ELIMU YA SAYANSI NI NGUZO MUHIMU KWA NCHI ZILIZOENDELEA KIUCHUMI DUNIANI

Na Stphano Mango,Songea

HAKUNA sululu itakayoweza kukidhi mahitaji ya Taifa lolote Duniani kwa kuongeza kasi ya maendeleo na kukuza uchumi wa nchi kama Serikali husika itashindwa kuwekeza katika elimu ya sayansi na teknolojia kwa wananchi wake

Kwani ni ukweli ulio wazi kuwa maendeleo ya sayansi na teknolojia katika nchi nyingi duniani ni nguzo muhimu ya maendeleo kutokana na umuhimu wake katika kuvumbua maarifa mapya ambayo hutumika viwandani ili kuzalisha bidhaa mbalimbali

Dhana ya sayansi kinadharia ni chachu  katika kuleta maendeleo na kukuza uchumi wa nchi na kubadili mfumo wa maisha kutoka kwenye lindi la umaskini hadi kwenye ustawi stahiki wa maisha ya binadamu kwa kuweza kuwa na huduma bora za kijamii

Tafsiri sahihi ya dhana ya sayansi kama ilivyotafsiriwa na kamusi ya Kiswahili sanifu toleo la 2004, inaeleza kuwa ni elimu inayotokana na uchunguzi,majaribio,vipimo na kuthibitishwa kwa muda uliopo,utafiti huo unaleta jawabu sahihi la matumizi yake kwa wakati uliopo

Kamusi hiyo inaendelea kufafanua kuwa teknolojia ni maarifa ya sayansi yaliyowekwa katikamatumizi ya vitu mbalimbali kama zana au mitambo katika viwanda,mawasiliano,ufundi na kilimo

Kulingana na tafsiri hiyo ni wazi kuwa sayansi ndio baba wa teknolojia inayopandwa kwa binadamu ili kumwezesha kutumia maarifa hayo katika kuleta mapinduzi ya maendeleo katika jamii na taifa kwa ujumla

Nchi za Magharibi kama Marekani,Kanada,Uingereza,Ujerumani,Ufaransa na zile za Mashariki kama Urusi,China,Japan Na India  ni miongoni mwa nchi zilizojikita katika kupanua wigo wa taaluma ya sayansi

Ambapo mafanikio ya teknolojia ya sayansi katika nchi hizo yamesaidia kufanikisha malengo ya tafiti mbalimbali ambazo nyingi kati ya hizo zinatokana na uzalishaji katika sekta ya viwanda

Mfano wa uzalishaji huo upo wazi kama vile simu za mkononi,modemu za intaneti,flash disk,Cd,memori card ambapo uzalishaji huo umewezesha kufanyika kwa biashara za kimataifa katika muda mfupi

Idadi kubwa ya wafanyabiashara wamekuwa wakijihusisha na biashara hizo kutoka nchi za Mashariki ya mbali kwa kuagiza kupitia teknologia ya mtandao na kuziingiza kwenye nchi zao ikiwemo na wafanyabiashara wa Tanzania na kusifia ubora wa bidhaa hizo kupitia matangazo mbalimbali utafikiri huko kiwandani wakati bidhaa hiyo inatengenezwa alikuwepo

Tumekuwa mabingwa wa kusifia bidhaa za wenzetu bila nasi kushiriki katika ugunduzi wa teknolojia iliyozalisha bidhaa hiyo,hivyo sasa ni muda muafaka wa kujiuliza vitu tunavyotumia leo katika maendeleo ya sayansi na teknolojia watanzania tumechangia nini?

Tunafurahia kama mazuzu kuruka kwa ndege kutoka sehemu ya mkoa hadi mwingine,nchi mpaka nchi nyingine kwa haraka,je mchango wetu kwenye kifaa hicho uko wapi? Vifaa kama vile kompyuta,luninga ambavyo tunavitumia kuangalia mambo mbalimbali duniani mchango wetu upo?

Sayansi ndiyo iliyovumbua matumizi ya kompyuta,utengenezaji wa mitambo,ndege,meli,magari,roketi,rada,zana za kivita,ujenzi wa majengo na barabara vyote ni kutokana na dhana ya sayansi

Jambo la kujiuliza ni njia zipi zinazofanikisha teknolojia hiyo kufanikiwa katika nchi husika? Hapo sasa ni wajibu wa serikali kujipanga katika elimu elekezi na thabiti ambayo itafanikisha teknolojia hiyo kupatikana mashuleni

Tunahitaji elimu ya ubunifu ambayo imesheheni vitendo kuliko nadharia kwani elimu ya uvumbuzi ndio ambayo imesaidia nchi nyingi duniani kuwa na maendeleo endelevu na kuachana na maendeleo bandi ambayo sisi tumekuwa tunajivunia huku tukisubiri kila kitu kulishwa kutoka kwenye mataifa mengine kana kwamba siye tumekuwa mazuzu

Nchi zilizoendelea zilitumia muda mwingi kutoa kipaumbele cha elimu kwa wananchi wake katika Nyanja ya sayansi pamoja na ugumu wake na ukubwa wa gharama za kuisomea kuliko masomo mengine lakini faida yake ni kubwa sana

Kuendelea kuogopa kuwekeza elimu ya sayansi nchini ni kushindwa kuwapata wanasayansi halisi kwa kipindi chote toka nchi ipate uhuru wake mwaka 1961 kwani elimu ya chuo kikuu ilinayoendelea kutolewa leo nchini inamahusiano ya masomo ya jamii pekee yake

Kutolewa kwa elimu ya sayansi kunahitaji mitambo ambayo itamwezesha mwanafunzi kufanya majaribio ya vitendo na kubaini majibu ya nadharia aliyojifunza darasani,uwepo wa  na miundombinu  stahiki yatakuwa yanamsaidia mwanafunzi kuunda,kuvumbua vitu

Elimu hiyo ndio ya kujivunia kwani ndiyo wanayoitumia wenzetu kuitawala dunia yetu leo hii hivyo katika suala hili ni lazima masomo ya sayansi yapewe msukumo zaidi kwa kufundishwa na walimu waliobobea ili kuweza kuleta zao stahiki

Hapo Mitaala ya sayansi ni lazima ziwe na maabara nzuri zilizojitosheleza kwa vifaa vinginevyo wanafunzi wa shule hizo wataishia katika masomo ya nadharia na Taifa litaendelea kukodisha teknolojia kutoka katika nchi zilizoendelea kisayansia

Somo kama fizikia ni lazima wanafunzi  wapatiwe vitabu vya kutosha ambapo somo hilo linapaswa lifundishwe kwa kina hasa kwa vitendo hivyo somo hilo halipaswi kufundishwa kwa ajili ya kuwasaidia kufanya mtihani tuu

Wafundishwe somo hilo kuibua ubunifu  wa wanafunzi ,tuachane na tabia ya kuwafundisha kufaulu mitihani kwani dunia ya sasa inahitaji watu ambao ni wabunifu hata masomo ya kemia na bayolojia yanatakiwa yawajengee uwezo wa kisayansi wanafunzi hao

Teknolojia ni nguzo muhimu ya kuanzisha viwanda vya mitambo ya juu,kati na midogo ambapo mitambo mikubwa ni pamoja na ile ya kutengeneza magari,matrekta,mashine za kufuma nguo,ya kutengenezea barabara ,madaraja na inayotumika kuchimbia madini migodini

Elimu ya sayansi huwawezesha wataalam kubuni mambo mbalimbali ya vyombo vya mawasiliano,utengenezaji wa silaha na ufundi wa zana mbalimbali

Watafiti mbalimbali wa kisayansi wanafafanua kuwa ukosefu wa teknolojia unaongeza umasikini katika jamii na taifa kwa ujumla hivyo uwekezaji katika elimu ya sayansi ungesaidia kufanya tafiti mbalimbali za mafuta,makaa yam awe na mali asili zingine

Ukosefu wa elimu ya sayansi ndio chanzo cha ukodishaji wa maliasili za nchi kwa makampuni ya kigeni kwa makampuni ya kigeni kwa kuwa taifa husika halina uwezo wa kufanya tafiti hizo hata kwa upande wa viwandani utafiti wa dawa za binadamu na mifugo unahitajika ili kuboresha huduma zinazotolewa na sekta ya afya

Wakati umefika sasa tuwe na wataalam ambao wanaweza kutengeneza vifaa tulivyoviainisha hapo juu mfano upo wazi Jeshi la Wananchi wa Tanzania(JWTZ) waliweza kutengeneza gari aina ya Nyumbu hiyo ni ishara njema kwa taifa letu hivyo tuwekeze huko

Ni lazima tujiulize kuwa Japan inayozalisha utitiri wa magari ya aina ya Toyota ambayo yamesambaa dunia nzima wao wana nini zaidi yetu au India inayozalisha magari aina ya Tata wana nini zaidi yetu

Jibu ni rahisi,uwekezaji kwenye elimu ya sayansi ambayo italeta uvumbuzi wa teknolojia mbalimbali kwani wenzetu wameweza kuwekeza huko na kuchukua muda mwingi kufikiria ubunifu wa kitu furani ambacho kitakuja kukuza uchumi wa nchi yao

Kama tutashindwa kuchukua hatua stahiki leo basi nchi za Marekani ,Korea,China,Urusi,India na mataifa mengine yataendelea kugeuza nchi za afrika maeneo ya kuuzia bidhaa zao kwa sababu sisi hatuna mchango katika uzalishaji

Hatari yake nyingine licha ya kwamba nchi yetu itageuzwa jalala la bidhaa nyingine hata watu wetu watageuzwa watumwa wa kuuza bidhaa za nchi hizo kwa sababu elimu ya uvumbuzi tumeishiwa hivyo tuzinduke kama kweli tunataka kuwa sehemu ya maendeleo yaliyopo duniani

Ni aibu kuendelea kuimba kuwa sisi tuna maendeleo ya sayansi na teknolojia wakati kila tunachotumia kinatoka nchi za wengine nasi kazi yetu kusifia tuu uzuri wa kitu hicho utafikiri tulikuwepo wakati kinatengenezwa

Mwandishi wa Makala

Anapatikana 0755-335051

http://www.stephanomango.blogspot.com/

MHANDISI MANYANYA MKUU WA MKOA WA RUKWA ATEMBELEA SHULE YA UFUNDI YA WALEMAVU YOMBO JIJINI DAR ES SALAAM NA KUWATIA MOYO WANAFUNZI HAO

 Mkuu wa Mkoa wa Rukwa Mhandisi Stella Manyanya akisaini kitabu cha wageni kwenye Ofisi ya Mkuu wa Chuo cha Ufundi Yombo mara baada ya kuwasili chuoni hapo

 Mkuu wa Mkoa wa Rukwa Mhandisi Stella Manyanya akiangalia jiko lililotengenezwa na wanafunzi wa chuo cha walemavu Yombo alipotembelea chuoni hapo na hasa katika darasa la wanafunzi wanaojifunza kutengeneza vyuma ambapo jiko hilo alilinunua kwa shilingi elfu ishirini 20000

  Mkuu wa Mkoa wa Rukwa Mhandisi Stella Manyanya akimpongeza Mwanafunzi pekee wa kike Mariam Kamala katika ufundi wa kuunga vyuma chuoni hapo

 Wanafunzi wa ufundi uselemala chuoni hapo wakimuonyesha Mkuu wa Mkoa wa Rukwa Mhandisi Stella Manyanya namna wanavyojifunza ufundi huo

 Mkuu wa Mkoa wa Rukwa Mhandisi Stella Manyanya akikagua mitambo ya ufundi useremala alipotembelea darasa la ufundi huo katika chuo cha Yombo

 Wanafunzi wa Darasa la Ufundi Seremala wakiwa kwenye picha ya pamoja na Mkuu wa Mkoa wa Rukwa Mhandisi Stella Manyanya alipotembelea chuo hicho

 Mkuu wa Mkoa wa Rukwa Mhandisi Stella Manyanya akiwa kwenye darasa la ufundi kushona

 Mkuu wa Mkoa wa Rukwa Mhandisi Stella Manyanya akiamuangalia Mwanafunzi Catherine alivyokuwa anajifunza kushona nguo

 Mkuu wa Mkoa wa Rukwa Mhandisi Stella Manyanya akiangalia wanafunzi wa Uhazini katika chuo cha Ufundi Yombo

 Mkuu wa Mkoa wa Rukwa Mhandisi Stella Manyanya akiwasalimia wanafunzi wa darasa la Ufundi Umeme katika chuo cha Yombo

 Mkuu wa Mkoa wa Rukwa Mhandisi Stella Manyanya akimuelekeza Mwanafunzi wa Ufundi Umeme Yusuph Said alipotembelea darasa hilo la umeme

Mkuu wa Mkoa wa Rukwa Mhandisi Stella Manyanya akiwa kwenye picha ya pamoja na Wanafunzi wa Umeme katika Chuo hicho cha Yombo, ikumbukwe kuwa Mhandisi Stella Manyanya ni msomi na mtaalamu wa ngazi ya juu katika fani ya ufundi umeme na kabla ya kuwa Mbunge wa Viti Maalum Mkoa wa Ruvuma na Mkuu wa Mkoa wa Rukwa alikuwa Injinia wa Shirika la Umeme Nchini Tanzania Tanesco

Chuo cha Ufundi kwa Wanafunzi wenye Ulemavu cha Yombo kinakabiliwa na changamoto mbalimbali ikiwemo miundombinu, vifaa na mitambo ya ufundi wa kada tofauti, walimu na gharama

Katika ziara yake Mhandisi Manyanya aliwapa moyo wanafunzi hao na kutoa kwa kila darasa shilingi 10000 ambapo jumla ya shilingi elfu tisini 90,000 alizitoa kwenye chuo hicho

WANANCHI WAUA SIMBA NA KUTAFUNA NYAMA YAKE

Na Steven Augustino Tunduru

WAKAZI wa Kijiji cha Mkowela Wilayani Tunduru Mkoani Ruvuma wamefanikiwa kumuua Simba na kula nyama yake ikiwa ni ishara ya kuonesha machungu waliyo kuwa nayo dhidi yake.

Wakiongea kwa nyakati tofauti baadhi ya mashuhuda wa tukio hilo walisema kuwa Simba huyo ali uawa kufuatia msako mkali ulio washirikisha wananchi na mhifadhi wa wanyama Pori Ahmadi Ally aliye tumwa na Idara yake kuhakikisha kuwa Simba huyo anauawa.

Walisema msako wa Simba huyo ulianza Feb 23 mwaka huu baada ya Simba huyo kuonekana akizunguka katika mitaa ya Kijiji hicho na vijiji jirani na kusababisha hofu kwa wananchi.

Akizungumzia tukio hilo Kaimu Afisa Wanyama pori wa Wilaya hiyo Peter Mtani mbali na kuthibitisha kuwepo kwa tukio hilo alisema kuwa katika kipindi hicho Simba huyo alifanikiwa kuua Ng`ombe 2 Mbuzi 4 na Mbwa 2.

Mtani aliendelea kufafanua kwa kuwataja wamiliki wa Mifugo hiyo kuwa Ng`ombe walikuwa ni mali ya Hasan Mbwana na Mfugaji wa Jamii ya Kisukuma aliyetambulika kwa jina moja la Relesh.

Kuhusu Mbuzi na Mbwa Mtani alisema kuwa walikuwa mali ya  Alli Ngalaisho, Edward Immeni, Peter Hasani,James Ado na Lilasi Said  wote wakiwa niu wakazi wa Kijiji hicho.

Kufuatia tukio hilo Mtani alitumia nafasi hiyo kuwaomba wananchi wanapo waona wanyama wakali kama huyo wawahi kutoa taarifa katika idara yake ili waweze kuchukua hatua kabla hawajasababisha madhara kwao

Mwisho

KAMATI YA KUCHUNGUZA MAUAJI MKOA WA RUVUMA KUWASILISHA RIPOTI YAKE HIVI KARIBUNI

MKUU WA MKOA WA RUVUMA SAID MWAMBUNGU

Na Gideon Mwakanosya, Songea 

KAMATI huru ya kuchunguza vurugu zilizotokea katika Manispaa ya Songea February 22 mwaka huu ambazo zilisababisha vifo vya watu watatu vikiwemo vifo viwili vilivyotokana na kuuwawa kwa kutumia silaha za moto na Askari Polisi iliyoundwa na Mkuu wa Mkoa wa Ruvuma na kupewa kazi ya uchunguzi ndani ya siku saba inatarajia kukamilisha kazi hiyo ya uchunguzi mwanzoni mwa wiki ijayo badala ya jana siku ambayo ilipangwa kuikamilisha.

Akizungumza na mtandao wa www.stephanomango.blogspot.com  jana ofisini kwake Mkuu wa mkoa wa Ruvuma Saidi Mwambungu alisema kuwa ofisi yake mpaka sasa bado haijapokea taarifa ya kamati aliyoiunda  kufanya kazi ya uchunguzi wa kina zaidi kwa lengo la kubaini chanzo na sababu  iliyosababisha na kuwepo kwa vurugu hiyo.

Alieleza zaidi kuwa wakati kamati hiyo inaendelea kufanya kazi yake hali ya utulivu imekuwa ni nzuri na usalama umezidi kuimarishwa zaidi na kwamba kila kata imeweka mikakati ya ulinzi shirikishi ambao kila mkazi wa Manispaa ya Songea anapaswa kushiriki.

Mkuu wa Mkoa wa Ruvuma Mwambungu alifafanua kuwa bado jitihada zinaendelea kufanywa kwa kukutana na viongozi mbalimbali wakiwemo wa mila na watu mashuhuri na wamedhehebu ya dini kwa lengo la kukemea uvumi na imani potofu zinazo sababisha uvunjifu wa amani katika maeneo mbalimbali kwa ustawi wa nchi na amesisitiza kila mwananchi awe na utii wa sheria badara ya kujichukulia sheria mkononi.

Amewataka wakazi wa Manispaa ya Songea kuwa makini katika shughuri zao za kila siku na badara yake waachane na uvumi ambao ndio ulio onekana umesababisha kuwepo kwa vurugu kubwa mjini Songea lakini kwa vile kamati ya uchunguzi ipo tuiachie indelee kufanya kazi.

Mwenyekiti wa kamati ya ulinzi na usalama ya wilaya ya Songea ambaye pia ni Kuu wa wilaya hiyo Thomas Ole Sabaya aliauambia mtandao huu wa www.stephanomango.blogspot.com kuwa tangu majuzi anaendelea kufanya ziara kwenye kata zote 21 kwa ajili ya kuhamasisha wananchi kuweka ulinzi shirikishi kwenye maeneo wanayo ishi .

February 22 mwaka huu kulitokea mauaji ya watu wawili ambao inadaiwa waliuawa kwa kupigwa risasi na Askari Polisi na mwingine mmoja alikufa hapohapo  baada ya kutumbukia kwenye shimo wakati wananchi wenye hasara kufanya maandamano yaliyokuwa na vurugu ambayo yalilazimika yadhibitiwe na chombo cha dola.

Kufuatia kuwepo kwa hali hiyo Askari Polisi wanne walidaiwa kuhusika na mahuaji ya watu wawili walikamatwa na wanaendelea kuhojiwa na Polisi na watu 54 walitiwa mbaroni kwa kufanya maandamano bila kuwa kibali na kusababisha Manispaa ya Songea kutokuwa na amani.

Mwisho.

WALIMU WAMCHARUKIA MWAJIRI WAO WILAYANI TUNDURU

Mkurugenzi wa Halmashauri Wilaya yaTunduru
                 Efraim Ole Nguyaine

Na, Steven Augustino Tunduru

CHAMA cha Walimu Tanzania (CWT) Wilayani Tunduru kimesema kuwa hivi sasa kimeanza kukosa imani na utendaji kazi wa Mkurugenzi Mtendaji wa Halmshuri ya wilaya hiyo ambaye ndiyo mwajiri wa Wanachama wake.

Kauli hiyo imetolewa na Katibu wa Chama hicho Wilayani humo Mwl. Razalo Saulo wakati akiongea na Walimu walioandamana hadi katika ofisi za chama hicho kwa nia ya kukitaka chama hicho kimshinikize mwajiri huyo ili awalipe stahili zao hizo.

Alisema kitendo cha kuchelewa kulipwa kwa madeni hayo kinatokana na Mwajiri huyo kutoonesha nia ya wazi katika ufuatiliaji wa Madai ya Malipo yanayo tokana na Mishahara kutoka hazina huku madeni hayo yakiwa tayari yamekwisha hakikiwa huku kukiwa na taarifa kuwa Wilaya zote zimekwisha lipa madeni hayo.

Akifafanua taarifa hiyo Mwl. Saulo alisema kuwa hadi Chama hicho kinaanza kupoteza imani na Mwajiri huyo Wanachama wake ambao wamekuwa wanaishi maisha ya kubahatisha na kusumbuka kwa muda mrefu wakidai
jumla ya Shilingi Milioni 268,524,643/= kwa Walimu 378 kuanzia mwaka
2008/ 2011.

Mwl. Saulo aliendelea kueleza kuwa awali walimu hao walikuwa wanadai jumla ya Shilingi Milioni 390,879,514/= na kwamba toka walilipwa
Shilingi Milioni 122,354,871 zilizo tokana na Madeni ya Uhamisho,Likizo,Matibabu na Gharama za Masoni juhudi za ufuatiliaji na
upelekaji wa taarifa za madeni ya deni lililo bakia umekuwa ukilegalega hali inayo kitia mashaka chama.

Alisema hayo yamebainika kuwa kila anapo kwenda ofisini kwa ajili ya ufuatilia majibu huwa ni taarifa zote zimekwisha tumwa, huku kukiwa
hakuna maelekezo ya wala takwimu zinazo onesha kuwa madai hayo yametumwa lini na yalitumwa kwanani hali ambayo inaonesha kuwepo kwa ubabaishaji wa utendaji kazi.

Aidha katika taarifa hiyo pia Mwl. Saulo akabainisha kuwepo kwa changamoto Mbalimbali zikiwemo za wanachama wake kuzubaishwa kutokana na kupewa hamisho zinazo tokana na majungu na uonevu wa baadhi ya wakuu wa idara ambao wamekuwa wakitaka kuabudiwa na watumishi walio chini yao hali ambao imekuwa ikiendelea kuisababishia Serikali mzigo wa madeni yasiyo kuwa ya lazima.

Changamoto nyingine iliyo bainishwa na Katibu huyo ni pamaja na wanachama wake kukosa imani na watumishi wa idara inayo simamia na
kutunza nyaraka za watumishi ambao wanadaiwa kuwa wamekuwa na tabia ya kuchomoa baadhi ya taarifa na kufanya kurudiwa mara kwa mara zoezi la uhakiki.

Akijibu kero hiyo Mbele ya Walimu hao Kaimu Mkurugenzi wa Halmashuri ya Wilaya hiyo Mwl. Rashi Mandoa mbali na kukiri kuwepo kwa deni hilo alisema kuwa siyo kweli ofisi yake haishughuliki madai ya walimu wake.

Mwl Mandoa alliendelea kueleza kuwa  hivi sasa Mkurugenzi Mtendaji mwenyewe Efraim Ole Nguyaine yupo Jijini Dar es salaam kwa ajili yua ufutiliaji wa kina ili kulitatua kabisa tatizo hilo na
kuondokana na mgogoro na walimu hao.

Mwisho

MANYANYA (MB) NA MKUU WA MKOA WA RUKWA AFUNGA MAFUNZO YA WAWEZESHAJI KONGANO NCHINI

HOTUBA YA KUFUNGA MAFUNZO YA WAWEZESHAJI KONGANO

Chini ya Pan African Competitiveness Forum – Tanzania Chapter

Tarehe  01.03.2012

Kaimu Mkurugenzi Mkuu wa Tume Sayansi na Teknolojia

Wajumbe wa Kamati ya Taifa ya Kongano Bunifu (Innovative Clusters)

Washiriki Wa mafunzo haya,

Wana habari, Mabibi na Mabwana

Kwanza kabisa napenda kuchukua fursa hii kuwapongeza washiriki wote kwa kutumia muda wenu ilikuweza kushiriki mafunzo haya ambayo yalianza tarehe 27Feb mpaka leo hii tarehe 1March2012. Najua ni jinsi gani unahitajika kiakili ili uweze kupata manufaa yaliyolengwa. Kama nilivyofundishwa mimi, mafunzo haya yanalenga kukuza uwezo wenu katika kuhamasisha na kuanzisha ushirikiano kati ya sekta binafsi, serikali na wanataaluma katika kongano mahsusi kwenye maeneo mbali mbali hapa nchini kwetu. Katika nchi nyingi ushirikiano huu umekuwa kichocheo kikubwa cha  ubunifu ambao husaidia katika kutoa bidhaa zenye viwango na sifa zinazoweza kuhimili ushindani ndani na nje ya nchi.

Ndugu washiriki, nimefahamishwa kuwa mmeshiriki mafunzo haya kwa moyo wote na kuonyesha kuwa mnania na mmedhamiria kutumia ujuzi mlioupata hapa katika kuimarisha kongano bunifu ambazo ziko katika mazingira yenu mnakofanyia kazi.

Nimeambiwa kuwa ofisi ya waziri mkuu ndio ilifungua mafunzo haya hasa kutokana na uhusiano wa karibu ulioko kati ya madhumuni ya kuendeleza Kongano na mikakati iliyoko katika idara ya maendeleo ya sekta binafsi.

Ndugu washiriki wa warsha hii, napenda kuwaambia kwamba kongano bunifu zinauwezo mkubwa wa kupunguza umaskini na kutoa nafasi nyingi za kazi kwa jamii. Vilevile Kongano hizi huleta mahusiano ya karibu sana kati ya wanachama wa kongano na wadau wengine wa maendeleo kama vile  wanataaluma,sekta binafsi na serikali.

Nyie mliofuzu mafunzo haya leo hii nakupewa vyeti,mna majukumu makubwa ya kuhakikisha kwamba lengo la mafunzo haya linafikiwa kwa kujituma kwa vitendo na kushirikiana na wenzenu pindi mtakapo rudi nyumbani. Kama mlivyoona ya kuwa hakuna jambo lisilowezekana, leo hii tunazungumzia mafanikio yanayotokana na kongano la Mwani – Zanzibar na Uhandisi Morogoro. Naamini kuwa katika mafunzo mengine yatakayo fanyika basi tutazungumzuia pia mafanikio ya Kongano zenu.

Ningependa kuwashukuru uongozi wa Tume ya Sayansi na Teknolojia kwa kuwa katika mstari wa mbele katika kuhakikisha Sayansi na Teknolojia inawasaidia wananchi kwa kuendeleza ubunifu nchini. Ni naamini jitihada hizi zimeshaanza kuleta matunda na ni matumaini yangu mafanikio yatakuwa mazuri zaidi na kwa Kongano zote hapa nchini licha ya kuwa na changamoto mblimbali.

Nimefarijika sana kuambiwa kuwa washiriki wa mafunzo haya wanatoka nchi nzima yaani Tanzania Bara na visiwani na zinajumuisha kongano za Asali (Waziri mkuu mdau mkubwa), usindikaji wa mafuta ya alizeti, uhandisi ,Viungo Zanzibar na Kilimo cha samaki(fish farming), useremala,utalii, Uyoga, ufugaji wa kuku, uchongaji wa sanaa(Wood crafts), na useketaji (Handloom Cluster) na kilimo cha mboga mboga.

Ningependa kutoa pongezi kwa wawezeshaji wa mafunzo haya ambao wote ni Watanzania wanaowezesha pia katika nchi zingine kama vile vile Mozambique, Ghana, Nigeria, Senegal na Kenya. Hii inaonyesha kuwa sisi kama waTanzania tunauwezo wa kuiongoza Afrika katika mambo muhimu ambayo yanalenga kutatua tatizo kubwa la umaskini.Naamini kila mtu ameelewa na kuwatumia wataalamu wetu vizuri.

Kutokana na kuwa Watanzania ndio wawezeshaji wakuu wa Maswala ya Kongano Afrika basi tuna kila sababu ya kuwa mstari wa mbele kwa bara zima la Afrika katika kuonyesha umuhimu wa Kongano kwa kuonyesha ni jinsi gani zimesaidia katika kuongeza pato la taifa, ajira na maendeleo ya jamii na uchumi.

Najua mmetoka hapa na mpango kazi ambao mtawashirikisha wadau wote wa kongano katika kutekeleza mpango kazi huo.

Bila ya kupoteza muda, ningependa kuwatakia safari njema ya kurudi nyumbani na vilevile kazi njema ya kuendeleza kongano bunifu na kuonyesha matokeo ya mafunzo haya mliopata kwa siku nne.

Sasa napenda kutamka rasmi kuwa Mafunzo haya ya wawezeshaji wa Kongano Bunifu yamefungwa rasmi.

ASANTENI KWA KUNISIKILIZA


Mgeni rasmi Mhandisi Stella Manyanya (Mb) na Mkuu wa Mkoa wa Rukwa akimpatia cheti cha ushiriki wa Mafunzo ya Wawezeshaji Kongano mmiliki wa mtandao wa www.stephanomango.blogspot.com, Stephano Mango, kushoto Kaimu Mkurugenzi Mkuu wa Tume ya Sayansi na Teknolojia Dk Dugushilu Mafunda, wa kwanza toka kulia ni Mwezeshaji Kongano Dk Flower Msuya, wa pili Mhandisi Peter Chisawilo kabla ya kufungwa kwa mafunzo hayo



Washiriki wa Mafunzo ya Wawezeshaji Kongano wakifuatilia maelekezo mbalimbali kutoka kwa wakufunzi wa mafunzo hayo

Washiriki wakifuatilia mafunzo hayo

HOTUBA YA KUFUNGA MAFUNZO YA WAWEZESHAJI KONGANO

Chini ya Pan African Competitiveness Forum – Tanzania Chapter

Tarehe  01.03.2012

Mheshimiwa Mkuu wa Mkoa wa Rukwa (Engineer Stella Manyanya) 

Wajumbe wa Kamati ya Taifa ya Kongano Bunifu (Innovative Clusters)

Washiriki Wa mafunzo haya,

Wana habari, Mabibi na Mabwana

Kwanza kabisa kwaniaba ya mkurugenzi mkuu  na Uongozi wote wa tume ya sayansi na teknolojia, napenda kutoa shukrani za dhati  kwako kwa kuamua kuja kwako. Hii inaonyesha jinsi unavyotilia mkazo kwa vitendo maendeleo ya Kongano bunifu hapa nchini. Ni jambo la kufurahisha sana kuona kwamba umeweza kupata muda wa kujumuika nasi hapa leo na kukubali kufunga mafunzo yetu.

Mbele yako ni wanawarsha  46 waliokuwa katika mafunzo ya kuwa wawezeshaji wa Kongano. Wanawarsha hawa wanatoka sehemu mbalimbali hapa nchini ambako kuna kongano ambazo zinahitaji kuendelezwa. Naamini madhumini ya mafunzo haya kwako si kitu kipya kwani na wewe ulipata nafasi ya kushiriki katika mafunzo ya kwanza. Kongano zinazotegemewa kuendelezwa katika mafunzo haya ni 26.

Mafunzo haya yameandaliwa na tume ya sayansi na teknolojia kwa kushirikiana na PACF –Tanzania. Mafunzo haya yalianza tarehe 27Feb2011 na yanamalizika leo  1March2012.

Tunashukuru  sana ufadhili wa wenzetu wa Sweeden(SIDA) kwa kutuwezesha kufanikisha swala hili ambalo tunaamini litasaidia katika kuendeleza ubunifu na kuleta maendeleo kijamii na kiuchumi.

Kwakuwa wewe ni mdau mkubwa katika Kongano na vilevile ni mjumbe wa Kamati ya Maendeleo ya Kongano hapa nchini aamini kuwa unamengi ya kutuelekeza.

 Bila ya kupoteza muda, napenda kuchukua nafasi hii kukukaribisha kutoa vyeti vya wahitimu wa mafunzo haya, kutuambia machache na mwisho kufunga mafunzo haya.

Karibu Mheshimiwa.

WANANCHI WA KIHAGARA WAIOMBA WIZARA YA AFYA IWASAIDIA KUJENGA KITUO CHA AFYA

Na Gideoni Mwakonosya , Songea

WANANCHI wa kata ya Kihagara Wilayani Nyasa Mkoa wa Ruvuma wameiomba Serikali kupitia Wizara ya Afya na Ustawi wa Jamii kuona umuhimu wa kuwasaidia shughuli za ujenzi wa kituo cha afya ambapo kwa awamu ya awali wamefyatua tofari za kutosha na ambazo zimesha chomwa na eneo linalotarajia kujengwa kituo hicho tayari mawe na mchanga wa kujengea ulishapelekwa.

Akizungumza na wananchi kwenye mkutano wa hadhara Kaimu Afisa Mtendaji wa kata ya Kihagara Jackobo Yela alisema kuwa januari mwaka jana ajenda ya ujenzi wa kituo cha afya cha kata ya Kihagara ilipitishwa katika kikao cha Kamati ya Maendeleo ya Kata hiyo na kuadhimia kufyatua tofari na kuzichoma haraka iwezekanavyo .

Alieleza zaidi kuwa tofari 375,000 zilifyatuliwa na kuchomwa kati ya tofari 500,000 zilikuwa zikihitajika na Halmashauri ya Wilaya ya Mbinga iliombwa na ikaridhia kuanza ujenzi wa kituo mara moja kwa kuchimba msingi na kupeleka Tani 210 za mawe na Tani 112 za mchanga kwenye eneo hilo.

 Alisema kuwa wananchi wa vijiji vya Tumbi, Ngehe, Mango, Songambele  na Kihagara wameiomba Serikali uwezekano wa kuwasaidia ujenzi wa kituo hicho kwani wakazi wa maeneo hayo wamekuwa wakitegemea kupata matibabu katika Hospitari za Liuli, Litembo na Mbinga mjini amabako ni mbali sasa na kata hiyo.

Mbunge wa Jimbo la Mbinga Magharibi Kapteni John Komba baada ya kupata taarifa hiyo aliamua kutoa fedha milioni tatu ili kusaidia ujezi wa kituo hicho ambacho alieleza kuwa ujenzi wa kituo hicho ukikamilia utakuwa ni msaada mkubwa kwa wakazi wa maeneo ya mwambao wa Ziwa Nyasa .

Aliwahimiza wananchi wa Kata hiyo kuhakikisha kuwa shughuli za ujenzi wa kiutuo hicho zinakamilika haraka iwezekanavyo ili kuondokana na tatizo lililopo la kwenda mbali kupata matibabu jambo ambalo limekuwa ni kero kubwa.

Mwisho.

DEREVA WA ROLI ALIYEFAHAMIKA KWA JINA LA KATWILA ASAKWA NA POLISI KWA KUSABABISHA KIFO CHA DEREVA YEBOYEBO

KAMANDA WA POLISI MKOA WA RUVUMA MICHAEL KAMUHANDA

Na Gideon Mwakanosya, Songea

JESHI la polisi Mkoani Ruvuma linamsaka Dereva aliyefahamika kwa jina moja la Katwila aliyekuwa akiendesha gari lililokuwa likitoka Songea mjini kwenda Dar es salaam ambalo limedaiwa kuigonga pikipiki na kusababisha kifo cha mwendesha pikipiki hapohapo katika eneo la Bombambili Manispaa ya Songea.

Kamanda wa polisi mkoa wa Ruvuma Michael Kamuhanda amemtaja aliyekufa kuwa ni Yassin Ally (32) ambaye ni mfanya biashara maarufu Songea Mjini na ameeleza kuwa tukio hilo lilitokea juzi saa 12:00  jioni huko katika eneo la bombambili kwenye barabara itokayo Songea kuelekea Njombe.

Amefafanua zaidi kuwa gari hilo lenye namba za usajili T 707 AJA aina ya Skania ambalo lilikuwa lina tela lake lenye namba T 719 AHL ambalo lilikuwa likiendeshwa na Katwira ambaye alitoroka pasipojulikana mara tu baada yakutokea ajali hiyo.

Amesema kuwa gari hiyo inadaiwa kuwa iliigonga pikipiki yenye namba za usajili T 369 ARQ aina ya Sanlg iliyokuwa ikiendeshwa na Yassini Ally ikitoka Msamala kwenda Songea mjini na kumsababishia kifo chake hapohapo.

Kamuhanda amesema kuwa kwa sasa hivi polisi inaendelea kumsaka Dereva huyo na kwamba mara atakapo patikana taratibu zitaandaliwa za kumpeleka mahakamani ili kuweza kujibu mashtaka yatakayo mkabili na chanjo cha ajali hiyo inadaiwa kuwa ni mwendo kasi wa roli hilo ambalo lilimsababishia dereva kushindwa kumudu msikani wa roli hilo.

Mwisho.

WAHUKUMIWA KUTUMIKIA KIFUNGO CHA MIAKA 11 JERA

Na, Augustino Chindiye Tunduru

MAHAKAMA ya hakimu mkazi mfawidhi wa Wilaya ya Tunduru Mkoani Ruvuma imewahukumu watu wawili kutumikia kifungo cha miaka 11 jela baada ya
kupatikana na hatia katika matukio tofauti ya wizi.

Akitoa hukumu hizo kwa nyakati tofauti Hakimu wa Mahakama hiyo Geofrey Mhioni alisema kuwa anatoa adhabu hiyo baada ya Mahakama hiyo kuridhishwa na ushahidi uliotolewa na upande wa walalamikaji.

Waliohukumiwa kutumikia adhabu hiyo ni Michael Lukas (31) aliyehukumiwa kutumikia  kifungo cha miaka 5 jela baada ya kupatikana na hatia katika  Shauli la Jinai Namba 119/2011 la tuhuma za wizi wa kuaminiwa kinyume na kifungu namba 273 (B) cha sheria.

Katika shauri hilo Lukas alikuwa anatuhumiwa kuiba Pikipiki yenye namba za usajiri T175 BQU mali ya Said Yasini ambaye alimuazima kwa madai ya kutaka kumpeleka mkewe katika hospitali ya Misheni ya
Mbesa kwa ajili ya kupatiwa matibabu na kwenda kuiuza kwa Shilingi 800.000 katika kijiji cha Londo Mkoani Lindi.

Akifafanua hukumu hiyo Mhini alisema kuwa katika kuonesha nia mbaya mtuhumiwa huyo pia alishirikiana na Mtu aliye muuzia na kufaniliwa kubadilishwa namba za usajiri wa pikipiki hiyo kuwa nmaba
T434 BEE .

Katika tukio la pili aliyehukumiwa na mahakama hiyo ni Salm haji (29) aliye kuwa anakabiliwa na shauli la Jinai namba 153/201 na kupatinana na  hatia katika makosa ya Kuvunja nyumba kinyume na Sheria namba 294
(2)cha kanuni ya adhabu  sura ya 16.ambapo alikiri kosa hili alihukumiwa kutumikia kifungo cha miaka 6 jela na kosa la wizi kinyume na kifungu namba 265  pamoja na kifungu cha 258 cha kanuni ya adhabu kosa ambalo alihukumiwa kifungo cha miaka 5 jela na kuelezwa kuwa
adhabu zote zinaenda kwa pamoja.

Awali akiwasomea mashauri hayo Mwendesha mashtaka mkaguzi msaidizi wa Polisi ASP Alfred Kasolo alisema kuwa Mtuhumiwa Lukasi alifanya kosa
hilo Septemba 12/2011 huku mtuhumiwa wa shauli la jinai namba 153 /2011
Haji yeye alitenda kosa hilo Nov 12 2011 ambapo alivunja na kuiba
mali yenye thamani ya Shilingi 126,0000 katika nyumba ya  George
Komba.

Mbali na kutokuwa na kumbukumbu za  makosa ya nyuma kwa watuhumiwa hao
baada ya mahakama kuwatia hatiani ASP Kasolo aliiomba mahakama hiyo
kutoa adhabu kali ili iwe fundisho kwa watu wengine wenye tabia za
aina hiyo.

Wakitoa utetezi wao kabla ya kupewa kwa adhabu hiyo watuhumiwa hao kwa
nyakati tofauti Haji aliiomba mahakama hiyo impatia adhabu ndogo
kutokana na afya yake kusumbuliwa na kifua kikuu, huku mtuhumiwa Lukas
akiomba aonewe huruma kutokana na kusumbuliwa na vidonda vya tumbo.

Mwisho

MAFUNZO YA WAWEZESHAJI WA UJASIRIAMALI KANDA YAANZA KATIKA UKUMBI WA THE BEACH COMBER HOTEL JIJINI DAR ES SALAAM YAANZA ASUBUHI HII

 Mkurugenzi Mtendaji wa Tanzania Commission For Science And Technology DKT, Dugushilu Mafunda akiwakaribisha washiriki kutoka Tanzania Bara na Tanzania Visiwani katika ukumbi wa mafunzo wa The Beach Comber Hotel

 Mwasisi wa Kongano la Ujasiriamali Tanzania Profesa Burton Mwamila akimkaribisha mgeni rasmi ili aweze kufungua mafunzo hayo ya siku nne ambayo yanaanza Februari 27 hadi machi 1 mwaka huu

                        Washiriki wa mafunzo hayo wakiendelea na darasa

Washiriki wa Mafunzo ya Cluster Facilitator wakiwa kwenye picha ya pamoja baada ya ufunguzi wa mafunzo hayo

CHAMA KIKUU CHA USHIRIKA WA WAKULIMA WILAYA YA TUNDURU KIMEELEMEWA NA MZIGO WA MADENI

Na,Steven Augustino Tunduru

WAKATI Makampuni ya Wanunuzi wa Korosho Nchini wakiendele kutunishiana misuli na Serikali Chama Kikuu cha Ushirika wa Wakulima wa Wilaya ya Tunduru (TAMCU) kimekiri kuelemewa na mzigo wa Madeni ya Wakulima yaliyotokana na Chama hicho kununua Korosho za Wakulima wa
zao hilo.

Hayo yameeelezwa na Meneja wa Chama hicho Imani Kalembo wakati akitoa taarifa kwa Mkuu wa Wilaya ya Tunduru Juma Madaha wakati wa kikao cha pamoja na Wadau wa Kilimo na viongozi wa Vyama vya Siasa .

Katika taarifa yake, Meneja huyo alifafanua kuwa hadi sasa chama hicho kupitia vyama vikuu vya Ushirika vya wakulima wa zao hilo kinadaiwa Jumla ya Shilingi Bilioni 2,441,870,350 .

Taarifa hiyo iliendelea kueleza kuwa fedha hizo zimetokana na chama hicho kununua jumla ya Kilo 6,976,821 ambazo Chama hicho kupitia vyama vya msingi vimeweza kuzilipia kwa asilimia 70% pekee .

Alisema sambamba na Deni hilo pia Tamcu bado inakabiriwa na deni la Shilingi Milioni.608,260,000 zilizo tokana na Mkopo wa  kilo 506,855 za Korosho za zilizo kopeshwa na wakulima kwa vyama vya Msingi .

Kalembo aliendelea kueleza kuwa wakati hayo yakiendelea Chama hicho pia  kinakabiliwa na changamoto ya Chama kushindwa kununua jumla
ya kilo 86,324 zenye thamani ya Shilingi Milioni 17,264,800 ambazo bado zipo mikononi mwa wakulima wa zao hilo hali inayo endelea
kuwakatisha tamaa ya kuendelea na kilimo hicho.

Akizungumzia hali uzalishaji wa zao hilo katika Msinu wa mavuno wa
mwaka 2011/2012,Kalembo alisema kuwa Takwimu za manunuzi na Korosho
zilizopo mikononi mwa wakulima zinazonesha kuwa Jumla ya Kilo 7,570,000
zilizalimwa katika kipindi hicho.

Akizungumzia madhara yaliyo sababishwa na mgomo wa  Makampuni ya Wanunuzi zao hili Mkuu wa Wilaya hiyo Juma Madaha aliwataka wakulima kupitia wadau hao kuwa na uvumilivu wakati Serikali ikitafuta
suluhisho la kudumu la soko la mazao hayo.

Mwisho

MADEREVA YEBOYEBO WAMTEMEA NYONGO RC MWAMBUNGU RUVUMA

                              MKUU WA MKOA WA RUVUMA SAID MWAMBUNGU

Na Kassian Nyandindi, Songea

MADEREVA wanaoendesha pikipiki maarufu kwa jina la 'yeboyebo' katika Manispaa ya Songea mkoani Ruvuma, wamemlalamikia mkuu wa mkoa huo Said Mwambungu wakisema kuwa chanzo cha machafuko na mauaji ya raia wawili waliopigwa risasi na askari polisi, yametokana na jeshi hilo kupuuza taarifa za uhalifu zilizokuwa zikitolewa na wakazi wa manispaa hiyo.

Malalamiko hayo yalitolewa na madereva hao kutokana na vifo vingi vinavyojitokeza katika manispaa hiyo wengi wanaouawa ni wao, walipokuwa wakizungumza katika kikao kilichoitishwa na mkuu wa mkoa huo kwa lengo la kujenga ushirikiano baina ya serikali na madereva hao ili machafuko yaliyotokea hivi karibuni yasiweze kuendelea.

Akichangia hoja katika kikao hicho mmoja kati ya madereva hao  Bonventura Njogopa, alisema kuwa mara nyingi askari polisi wapelelezi wamekuwa wakikaa vijiweni katika maeneo ya mjini na kuwafuatilia madereva hao kwa madai kwamba wanajihusisha na vitendo vya ujambazi wakati sio kweli badala yake walimweleza Bw. Mwambungu kuwa askari hao ni vyema muda mwingi wawe wanazunguka pembezoni mwa mji ambako mara nyingi wamekuwa wakijificha majambazi.

"Mheshimiwa mkuu wa mkoa askari wako wapelelezi wanatuambia sisi ndio chanzo cha kuwepo kwa majambazi, hii si kweli sisi ni raia wema tunachohitaji waache kukaa muda mwingi vijiweni hapa mjini badala yake wawe wanazunguka na sehemu zingine katika mji wetu wa songea ambako ndiko wahalifu wengi wanajificha", alisema Njogopa.

Naye Ali Omary alisema kwa muda mrefu polisi wamekuwa wakiwataka wao kama madereva wa pikipiki ambao huzunguka katika maeneo mbalimbali, kujenga ushirikiano na jeshi hilo kwa kutoa taarifa kwa njia ya simu au vinginevyo pale wanapobaini kuna dalili za uhalifu mahali fulani, lakini pamoja na wao kujitahidi kufanya mawasiliano na askari hao wamekuwa wakipuuzwa.

"Tunaiomba serikali yako hususani hawa polisi wakamate majambazi, lakini pia waache habari za kutuumiza sisi madereva wa pikipiki kwa kutupiga ovyo", alisema.

Pia walimweleza mkuu huyo wa mkoa kwamba askari wa usalama barabarani na polisi wa kawaida wote kwa pamoja wamekuwa wakijihusisha na ukamataji wa pikipiki jambo ambalo linawafanya washindwe kutambua nani hasa anapaswa kukagua vyombo hivyo vya moto.

Walielekeza malalamiko yao kwa mkuu wa usalama barabarani (RTO) mkoani Ruvuma  Sebastian Mtaki wakisema kuwa wanapotoa taarifa kwake, juu ya vitendo hivyo vinavyofanywa na askari wake hupuuzwa na hakuna hatua zinazochukuliwa.

"Utakuta pikipiki inakamatwa na kupelekwa kituoni, unapotakiwa kwenda kulipa faini ya makosa yako tunaambia tumfuate askari fulani kwenye baa fulani, je mkuu huu ndio utendaji halali wa kazi au ni ofisi zao binafsi", walihoji.

Kwa upande wake akijibu hoja hizo mkuu wa mkoa wa Ruvuma Mwambungu alisema kimsingi atafuatilia malalamiko yao na kuyafanyia kazi haraka na kwamba aliwataka kuheshimu sheria na taratibu zilizowekwa ili kuepuka uwezekano wa uvunjifu wa amani kama ilivyojitokeza siku mbili zilizopita.

Hata hivyo aliongeza kuwa ofisi yake imekwisha unda tume ya watu nane ambayo itachunguza machafuko na mauaji ya raia yaliyojitokeza mjini Songea na kutoa majibu kwake kwa kippindi cha siku saba zijazo.

MWISHO.

WAANDISHI WA HABARI MKOA WA RUVUMA KUENDELEA NA MAFUNZO YA UANDISHI WA HABARI ZA UCHUNGUZI

 Mwezeshaji wa Mafunzo ya uandishi wa habari za uchunguzi Fili Karashani

 Mwenyekiti wa Chama cha waandishi wa habari mkoa wa Ruvuma Andrew Kuchonjoma akifuatilia mafunzo hayo ya siku tano yaliyoanza Februari 22 na kumalizika februari 27, yaliyofadhiriwa na Muungano wa Vyama vya Waandishi wa Habari Mikoani(UTPC) na kuhudhuria na waandishi 22

 Kutoka kushoto ni Alpius Mchucha (Habari leo), Christian Sikapundwa (Mhariri Tujifunze) Cresencia Kapinga (Majira) Joyce Joliga ( Mwananchi) Judith Lugome (Tujifunze)

 Christian Sikapundwa (Mhariri Tujifunze) Cresencia Kapinga (Majira)

 Joyce Joliga ( Mwananchi) Judith Lugome (Tujifunze)

 Kutoka kushoto Kassian Nyandindi (Majira) Thomas Lipuka (Jambo Leo) Ngaiyona Nkondora (Radio Free/Star Tv, Ngerangera

 Ngaiyona Nkondora (Radio Free/Star Tv na Jofrey Nilai (Radio Maria)

 Thomas Lipuka akisisitiza jambo wakati wa mafunzo hayo

Kutoka kushoto ni Gerson Msigwa(TBC) Julius Konala (Tanzania Daima) Ngerangera Senior, Muhidin Amri (Majira) Jackline Claver (Radio Maria)

ASKARI WANNE WAHOJIWA KWA KUSABABISHA MAUAJI YA WATU WATATU

 KAMANDA WA POLISI MKOA WA RUVUMA MICHAEL KAMUHANDA

 ASKARI WAKITULIZA GHASIA JANA

Mmoja wa marehemu aliyeuawa kwa kupigwa risasi na Polisi

Na, Stephano Mango ,Songea

VURUGU zilizojitokeza wakati wa maandano ya amani ya wananchi wenye hasira kali katika Halmashauri ya Manispaa ya Songea Mkoani Ruvuma zimesababisha hasara kubwa ya mali zenye thamani ambayo haikufahamika mara moja na kwamba katika sakata hilo Askari  Polisi wanne wanashikiliwa na Jeshi la Polisi kwa tuhuma za kuwapiga risasi za moto watu wawili ambao wamefariki kwenye maandamano hayo

Akizungumza na waandishi wa habari jana ofisini kwake Kamanda wa Polisi wa Mkoa wa Ruvuma Michael Kamuhanda alisema kuwa hali ya mji kwa sasa hivi ni tulivu na hatua mbalimbali za kiusalama zinaendelea kuimarishwa ili wananchi waendelee na shughuli zao za kila siku

Kamuhanda alisema kuwa kwenye vurugu hizo watu 54 walikamatwa na wamefikishwa Mahakamani kujibu tuhuma za kufanya maandamano bila kibali na kusababisha uvunjifu wa amani katika maeneo mbalimbali ya mji wa Songea na vitongoji vyake

Alisema kuwa Askari Polisi waliohusika na kupiga risasi raia kwa sasa wanahojiwa na Jeshi hilo ili kupata uhalali wa kutumia risasi za moto katika tukio la maandamano yaliyofanyika jana na kwamba ikidhibitika kuwa walifanya uzembe watachukuliwa hatua za kisheria

Alieleza zaidi kuwa wananchi wakiwa kwenye maandamano hayo walivamia Ofisi za Chama cha Mapinduzi Manispaa ya Songea  na Chama cha Mapinduzi Wilaya ya Songea Vijijini walipiga mawe milango na kisha kuchoma bendera na kuleta hasara za mali nyingine za chama hicho, walivamia Ofisi ya Mkuu wa Wilaya ya Songea na Ofisi ya Mkuu wa Mkoa wa Ruvuma,walivamia  Ikulu ndogo walipiga mawe, walivamia Kituo cha Polisi na kupiga mawe na kuharibu baadhi ya magari ya wananchi

Alieleza kuwa waandamanaji walirusha mawe hovyo na kuwajeruhi wananchi wenzao, kufunga barabara kwa kutumia mawe makubwa, magogo na kuchoma mataili moto ili gari zinazoingia na kutoka nje ya mji zisiweze kuendelea na safari zake pia waandamanaji walivamia gari la Polisi na kuanza kurusha mawe na kusababisha Askari waanze kujihami kwa kurusha mabomu ya machozi

Alifafanua kuwa fujo hizo zinadaiwa kuwa zimetokana kwa sababu wananchi wamekuwa wakilalamikia matukio mfululizo wa mauaji mbalimbali likiwemo la mwendesha Pikipiki aliyeuawa februari 22 mwaka huu majira ya 2 asubuhi huko katika eneo la mto Matarawe, kuwa Jeshi la Polisi halichukui hatua ya kuwadhibiti wauaji hao

Kwa upande wake Mkuu wa Wilaya ya Songea Thomas Oley Sabaya alisema kuwa baada ya kutokea matukio hayo ameitisha viongozi wa Serikali za mitaa ya yote na kuwapa maagizo kuwa kuanzia sasa ulinzi shirikishi unatakiwa kuanza kwa kasi zaidi na kwamba kama kunawatu wanajihusisha na mambo ya uhalifu wajisalimishe haraka kwenye vyombo vya dola badala kusubiri wakamatwe

Naye Mkuu wa Mkoa wa Ruvuma Said Mwambungu amelaani kitendo kilichotokea juzi ambacho amesema sio cha kawaida hivyo kufuatia tukio hilo ameunda tume huru ya watu nane ambayo itafanya kazi ya siku saba ya kuchunguza kwa kina juu ya hali iliyojitokeza juzi mjini Songea na ripoti inapaswa kuwasilishwa arahamisi ijayo asubuhi ofisini kwake na kwamba hiyo tume inahusisha vyombo vyote vya dola

Baadhi ya wananchi wameiomba Serikali ichukue hatua za haraka kudhitibi hali iliyojitokeza juzi ambapo watu wawili waliuawa kwa kupigwa risasi na Polisi wakati wa wenye hasira kali walipokuwa wakipita mitaani kufanya vurugu huku wakidai kuwa Jeshi la Polisi limeshindwa kufanya kazi na mwingine kufa baada ya kutumbukia kwenye shimo na Pikipiki wakati wa vurugu hizo

 Wananchi hao ambao ni wakazi wa maeneo ya Mfaranyaki, Majengo, Bombambili na Mjini ambao wameomba majina yao yahifadhiwe walisema kuwa hali iliyojitokeza juzi haikuwa ya kawaida hivyo ni vyema Serikali ikatafuta njia muafaka ya kudhibiti chanzo cha vurugu badala ya kujishughulisha na kuzuia maandamano ya amani ya wananchi na kwamba thamani yake haikuweza kufahamika mara moja

MWISHO

MTOTO MCHANGA AOKOTWA NA MSAMALIA MWEMA AKILIA MSITUNI

Na,Steven Augustino,Tunduru

MTOTO mchanga anayekadiliwa kuwa na umri wa wiki moja au mbili kameokotwa baada ya kutelekezwa na mama yake mzazi na kukomea kusiko julikana

Taarifa kutoka kwa msamalia mwema aliyemuokota kichanga hicho Halima
Chalamanda alisema kuwa kabla ya tukio hilo alisikia Sauti ikitokea
katika vichaka vya Msitu uliokuwa kambi iliyofungwa ya Jeshi la Wananchi wa JWTZ wakati akielekea Shambani katika kijiji cha Namsalau.

Alisema kuwa baada ya kusikiliza kwa makini aligundua kuwa sauti ya kitoto
hicho ikitokea vichakani  hali iliyo msukuma kuingia katika msitu huo na kumkuta akiwa peke yake na kuamua kumchukua.

Chalamanda aliendelea kufafanua kuwa baada ya kumuokota mtoto huyo alichukua uamuzi wa kumpeleka katika Kituo kikuu cha Polisi kilichopo Mjini hapa na baadae akaelekezwa kumpeleka katika Hospitali ya Serikali ya Wilaya hiyo kwa ajili ya uchunguzi.

Akizungumzia hali ya  Mtoto huyo, Mganga wa Hospitali ya Serikali ya Wilaya hiyo Dkt. Goerge Chiwangu alisema kuwa hali ya mtoto huyo ilikuwa ni dhaifu sana lakini baada ya Msamalia huyo ambaye pia
analea Mtoto mchanga kumsaidia kwa kumnyonyesha Maziwa na kupatiwa hudumu za matibabu hali yake imeendelea kuimarika.

Alisema baada ya uchunguzi pia maafisa tabibu waligundua kuwepo kwa vidonda sehemu mbalimbali za mwili wake vilivyo sababishwa na  kukaa polini kwa muda mrefu hali iliyo wafanya wadudu kuanza kumshambulia sehemu mbalimbali za mwili wake.

Dkt. Chiwangu alieendelea kueleza kuwa kutokana na mtoto huyo kukosa mtu ayemtambua ofisi yake kwa kusaidiana na idara ya Ustawi wa Jamii
Wilayani humo wanampango wa kumpeleka katika Kituo cha Kulelea Watoto
Yatima kilichopo katika Hospitali ya Missioni ya Mbesa ili alelewe
huko na Watoto wengine.

Wakiongea kwa nyakati tofauti Afisa ustawi wa jamii wa Wilaya hiyo
Alto Philipo na Mlezi wa Watoto yatima Katika Kituo cha Mbesa Mchungaji Ignas Nchimbi walisema kuwa hilo ni tukio la kwanza la mama kutupa mtoto mchanga Wilayani humo toka Kituo cha kulelea Watoto yatima kifunguliwe mwaka 1960.

Akizungumzia hali ya Watoto wanao lelewa katika kitu hicho Mchungaji Nchimbi alisema kuwa kituo hicho chenye Watoto 27, kichanga hicho kitakuwa cha 28 na kwamba hali ya kituo ni nzuri.

Kamanda wa Polisi wa Mkoa wa Ruvuma Michael Kamuhanda mbali na kuthibitisha kuwepo kwa tukio hilo amesema kuwa jeshi hilo linaendelea na uchunguzi na kwamba sheria itafuta mkondo wake endapo mtuhumiwa atabainika.

Mwisho

SONGEA YAGEUKA UWANJA WA MAPAMBANO KATI YA POLISI NA WANANCHI

MADEREVA PIKIPIKI WAKIWA WAMEFUNGA BARABARA YA SONGEA KWEWNDA TUNDURU KARIBU NA MLANGO WA KUINGILIA OFISI YA MKUU WA MKOA WA RUVUMA

Polisi wakiwatawanya na kuwakamata baadhi ya waandamanaji hao katika manispaa ya Songea baada ya wakazi wa manispaa hiyo wengi wao wakiwa madereva wa pikipiki kuandamana hadi ofisi ya kamanda wa polisi mkoa wa Ruvuma kupinga mauaji ya watu yanayoendelea kwa kasi mjini humo ambao hadi sasa jeshi la polisi halijafanikiwa kuwakamata wauaji.

 Polisi wakiwa katika mishemishe za kutuliza fujo na kujeruhi raia

Mama ambaye hakufahamika jina lake mara moja akiwa anaokotaa vipande vya taa ya gari yake baada ya kujeruhiwa katika vurugu hizo

Na Stephano Mango,Songea.

WATU watatu wamefariki dunia na idadi kubwa ya watu wanadaiwa kujeruhiwa kutokana na hali tete iliyozuka katika mji wa Songea mkoani Ruvuma, baada ya mamia ya wananchi na madereva wa pikipiki maarufu kwa jina la yeboyebo, kuandamana kuelekea kituo kikuu cha polisi na ofisi ya mkuu wa mkoa huo, wakipinga mauaji ya raia ambayo yameshamiri katika mji huo.

Kufuatia maandamano hayo kushika kasi katika mji huo, jeshi la polisi lililazimika kuingilia kati kwa kuanza kupiga mabomu ya machozi na risasi za moto hewani ikiwa ni lengo la kuwatawanya raia hao wasiendelee kuleta vurugu.  

Wakati mabomu na risasi hizo zikipigwa, ghasia za hapa na pale zilianza kujitokeza baadhi ya wananchi wakirusha mawe kuelekea kituo kikuu cha polisi na wengine wakipaza sauti wakielekeza lawama kwa jeshi hilo kwamba limeshindwa kudhibiti mauaji hayo.

Vurugu hizo zimesababisha ofisi za serikali na taasisi binafsi mkoani Ruvuma kufungwa kwa muda yakiwemo maduka na huduma za kifedha katika mabenki zimesimama kwa muda.

Huduma za usafiri katika stendi kuu ya mabasi yaendayo mikoani nazo zimesimama huku madereva wa mabasi na abiria wakikimbia kujificha kwa lengo la kuepukana na mabomu ya machozi na risasi za moto zilizokuwa zikipigwa hewani.

Pia huduma za matibabu katika hospitali ya mkoa huo nazo zimesimama kwa muda baada ya walinzi wa hospitali hiyo kufunga lango kuu kutokana na raia wengi walikuwa wakikimbilia huko wakiepukana na mabomu yaliyokuwa yakipigwa hewani.

Matukio ya mauaji katika mji wa songea yalianza kujitokeza mapema mwezi Novemba mwaka jana yakiendelea hadi sasa, ambapo kila baada ya siku kadhaa watu walikuwa wanauawa katika mazingira ya kutatanisha huku miili ya marehemu ikikutwa imejeruhiwa vibaya.

Watu tisa wameuawa katika mji huo tokea matukio ya mauaji yaanze kujitokeza katika mji wa Songea huku miili mingine ikiokotwa bila kuwa na sehemu za siri na kwamba watuhumiwa wanne wanaodaiwa kuhusika na mauaji hayo wanashikiliwa na polisi.

Watuhumiwa wanaoshikiliwa na jeshi la polisi ni Johari Kassim (16), Onesmo Hinju (14), Samason Haule (22) na Mussa Fuala (20) wote wakazi wa mtaa wa Lizaboni mjini Songea.

Pamoja na mambo mengine mpaka habari hizi zinaingia mitamboni Kamanda wa polisi mkoani Ruvuma hawakuweza kupatikana kuzungumzia sakata hilo huku simu zake zikiwa zimefungwa na askari polisi mjini hapa wakiendelea kupiga mabomu ya machozi, kwa lengo la kutawanya watu.

Uchunguzi uliofanywa na mtandao wa www.stephanomango.blogspot.com umebaini kuwa vurugu hizo zimetokana na  wananchi hao kutokuwa na imani kwa Jeshi hilo kwa madai kwamba  halifanyi kazi yake ipasavyo katika kusaka majambazi na watu wengine wanaojihusisha na vitendo hivyo viovu badala yake nguvu kubwa wanaitumia katika kusaka na kukamata pikipiki zinazodaiwa kuwa na makosa

Vurugu hizo zilitokea jana baada ya wananchi hao wenye hasira kali kuona mauaji hayo yakizidi kuendelea siku hadi siku jambo ambalo liliwafanya waanze kufanya maandamano yenye lengo la kuilalamikia serikali kutokana na siku hiyo ya tukio kuokota mwili wa mtu mmoja ambaye anadaiwa kuwa ni muendesha pikipiki akiwa ameuwawa na watu wasiofahamika hali iliyowafanya wananchi hao walifuatilie gari la Polisi ambalo lilifika kuchukua mwili wa marehemu huyo ambaye jina lake halikuweza kufahamika wakati wakiiupeleka kwenye chumba cha kuhifadhia maiti katika Hospitali ya Mkoa Songea ambako vurugu hizo zilianzia

Wakizungumza kwa nyakati tofauti na mtandao wa www.stephanomango.blogspot.com  baadhi ya wananchi Mkoani humo wamedai kwamba tangu matukio haya yaanze kutokea Jeshi hilo halijachukua hatua ya kupita kila kata  kwa lengo la kutoa Elimu kwa wananchi hususani kwenye maeneo ambayo yamekumbwa na mkasa huo na kuongea na wananchi wake.

Akizungumza kwa njia ya simu Mkuu wa Mkoa wa Ruvuma Said Mwambungu alisema kuwa kitendo cha wananchi kuleta vurugu sio cha kushabikia hivyo aliwataka wananchi  kutoa ushirikiano kwa Jeshi hilo katika kuwafichua watu wanaojihusisha na vitendo hivyo viovu kwa kuwa watu hao wanaishi katika jamii na kudai kwamba Jeshi peke yake bila ya kupata ushirikiano toka kwa raia wema haliwezi kufanya kazi yake ipasavyo.

MCHIMBAJI WA MADINI YA VITO AFARIKI BAADA YA KUDONDOKEWA NA KIFUSI

Na, Augustino Chindiye Tunduru
MCHIMBAJI wa madini ya Vito katika eneo la machimbo yaliyopo Namba 8 katika Mto Muhuwesi Wilayani Tunduru Kessi  Mtolela ( Mpogolo)amefariki dunia baada ya kuangukiwa na kifusi cha udongo.

Mashuhuda wa tukio hilo walisema kuwa marehemu aliangukiwa na kifusi hicho wakati akifuatilia madini hayo katika eneo hilo baada ya kuvutiwa na udongo ulio onekana kuingia kwa ndani ya kifusi hicho.

Walisema akiwa katika harakati hizo ghafla udongo uliokuwa juu yake ulikatika na kumuangukia kwa kumfunika mwili mzima na kupoteza maisha yake papo hapo.

Mganga kutoka katika Hospitali ya Serikali ya Wilaya ya Tunduru
Dkt.Jeshi Daraja aliyeufanyia uchunguzi mwili wa marehemu Mpogoro alisema kuwa kifo hicho kilitokana na mkandamizo mkubwa na udongo huo na kukosa hewa kwa muda mrefu.

Akizingumzia tukio hilo afisa madini makazi wa Wilaya hiyo
Fredriki Mwanjisi mbali na kukiri kuwepo kwake aliwatahadharisha
wachimbaji hao wadogo wadogo kufanya kazi zao kwa uangalifu ili
kujikinga na matukio ya aina hiyo ambayo yamekuwa yakisababisha vifo na vilema vya maisha.

Kamanda wa Polisi wa mkoa wa Ruvuma Michael kamuhanda
alithibitisha kuwepo kwa tukio hilo na kueleza kuwa polisi wanaendelea na uchunguzi wa kifo hicho.

Mwisho