robert Louis Stevenson alivyopata kusema kwamba, “Usipime siku yako kwa yale uliyovuna bali pima kwa yale uliyopanda.” Malengo hayo ndiyo yamenifanya nipande mbegu ya kitabu hiki kwa kuitakia mema nchi yangu kwa miaka 50 mingine.

Mwisho natabaruku kitabu hiki ni kwa heshima ya taifa langu Tanzania linalofanya Jubilei ya miaka 50 ya uhuru wake na kwa namna ya pekee Mama yangu mpendwa Christina Shija, baba yangu mpendwa marehemu Gabriel Kasembo, marehemu babu yangu Chifu Yohana Kilangabhana Kasembo, marehemu bibi yangu Agatha Mija Michael, Hayati Askofu Mkuu Anthony Mayala, Baba wa Taifa, Hayati Mwalimu Julius Kambarage Nyerere na Watanzania wote ninaochangia nao utaifa na nia njema ya kuitakia mema nchi yetu na zaidi wenye moyo wa dhati wa kujenga taifa la Tanzania lenye heshima, upendo, amani na maendeleo ya kweli na ya uhakika kwa kizazi hiki na kijacho! Nakutakieni usomaji mwema na mafanikio tele katika maadhimisho ya jubilei ya miaka 50 ya uhuru wa Tanzania huku tu tukifakari  uwepo, maisha na mustakabali wa taifa letu !

KWA KUAGIZA NAKALA YA KITABU HIKI ADIMU NA ADHIMU KWA TAIFA LETU, WASILIANA NA:

JOHN MTWALE KASEMBO

P.O BOX 22, PERAMIHO.

SIMU: 0755 417 074 / 0712 120 775

BARUA PEPE: jmkasembo02@yahoo.com

WANNE WAFA KATIKA MATUKIO MANNE TOFAUTI MKOANI RUVUMA

KAMANDA WA POLISI MKOA WA RUVUMA MICHAEL KAMUHANDA

Na Gideon Mwakanosya, Songea

WATU wanne wa Vijiji vya Litolongi na Minango  vilivyopo Kata ya Kigonsera Wilayani Mbinga na Mkaya kilichopo Kata ya Lituhi Wilayani Nyasa Mkoa wa Ruvuma  wamekufa katika Matukio matatu tofauti yakiwemo ya kupigwa na radi wakati mvua zikiwa zinaendelea kunyesha.

Wametajwa waliokufa kwa kupigwa na radi kuwa ni Manfred Komba (18) na Pascar Ndomba (33) wote wakazi wa Kijiji cha Minango Kata ya Kigonsera na mwingine ni Maria Kinunda (18) Mkazi wa Kijiji cha Litolongi Kata ya Kigonsera Wilayani humo na Martias Charle (52) Mkazi wa Kijiji cha Mkaya Kilichopo Kata ya Lituhi Wilaya mpya ya Nyasa ambaye alikutwa Porini akiwa amekufa.

Kamanda wa Polisi wa Mkoa wa Ruvuma Michael Kamuhanda alisema kuwa tukio la kwanza lilitokea January 27 Mwaka huu majira ya Saa 11 Jioni huko katika Kijiji cha Minango kilichopo Kata ya Kigonsera ambako Komba na Ndomba kabla ya kukutwa na mauti walikuwa shambani wakilima.

Alieleza zaidi kuwa wakiwa wanaendelea kulima Majira ya Saa 11 Jioni ghafla manyunyu ya mvua yalianza na baadaye Mvua kubwa iliongezeka huku ikiwa imeambatana na radi ndipo walipoamua kuacha kuendelea kulima kasha wakaanza kukimbilia kwenye kibanda kwa ajili ya kujificha mvua lakini kabla hawajafika kwenye kibanda hicho walipigwa na radi na kufa papohapo.

Kamuhanda alisema kuwa tukio jingine lilitokea January 27 mwaka huu Majira ya saa 12 Jioni huko katika Kijiji cha Litolongo Kata ya Kigonsera wilayani humo Maria alipigwa na radi na kufa papohapo wakati akikimbilia ndani ya Nyumba yake kujificha Mvua.

Alifafanua kuwa Maria mapema inadaiwa kuwa alikuwa akifanya shughuli zake nje ya nyumba yake na baadaye Mvua zilipoanza kunyesha ambazo ziliambatana na radi ndizo zilizosababisha kukatisha Maisha yake kwa kupigwa na radi na kufariki papo hapo.

Wakati huo huo  Matias Charle (52) Mkazi wa Kijiji cha Mkaya kilichopo Kata ya Lituhi Wilayani Nyasa ambaye anadaiwa kuwa alikuwa mgonjwa wa akili na ni mlemavu wa mikono na miguu alikutwa porini akiwa amekufa.

Alieleza zaidi kuwa Charle anadaiwa kuwa wakati wa uhai wake Oktoba mwaka jana alitoweka nyumbani kwake na kutokomea kusikojulikana na jitihada za kumtafuta zilifanywa bila kuwepo mafanikio na Juzi majira ya saa 9 alasiri alikutwa porini akiwa amekufa.

Mwisho.  

WATU SITA MBARONI KWA UPORAJI WA KUTUMIA BARUTI

KAMANDA WA POLISI MKOA WA RUVUMA MICHAEL KAMUHANDA

Na Nathan Mtega,Songea  

 

JESHI la polisi mkoani Ruvuma linawashikilia watu sita wanaodaiwa kuwa ni majambazi ambao walivamia nyumba mbili za wafanyabiashara wa kijiji cha Mkongotema eneo la Madaba Songea vijijini na kufanikiwa kupora zaidi ya shilingi milioni 415600 baada ya kufyatua milipuko mara nne hewani na kusababisha sintofahamu miongoni mwa wananchi wa kijiji hicho.

 

 Kamanda wa polisi wa mkoa wa Ruvuma Michael Kamuhanda amesena kuwa tukio hilo lilitokea Januari 31 mwaka huu majira ya 7:30 usiku ambapo aliwataja watuhumiwa hao kuwa ni Baraka Bedo(25) mkazi wa Morogoro,Salum Ahmad(45) mkazi wa Mtwara na Stanley Mtega(20) mkazi wa Ludewa mkoani Iringa.

 

Wengine ni Peter Mbilinyi(35) mkazi wa kijiji cha Mkongotema,Mfaume Rashid(30) mkazi wa kijiji cha Hanga ngadinda na James Mtewele(21) mkazi wa kijiji cha Magingo wilayani Songea vijijini.

 

Alifafanua kuwa inadaiwa kuwa siku hiyo ya tukio watu wasiofahamika wakiwa na milipuko na mapanga waliivamia nyumba mbili ikiwemo ya Remigius Ngunja na Egno Mgeni na kufanikiwa kupora fedha taslimu kiasi cha shilini milioni 4.156.000 kabla ya uvamizi huo watuhumiwa hao inadaiwa kuwa walifyatua milipuko minne hewani na kumjeruhi Reimigius  kwa mapanga kichwani na mgongoni.

 

Alisema kuwa baada ya Remigius kupigwa alianguka na kuzirai ndipo mke wake Octaviana Danda walimuamuru atoe fedha huku wakimtishia kumkata mikono kwa kutumia panga walilokuwa nalo ndipo mke huyo alichukua shilingi milioni tatu na kuwakabidhi watu hao pamoja na simu mbili za mkononi.

 

 Kamanda kamuhanda alieleza zaidi kuwa baadae watuhumiwa hao walikwenda kwenye nyumba nyingine ya Egno Mgeni na kumkuta mlinzi wake Avito Mbilinyi na kumuaru awaonyeshe mahali alipo tajiri kisha walifyatua milipuko mitatu hewani na baadae walimkuta mkewe Mgeni na kumuuliza aliko mumewe ambaye alikataa kuonyesha mumewe alipolala na baadae walifanikiwa kumuona ndani ya nyumba na kumuomba awaonyeshe mahali alipo tajiri na mmiliki wa nyumba hiyo.

 

Alibainisha zaidi kuwa mmiliki wa nyumba hiyo hayupo kisha wakaenda kumvamia mkewe na kumuamuru atoe fedha ndipo alipowakabidhi shilingi milioni 1.126.000 na kisha wakatokomea na kwenda kusikojulikana.

 

 Kamuhanda alieleza kuwa polisi walipata taarifa ya tukio hilo kwa njia ya simu na kwenda eneo la tukio na baadae walisimamisha gari lenye namba za usajili T435 BHT Coaster ya abiria inayofanya safari zake kati ya Madaba na Songea mkoani humu ambao walifanikiwa kuwakamata watuhumiwa wa ujambazi watatu ambao ni Edo,Ahmad na Mtega.

 

Ambao walikutwa na kitambaa chenye damu,nguo zilizolowa damu milipuko,betri simu ya mkononi aina ya Nokia,fedha taslimu kiasi cha shilingi 758.000 pamoja na milipuko ambayo ilikuwa imeandaliwa kwa kuweza kulipuka muda wowote.

 

Amesema kuwa watuhumiwa wote wanatarajia kufikishwa mahakamani baada ya uchunguzi kukamilika.

 

Mwisho.

SERIKALI MKOANI RUVUMA IMEIHAKIKISHIA NCHI YA CUBA KUENDELEZA USHIRIKIANO

Kaimu Katibu Tawala Mkoa wa Ruvuma Dkt Anselm Tarimo akimkaribisha Balozi wa Cuba nchini Ernesto Gomez Diaz.Tukio hili limefanyika leo katika ofisi ya Mkuu wa Mkoa wa Ruvuma wakati balozi huyo alipofanya ziara ya kikazi yenye lengo la kukuza ushirikiano wa nchi mbili

Dkt Pulor Lopez Hernandez kutoka Cuba amabye anafanya kazi katika hospoitali ya Mkoa wa Ruvuma akijitambulisha kwa Balozi wa nchini Cuba 

Kaimu Mganga Mkuu wa Mkoa wa Ruvuma Dkt Hassan Lumbe akitoa maelezo kwa Balozi wa Cuba Ernesto Gomez Diaz wakati balozi huyo alipotemebelea na kukugua wodi ya magonjwa ya kumabikiza katika hospitali ya mkoa wa Ruvuma leo

Na Revocatus Kassimba, Songea

SERIKALI  mkoani Ruvuma imeihakikishia nchi ya Cuba kuendeleza ushirikiano  ili kuboresha mahusiano mema yaliyojengeka kwa miongo zaidi ya minne hususan katika kuendeleza huduma za afya nchini.

Kauli hiyo imetolewa leo mjini Songea na Kaimu Katibu Tawala  Mkoa wa Ruvuma  Dkt Anselm Tarimo alipokuwa akiongea na Balozi wa Cuba nchini Ernesto Gomez Diaz alipofanya mazungumzo na uongozi wa Sekretariati ya Mkoa wa Ruvuma.

Dkt Tarimo alielezea Uhusiano wa kiurafiki uliopo na nchi ya Cuba kuwa umesaidia sana katika jitihada za serikali ya Tanzania kuwapatia wananchi wake Huduma bora  na za uhakika za afya.

Alisema kwa kipindi kirefu nchi ya Cuba imekuwa ikisaidia Tanzania kwa kuipatia wataalam wa afya hususan madaktari wanaofanya kazi katika hospitali mbalimbali nchini ambapo katika mkoa wa Ruvuma wapo madaktari wawili kutoka nchini Cuba.

“Tunashukuru kwa ushirikiano tulionao baina ya nchiz zetu mbili kwani kuanzia miaka ya 1980 mkoa wetu umekuwa ukipokea madaktari kutoka nchini Cuba ambao wanasaidia kutoa Huduma za tiba katika hospitali yetu ya Mkoa Songea” alisema Dkt Tarimo

Aliongeza kusema kwa sasa mahitaji ya madaktari ni makubwa kutokana na hospitali ya mkoa kupandishwa hadhi na kuwa ya rufaa hivyo ni vema Cuba ikaongeza wataalam zaidi

Naye Balozi wa Cuba nchini Ernesto Gomez Diaz alishukuru serikali ya Tanzania chini ya uongozi wa Rais Jakaya Kikwete kwa kuendeleza na kudumisha ushirikiano kati ya nchi zote mbili  toka enzi za waasisi  Mwalimu Julius Nyerere wa Tanzania na Fidel Castro wa Cuba

Balozi Diaz amesema Cuba ni nchi pekee iliyobaki inayofuata mfumo wa Ukoministi  Duniani wenye lengo la kuhakikisha maisha ya kijamaa ambapo rasilimali za umma zinatumika kwa wote

Aliongeza kusema kuwa katika nchi ya Cuba kutokana na sera ya Ukoministi serikali imefanikiwa kutoa Huduma za afya na Elimu bure kwa raia wake wote na kusema kuwa nchi yake itaendelea kutoa kipaumbele kwa watanzania kwenda kusoma udaktari nchini Cuba .

Balozi Diaz yupo mkoani Ruvuma kwa ziara ya kikazi ya siku mbili ambapo amepata fursa ya kutembelea na kukagua Hospitali ya mkoa ambapo nchi yake ina madaktari wawili wanaofanya kazi.

Ameshukuru uongozi wa serikali kwa kutoa ushirikiano kwa wataalam hao wa Cuba kwa kipindi chote wanachofanya kazi kwani wameendelea kufurahi uwepo wao hapa mkoani.

………………………………………………………………………………………………………………………………………………

Revocatus Kassimba

Afisa Habari

Ofisi ya Mkuu wa Mkoa Ruvuma

VIONGOZI WA UWT WATAKIWA KUWASHIRIKISHA WANACHAMA KATIKA CHAGUZI ZAKE

                        KATIBU WA UWT MKOA WA RUVUMA MARIAM YUSSUF

Na Stephano Mango,Songea

WATENDAJI na viongozi wa Jumuiya ya Wanawake ya Chama cha Mapinduzi mkoa wa Ruvuma wametakiwa kuwahamasisha na kuwashirikisha kikamilifu wanachama wa Jumuiya hiyo iliwaweze kujitokeza kugombea nafasi mbalimbali ndani ya chama

Wito huo umetolewa jana na Katibu wa Jumuiya ya Wanawake Tanzania(Uwt) Mkoa wa Ruvuma Mariam Yussuf wakati akizungumza na waandishi wa habari Ofisini kwake kuhusu mchakato wa uchaguzi wa Jumuiya za Chama cha Mapinduzi

Yussuf alisema kuwa viongozi wa Uwt  kupitia vikao halali vya Jumuiya wanapaswa kuwahamasisha wanachama kushiriki katika uchaguzi kwa kujitokeza kwa wingi kugombea nafasi mbalimbali za uongozi kwani wanawake wanaweza hata bila kuwezeshwa

Alisema kuwa wanachama wanatakiwa waendelee kuhudhuria vikao na mikutano inayowahusu ili kuweza kutumia haki stahiki ya kidemokrasia kwa kuomba kuchaguliwa au kuchagua viongozi bora watakaotuvusha wakati huu mgumu

Alieleza kuwa Jumuiya ya Uwt tayari imeshawatangazia wanachama wake utaratibu wa uchukuaji wa fomu za kugombea nafasi za uongozi kuanzia ngazi za matawi,kata,wilaya,mkoa na Taifa ili wale wenye sifa za uongozi waweze kujitokeza kwa wingi kugombea nafasi mbalimbali za uongozi

Alieleza zaidi kuwa wanaotaka uongozi ni vema wasifanye kampeni kabla ya wakati kwa kuanza kurushiana maneno machafu,kwa kutoa rushwa kwani kwa kufanya hivyo kutasababisha kuleta uadui na ustawi wa jamii na jumuiya ya Uwt na Ccm kwa ujumla hivyo tuepukane na vitendo hivyo

MWISHO

WAKULIMA SONGEA WATAKIWA KULIMA KWA WINGI NA KWA KUZINGATIA KANUNI BORA ZA KILIMO

Mkuu wa Mkoa wa Ruvuma Said Thabit Mwambungu akiongea na watendaji wa vijiji vya Magagula.Muungano Zomba na Lugagara wilaya ya Songea jana alipotembelea kuhamasisha wakulima kuzalisha mahindi kwa kuzingatia kanuni bora za kilimo.Wengine ni Mkuu wa Wilaya ya Songea Thomas Sabaya(kulia) na mwenyekiti wa Halmashauri ya Songea Rajab Mtiula(Picha na Ofisi ya Mkuu wa Mkoa Ruvuma)

Mkuu wa Mkoa wa Ruvuma Said Mwambungu (mwenye kaunda suti nyeusi) akisikiliza maelezo ya kilimo kutoka kwa Mkuu wa wilaya ya Songea Thomas Sabaya (kulia) wakati wa ziara ya kukagua usambazaji wa pembejeo kijiji cha Lugagara wilaya ya Songea

Wakulima wa kijiji cha Magagula wilaya ya Songea wakimsikiliza mkuu wa mkoa wa Ruvuma Said Mwambungu (hayupo pichani) jana alipofanya ziara ya kukagua shughuli za kilimo

Na Revocatus A.Kassimba,Ofisi ya Mkuu wa Mkoa wa Ruvuma

SERIKALI imewataka wakulima  mkoani Ruvuma kulima kwa wingi mahindi katika msimu huu kwa kuzingatia kanuni bora za kilimo licha ya changamoto za soko lililowakabiri msimu wa kilimo uliopita.

Kauli hiyo ilitolewa jana na Mkuu wa Mkoa wa Ruvuma Said Thabit Mwambungu wakati wa ziara yake katika vijiji vya Magagula, Lugagala na Muungano Zomba vilivyopo wilaya ya Songea .

Mwambungu aliwaeleza wananchi kuwa serikali inatambua kero ya ununuzi wa mahindi iliyotokea msimu wa 2011/2012 ambapo wakulima wengi walichelewa kupokea fedha zao kutoka Wakala wa Hifadhi za Chakula (NFRA).

Aliongeza kusema kuwa changamoto ya fedha za wakulima hazitajitokeza tena msimu ujao kwani tayari serikali imejiandaa kwa kutengwa fedha katika bajeti ili kuhakikisha mahindi yote yatanunuliwa kwa wakati.

“Limeni kuliko mwaka jana kwani serikali imejipanga kununua kwa wakati na kuhakikisha kuwa hakuna mkulima atakayecheleweshewa malipo na serikali” alisema Mwambungu na kuongeza kuwa hakuna mkulima sasa anayeidai serikali wote wamelipwa.

Mkuu wa mkoa Mwambungu alisisitiza kuwa serikali inafanya kila linalowezekana kuondoa kero ya kukopa mahindi ya wakulima hivyo ni vema wakulima wakaendelea kuunga mkono juhudi hizi za serikali kwa kuongeza uzalishaji.

Katika msimu 2011/2012 wa kilimo kwa mujibu wa taarifa za Wakala wa Hifadhi ya Chakula jumla ya tani 50,018 za mahindi zimenunuliwa kutoka kwa wakulima mkoani Ruvuma zenye thamani ya shilingi bilioni 17.5 ambapo kilo ilinunuliwa kwa shilingi 350.

Mkuu wa Mkoa alitumia fursa hiyo kuwapongeza wakulima wa vijiji hivyo alivyovitembelea kwa kutumia vema pembejeo za ruzuku kwa mfumo wa vocha kwani wameongeza uzalishaji wa mahindi na kuifanya wilaya ya Songea kuongoza katika kuzalisha mahindi mkoani.

Ziara ya Mkuu wa mkoa ilihusisha pia kukagua zoezi la ugawaji wa vocha za pembejeo ambapo kwa mujibu wa taarifa ya iliyotolewa na Mkuu wa wilaya ya Songea Thomas Sabaya alisema wilaya imepata mgao wa vocha 64,417 ambazo zimesambazwa kwa wakulima.

Sabaya alisema vocha hizo zinahusisha mbegu bora za mahindi, mbolea ya kupandia na mbolea ya kukuzia ambapo bei ya mfuko wa mbolea ya kupandia (DAP) inauzwa shilingi 80,000/=huku mkulima akichangia shilingi 52,000/=.

Kuhusu mbolea ya kukuzia (UREA) mfuko unauzwa shilingi 72,000/= na mkulima anachangia shilingi 52,000/= huku serikali ikilipia zinazobaki na kwa mbegu bora mfuko unauzwa shilingi 40,000/= huku mkulima akichangia 20,000/= na serikali zinazobakia.

Kwa upande wake Afisa Mtendaji wa kijiji cha Lugagara Bi Taifa Mahundi katika risala yake alisema wakulima wana changamoto kubwa ya upungufu wa vocha za ruzuku hivyo akaiomba serikali kuongeza mgao kwa kijiji.

Mkuu wa mkoa akijibu hoja hiyo aliwafahamisha wananchi kuwa vocha zinazotolewa ni vigumu kufanana na idadi ya wakulima kwani hiyo ni ruzuku itolewayo na serikali kuwasaidia wakulima kujenga uwezo wa kujitegemea.

Katika msimu huu wa kilimo mkoa wa Ruvuma umepatiwa vocha za ruzuku ya pembejeo za kilimo 192,000 ambapo kwa mwaka uliopita ulipatiwa vocha 204,000 hivyo kuwa na upungufu wa vocha 12,000/=.

Mkoa wa Ruvuma ni kati ya mikoa sita maarufu kwa uzalishaji wa mahindi nchini ambapo mikoa mingine ni Iringa, Mbeya, Rukwa, Kigoma na Morogoro.

…………………………………………………………………………………………………

Revocatus A.Kassimba

Afisa Habari

Ofisi ya Mkuu wa Mkoa Ruvuma

WAKAMATWA NA KILO 350 ZA BANGI NA KILO 112 ZA MBEGU ZA ZAO HILO

KAMANDA WA POLISI MKOA WA RUVUMA MICHAEL KAMUHANDA

Na, Mwandishi Wetu,Tunduru

KIKOSI maalumu cha Oparesheni zuia uharifu cha Polisi Wilayani
Tunduru Mkoani Ruvuma kimewakama watu watatu kwa tuhuma za kukutwa na kilo 350 za bangi zikiwa tayari kwa ajili yakusafilishwa na kusambazwa sehemu mbalimbali za masoko ya walaji.

Kamanda wa Polisi Mkoa wa Ruvuma Michael Kamuhanda alisema kuwa
tukio hilo limefanikiwa kufuatia taarifa zilizotolewa na raia wema na kufanikisha kuwanasa watu hao ambao miongoni mwao yumo mtuhumiwa wa usambazaji wa madawa hayo katika sehemu mbali mbali za vijiji vilivyopo Wilayani humo.

Kamuhanda alisema kuwa Sambamba na tukio hilo pia watuhumiwa hao walikutwa na kilo 112 za mbegu za bangi ambazo zinadaiwa pia zilikuwa katika harakati za kusafirishwa zikiwa ni juhudi za wakulima wa zao hilo kujidhatiti hasa kipindi hiki
cha kilimo ili kukidhi mahitaji ya soko lao.

Kamanda Kamuhanda aliwataja watuhumiwa hao kuwa ni Adam Mkwanda
(33), Mkwanda Said (29) wakulima wakazi wa Kijiji cha Mpanji Wilayani humo pamoja na Mfaume Alli Mpwanda mnunuzi na msambazaji wa Bangi mkazi wa Kijiji cha Mchoteka Wilayani hapa.

Kamuhanda alifafanua kuwa katika tukio hilo watuhumiwa hao walikutwa wakiwa wamehifadhi shehene hiyo ya bangi katika maghala ya kuhifadhia chakula kukiwa na viroba 6 vilivyo kuwa vimejazwa madawa hayo vikiwa tayari kwa ajili ya kusafirishwa.

Kufuatia hali hiyo kamanda kamuhanda akatumia nafasi hiyo kutoa wito kwa wananchi kulisaidia jeshi hilo kutoa taarifa za matukio ya uhalifu na kwamba hivi sasa wamejipanga kuhakikisha watoa taarifa wanalindwa zikiwa ni juhudi za kutekeleza kwa vitendo maelekezo ya elimu ya ulinzi shirikishi yanayotolewa na jeshi hilo.

Alisema watuhumiwa hao wanatarajiwa kufikishwa mahakama baada ya kukamilika kwa tatratibu za upelelezi ili sheria
iweze kufuata mkondo wake.

Wakati hayo yakijiri uchunguzi unaonesha kuwa wakulima wengi Wilayani humo wamekuwa wakishawishika kulima zao hilo kutokana na kivutio cha bei ambayo hutolewa na wafanyabiashara wake huku kukiwa na wimbi kubwa la ongezeko la watumiaji wa madawa hayo ambayo hudaiwa kuwapatia stimu.

Kwa mujibu wa uchunguzi huo Debe moja la bangi linauzwa kati ya Tsh.20,000/= na 30,000/=  ikiwa ni tofauti na Bei ya mahindi ambayo debe moja hivi sasa linauzwa kwa bei ya 7,000/=.

Mwisho

WAKULIMA WA KOROSHO WATAKIWA KUWA NA SUBIRA WAKATI SOKO LA MAZAO YAO LINATAFUTWA

   MKUU WA MKOA WA RUVUMA SAID MWAMBUNGU

Na Augustino Chindiye,Tunduru

WAKULIMA wa Korosho Nchini wametakiwa kuwa na subira wakati serikali ikiendelea kutafuta suluhisho la kudumu la upatikanaji wa soko la uhakika wa zao

Hayo yamesemwa jana na Mkuu wa Mkoa wa Ruvuma Said
Mwambunmgu wakati akiongea na Madiwanai wa Halmashauri ya Wilaya ya Tunduru Mkoani humo na kuongeza kuwa hali hiyo imetokana na Serikali kubaini tatizo la ubabaishaji wa Soko la Mazao hayo katika msimu wa Mwaka 2011/2012 hali inayo tishia wakulima kupata malipo ya pili.

Sambamba na ahadi hiyo pia Mkuu huyo wa Mkoa wa Ruvuma amewaahidi wakulima wa mazo hayo kuwa kauli ya serikali juu ya Suluhisho la kupatikana kwa Soko la uhakika litatolewa katika kikao kitakachoketi February 2 Mwaka huuu Mjini Dodoma  na kuwahushisha Wakuu wa Mikoa Mitano inayao lima Korosho nchini.

Akifafanua taarifa hiyo Mkuu wa Mkoa huyo alisema kuwa kikao hicho ambacho Mgeni Rasmi atakuwa Waziri wa Kilimo Chakula na Ushirika Prof.Jumanne Maghembe, Pia kitawahusiha Maafisa Kilimo wa Mikoa na Wilaya husika, wadau na viongozi wa vyama vya Ushirika katika Wilaya na Mikoa hiyo.

Mwambungu aliitaja Mikoa itayaohusika katika Mkutano huo kuwa ni
Ruvuma, Mtwara, Lindi,Pwani na Morogoro ambayo alidai kuwa pamoja nautekelezaji wa majukumu yao ya kawaida pia kwa pamoja wameapa kutolifumbia macho suala la ubabaishaji wa soko la mazao hayo kutoka kwa wakulima zikiwa ni juhudi za kuwarudishia ari wakulima baada ya kuhakikishiwa upatikanaji wa soko la mazao yao.

Kufuatia kuyumba kwa soko la zao hilo Mkuu wa Mkoa huyo akatumia
nafasi hiyo kuwataka viongozi wa Wilaya ya Tunduru kubuni mikakati mbalimbali ya kuwainua wananachi kwa kuwahimiza Wakulima kulima kwa wingi za la Mpunga na kulitumia kwa chakula na Biashara likiwa ni mbadala wa zao la Korosho.

Alisema Wilaya ya Tunduru ambayo ni kati ya Wilaya tano zilipo Mkoa Ruvuma ni tajiri wa rasilimali ardhi ambayo imesheheni Mito na mabonde yanayo tiririsha maji kipindi cha mwaka mzima na kwamba endapo viongozi watajipanga vyema katika kuwawezesha wakulima kwa kuwawekea miundombinu ya uhakika wataweza kuwaondoa katika mawazo mgando ya utumwa wa kutegema zao moja tu ambalo linaonekana kubezwa na walaji wakati huo wakiwa na mahitaji nalo.

Nao Mkuu wa Wilaya ya Tunduru Juma Madaha na Mkurugenzi mtendaji
wa Halmashauri hiyo Efraemm Ole Nguyaine walisema kuwa pamoja na
maandalizi ya miundombinu inayoendelea kutekelezwa pia Wilaya hiyo imekwisha jenga Skim 4 za umwagiliaji imenunua matrekta madogo zaidi ya 200 na kuyasambaza katika vikundi vijijini zikiwa ni juhudi za dhati katika utekelezaji wa kauli mbiu ya Kilimo kwanza.

Kwa upande wao baadhi ya Madiwani ambao walitaka majina yao yasitajwe gazetini ambao mbali na kukiomba kikao hicho kutoa kauli yenye maslahi kwa Wakulima walionesha mashaka
makubwa kuwa kikao hicho si lolote kwa madai ya kuwepo kwa fufunu za wanunuzi “kuiweka” kiganjani Serikali hali inayo wafanya kuwa na kiburi cha kuiyumbisha watakavyo huku viongozi wake wakishindwa kutoa kauli.
Mwisho

MADIWANI MKOANI RUVUMA WAMETAKIWA KUSIMAMIA KIKAMILIFU MGAO WA PEMBEJEO ZA RUZUKU

                           Mkuu wa Mkoa wa Ruvuma Said Mwambungu

Na Revocatus Kassimba ,Ofisi ya Mkuu wa Mkoa Ruvuma

MADIWANI mkoani Ruvuma wametakiwa kutumia madaraka waliyonayo kuhakikisha wananchi walengwa wananufaika na mgao wa pembejeo za ruzuku  kwa njia ya vocha znzazotolewa na serikali zinafika kwa wakati na hakutokei udanganyifu.

Rai hiyo imetolewa jana  na Mkuu wa Mkoa wa Ruvuma Said Mwambungu wakati wa kikao cha kawaida cha Baraza la madiwani katika Halmashauri hiyo kilichofanyika katika ukumbi wa Klasta Mlingoti wilayani Tunduru

Mwambungu aliwaambia madiwani kuwa wao ndio wenyeviti wa kamati za maendeleo za kata hivyo ni muhimu wakashirikiana na serikali katika kuhakikisha walengwa wa kunufaika na pembejero za ruzuku za kilimo wanapata kupitia taratibu zilizowekwa.

“Nawaombeni sana madiwani tumieni nafasi zenu kuhakikisha vocha zinagawiwa kwa walengwa’ alisema mkuu wa mkoa na kuongeza kuwa lengo kuu la serikali ni kuwajengea uwezo wakulima kuzalisha kwa wingi na kwa ubora mazao yao.

Alisema kuwa serikali haitamwachia yeyote yule atakayekwenda kinyume na zoezi la vocha za pembejeo kwani hizi ni fedha za umma hivyo ni budi wananchi wakapatiwa ili zisaidie kuongeza uzalishaji wa mazao na kujihakikishia uhakika wa chakula.

Mwambungu alisisitiza juu ya mtendaji au wakala wa pembejeo za ruzuku atakayebainika kuchakachua vocha kuwa hatua za kisheria za kuwafikisha katika vyombo vya sheria zitachukuliwa mara moja

Katika msimu huu wa kilimo zaidi ya wakulima laki moja na tisini watanufaika na pembejeo za ruzuku za kilimo zikiwemo mbegu bora za mahindi,mpunga, mbolea ya kupandia na kukuzia katika mkoa wa Ruvuma.

Katika hatua nyingine Mkuu huyo wa Mkoa amewataka madiwani wa halmashauri ya Tunduru kuhamasisha wakulima kuzalisha zao la mpunga ambalo linastawi kwa wingi wilayani humo ili liwe zao mbadala la biashara badala ya kutegemea korosho pekee.

Alisema hivyo kutokana na suala la soko la korosho za wakulima kuendelea kuzorota na kusababisha kero hivyo akawaasa kutumia skimu za umwagiliaji maji zilizopo wilayani humo kuzalisha mpunga huku serikali ikiendelea kutafutia suluhu ya soko la korosho hapa nchini.

“Tunaweza kutumia mpunga miaka ijayo kama zao la biashara hivyo tuwahamasishe wakulima kulima sambamba na korosho” alisisitiza Mwambungu

Na Revocatus Kassimba

Afisa Habari

Ofisi ya Mkuu wa Mkoa Ruvuma

KIKAO CHA MAANDALIZI YA MASHINDANO YA SANGA ONE CUP KIMEANZA MCHANA HUU

Kutoka kushoto ni Mjumbe wa Kamati ya Utendaji wa Sufa Mshamu Mkuruma,Adimu Rader

Kutoka kushoto ni Katibu Msaidizi wa Chama cha Mpira wa miguu Manispaa ya Songea Godfrey Mvula,wa pili ni Katibu wa Kamati ya Ufundi SUFA Francis Kasembe,Kumburu Laukila,Shaibu Mambo

Katibu wa Chama cha Mpira wa miguu Manispaa ya Songea Ajaba Chitete



KAMATI MASHINDANO YA SANGA ONE CUP KUZINDULIWA MCHANA HUUUUUUUUUUU

Na Stephano Mango,Songea

KAMATI ya kuandaa na kusimamia Mashindano  ya Sanga One Cup kuzinduliwa mchana huu katika viwanja vya Sanga One Bombambili

Akizungumza na Mtandao huu wa www.stephanomango.blogspot.com, Diwani Mstaafu wa Kata ya Bombambili na Mwenyekiti wa Chama cha Mpira wa Miguu ambaye pia ni mdhamini wa mashindao hayo Golden Sanga (Sanga One) alisema kuwa tayari wajumbe hao wamepatikana ambao watafanya uchaguzi mdogo ili kuweza kuwapata viongozi wake

Sanga alisema kuwa kazi yao kubwa itakuwa ni kuandaa mashindao hayo na kusimamia mashindano hayo kwa haki na usawa ili waweze kupatikana washindi stahiki na wachezaji bora watakaoweza kuibuliwa na mashindano hayo

Alisema kuwa anategemea kuwa wajumbe hao watawapata viongozi wenye busara na uzalendo katika kusimamia mashindano hayo,kuibua wachezaji chipukizi watakao chukuliwa kuchezea timu zingine za Wilaya,Mkoa na Taifa na kuleta ushindani mkubwa katika soka

Alieleza kuwa wajumbe wa kamati hiyo tayari wameanza kuwasili katika viwanja vya mkutano ili kuweza kutimiza lengo la kikao na kwamba anaamini kuwa kamati hiyo itafanya kazi yake vizuri kama ilivyokusudiwa
MWISHO

TIMU YA MLALE JKT YASAJIRI KINDA KUTOKA KAHAMA UNITED

Na Stephano Mango, Songea

 

TIMU ya soka ya Mlale JKT ya Songea imesajili kinda  kutoka Kahama United ya Shinyanga katika nafasi ya kiungo katika usajili wa dirisha dogo kabla ya kuanza kwa ligi ya Daraja la kwanza mzunguko wa pili, ligi hiyo ambayo inatarajiwa kuanza Februari, 4 mwaka huu.

 

Akizungumza mjini hapa jana kocha msaidizi wa Maafande hao, Edger Msabaila alimtaja kinda hilo kuwa Dotto Mrisho ambaye alikuwa akichezea nafasi ya kiungo katika timu yake ya Kahama United na kuwa tishio kwa timu nyingine za mkoa huo.

 

Alisema wamechukua uhamuzi huo wa kusajili nafasi hiyo moja ya kiungo baada ya kukaa chini na kamati ya ufundi wa timu hiyo na kuweza kubaini kulikuwepo na pengo katika mechi zake za mzunguko wa kwanza wa ligi hiyo kutokana na mchezaji anayechezea nafasi hiyo, Patrick Batweri kusumbuliwa  na maumivu ya mara kwa mara ya kifundo cha mguu.

 

Alieleza usajili huo wa kinda hilo umepelekea timu yao kukamilika kila idara zake na kuwataka wapenzi wa soka wa mkoa wa Ruvuma wawe na matumaini ya kuvuka ungwe hiyo na kucheza tisa bora na hatimaye kucheza ligi kuu ya Bara msimu ujao

 

Alisema moyo wa matumaini hayo yamekuja kufuatia uwezo mkubwa aliouonyesha kinda huyo wa kuweza kumiliki nafasi hiyo ya kiungo ambao anauonyesha katika mazoezi na kuwa kivutio kwa watazamaji wanaofurika kushuhudia mazoezi yao yanaendelea kwenye uwanja wa Majimaji mjini hapa.

 

Mlale JKT katika mchezo wake wa kwanza duru la mzunguko wa pili wamepangwa kukutana na ndugu zao Majimaji kabla ya kucheza na Small Boys ya Rukwa na mchezo wake wa tatu itasafiri na kwenda  kukutana na Maafande a Polisi Iringa, kabla ya kurudi nyumbani na kuzisubili timu za Mbeya City na Prisons ya Mbeya.

 

MWISHO.