WAZIRI wa Maliasili na Utalii, Balozi Khamis Kagasheki, amesema hatokubali kuhukumiwa kufa kwa kunyongwa au kupigwa risasi kwa sababu ya madudu yatakayofanywa na watendaji wa wizara hiyo.
Kagasheki alisema wizara hiyo imechafuka kwa kiasi kikubwa na tuhuma za ubadhirifu wa hali ya juu umewafanya hata wabunge kupendekeza mtumishi wa serikali atakayebainika kuhujumu mali za nchi kuuawa kwa kunyongwa.
Akizungumza katika makabidhiano baina yake na aliyekuwa akishikilia wizara hiyo, Ezekiel Maige, waziri huyo mpya alisema wizara hiyo ina sura mbaya kwa nje kutokana na tuhuma za ufisadi wa kutisha unaofanywa na baadhi ya watendaji wake jambo lililosababisha katika kipindi cha utawala wa Rais Jakaya Kikwete kuongozwa na mawaziri watano.
Wizara hiyo imeongozwa na mawaziri Anthony Diallo, Prof. Jumanne Maghembe, Shamsa Mwangunga, Ezekiel Maige na sasa Kagasheki mwenyewe.
“Katika Bunge lililopita mbunge mmoja alitaka mawaziri wabadhirifu wanyongwe au wapigwe risasi mimi sitaki kufikia huko nitawanyonga wafanyakazi wabadhirifu kabla ya kunyongwa mimi; nasema hili kwa nia njema kabisa na sio kutisha watu,” alisema Kagasheki.
Alisema kutokana na uozo huo, wizara hiyo imebadilishwa jina na kuitwa ‘mali ya siri kubwa’ jambo ambalo si zuri kwa kuwa kila kitu kinatakiwa kufanyika kwa uwazi kwa maendeleo ya taifa.
Waziri huyo pia alisema Wizara ya Maliasili na Utalii inatakiwa kuchangia pato kubwa la taifa kupita wizara nyingine yoyote hata ile ya Nishati na Madini isingeweza kufikia lakini kwa sasa inachangia pato la taifa kwa asilimia 18 tu.
“Mimi nataka kufanya kazi kwa kushirikiana na sio kwa ugomvi: waziri haelewani na naibu wake; vurugu tupu. Hii inaondoa ufanisi katika kazi na kama naibu waziri na waziri wanashindwa kuelewana itasababisha hata watendaji wa ngazi ya chini kushindwa kuelewana pia,” alisema Kagasheki.
Alisema atafanya kazi kwa kuangalia pia changamoto mbalimbali katika sekta za wizara hiyo, ikiwa ni pamoja na kuangalia sekta ya wanyapori, misitu na sera nzima ya utalii na changamoto nyingine ikiwemo ya upungufu wa watumishi na kufuatilia kwa kina yanayozungumzwa katika hifadhi ya Ngorongoro.
Naye Naibu Waziri wa Wizara hiyo, Lazaro Nyalandu, alisema kwa kushirikiana watahakikisha pato la wizara hiyo linakuwa kwa kasi, watalii wanaongezeka kwa kuutangaza utalii ndani na nje ya nchi.
Aidha alimtaka kila mfanyakazi wa wizara hiyo kufanya kazi kwa moyo mmoja na kuhakikisha kuwa anaongeza uzalishaji wake.
Akikabidhi ofisi aliyekuwa waziri, Ezekiel Maige, aliwatahadharisha mawaziri hao kuwa macho kwa vile anajua aliondolewa kutokana na makosa ya baadhi ya watendaji wake wa chini.
Maige alidai kuwa katika wakati wake wa utendaji, alijitahidi sana kutumia akili na nguvu zake nyingi kuimarisha wizara hiyo, na kukiri kuwa kuna tuhuma za baadhi ya wafanyakazi wanaojihusisha na biashara za utalii.
Alidai kuwa baadhi ya wafanyakazi, akiwemo mtumishi mmoja mwandamizi ambaye kesi yake iko mahakamani, wamejitumbukiza katika biashara hizo, na kumtaka Kagasheni kupambana nalo.
Maige alidai wizara hiyo katika kutekeleza majukumu yake inakabiliwa na upungufu wa watumishi, ujangili, uvujaji wa mapato, ukosefu wa vitendea kazi na uchakavu wa miundombinu.
Nyingine ni utoroshwaji wa wanyamapori hai kupitia uwanja wa ndege wa Kilimanjaro, ambapo wizara ilisitisha biashara ya wanyapori hai sambamba na kuunda tume mbalimbali za kufanya uchunguzi kwa maofisa walioshiriki.
Waziri Maige aliahidi kushirikiana nao bega kwa bega katika kuendeleza yale aliyoanza kuyafanyia kazi ikiwa ni pamoja na suala la uchimbaji urani katika pori la akiba la Selous.
|
No comments:
Post a Comment