WANANCHI WAPATA MASHAKA NA MKANDARASI WA UJENZI WA LAMI NAMTUMBO HADI TUNDURU

Na Steven Augustino, Tunduru SERIKALI imeombwa kuichukulia hatua kampuni ya progressive Constraction  iliyopewa kazi ya kujenga kwa kiwango cha Lami Barabara ya Tunduru hadi Namtumbo Mkoani Ruvuma zikiwa ni juhudi za Serikali kuiunganisha mikoa ya Kusini kwenye mtandao wa barabara za kiwango cha Lami.

Hayo yamesemwa na baadhi ya wananchi waliotakiwa kutoa maoni yao juu ya maendeleo ya Ujenzi wa Barabara hiyo yenye urefu wa kilometa 180 wenye thamani ya zaidi ya Shilingi Bilioni. 180.66 ambazo ilipewa kampuni hiyo kwa makubaliano ya kuikamirisha katika kipindi cha miezi 27 inayoishia mwezi july 2013.

Wakifafanua maelezo yao walidai kuwa Mradi huo ambao hadi sasa umetimiza miezi 16 iliyopita kampuni hiyo bado haijakamirisha hata ujenzi wa kambi zao hali inayo onesha wazi kutokuwepo kwa matumaini ya mradi huo kukamirisha ujenzi wake hata ikipewa miaka 10 zaidi wakiwa na maana kuwa kampuni hiyo haina uwezo kwani hata vyombo haina.

Goerge Mrope, Fatu Alli, Mohamed Said na Adam Mkwanda ni miongoni mwa wananchi waliotoa maoni hayo na kudai kuwa endapo serikali haitachukua hatua za kuuokoa mradi huo na kuufanya ukamilike kwa wakati kuna hatari ya Chama tawala CCM kufanya vibaya katika matokeo ya uchaguzi mkuu ujao wa mwaka 2015 ambapo wapigakura hawatakuwa tayari kusikiliza la mtu na badala yake itakuwa ni kukisulubu tu.

Nao Madiwani Athuman Nkinde, Msenga Said na Mchungaji Wiliam Mazuguni katika maoni yao walionesha mashaka ya kuanguka kwa chama Cha Mapinduzi (CCM) katika uchaguzi huo kutatokana na wananchi wengi kuwa na uelewa hasa wakati huu ambao vyama vya siasa vya Chadema na CUF vinaendelea kujijenga na kuanza kuimung`unyua na kuwateka wanachi wa mikoa ya kusini ambako kumekuwa ni ngome kubwa ya CCM toka nchi hii ipate Uhuru.

Walisema ili kuokoa hali hiyo hatua madhubuti zinatakiwa kuchukuliwa na kufanyika kwa kazi ya ziada kwa dalili za kushindikana kukamilika kwa barabara hiyo katika kipindi kilicho pangwa zinaonekana kugonga ukuta kutokana na kampuni hiyo kuonekana kuifanya kazi hiyo kwa mwendo wa Kinyonga huku ikiwa imebakia miezi 11 ya kuikabidhi huku wakibainisha kuwa chanzo cha kuichelewa kukamirika kwa mradi huo ni uchakachuaji uliofanywa viongozi wa Wizara ya Ujenzi kutokana na kutoa kazi zote kwa mkandarasi mmoja badala ya kila kipande kupewa kampuni tofauti.

Kwa mujibu wa maelekezo ya Mikataba ya Barabara hiyo ilyogawanywa katika vipande vitatu, kipande cha Tunduru Matemanga Kilometa 58.70 Shilingi Bilioni. 63.41 kilipangwa kukabidhiwa mwezi July 2013, Matemanga Kilimasera kilometa 68.20 chenye thamani ya Shilingi Bilioni. 64.02 kilipanwa kukabidhiwa mwezi Mei 2013 na Kilimasera Namtumbo Kilometa 60.70 Chenye thamani ya Shilingi Bilioni.53.23 kilipangwa kukamilika mwezi march 2013.

Wakizungumzia hali hiyo Mkuu wa Mkoa wa Ruvuma Said Mwambungu, Mkuu wa Wilaya ya Tunduru Bakari Nalicho na Meneja wa wakala wa Barabara TANROADs Mkoa wa Ruvuma Eng. Abraham Kisimbo waliungana na wananchi hao kwa madai ya kutoridhishwa wala kufurahishwa na maendeleo ya Mradi huo na kuongeza kuwa serikali inajitahidi kwa kutumia nguvu zao zote kubanana na kusukumana kukabiri vitendo vya Mkandarasi wa kampuni hiyo na kuhakikisha kuwa barabara hiyo inajengwa.

Aidha Mwambungu aliwapongeza wakandarasi wanaojenga Bara bara za Songea/ Namtumbo kilometa 67.00 utakao ghalimu Shilingi Bilioni.62.88 na Peramiho/Mbinga kilometa 78.00 wenye thamani ya shilingi Bilioni.79.81 kuwa inaendelea vizuri na akaongeza kwa kuonesha mashaka ya mdororo wa ujenzi wa Barabara ya Tunduru/ Namtumbo kuwa huenda mradi huo ukapitwa na miradi mipya ya Barabara za Tunduru Mtambaswala Kilometa 202.5, Shilingi Bilioni.240.858 na Mbinga /Mbambabey kilometa 66.00 utakao ghalimu shilingi Bilioni.2.90.

Wakati hayo yakiendelea taarifa zilizovuja kutoka kwa wakaguzi wa Barabara hiyo waliotembelea Wilayani Tunduru July 12 mwaka huu zinadai kuwa kampuni hiyo hadi sasa imefanya kazi kwa asilimia 1 tu toka ikabidhiwe kazi hizo katika kipindi hicho cha miezi 16 iliyopita

MWISHO

MAVETERANI WA SIMBA NA YANGA SONGEA DIMBANI JULAI 22

Mdhamini  mkuu wa mechi ya Simba na Yanga Gorden Sanga (Sanga One) akizungumza na waandishi wa habari

Na Stephano Mango, Songea

MAVETERANI wa Simba na Yanga wa Kata ya Bombambili Halmashauri ya Manispaa ya Songea wameanza mazoezi kwa ajiri ya mechi ya kirafiki ambayo wanatarajia kucheza Julai 22 mwaka huu yenye lengo la kuboresha mahusiano ya kijadi

Akizungumza na waandishi wa habari jana Mdhamini mkuu wa mechi hiyo Gorden Sanga (Sanga One) alisema kuwa mavetani wamekuwa wakikutana vijiweni na kufanya ushabiki wa timu hizo ambazo zina mashabiki wengi bila nao kushiriki kucheza katika maeneo yao

Sanga alisema kuwa tayari wachezaji wa timu zote mbili wamesha sajiriwa kutoka katika pande zote za Halmashauri ya Manispaa ya Songea kwa ajiri ya mechi hiyo yenye ushindani mkubwa na majigambo ya pande zote mbili

Alisema kuwa kamati ya maandalizi imejipanga kikamilifu kwa mechi hiyo ambapo zawadi za mfungaji bora, mchezaji bora na kipa bora zimeandaliwa na zitatolewa siku hiyo kwa lengo la kuthamini mechi hiyo na kanuni bora za michezo

Alieleza kuwa siku ya mechi ulinzi utakuwa wakutosha ili kuweza kudhibiti vitendo vya fujo na uhalifu wowote ule ambao unaweza kutokea kutokana na Maveterani hao kutambiana sana kutokana na hamu ya mechi hiyo itakayofanyika kwenye viwanja vya Shule ya Msingi Sokoine mjini hapa

Alifafanua kuwa mechi hiyo inadhaminiwa na wapenzi wa michezo mjini Songea ambao ni Sanga One Transport, Top One Inn Hotel na Redio Jogoo na kwamba amewataka washabiki wa michezo kujitokeza kwa wingi katika mechi, pia amewaasa wachezaji kucheza kwa amani na upendo mkubwa na mashabiki kushangilia bila kuleta vurugu kwani michezo ni amani

MWISHO

MKURUGENZI MTENDAJI WA KAMPUNI YA CARGO STARS DIONIS MALINZI AWEZESHA UPATIKANAJI WA MILIONI 18

Na Stephano Mango, Songea

VIONGOZI wa dini na Wanakwaya nchini wametakiwa kumwomba Mungu kwa njia ya nyimbo na sala ili aweze kuwajalia viongozi wa Serikali nguvu za kumkataa shetani na mambo yake yote na awape busara na hekima katika kuliongoza Taifa kwa maendeleo ya wananchi

Wito huo umetolewa jana na Mhashamu Askofu Mkuu wa Jimbo la Songea Dkt Norbert Mtega wakati akitoa neno la shukrani kwa mgeni rasmi Mkurugenzi Mtendaji wa Kampuni ya Cargo Stars  Dionis Malinzi kwenye harambee ya uzinduzi wa Kanda ya Shetani Ameshindwa iliyoimbwa na kwaya ya Mt.Paulo Mtume Parokia ya Songea Mjini

Mtega alisema kuwa imeanza kujengeka tabia miongoni mwa viongozi wa Serikali kutoa maneno ambayo yanasababisha kuwepo kwa migawanyiko ya kiutendaji na kifikra miongoni mwa jamii kuhusu umoja na muungano wetu kama taifa

Alisema kuwa anapotokea mtu na kusema kuwa tusiliombee taifa, tusiimbe wimbo wa taifa au Tanzania igawanyike ni ishara ya nguvu za shetani kwasababu kazi yake kubwa ni kutia chuki miongoni mwa binadamu ili wachukiane na watengane na kuharibu tunu ya umoja wetu

Alifafanua kuwa umoja na muungano wetu kama taifa ni ishara ya maendeleo kwani kitendo cha kukaribisha migawanyiko husababisha amani kutoweka miongoni mwa jamii na ndio maana leo taifa linaanza kunuka damu kutokana na vitendo vya kikatili na mauaji yanayoendelea kutokea katika jamii zetu

“ Taifa limekumbwa na mambo ya kishetani sana kwani vitendo vya watu kuvamiwa, kutekwa, kuteswa, kujeruhiwa, kuuawa vinashamiri kwa kasi kubwa kutokana na wananchi kukosa imani na vyombo vya dola, jambo ambalo linaendelea kuathiri jamii zetu” alisema Mtega

Alisema Shetani akishindwa viongozi wetu watakuwa wakweli katika kuliongoza taifa na hapo ndipo amani, haki, uhuru wa kweli utapatikana na usawa wa binadamu na maendeleo yatasonga mbele

Kwa upande wake  mgeni rasmi Mkurugenzi Mtendaji wa Kampuni ya Cargo Stars Dionis Malinzi akitoa salamu zake kwenye harambee hiyo alisema kuwa kwaya zote zinapaswa kutunga nyimbo nzuri za kumtukuza mungu na kumkataa shetani ili upatikane wokovu wa kweli

Malinzi alisema kuwa kanda inayozinduliwa katika harambee hii inaitwa Shetani Ameshindwa ni njia nzuri ya kuimarika katika utume na imani za jamii ya watanzania

Kwa upande wake Mwenyeketi wa Kamati ya uzinduzi wa kanda hiyo Jumanne Nyingo alisema kuwa michango iliyopatikana ambayo imeletwa na mgeni rasmi kutoka kwake binafsi, kwa marafiki zake na michango iliyopatikana kutokana na ushawishi wake itasaidia mambo mengi sana katika kwaya hiyo kwa kununua vifaa mbalimbali

Nyingo alisema kuwa Mgeni rasmi Dionis Malinzi alitoa mchango wa shilingi milioni 16, Mkuu wa Mkoa wa Ruvuma alitoa shilingi laki tatu, ahadi milioni 1.6 na michango mingine ambapo jumla yake ni shilingi milioni 18.7 kwa ajiri ya kwaya, pia mgeni rasmi alitoa shilingi milioni 30 kwa ajiri ya Kanisa katoliki la Songea mjini

MWISHO

SANGA ONE AGOMBEA UWENYEKITI WA CCM HALMASHAURI YA MANISPAA YA SONGEA NA UWENYEKITI WA CHAMA CHA MPIRA WA MIGUU MKOA WA RUVUMA (FARU)

Diwani Mstaafu wa Kata ya Bombambili na Mwenyekiti  Mstaafu wa Chama cha Mpira wa miguu Halmashauri ya Manispaa ya Songea (Songea Mjini)SUFA Gorden Sanga (Sanga One) akizungumza jambo wakati wa ufungaji wa mashindano ya Sanga One Cup, kulia ni aliyekuwa Kamanda wa Polisi Mkoa wa Ruvuma Michael Kamuhanda ambaye kwa sasa ni Kamanda wa Polisi Mkoa wa Iringa

SANGA ONE ni mdau mkubwa wa michezo mkoa wa Ruvuma na Mwanasiasa mwenye hekima, busara na ueledi mkubwa

MTANDAO HUU, www.stephanomango.blogspot.com, utaendelea kuwajulisha kila kinachoendelea kuhusu kampeni husika

Uchaguzi unaweza kufanyika mwezi wa 9, 2012 wa chama cha mpira wa miguu mkoa wa Ruvuma( FARU)

Uchaguzi Ccm fomu zinatolewa mwezi wa 8 tarehe 2,2012

UZINDUZI WA WIMBO WA SHETANI AMESHINDWA YA KWAYA YA MTAKATIFU PAULO MTUME PAROKIA YA SONGEA MJINI WAFANA

 Mwenyekiti wa Kamati ya maandalizi ya uzinduzi wa ALBAMU ya SHETANI AMESHINDWA, Diwani wa Kata ya Litisha Jumann Nyingo akimkaribisha mgeni rasmi katika sherehe iliyofanyika leo mchana katika ukumbi wa Centenary

Kiongozi wa wanakaya akisoma risala kwa niaba ya wanakwaya ya mtakatifu Paulo

HABARI KAMILI INAFUATA

KUTEKWA,KUTESWA KWA ULIMBOKA LAZIMA MTU AWAJIBISHWE

Na Padri Privatus Karugendo HATA kama tumetangaziwa kwamba aliyemteka na kumtesa Dk. Stephen Ulimboka alitoka nje ya nchi, imetajwa Kenya, ina maana itawaponya baadhi ya watu hapa nchini kuwajibika kwa tukio hilo? Vyovyote vile ni lazima mtu au watu wawajibishwe! Uzembe unajionyesha wazi wazi. Bila kuziba ufa huu, tutalazimishwa kujenga ukuta! Kama kikundi cha watu wabaya kutoka nje wanaweza kuingia ndani ya nchi bila kutambuliwa na kutekeleza kazi yao na kuondoka bila ya kukamatwa, mpaka wao waamue kwenda kanisani kuungama, ulinzi wa taifa letu si uko mashakani? Zamu hii ametekwa Ulimboka, je kesho watu hawa wakiingia na mabomu na kuyatega sehemu mbali mbali si itakuwa hatari kwa taifa letu? Je polisi wanaotiliwa shaka kushiriki sakata zima la kumteka na kumtesa Ulimboka, wataweza kukwepa kuwajibika kwa vile mhusika mkuu amejitokeza? Kwa maelezo ya Kamanda Kova, si kwamba mtu huyu (Aliyemteka na kumtesa Ulimboka) amekamatwa na Polisi, bali mtu mwenyewe alikwenda kanisani kuungama na “Mchungaji” akafanya kazi ya usalama wa taifa. Hadi hapo Polisi, hawawezi kukwepa kuwajibika! Wanashindwa kufanya kazi yao ya upelelezi hadi wasaidiwe na “Mchungaji”? Ni bahati mbaya kwamba Kamanda Kova, hakutaja kanisa ambalo mtu huyo alikwenda kuungama. Tungependa kulijua kanisa hilo na mchungaji huyo. Tujuavyo sisi ni kwamba maungamo ni “siri” kati ya anayeungama na anayeungamisha. Na kamwe, hata kama ni chini ya tishio la kupoteza maisha, mchungaji au padri, anakatazwa kutoa siri ya maungamo. Kutoa siri ya maungamo ni dhambi ya mauti na haina msamaha popote labda kwa Mungu Mwenyewe. “Usiri” huu wa maungamo ndo uliwajengea watu imani ya kuendelea kukumbatia mfumo huu wa kutubu dhambi. Mtu anataja dhambi zake, anasafishwa na kuendelea na maisha. Nje ya imani, huu ni mfumo mbaya kabisa; mtu anaweza kuendelea kutenda dhambi na kuwanyanyasa wengine kwa vile anajua kuna “mchungaji” wa kusafisha dhambi zake. Ni mfumo wa mtu kuufungua mdomo wake (kusema yote machafu) na kuufunga mdomo wa “mchungaji”. Kama wachungaji na mapadri wangejenga utamaduni wa kuzitangaza siri za maungamo, basi mfumo huu ungekufa zamani sana. Sasa huyu “mchungaji” aliyeamua kutoa siri za maungamo, na kuamua kufanya kazi na polisi ni nani? Huyu amesoma chuo gani cha teolojia? Au ni uchungaji wa kujipachika? Mchungaji mchana na usiku ni Polisi? Sijasema alichokifanya ni kibaya kwa taifa letu; sijasema amekosea kushiriki kazi ya ulinzi na usalama wa taifa letu; sijasema amekosea kumfichua huyu mtu aliyetenda unyama wa kumteka na kumtesa Dk. Ulimboka. Sote tumechukia na kuguswa na tukio hili na tungependa kumfahamu aliyetenda hivi na ni kwa nini? Hoja hapa ni namna mchungaji huyu alivyoshiriki. Mchungaji huyu anataka tuamini kwamba makanisa ni usalama wa taifa? Kwamba makanisa yanafanya kazi na serikali? Waislamu wamekuwa wakipiga kelele nyingi kwamba serikali inapendelea wakristu na kwamba makanisa yamekuwa yakifanya kazi kwa karibu sana na serikali ya Tanzania. Tumekuwa tukilipinga jambo hili kwa nguvu zote, lakini sasa baada ya Kamanda Kova, kutangaza kwamba mtu aliyemteka na kumtesa Ulimboka, ameibukia kanisani kwa njia ya maungamo, ni lazima tushawishike kwamba madai ya Waislamu yana ukweli fulani? Je, mchungaji huyu ametoa hili la Ulimboka tu, au anatoa mengine? Ushawishi huu wa kanisa kufanya kazi kwa karibu na polisi, unaishia hapo au unaendelea? Je “Mchungaji” huyu anashirikiana na polisi tu au ushawishi wake unaendelea kwenye idara nyingine za serikali? Tuna haki ya kujua, maana kama Kamanda Kova, ameamua kulifichua hili ni lazima aliweke wazi! Vinginevyo ni kuleta vurugu na kuvuruga amani ya watanzania. Inawezekana kabisa kwa kutaka kujikosha, Polisi wanatuingiza kwenye matatizo mengine makubwa: Tutaanza kuhoji umakini wa polisi wetu, tutaanza kuhoji kwa nguvu zote uhusiano wa serikali na kanisa na wenye imani zao wataanza kuhoji uadilifu wa wachungaji na mapadri juu ya siri za kitubio. Lakini pia kuna hili tatizo kubwa la kufunika mambo ambayo kesho na keshokutwa yatafumuka na kuliingiza taifa kwenye majanga makubwa. Kwa kumkamata mtuhumiwa huyo kutoka Kenya, na kama alivyoeleza Kamanda Kova kwamba atafunguliwa kesi; suala la Ulimboka, litakuwa halijadiliwi tena, kwani tutaambiwa kwamba liko mahakamani. Utamaduni wa mahakama zetu, kesi inaweza kwenda zaidi ya miaka mitatu; suala kama hili la Ulimboka, ambalo limegusa hisia za watu wengi na zaidi vijana wa nchi hii, kulifunika na kuzuia mjadala kwa kisingizio cha kesi kuwa mahakamani ni kuchokoza mzinga wa nyuki. Na kuna tatizo jingine la kuleta mahusiano mabaya kati ya nchi na nchi. Tunaweza kuanza kuinyoshea Kenya kidole kwa kutuingizia makundi ya majambazi ya kuwateka na kuwatesa. Hata Kenya, wanaweza kuja juu kwa kuitumia nchi yao kuficha madhambi ya baadhi ya watu wetu. Utamaduni huu wa kuitumia Mahakama kama kinga ya maovu, umeanza hivi karibuni nchi yetu ilipotumbukia kwenye dimbwi la mambo ya ovyo kama vile ufisadi na uporaji wa rasilimali za taifa. Hadi sasa mambo mengi yamefunikwa kwa kisingizio cha kesi kuwa mahakamani. Serikali inaposhikwa pabaya inakimbilia mahakamani. Suala likishafikishwa mahakamani, halijadiliwi tena bungeni, kwenye jamii na kwenye vyombo vya habari. Njia pekee ya kuwanyamazisha watu, kuwazuia watu kutetea haki zao za msingi ni kukimbilia mahakamani. Ile dhana nzima ya Mahakama kama chombo cha kutetea na kutoa haki sawa kwa kila mwananchi imeanza kupotea. Kinachojitokeza ni Mahakama kugeuka kuwa chombo kandamizi na kulinda maslahi ya wakubwa, serikali na watu wenye fedha. Mbali na kutumia maungamo kumfichua mtu aliyemteka na kumtesa Dk. Ulimboka, na mpango mzima wa kutaka kuitumia mahakama kuzuia mjadala juu ya sakata hili, kuna jambo jingine la kushangaza: Katika hali ya kawaida, tulitegemea mtu aliyetoka nje ya nchi kuja kutekeleza kazi ya “Mauaji”, angetoroka na kurudi nchini kwao mara baada ya kumaliza kazi yake. Sasa huyu “Mtu wa Ulimboka”, baada ya kazi yake, ambayo aliifanya na kuimaliza bila kukamatwa, akaendelea kuishi Tanzania, bila wasi wasi wowote na bila Polisi kutambua, mpaka Roho wa Bwana alipomwingia akaamua kwenda kanisani kwa mchungaji kuungama? Na je, aliungama kwa lengo la kusafishwa dhambi zake ili aendelee kutenda dhambi nyingine? Ili aendelee kuwateka na kuwatesa watu wengine? Au aliungama kwa kuchukia dhambi aliyoifanya? Na kama ni hivyo si angejisalimisha moja kwa moja kwa polisi na kwa kufuata mantiki, angejisalimisha nyumbani kwao Kenya. Kilio cha madaktari na watetezi wa haki za binadamu ni kwamba suala la kutekwa na kuteswa kwa Ulimboka liundiwe tume huru. Tume ambayo badala ya kukimbilia kanisani na nje ya nchi na mahakamani itachunguza kiini cha tukio lenyewe hapa hapa nchini. Kwa vile suala hili linaelekea kuwagusa watu wengi na kuibua dalili za kutoaminiana na kulituhumu moja kwa moja Jeshi la Polisi, hekima pekee ni kuliundia tume huru. Vinginevyo tutaendelea kusikia “hadithi” ambazo hazitatusaidia kuleta maelewano. Vyovyote vile kwa suala la Kutekwa na kuteswa kwa Dk. Ulimboka, ni lazima mtu awajibishwe, vinginevyo ni kuendelea kuwalazimisha watu kujichukulia sheria mkononi!

ALAT RUVUMA YAWEKA AZIMIO LA KILIMO CHA MAZAO MBADALA

Na Steven Agustino,Tunduru

KIKAO cha jumuiya za serikali za mitaa (ALAT) mkoa wa Ruvuma kimeazimia kuanzisha na kuendeleza kilimo cha mazao mbadala katika mkoa wa Ruvuma ambayo ni pamoja na korosho,karanga,mihogo na kahawa badala ya kuendeleza zaidi kilimo cha mahindi pekee.

Azimio hilo limepitishwa na wajumbe wa jumuiya hiyo katika mkutano mkuu uliofanyika wilayani Tunduru ambao ulitanguliwa na ziara ya mafunzo kwa wajumbe kutembelea kituo cha utafiti wa kilimo cha Naliendele kilichopo mkoani Mtwara zikiwa ni juhudi za wajumbe hao
kupata ufahamu zaidi wa shughuli za uzalishaji bora wa zao la korosho.


Aidha wakiwa katika ziara hiyo ya mafunzo katika kituo hicho wajumbe hao pamoja na kujifunza namna ya uzalishaji bora wa korosho pia walielimishwa namna ya kulima kilimo bora cha karanga,Ufuta, na muhogo mazao ambayo yanastawi pia mkoani Ruvuma ambako kunalimwa mahindi kwa kiasi kikubwa na kahawa ambalo ni zao la biashara linalolimwa zaidi katika wilaya ya Mbinga nalo limewekewa mikakati zaidi ya kuhakikisha wilaya zote za mkoa wa Ruvuma zinalima.

Akizungumza wakati akitoa mafunzo hayo kwa wajumbe Afisa utafiti wa kilimo wa kituo cha Naliendele Ramadhan Bashiru alisema kuwa uamuzi wa wajumbe hao kutoka mkoani Ruvuma kufika katika kituo hicho kwa ajili ya kujifunza ni ishara kuwa wamedhamiria kuinua kiwango cha wakulima wa mkoa wa Ruvuma kwani watalima kilimo bora chenye tija kwao na taifa kwa ujumla.

 Bashiru aliwaeleza wajumbe hao kuwa mbali na kituo hicho kufanya utafiti wa mazao mbali mbali pia kimekuwa kikitoa mafunzo kwa wakulima kulingana na mahitaji yao ingawa wananchi wanaokizunguka kituo hicho bado hawajaonyesha mwamko chanya wa kutaka kujifunza kilimo bora na uzalishaji bora wa mazao mbali mbali ambayo ni rahisi kwa wakulima wadogo wadogo.

Aidha Bashiru alitoa wito kwa mikoa mingine kuiga mfano wa mkoa wa Ruvuma kufika kwenye kituo hicho kwa ajili ya kujifunza na kupata mbegu bora za mazao mbali mbali ili kutekeleza kauli mbiu ya kilimo kwa vitendo kwa sababu kilimo ndiyo uti wa mgongo wa taifa.

Awali akifungua mkutano huo  Mkuu wa Wilaya ya Tunduru  Bakari Nalicho pamoja na kutoa hamasa kwa viongozi wa Jumuiya hiyo kuhamasisha uzalishaji wa mazao hayo kwa wakulima wao pia aliwaomba viongozi wa Bodi ya Korosho na Mfuko unaosimamia uzalishaji wa zao hilo
kuhakikisha wanatafuta soko la uhakika na kuuza korosho zilizo kwama katika maghala ya vyama vya ushirika Wilayani humo pamoja na kujenga tabia ya kupeleka madawa ya kupulizi mikorosho ya wakulima kwa wakati.

Aidha DC, Nalicho aliwahamasisha wajumbe hao kupia halmashauri zao kuhamasisha wananchi kukopa matrekta yaliyoletwa Mkoani humo, kutoa elimu  juu ya ukusanyaji wa kodi kutoka kwa wafanyabiashara, kubuni mbinu mpya za ukusanyaji wa mapato kutoka katika vyazo visivyo wa kwaza wananchi na akatumia nafasi hiyo kuwakumbusha watendaji katika halmashauri hizo kusimamia mapato hayo ili yatumike katika uboreshaji wa maisha ya wananchi kupitia huduma muhimu za Maji,Afya, Elimu,Kilimo kwa maana ya Pembejeo na miradi ya ufugaji.

Akifunga mkutano huo Mwenyekiti wa ALAT mkoa wa Ruvuma Oddo Mwisho aliwataka wajumbe waliofika kwenye kituo hicho kuwa mabalozi kwa kuwaelimisha wananchi umuhimu wa kuwatumia wataalamu wa kilimo waliopo katika halmashauri zao ili kuufanya mkoa wa Ruvuma kuwa na mazao mbali mbali ya biashara na chakula.

Naye Mstahiki Meya wa Manispaa ya Songea Charles Mhagama alisema kuwa ziara hiyo ya wajumbe kwenye kituo hicho ni chachu kubwa ya kuufanya mkoa wa Ruvuma kuwa kioo cha uzalishaji wa mazao hayo ambayo yakizalishwa kwa kuzingatia utaalamu yatainua uchumi wa mkulima na taifa kwa ujumla.
Mwisho.

WAFANYAKAZI WA TANESCO LAWAMANI TUNDURU

Na Steven Augustino, Tunduru

WAFANYAKAZI wa Shirika la ugavi wa Umeme Tanzania (TANESCO) Wilayani Tunduru Mkoani Ruvuma wametuhumiwa kuwa wahujumu na wachakachuaji wa kubwa na wauzaji wa mafuta ya kuendeshea mitambo ya umeme ya shirika hilo.

Hayo yamesemwa na baadhi ya  wakazi wa Mji wa Tunduru kufuatia kuwepo na kujengeka kwa mazoea ya watumishi wa Shirika hilo kuuza mafuta hayo huku viongozi wao wakiwa wanawakingia vifua kwa visingizio kuwa mafuta yaliyo uzwa ni miongoni mwa mafuta yaliyotumika yaani machafu.

Baadhi ya wananchi hao ambao waliomba wasitajwe majina yao gazetini walidai kuwa wamelazimika kutoa kilio chao cha kuiomba serikali iwasaidie kufuatilia kwa karibu suala hilo ili kuwaondolea adha hiyo.

Walisema kufuatia kukosekana kwa huduma hiyo kumesababisha kuwepo kwa ukubwa na gharama za maisha kutokana na bidhaa zote kupanda bei hasa vyakula ambako chanzo chake kimekuwa kikisababishwa na kuzimwa kwa Umeme mara kwa mara.

Aidha pamoja na mambo mengine zikiwemo kero tofauti zinazo sababishwa na uzimwaji wa huduma hiyo ukiwemo mdororo wa utoaji wa huduma katika huduma za Serikali Gazeti hili lilishuhudia kupanda kwa bei za unga na kufikia Shilingi 1500 kwa kilo moja kutoka Shikingi 600, mchele Tsh.2200 kutoka tsh.1500.

Alipotakiwa kuzungumzia kero hiyo Kaimu Meneja wa Tanesco Wilayani humo Bosco Milumbe mbali na kukiri kuwepo kwa hali ya kutatanisha juu ya upatikanaji wa nishati hiyo alisema kuwa chanzo ni ukosefu wa mafuta ya kuendeshea mitambo hiyo.

Alisema hata hivyo wao hawana mamlaka ya kulishughulikia na kwamba wao hupokea mafuta baada ya kuandaliwa na Makao makuu ya Shirika hilo yaliyopo Jijini Dar Es Salaam ambao ndio hufanywa shughuli zote za manunuzi ya mafuta

Kuhusu tuhuma za watumishi kuchakachua mafuta alisema kuwa madai hayo siyo ya kweli akianisha kuwa Shirika hilo hupokea lita 30,000 za mafuta kila gari linapo fika na kwamba matumizi ya mitambo yake kwa siku ni wastani wa lita 3500 hadi lita 3600 ambapo hutakiwa kutumika wastani wa siku 10 tu.

Hata hivyo Milumbe alimaliza kwa kusema kuwa Shirika hilo limepanga kuwasha Umeme  kesho  kwa masaa mawili tu na kumaliza stoku ya mafuta lita 10.000 waliyokopa kutoka kwa mfanyabiashara binafsi kwa ajili ya kutoa nafasi kwa wakazi wa mji huo kusaga na kukoboa nafaka zao na kwamba baada ya hapo huduma hiyo haitapatikana klwa muda usiofahamika.

Juhudi za kumtafuta Meneja wa Tanesco Kanda ya Nyanda za juu Kusini Eng. Boniface Njombe ili kuzungumzia hatima ya nishati hiyo kwa wakazi wa wilaya hiyo  hazikufanikiwa kutokana na simu zake  kutopatikana

MWISHO

MADAKTARI; KUNA KIKOSI CHA KUMUUA ULIMBOKA

• Wasema Ulimboka alimtambua afisa aliyemteka Na Irene Mark

BAADA ya kutekwa, kupigwa na kutelekezwa kwa Mwenyekiti wa Jumuiya ya Madaktari nchini, Dk. Steven Ulimboka, viongozi wa vyama vya madaktari wamedai maisha yao yako hatari hali iliyowalazimu kuomba ulinzi Umoja wa Mataifa na makundi mbalimbali ya kutetea haki za binadamu. Madaktari hao wamesema hawana imani na maofisa wa serikali ya Rais Jakaya Kikwete, wanaotishia usalama wa maisha yao kwa namna tofauti hasa baada ya tukio la Dk. Ulimboka la Juni 27 mwaka huu. Barua ya madaktari hao kwenda kwa Mwakilishi Mkazi wa Umoja wa Mataifa hapa nchini ya Julai 7, 2012, madaktari wameeleza namna maofisa wa serikali wanavyotishia usalama wa maisha yao hao na kuwaeleza namna walivyowatuma wenzao Afrika Kusini kuhakikisha Dk. Ulimboka anapoteza maisha. Pia barua hiyo yenye kumb. Na.MAT/UN/SU/01, imetumwa kwa Mwenyekiti wa Chama cha Madaktari Tanzania (MAT), Dk. Namala Mkopi, Shirika la Human Rights Watch na Amnesty International. Taasisi nyingine zilizopelekewa nakala ya barua hiyo ambayo Tanzania Daima ina nakala yake ni Kituo cha Haki za Binaadam (LHRC), SIKIKA Tanzania, Mtandao wa Jinsia Tanzania (TGNP) na Chama cha Waandishi wa Habari Wanawake (TAMWA). “Hata hivyo, watu kutoka serikalini waliihakikishia MAT kwamba timu ya wasaidizi wao imeenda Afrika Kusini kuhakikisha Dk. Ulimboka anarudi nyumbani akiwa maiti. “Kwa kuongezea hapo, viongozi wa MAT tunapokea vitisho kwa njia ya ujumbe mfupi wa maandishi kwenye simu na wakati mwingine tunapigiwa simu na namba zisizopatikana tukitishiwa maisha,” ilieleza sehemu ya barua hiyo iliyosainiwa na Dk. Mkopi. Aidha, barua hiyo imeuomba Umoja wa Mataifa kuwahakikishia madaktari usalama wa Dk. Ulimboka kwenye hospitali anayotibiwa na kuwalinda madaktari wengine hasa viongozi wa vyama na jumuiya ya madaktari. Kadhalika barua hiyo imeuomba umoja huo kuushauri mfumo wa sheria za Tanzania kutokubali kutumika kwa faida za kisiasa na kulitaka Bunge kubaki na majukumu yake ya Kikatiba ya kuiwajibisha serikali kwa vifo vya watu kama matokeo ya mgomo unaoendelea. Katika barua hiyo madaktari hao wameeleza namna Dk. Ulimboka alivyoteswa na watekaji hao kwa kung’olewa kucha, meno na kuumizwa sehemu mbalimbali za mwili wake huku akimtambua ACP Msangi kuwa miongoni mwa watekaji hao. Walieleza namna polisi wa kituo cha Bunju walivyoshindwa kuwapa ushirikiano kwa haraka ili kumuwahisha majeruhi huyo kwenye Hospitali ya Taifa Muhimbili na jinsi walivyokuwa wakizuiwa na magari ya askari kwa lengo la kumchelewesha asipate huduma za kitabibu. “Akiwa kwenye chumba cha wagonjwa mahututi Kitengo cha Mifupa Muhimbili (MOI), Dk. Ulimboka licha ya maumivu makali aliyokuwa nayo alimtambua ACP Msangi kuwa ni miongoni mwa waliomteka na kumtesa,” ilieleza sehemu ya taarifa hiyo na kubainisha kwamba ACP Msangi ni kiongozi wa tume iliyoundwa kuchunguza suala hilo. Ikulu yasononesha viongozi wa dini Baadhi ya viongozi wa dini waliojitolea kusuluhisha mgogoro baina ya madaktari na serikali, wameeleza kusononeshwa na jibu la Ikulu la kukataa kuonana nao huku wakibainisha kwamba jukumu lao kubwa ni kuhakikisha amani inatawala. Akizungumza kwa niaba ya viongozi hao, Msemaji wa Kamati ya Vijana wa Baraza Kuu la Waislamu (Bakwata), Said Mwaipopo, alisema licha ya jibu hilo wanaendeleza juhudi za kuhakikisha mgogoro huo unamalizika kwa njia za amani. “Hatukatishwi tamaa na jibu la Ikulu kazi yetu kubwa ni kuhakikisha amani inakuwepo… ndiyo maana jana tulikutana na viongozi wa madaktari tukawaeleza kwamba njia bora ya kufanya ni kuandika barua na kuieleza jamii kupitia vyombo vya habari kwamba wanaomba msamaha kwa Rais, wananchi na serikali. “Kitu kinachotusikitisha vijana wale walikataa ushauri wetu tukagundua kwamba inawezekana nyuma yao kuna siasa zinaingia,” alisema Mwaipopo. Akijibu suala hilo Katibu wa Jumuiya ya Madaktari, Dk. Edwin Chitage, alikiri kukutana na viongozi hao jana na kueleza kwamba walichokubaliana ni kusubiri barua rasmi kutoka Ikulu ikiwataka madaktari hao kuandika barua kuomba msamaha kwa Rais, Watanzania na serikali. “Ni kweli lakini alichokisema Mwaipopo ni kwamba alipigiwa simu na watu waliodai kwamba wako Ikulu, hivyo wakawaambia viongozi hao wa dini watuambie madaktari tuandike barua ya kuomba msamaha.Tunaomba msamaha kwa nini,” alihoji. Dk. Mkopi aliongeza kuwa madai yao hayajatekelezwa licha ya kuwepo kwa muda mrefu tangu mwaka 2005 na kwamba kama serikali haina dhamira ya kweli ya kumaliza mgogoro huo utaendelea hata baada ya miaka 10. Kukutana na Dk. Mwinyi Makamu Mwenyekiti wa Jumuiya ya Madaktari Dk. Godbless Chale alisema walipokea simu kutoka kwa Waziri mpya ya Afya na Ustawi wa Jamii Dk. Hussein Mwinyi ikiwataka kwenda kumweleza sababu za mgomo wao. “Kweli Dk. Mwinyi alitupigia simu akatuita alisema hajui madai yetu hivyo twende tukamweleze hivi kwa akili ya kawaida kweli ofisi inakosa nyaraka za kumbukumbu?!! Tunaona hayupo ‘serious’. “Kabla hajatuita wizara yake iliteua wajumbe watatu Naibu Katibu Mkuu, Naibu Mganga Mkuu Dk. Donald Mbando na Mkurugenzi wa Rasilimali tukaketi nao kuwaeleza siku chache baadaye waziri anasema hajui madai yetu hii tumeona ni ‘kamchezo’ wanataka kutufanyia,” alisema Dk. Godbless.

MAHOJIANO YA GAZETI LA JAMHURI NA ACP MSANGI KUHUSU DKT ULIMBOKA

 

Askari anayetuhumiwa kumteka Mwenyekiti wa Jumuiya ya Madaktari Tanzania, Dk. Stephen Ulimboka, Kamishna wa Polisi Msaidizi (ACP), Ahmed Msangi, amehojiwa na kuzungumzia kilichotokea kuhusiana na tuhuma kwamba aliambiwa arejeshe simu ya mkononi na pochi ya Dk. Ulimboka. Akizungumza, ACP Msangi alikiri kwenda katika wodi ya wagonjwa mahututi katika Taasisi ya Mifupa Muhimbili (MOI) kwa nia ya kumhoji Dk. Ulimboka, ila akaeleza mshangao wake kutokana na habari zilizochapishwa mwishoni mwa wiki, kuwa aliambiwa arejeshe pochi na simu ya Dk Ulimboka kwa maana kuwa alivipora walipomteka.
Vyombo vya habari mwishoni mwa wiki vilichapisha taarifa bila kutaja jina la askari anayetuhumiwa, lakini pia ukawa unasambazwa ujumbe mfupi kupitia simu za mkononi ambao ulisema hivi:

“Kamanda Msangi aliyemkamata na kumtesa Dr. Ulimboka, yuko katika jopo la kuchunguza nini kilimtokea Dk. Ulimboka. Alipofika kumhoji Dk. Ulimboka alimwambia ‘Nirudishie simu na wallet yangu’. Kamanda Msangi taratibu akaondoka wodini kichwa chini. Kama wewe ni mpenda haki na unapinga ujinga na dhuluma, watumie ujumbe huu watu wengi kadri uwezavyo ili wamjue dhalimu aliyeongoza unyama huu,” ulisema ujumbe huo unaosambazwa kupitia simu za mkononi.

Tume ya Jeshi la Polisi iliyoundwa kuchunguza tukio la Dk. Ulimboka kutekwa nyara, kwa mujibu wa Kamanda Polisi wa Kanda Maalumu ya Dar es Salaam, Suleiman Kova, inaongozwa na Kamanda Msangi.

Kamanda Msangi azungumza
Jamhuri: Afande umetangazwa kuongoza hii Tume ya Polisi kuchunguza suala la Dk. Ulimboka, lakini taarifa zilisosambaa zinaonyesha Ulimboka alikwambia umerejeshee simu na wallet yake. Unalizungumziaje hili?

Kamanda Msangi: Hata mimi nimesikia hizi taarifa, na zimenisikitisha mno. Naamini taarifa hizi zina malengo ya ziada. Si kweli kwamba nilishiriki kumteka Dk. Ulimboka na wala sijawahi kuwa na wazo hilo.


Jamhuri: Ikiwa hukushiriki kumteka iweje wodini akwambie nirudishie simu yangu?

Msangi: Kwanza ifahamike mimi huyu Dk. Ulimboka na mwenzake Dk. Deo nimewafahamu siku nyingi sana. Kwa maana hiyo ni mtu anayenifahamu vizuri tu. Kuna upotoshaji wa makusudi umefanywa ambao mimi nadhani una msukumo wa kisiasa.

Alichosema Dk. Ulimboka nilipozungumza naye, ni kwamba simu moja ilidondoka, nyingine wale watu waliomteka wameichukua pamoja na wallet yake. Hivyo alikuwa ananitajia vitu vilivyopotea. Nilipomuuliza iwapo anakumbuka namba ya simu, aliniambia nikamuulize Dk. Deo. Sasa nashangaa mtu aliyepenyeza uongo huu kwamba alisema mimi ndiye niliyempora hivyo vitu… sielewi ni nani na ana malengo gani.

Jamhuri: Haya unayasema wewe, hivi unadhani jamii itakuamini kwa kauli hizi, haitaonekana unajitetea tu?

Msangi: Wakati anazungumza maneno haya, alikuwapo Profesa Museru ambaye ni Mkurugenzi wa MOI. Sina cha kuficha kamuulize tu, atakwambia alichosema Dk. Ulimboka. Yupo pia Dk. Deo, huyu ananifahamu na Dk. Ulimboka anasema walikuwa wote wakati anatekwa. Dk. Deo ananifahamu, akaulizwe iwapo mimi ndiye niliyemteka Dk. Ulimboka.

Jamhuri: Tuhuma hizi zilianza kusambaa mapema tu Ijumaa. Je, wewe hukuwa na hofu kwenda pale MOI kumhoji Dk. Ulimboka?

Msangi: Ndugu yangu, nchi hii ina askari wengi mno. Hivi mimi kwa akili ya kawaida naweza kushiriki kumteka Dk. Ulimboka kisha nikaenda wodini kumhoji? Hata katika akili ya kawaida ya binadamu hilo haliwezekani.

Jamhuri: Hizi tuhuma zilizoelekezwa kwako ni nzito. Wewe ndiye uliyeteuliwa kuongoza Tume ya Uchunguzi wa tatizo hili. Je, unadhani uchunguzi utakaofanya utaaminiwa na wananchi ukitoa ripoti?

Msangi: Mimi ninachokuhakikishia sikushiriki kumteka na si kweli kwa kila hali. Mambo kama haya yanakatisha tamaa. Kama tunaanza kuzushiana uongo kwa kiwango hiki, nchi hii sijui inaelekea wapi! Kimsingi imenikatisha tamaa mno. Wapo wanaosema nijiuzulu katika Tume hii lakini mimi nasema wakubwa wangu wamenipa kazi hii na watakaloamua nitalipokea.

Hivi wewe gazeti lako likituhumiwa unaacha kuendelea kutafuta habari? Nitaendelea kufanya kazi hii kama nilivyoapa siku nilipohitimu mafunzo kwamba nitalitumikia taifa kwa uadilifu na uaminifu wa hali ya juu katika kiapo changu cha utii. Na hilo ndilo nitakaloendelea kufanya. Watu wanapenda kuharibiana maisha tu.
Profesa Museru asema alichokisikia

Mkurugenzi wa Taasisi ya Mifupa Muhimbili, Profesa Lawrence Museru, akizungumza na JAMHURI kuhusiana na sakata kwamba Dk. Ulimboka, alimweleza Kamanda Msangi arejeshe simu na wallet yake.

Jamhuri: Profesa nimezungumza na Kamanda Msangi juu ya tuhuma zinazomkabili kuwa aliambiwa na Dk. Ulimboka amrejeshee simu na wallet yake, na akakutaja wewe kuwa ulikuwapo wakati wa mazungumzo hayo. Wewe nini ulichokisikia kuhusiana na tuhuma hizi.

Profesa Museru: Mimi ndiye niliyempeleka pale wodini. Ni bwana mzuri tu. Nilimu-introduce (nilimtambulisha), akaanza mahojiano. Mimi hilo sikulisikia kwamba ameambiwa arejeshe simu na wallet, hilo sikulisikia.

Jamhuri: Kuna habari kuwa Kamanda Msangi baada ya kuambiwa kauli hiyo alitoweka wodini bila kuaga akikwepa kipigo kama ilivyomtokea askari mwenzake siku mbili kabla. Je, unalizungumziaje hilo profesa?

Profesa Museru: Nini? Kwamba alikimbia? Jamani nchi hii inakwenda pabaya. Mimi nilimsindikiza hadi nje ya wodi akapanda gari lake na kurejea ofisini kwake, sasa hilo la kukimbia limetokea wapi? Jamani ehee, mimi niseme katika hali kama hii sintofahamu zipo nyingi. Ni vyema kuchuja taarifa tunazozipata.

DC AWAASA WANANCHI KUPENDA KUFANYA KAZI HALALI

Na Stephano Mango, Nyasa

MKUU wa wilaya ya nyasa Mkoani Ruvuma Ernest Kahindi amesema kuwa kauli mbio yake katika kuhimiza maendeleo wilayani humo ni amani na maendeleo ambayo inahimizwa kwa wakazi wote wa wilaya hiyo wenye uwezo wa kufanya kazi na amewatahadharisha wananchi kutokunywa pombe wakati wa saa za mchana na badala yake waone umuhimu wa kufanya kazi mbalimbali zitakazoweza kuwaletea kipato.

Kahindi aliyasema hayo jana kwenye mji mdogo wa Mbambabey ambapo alifafanua kuwa amani ni kupambana na mambo mbalimbali ya uharifu mfano ujambazi,uhamiaji haramu ,unyanyasaji wa kijinsia, ubakaji ,rushwa ,mimba kwa watoto wa shule za msingi na sekondari .

Alisema kuwa maendeleo kila mkazi mwenye uwezo wa kufanya kazi ni lazima awajibike kikamilifu ili kusukuma gurudumu la maendeleo kwa wakazi wote wa wilaya mpya ya nyasa kwa kuelekeza nguvu kwa kuhakikisha wananchi wanaondokana na ujinga, maradhi na umasikini.

Aliendelea kufafanua kuwa ujinga ndio unahathari kubwa hivyo mtazamo wake utakuwa ni kusimamia swala zima la Elimu hasa ikizingatiwa kuwa kila kata kuna shule za msingi na sekondari hivyo watoto wenye umri wa kwenda wa kuanza kwenda shule ni lazima wazazi wao wawapeleke kwenye shule ili kuondokana na tatizo sugu la ujinga na wanafunzi ambao wanaonekana kuwa ni watoro kwenye shule za sekondari za kata wajirudihe wenyewe badala ya kufuatwa na mkono wa dola na si vinginevyo.

Alieleza zaidi kuwa amewaagiza maafiza watendaji wa kata zote kuhakikisha kuwa wanawasiliana na wakuu wa shule za sekondari za kata ili kuwabaini wanafunzi watoro ambao wanapaswa warejee kwenye shule zao kabla ya hatua zingine kuanza kuchukuliwa.

Amewaonya baadhi ya wavuvi katika ziwa nyasa wenye tabia ya kuwatumia wanafunzi wa shule za msingi na sekondari kwenye shughuri zao za uvuvi na badala yake wawahimize wanafunzi hao kwenda shuleni na kwamba mvuvi yeyote katika wilaya ya nyasa anawaajili wanafunzi kazi ya kuvua samaki kwenye ziwea nyasa atachukuliwa hatua za kisheria mara moja..

Alisema kuwa wilaya ya nyasa wananchi wake ni wakulima na wavuvi wa samaki hivyo kazi kubwa mbele yake ni kuhakikisha kuwa wilaya hiyo inakuwa na mazao ya chakula na biashara ambapo aliyataja mazao ya chakula kuwa ni mahindi, muhogo na mpunga na mazao ya biashara ni kahawa na korosho.

Alibainisha zaidi kuwa vijana wote katika wilaya hiyo wenye uwezo ni lazima wafanye kazi bila kuchagua kazi na waachane na swala la kunywa pombe nyakati za saa za mchana na badala yake waone umuhimu wa kubuni miradi mbalimbali za maendeleo zitakazo weza kuwakwamua kiuchumi.

Aidha amewahimiza wawekezaji hapa nchini kuona umuhimu wa kuwekeza katika maeneo mbalimbali hasa kandokando ya ziwa nyasa ambako kuna vivutio vingi vya utalii kwa kuweka mahoteli, viwanda na taasisi za fedha (bank ) hasa katika miji midogo ya Litui,Lihuli na mbambabey ambako ndio makao makuu ya wilaya hiyo.

Mwisho

CHADEMA WAISHUKIA ZIARA YA PINDA MKOANI RUVUMA

 Mwenyekiti wa Chadema Mkoa wa Ruvuma na Diwani wa Kata ya Mjini Joseph Fuime akiwahutubia mamia ya wananchi jana (hawapo pichani) kwenye mkutano wa hadhara uliofanyika jana kwenye viwanja vya Soko la Samaki la Zamani

 Kutoka kushoto ni Katibu wa Wanawake Jimbo la Songea Asia Ngonyani, Mwenyekiti wa Wanawake Jimbo la Songea na Diwani wa Vitimaalum Chadema Manispaa ya Songea Rhoda Komba na watatu ni mwanachama wa chama hicho Kudeka

 Wananchi wakisikiliza mkutano huo jana

 Mwenyekiti wa Chadema Mkoa wa Ruvuma na Diwani wa Kata ya Mjini Joseph Fuime akimvua gamba mwanachama wa CCM Kaumeme kwenye mkutano wa jana

 Wapenzi wa kumbukumbu wakichukua tukio hilo jana la KAUMEME kujiunga na Chadema

Na Mwandishi Wetu, Songea

CHAMA cha Demokrasia na Maendeleo (Chadema) Mkoani Ruvuma kimemtaka Waziri Mkuu Mizengo Pinda kufanya ziara yenye maslahi kwa wakazi wa Mkoa wa Ruvuma na Taifa kiujumla badala ya kufanya ziara ya kuliingizia Taifa hasara kubwa

Wito huo umetolewa jana na Mwenyekiti wa Chadema Mkoa wa Ruvuma na Diwani wa Kata ya Mjini Joseph Fuime wakati akiwahutubia mamia ya wakazi wa Songea katika mkutano wa hadhara uliofanyika katika viwanja vya Soko la Samaki la Zamani mjini hapa

Fuime alisema kuwa Waziri Mkuu Mizengo Pinda anatarajia kufanya ziara ya siku mbili kuanzia julai 6 hadi julai 7 katika mkoa wa Ruvuma yenye lengo la kupokea taarifa ya Mkoa ya shughuli za Maendeleo na kupokea taarifa ya maendeleo ya Chama Tawala

Alisema kuwa julai 7 mwaka huu ataenda Kijiji cha Lipokela Wilaya ya Songea na kupokea taarifa ya shamba na kukagua maandalizi ya kilimo cha kahawa,pia atakagua maandalizi ya ununuzi wa mahindi msimu wa 2012/2013 katika hifadhi ya Taifa ya NFRA-Ruhuwiko na baada ya hapo atazindua kampeni ya kimkoa ya matumizi ya matrekta makubwa ya kilimo

Alieleza kuwa Waziri Mkuu ni kiongozi mkubwa sana katika nchi yetu hivyo pamoja na kufanya ziara hiyo ambayo kimsingi haina tija kwa wakazi wa Ruvuma zaidi ya maslahi ya watu wachache wenye makampuni

Alifafanua kuwa mkoa wa Ruvuma ni umeathilika kwa matumizi ya mbolea zilizokosa ubora na ripoti zipo wazi kutokana na utafiti uliofanyika, hakuna umeme wa uhakika, wananchi hawanufaiki na uchimbaji wa Uraniam Namtumbo, Makaa ya Mawe Mbinga na rasilimali zingine

Alieleza zaidi kuwa Wilaya ya Songea kulikuwa na kiwanda cha kusindika Tumbaku lakini kilihamishwa kihuni na kupelekwa mkoani Morogoro, jambo ambalo linaendelea kuwaumiza wananchi kutokana na kuwa na mzunguko mdogo wa fedha katika mji wa Songea

Alisema kuwa Ziara ya Waziri Mkuu Mizengo Pinda haitakuwa na maana yoyote ile kwa wakazi wa Ruvuma kama hata tatua matatizo makubwa ya wananchi kuhusu mbolea, umeme,ajira kwa wakazi wa Ruvuma katika migodi na kero zingine

Alisema kuwa Chadema mkoa wa Ruvuma kinamtaka Waziri Mkuu kuacha kulalamika na badala yake kuchukua hatua madhubuti ya kuiagiza Shirika la Viwango Nchini (Tbs) kuchunguza ubora wa mbolea ambazo zinauzwa mkoani Ruvuma kwa sababu zimeleta kiama kwa wananchi wa mkoa wa Ruvuma

Alieleza zaidi kuwa Chadema kinamtaka Pinda atoe kauli kuhusu kiwanda cha Tumbaku cha Samcu, ujenzi wa barabara ya kiwango cha lami kutoka Namtumbo hadi Tunduru kwani mkandarasi yule ameonyesha wazi kushindwa kazi,pia tunamtaka atoe kauli kuhusu uharibifu mkubwa wa uwanja wa Majimaji na Uwanja wa Zimanimoto kwani bila kufanya hivyo ziara yake haitakuwa na tija kwa wazazi wa Ruvuma

Alisema ziara ya Waziri mkuu inatumia gharama kubwa sana ambazo zinatokana na kodi ya wananchi ambao wanahangaika kila kukicha kuzilipa kodi hizo hivyo matumizi yake ni lazima yawe yenye maslahi kwa wananchi wenyewe ndio maana chadema kwa kuwa ni chama ambacho kinapigania wanyonge na kinatetea ufujaji wa fedha za walipa kodi hivyo ni lazima tutoe maagizo kwa waziri mkuu na tunamtakaayatekeleza maagizo hayo kikamilifu

Awali Katibu wa Chadema Mkoa wa Ruvuma Dorphin Ghazia alisema kuwa Viongozi wa Serikali wamekuwa wakitumia fedha nyingi za walipa kodi bila kujali maslahi ya wananchi hivyo wananchi wanatakiwa wawe makini katika uchaguzi ujao ili kuweza kupata viongozi wenye mipango madhubuti kwa maendeleo ya wananchi

Ghazia alisema kuwa Chadema ni fursa ambayo watanzania wanapaswa kuitumia ili kuweza kuikomboa nchi kutoka mikononi mwa chama cha Mapinduzi ambacho miaka zaidi ya 50 sasa toka tupate uhuru bado wananchi wana mahangaiko makubwa

MWISHO

CHADEMA RUVUMA KUFANYA MKUTANO MKUBWA WA HADHARA LEO MCHANA

Na Mwandishi Wetu, Songea

CHAMA cha Demokrasia na Maendeleo (Chadema) Mkoa wa Ruvuma leo tarehe 4/7/2012 majira ya saa nane kinatarajia kufanya mkutano mkubwa wa hadhara katika Viwanja vya Soko la Samaki la zamani (Shule ya Msingi Mfaranyaki)

Taarifa zilizopatikana mjini hapa jana na kuthibitishwa na Mwenyekiti wa Chadema Mkoa wa Ruvuma ambaye pia ni Diwani wa Kata ya Mjini Joseph Fuime zimeeleza kuwa mkutano huo utahutubiwa na viongozi wa ngazi mbalimbali wa Chadema kutoka ndani ya mkoa wa Ruvuma

Fuime alisema lengo kuu ni kuimarisha chama na kukemea mambo ambayo yanaashiria ukandamizaji wa haki za wanyonge kunakofanywa na Serikali ya Chama cha Mapinduzi

Hata hivyo, alitoa wito kwa wanachama na wananchi wote kujitokeza kwa wingi katika mkutano huo ili kuweza kusikia sera za Chadema na maovu yanayofanywa na Serikali ya Chama cha Mapinduzi

MWISHO

RAIS TUEPUSHE NA LAANA HII

KAMA kuna neno zito lenye hekima na busara lililotolewa na Rais Jakaya Kikwete, ni kauli yake ya kuwaomba madaktari waliogoma warudi kazini ili kuwahudumia wagonjwa. Rais alipolihutubia taifa juzi, alisema inatia majonzi makubwa pale watu wanaposhuhudia miili ya wapendwa wao ikipelekwa kwenye chumba cha kuhifadhia maiti kwa sababu madaktari wamegoma. Tunaungana na Rais kwa kauli yake hiyo ya kuwasikitikia wananchi huku tukihoji ni kwa nini mgogoro baina ya madaktari na serikali unaendelea kama kuna dhamira ya dhati ya kuwahurumia watu? Tunasema hivyo tukiamini kuwa ni fedheha kwa serikali inayojifanya kuwa na huruma kuendelea kuvutana, kutambiana na kutoa kauli za ubabe na vitisho kwa madaktari ambazo mwisho wake ni unyama kwa wananchi maskini. Rais kama mkuu wa nchi na amiri jeshi mkuu wa vyombo vya ulinzi na usalama alikuwa na kila sababu ya kuhakikisha anapata taarifa sahihi kuhusu madai ya madaktari na kisha kupanua mjadala nao ili kuepusha mgomo. Ni dhahiri kuwa hatuungi mkono madaktari kugoma wakati wananchi wanapoteza maisha, lakini hoja yetu ni kwamba ufafanuzi wa Rais Kikwete na msimamo wake juzi kwa taifa, alipaswa kuutoa na mapema kabla mgomo haujaanza. Katika vuta nikuvute hii, tunashangazwa na ukimya wa Chama cha Wafanyakazi wa Serikali Kuu na Afya (TUGHE) chenye dhamana ya kuitisha mgomo kwa sekta hiyo badala yake tumeachwa kwenye ombwe la danadana baina ya Chama cha Madaktari (MAT) na Jumuiya ya Madaktari. Tumeona migogoro kadhaa iliyofukuta huko nyuma iliyowahusu wafanyakazi wa Kampuni ya Mawasiliano (TTCL) ilishughulikiwa na TEWUTA na NBC kina TUICO walionekana sana katika kutatua mgogoro na kufikia hatua nzuri. Tumeona jinsi mgogoro ya kimaslahi baina ya Wafanyakazi wa Reli na Serikali, chombo chao cha wafanyakazi (TRAWU) hakikukaa pembeni ndio maana tunajaribu kuangalia kwa kina hawa kina TUGHE hawana uhusiano wowote na madaktari? TUGHE walipaswa kutoa msimamo kwa umma kueleza ama wanaunga au hawaungi mkono mgomo wa madaktari kwa kuwa umeanzia ndani ya umoja wao wa kitaaluma na kwamba wamekiuka au wamefuata ipasavyo sheria za kazi. Tunasema hivyo kutokana na ukweli kwamba wananchi hawahitaji kujua nani anapaswa kuitisha mgomo baina ya jumiya na MAT, isipokuwa wanataka kupata huduma bora za afya. Hivyo mwenye dhamana ya kusimamia hilo la huduma bora za afya ni serikali. Na ndiyo maana tunaiona kauli ya Rais Kikwete kwa madaktari kuwataka wasioweza kupokea mishahara ya serikali waache kazi, imechelewa. Kwa maana hiyo Rais angefanya kila mbinu ikiwa ni pamoja na kuwashirikisha TUGHE ili kumaliza mivutano baina ya serikali na madaktari. Chanzo Tanzania daima

MAHAKAMA YAPELEKA KILIO KWENYE FAMILIA

Na Steven Augustino, Tunduru
MAHAKAMA kuu Tanzania Kanda ya Songea imepeleka kilio katika familia ya Shaibu Zuberi Kipande baada ya kumhukumu  kunyongwa hadi kufa baada ya kupatikana na hatia katika kosa la kuua kwa kukusudia kinyume na kifungu cha 196 cha Kanuni ya Adhabu, sura ya 16 kama ilivyofanyiwa mapitio mwaka 2002.

Kipande alihukumiwa adhabu hiyo baada ya Mahakama hiyo kumtia hatiani katika kosa kubwa la kuua kwa kukusudia, shauri Namba 7/2012 lililofunguliwa katika Mahakama Kuu Kanda ya Songea na kusikilizwa katika kikao cha Mahakama Kuu kilichofanyika katika Mahakama ya Wilaya ya Tunduru. Bwana Kipande alishtakiwa kwa kosa la kumuua Hamisi Henyeka kwa kumnyonga na kumvunja shingo tukio lililotokea katika kijiji cha Nakapanya Wilayani Tunduru Januari 28/2010 na kwamba kutokana na mazingira hayo alistahili kupata adhabu hiyo kutokana na unyama alioufanya.

Sambamba na familia hiyo kuonja makali kutokana na machungu hayo ya kutenganishwa na ndugu yao huyo ambaye hata kaburi lake hawataliona,familia mbili ambazo ndugu zao walikuwa katika hamaki kutokana na kusubilia kutolewa kwa amri na Mahakama hiyo kutokana na tuhuma za aina hiyo Adhabu iliyotolewa ikawafuta machozi ya kutengana na ndugu zao muda mrefu baada ya Mahakama hiyo kuwaona hawana hatia na kuwaachia huru taarifa ambayo ililishitua Jeshi la polisi kutokana na vijana hao kudaiwa kuifahamu vyema yazi hiyo wawapo mitaani.

Aidha katika Mahakama hiyo pia familia nyingine tano (5) za wafungwa waliokuwa wakitumikia vifungo tofauti baada ya kupatikana na hatia katika makosa ya wizi wa kutumia silaha nazo zikanufaika na Rufaa walizokata baada ya mahakama hiyo kutengua adhabu za vifungo hivyo huku mahakama hiyo ikibainisha kuwa sababu za kuachiliwa huru kwao kunatokana na kilichodaiwa kuwa ni udhaifu wa ushahidi pamoja na kutozingatiwa kwa vifungu sahihi wakati wa kufungua mashtaka.

Akifafanua adhabu hizo Hakimu Mkuu Mwenye mamlaka ya Ki JAJI Mhesh. Wilifred Peter Dyansobera alisema kuwa mahakama hiyo imetoa adhabu ya kunyogwa hadi kufa baada ya kuridhika na ushahidi uliotolewa na mashahidi wanne waliongozwa kutoa ushahidi wao mahakamni na Mwanasheria mwandamizi wa Serikali Mkoani Ruvuma  Maurice
Mwamwenda.

Alisema mbali na kuzingatia rai ya upande wa utetezi iliyotolewa na Wakili Msomi wa kujitegemea  Dickson Ndunguru alitoa maoni kuwa adhabu anayostahili mstakiwa ni kunyongwa na kwa kuwa hakuna adhabu mbadala kwa mujibu wa kosa la mauaji ya makusudi aliomba Mahakama iandae nyaraka zinazostahili ili mshtakiwa aweze kukata rufaa.

Upande wa Jamhuri ukiongozwa na mwanasheria wa Serikari Wilbroad Ndunguru alihitimisha kwa kutoa maoni kwa kuiomba Mahakama hiyo izingatie kifungu cha 196 cha Kanuni ya Adhabu Sura ya 16 juzuu ya 2002 katika kutoa adhabu kwa mshtakiwa.

Aidha Hakimu Mkuu mwenye  mamlaka ya Jaji,Mhesh. Dyansobera baada ya kumtia hatiani mshtakiwa na kutoa adhabu ya kunyongwa hadi kufa alihitimisha hukumu hiyo kwa kuutalifu upande wa utetezi kuwa njia ipo wazi endapo watahitaji kukata Rufaa na kuongeza kuwa Mahakama yake ipo tayari kutoa nakala ya hati ya hukumu na mwenendo wa shauri hilo mapema iwezekanavyo baada ya kukamilika kwa taratibu za kisheria.

Kwa mujibu wa adhabu zilizotolewa na Mahakama hiyo walionufaika kwa kuachiwa huru kutokana na udhaifu wa ushahidi wa tuhuma zilizo kuwa zikiwakabili ni pamoja na Salum Rashid Chibama aliyekuwa anatuhumiwa kwa tuhuma za mauaji ya bila kukusudia katika shauri la mauaji namba 6/2012 ambapo alidaiwa kuchoma nyumba moto na kusababisha kifo cha Mtoto Shadrack Hasani ambalo kiini chake ni tukio la fumanizi lililotokea katika
kijiji cha Muhuwesi Januari 4/2011.

Aidha Gotad Rufunda aliyekuwa anatuhumiwa katika Shauli la mauaji namba 4/2012 la tuhuma za kumuua marehemu Emmanuel Nyoni, Katika tukio lililo tokea Wilayani Namtumbo Tarehe 28/06/2008 aliachiwa huru baada ya kukosekana kwa ushahidi wa kumwunganisha na
shtaka la mauaji.

Walionufaika na Rufaa zao kwa kuachiwa huru ni pamoja na Hasan Rajabu ,Kiwembe Kampose na Hamad Wajika Jamshid waliokuwa wanatumikia kifungo cha miaka 30 kila mmoja baaya ya Mahakama ya Wilaya ya Tunduru kuwatia hatiani kwa kosa la Wizi wa kutumia Silaha kinyume cha sheria namba 294 (A) kanuni ya Adhabu kama ilivyofanyiwa mapitio mwaka 2002 ambapo ilidaiwa kuwa kwa pamoja waliiba kwa kutumia silaha na baada ya kuiba walimtishia kumchoma Kisu askari (mstaafu) wa Jeshi la wananchi  Abbas Husein katika tukio lililotokea February 13/2011.

Kesi nyingine iliyotolewa maamuzi ya aina hiyo ni ya Rufaa namba 4A/2012 wakata rufaa wakiwa ni  Alex Steven Chipasula, Lazack Ally Jaza na Rashid Kamwana walikuwa wanatumikia kifungo cha miaka 11 kila mmoja wao baada ya Mahakama ya Wilaya hiyo kuwatia hatiani katika makosa mawili likiwemo la kuvunja na kuiba Seti ya TV na deki vyote
vikiwa na thamani ya Shilingi 900,000 mali ya Afisa utumishi wa halmashauri ya Wilaya hiyo  Christina Kumwenda katika tukio lililo tokea usiku wa manane agosti 19/2011.

Rufaa ya mwisho iliyotolewa maamuzi hayo na Mahakama hiyo ni Namba 7/2011 iliyokatwa na  Said Hamidu Manyiru ambaye alihukumiwa kutumikia kifungo cha miaka 6 na Mahakama ya Wilaya baada ya kumtia hatiani kwa kosa la wizi wa pikipiki yenye namba za Usajiri T 772 EAD
mali ya Erasmo Damian iliyokuwa ameegeshwa katika yadi ya Idara ya Ujenzi Wilayani humo ambapo maelezo ya shauri hilo yalidai kuwa, Manyiru alibambwa na walinzi wa idara hiyo akitaka kuondoka na Pikipiki hiyo Mei 16/2011.

Wakizungumzia adhabu hizo Mwanasheria msomi wa Serikali  Wilbroad Ndunguru mbali na kukiri Jamhuri kufanya vibaya katika kesi hizo alisema kuwa kuanguka huko kumetokana na mapungufu ya kiushahidi ulioandaliwa na kutolewa Mahakamani huku Wakili wa kujitegemea .
Dickson Ndunguru alidai kutoridhishwa na adhabu ya kunyogwa hadi kufa
iliyotolewa dhidi ya mteja wake nikubwa mno na akaahidi kukata rufaa.

Upande wa Zuberi Kipande ambaye ni Baba mzazi wa mtuhumiwa aliyehukumiwa adhabu ya Kifo cha kunyongwa alipotakiwa kuzungumzia adhabu hiyo aliongea kwa uchungu kuwa kitendo cha kutenganishwa na mpendwa wao huku wakiwa hawajui mwili wake utazikwa wapi baada ya adhabu hiyo kutekelezwa kimewauma sana.
Mwisho

WAKULIMA WA KOROSHO WALILIA MADAWA YA KUUA VISUMBUFU

Na Steven Augustino, Tunduru
WAKULIMA wa Korosho Wilayani Tunduru Mkoani Ruvuma wameiomba Serikali kuwa na msukumo na kuhakisha Madawa ya Pembejeo za bei ya ruzuku ambayo hutumika kwa ajili ya Kupulizia na kuua visumbufu katika mikorosho yao yanafika kwa wakati.
Wakiongea kwa nyakati tofauti baadhi ya wakulima hao walisema kuwa malalamiko hayo yametokana na kuwepo kwa taarifa za kutatanisha juu ya ujio wake huku mikorosho yao ikiwa katika hali ya kuhitaji kupuliziwa baada ya kuchanua

Mtua issa,Kawanga Abdala na Milanzi Athuiman ni miongoni mwa wakulima waliopaza sauti zao na kuongeza kuwa endapo madawa hayo yataendelea kucheleweshwa kuna hatari ya wakulima hao kuanguka kimavuno msimu huu wa mwaka 2012/2013.

Walisema hali hiyo inatokana na wakulima wengi kushindwa kumudu bei ya Shilingi 45,000/= kwa mfuko wa kilo 25 za madawa hayo kutoka kwa wafanyabiashara walanguzi tofauti na bei ya ruzuku ambayo mfuko huo ulipangwa kuuzwa kwa Shilingi 12,000.
Akizungumzia hali hiyo Afisa Kilimo wa Wilaya hiyo Chiza Marando alisema kuwa tayari ofisi yake imekwisha kabidhi kazi hiyo kwa Mzabuni aliyeteuliwa kusimamia usambazaji wa madawa ya ruzuku ya y a asilimia 50% kutoka Serikalini yakiwemo ya viuatilifu vya kudhibiti visumbufu vya wadudu katika Mikorosho ya wakulima hao tangu mei 29 mwaka huu.

Marando aliendelea kufafanua kuwa uteuzi huo ulifanyka katika kikao kilichofanyika mei 8 mwaka huu baada ya kamati inayosimamia zao hilo kuridhika na sifa zilizohitajika kati ya Wazabuni Wanne (4)
wakiwemo Halima Luambano, Mohamed kionjo na Alli Chimwa.

Alisema katika mkataba huo unaomruhusu Namhala kusambaza pembejeo hizo unaonesha kuwa jumla ya Madawa yenye thamani ya shilingi 144,294,600/= yamepangwa kusambazwa kwa Wakulima wa wilaya hiyo zikiwemo Kilo 234,194 za Sulphur ya Unga madawa ya maji lita 6183 zikiwemo lita 2,108 za Mupavil,Lita 1,171 za duduali, lita 1,405 za Faipro na lita 234 za dawa aina ya Rav.
Upande wa Mzabuni huyo aliyeteuliwa na Kamati inayosimamia usambazaji wa Pembejeo za Ruzuku kwa Wakulima wa Korosho Wilayani Tundudru Mkoani Ruvuma Zuberi Rashid Namahala alipo takiwa kuzungumzia maendeleo ya mradi huo alianza kwa kuulalamikia uongozi wa Mfuko unaosimamia
ukuzaji wa zao hilo kwa urasimu na ucheleweshaji wa Madawa ya mgao uliyopangwa kupelekwa kwa wakulima wa Wilaya hiyo.

Aidha katika taarifa hiyo Namahala alidai kuanza kupoteza imani na uongozi wa mfuko huo ambao tayari amekwisha walipa fedha hizo tangu Mei 29 mwaka huu kupia katika akaunti namba 0150237061700 inayomilikiwa na mfuko huo katika Mabenki ya CRDB tawi la Mtwara na toka wakati huo hajakabidhiwa hata mfuko mmoja wa madawa hayo kitendo alicho kitilia mashaka kuwa huenda wanapanga mambo ya kufanyia utapeli wa fedha hizo.
Alisema kufuati hali hiyo ofisi yake ina andaa utaratibu wa kutafuta mwanasheria ili amsaidie kuangali utaratibu wa kukatisha mkataba huo na kudai arudishiwe fedha zake kwa madai kuwa ucheleweshaji huo utamfanya ashindwe kumudu kulipia mkopo wake benki na kumsababishia hasara.

Akiongea kwa njia ya Simu Mwenyekiti wa mfuko wa kuendeleza uzarishaji wa Korosho Tanzania Athumani Nkinde mbali na kukiri kupokelewa kwa fedha za mzabuni huyo, alisema kuwa chanzo cha kuchelewa kwa madawa hayo kunatokana na kuangushwa na Mzabuni aliyeteuliwa na Mfuko huo
kampuni ya Export Treding iliyo pewa kazi ya kusambaza Tani 5000 ambayo hadi wanakatisha mkataba Mei 4 mwaka huu ilikuwa imemudu
kuingiza tani 800 tu.

Alisema baada ya kukatishwa kwa mkataba huo Mfuko ulimteua wakala mwingine kampuni ya HAMAS (T) LTD katika kikao kilicho keti Mei 31 mwaka huu na kuahidiwa kuletewa madawa hayo mwishoni mwa mwezi huu.

Kufuati hali hiyo Nkinde pamoja na mambo mengine aliwaomba radhi wakulima hao na akawataka kuwa wavumilivu wakati taratibu za ufuatiliaji wa madawa hayo zikiendelea na akatumia nafasi hiyo
kumuomba Namahala kwenda kuchukua madawa ya maji aliyodai kuwa tayari yapo kwa wingi iIi yasambazwe ili wakulima wapulizie mikorosho yao awamu ya kwanza huku akiahidi kuwa awamu itakayo fuata watapuliza dawa ya Sulpur ya unga waliyo izowea.

Nae Mbunge wa Jimbo la Tunduru kusini alhaji Mtutura Mtutura alipotakiwa kuzungumzia ucheleweshaji wa madawa hayo aliahidi kutoa taarifa sahihi baada ya kuwasiliana na Waziri mwenye dhamana.
Mwisho